सरकार स्थानीय तहया निर्वाचन वैशाख ३० गते यायेगु निर्णय याउगु दु।

मन्त्रिपरिषद आः च्वना च्वंगु बैठकं स्थानीय निर्वाचनया मिति क्वछिउगु दु धका छम्ह मन्त्रीं जानकारी बिउगु दु।

निर्वाचन आयोगं छगु हे चरणमा यायेगु खःसा १४ वैशाख व निगु चरणय् यायेगु खःसा १४ व २२ वैशाखया मिति सिफारिस याउगु खः। तर सत्तारुढ न्यागु दलीय गठबन्धनं जेठ मसान्त दुने निर्वाचन यायेगु धका आयोगं ४ जेठ प्रस्ताव याउगु खः।

स्थानीय तह निर्वाचन ऐन कथं आः कायम दुगु स्थानीय जनप्रतिनिधिपिनिगु कार्यकाल ५ जेठ २०७९ य् क्वचाइ। नाप संविधानं स्थानीय तह जनप्रतिनिधिविहीन जुइगु कल्पना याउगु मदु।

स्वनिगलय् थौंनिसे जोर बिजोर प्रणाली हटे जुगु दु नाप फागुन १ गतेनिसे हे भौतिक उपस्थितिइ हे विद्यालय सञ्चालन याइगु जुगु दु।

कोभिड–१९ संकट व्यवस्थापन समन्वय केन्द्र (सीसीएमसीसी)या सिफारिस कथं स्वनिगः दुनेया स्वंगु हे जिल्ला (येँ, यल व ख्वप) या प्रशासन कार्यालयं म्हिगः थौं चान्ह्यनिसे सवारी साधानय् जोर बिजोर हटे यायेगु निर्णय याउगु दु। फागुन १ गतनिसे स्कुल, कलेज, ट्युसन सेन्टर लगायतया शैक्षिक क्रियाकलाप सञ्चालन याये फइगु जुगु दु।

तर १२ दँ पुरा मजुगु  विद्यार्थीपिनिगु हकय् स्थानीय तहया समन्वय न पालंपाः वा सिफ्ट प्रणालीइ कक्षा सञ्चालन यायेगु  व्यवस्था मिले यायेमाःगु धका धाउगु दु। दक्को परीक्षा जेड आकार फागुन १ गतेनिसे सञ्चालन याये फइगु सूचंखय् उल्लेख याउगु दु।

सार्वजनिक व निजी सेवा प्रदायकयात सम्भव जू तले विद्युतीय प्रणालीपाखे सेवा बिइगु सूचनाय् उल्लेख याउगु दु सा उगु आदेश पालना अवज्ञा मयाइपि व्यक्ति वा संस्थायात संक्रामक रोग ऐन, २०२० व स्थानीय प्रशासन ऐन, २०२८ बमोजिम कारबाही व सजाय जुइगु प्रशासनं धाउगु दु।

अथेहे सपिङ मल, डिपार्टमेन्टल स्टोर, सुपर मार्केट व दक्को प्रकारया पसलय् छकलं २० म्ह स्वया अप्पो भेला याये दइमखु।

सत्तारुढ दल नेपाली कांग्रेसया सभापति नाप प्रधानमन्त्री शेरबहादुर देउवायात नापलायेत नेकपा माओवादी केन्द्रया अध्यक्ष पुष्पकमल दाहाल प्रचण्ड व प्रमुख प्रतिपक्षी दल नेकपा एमालेया अध्यक्ष केपी शर्मा बालुवाटारय् वंगु दु।

प्रधानमन्त्री हटे जुइ धुका एमालेया अध्यक्ष ओली न्हापागु पटक बालुवाटारय् वंगु दु। प्रधानमन्त्रीया सचिवालय कथं देउवायात नापलायेत प्रचण्ड व ओली प्रधानमन्त्री निवास बालुवाटारय् वंगु खः।

स्वम्ह नेतापि दथुइ एमाले महासचिव शंकर पोखरेल व सञ्चारमन्त्री ज्ञानेन्द्रबहादुर कार्कीपि न सहभागी जुगु खः। थौं स्थानीय तहया निर्वाचन, अमेरिकी सहयोगसम्बन्धी सम्झौता मिलेनियम च्यालेन्ज कम्प्याक्ट (एमसीसी) लगायतया बारेय् छलफल जुगु धका सचिवालयं धाउगु दु।

लमजुङय् हाकनं भुखाय् ब्बःगु दु।

लमजुङया दोर्दी गाउँपालिका–८ बन्सार केन्द्र विन्दु जुया थौं आइतबाः न्हिनय् ३ः२७ बजे ३.२ रेक्टर स्केलया भुखाय् ब्बःगु दु धका राष्ट्रिय भूकम्पमापन तथा अनुसन्धान केन्द्र न धाउगु दु।

स्वास्थ्य मन्त्रालयया कथं थौं आइतबाः स्वनिगलय् थप ५६६ म्हेसित कोरोना संक्रमण पुष्टि जुगु दु।

उकि मध्ये येँ ४१० म्हेसित कोरोना सक्रमण पुष्टि जुगु दु। अथेहे, यलय् १२४ म्हेसित व ख्वपय् ३२ म्हेसित संक्रमित पुष्टि जुगु दु।

स्वास्थ्य मन्त्रालयया कथं मेमेगु जिल्लाय् कास्कीइ ५६, कैलालीइ ५२, धादिङय् ५०, मोरङय् ३७, झापाय् ३४ म्ह व चितवनय् ३१ म्हेसित कोरोना संक्रमण पुष्टि जुगु दु।

अथेहे सुनसरीइ २०, बाँके व रुपन्देहीइ १८÷१८ म्ह, धनुषाय् १६, तनहुँइ १५, सिरहा व बागलुङय् १३÷१३ म्ह, स्याङ्जाय् ११ नाप रौतहट व पर्वतमा १०÷१० म्हेसित कोरोना संक्रमितपि थपे जुगु दु धका मन्त्रालयं धाउगु दु।