नेकपा माओवादी केन्द्रया नेता वर्षमान पुन थप उपचारया लागि थाइल्याण्डया बैंककय् प्रस्थान याउगु दु।

वयकःया स्वास्थ्यय् समस्या वयेवं निन्हु न्ह्यनिसे अस्पतालय् भर्ना याउगु खः। तर, सुधार मजुइवं थप उपचारया लागि डाक्टरपिनिगु सल्लाह कथं बैंककय् वनेत्यंगु धका वयकःया सचिवालयं धाउगु दु।

वयकःयात हाकनं जण्डिस खनेदुगु खः। थ्व स्वया न्ह्यः न स्वास्थ्यय् समस्या खनेदुगुलि उपचारया लागि थाइल्याण्ड वंगु खः। न्यादँ लिपा नेता पुनं हाकन बैंककयय् नियमित उपचार यावनेत्यंगु खः।

वंगु २४ घण्टाया दुने स्वनिगः दुने ३८३ म्हेसित कोभिड–१९ संक्रमितपि थपे जुुगु दु।

अथेहे येँ २७० म्हेसित कोरोना सक्रमण जुगु दु। ख्वपय् ४४ म्ह व यलय् ६९ म्हे संक्रमितपि थपे जुगु दु।

आःतक स्वनिगलय् कोरोना सक्रिय संक्रमितपि ४४४२ म्ह दु। आः देयन्यक १७ हजार १२५ म्ह होम आइसोलेसनय्, १२९७ म्ह संस्थागत आइसोलेसनय्, ३६४ म्ह आईसीयू व १२० म्ह भेन्टिलेटरय् च्वनाच्वंगु दु धका स्वास्थ्य तथा जनसंख्या मन्त्रालयं धाउगु दु।

वंगु २४ घण्टाया दुने देयन्यक १,१५८ म्हेसित कोरोना भाइरस संक्रमण पुष्टि जूगु दु।

११ हजार ६ सय ७२ म्हेसिगु पिसीआर परीक्षण याउगुलि ९०४ म्ह व २ हजार ३३१ म्हेसिगु एन्टिजेन परीक्षण याउगुलि २५४ म्ह याना १ हजार १५८ म्हेसित कोरोना भाइरस संक्रमण खनेदुगु धका स्वास्थ्य तथा जनसंख्या मन्त्रालयं धाउगु दु। अथेहे वंगु २४ घण्टाय् कोरोना संक्रमणं १२ म्ह सीगु दु सा १ हजार ३१८ म्ह कोरोनामुक्त जुगु दु।

मंगलबाः थपे जूपि नाप नेपालय् कोरोना संक्रमितपि आःतक ७ लाख ९३ हजार २७१ म्ह थ्यंगु दु। अथेहे थ्व नाप आःतक नेपालय् सीपिनिगु ल्याः ११ हजार ११५ म्ह थ्यंगु दु सा ७ लाख ६३गु हजार ७३४ म्ह संक्रमणमुक्त जुइ धुकुगु दु।

गृहमन्त्री बालकृष्ण खाणं मोहनी, स्वन्ती व छठय् स्वनिगलय् सुरक्षा व्यवस्था व बजार व्यवस्थापन प्रभावकारी दयकेगु निति सरोकारवाला निकाययात निर्देशन बिउगु दु। स्वनिगःया स्वम्ह जिल्लाया प्रमुख जिल्ला अधिकारी, प्रहरी प्रमुख व ट्राफिक महाशाखा प्रमुखपिन्त नागरिक याउगु अनुभूति खनेदुगु कथं सुरक्षा व्यवस्था व बजार व्यवस्थापन प्रभावकारी दयकेत निर्देशन बिउगु दु।

‘आः सामान्य अवस्था थे नखःया इलय् सुरक्षा व्यवस्था व बजार व्यवस्थापन सहज जुइमाः। नागरिकपिन्स थिकेकः, म्याद सिधगु नयेगु अवस्था मवयेमाः,’ मन्त्री खाणं धागु दु, ‘आः गज्यागु अवस्था दु, अज्यागु हे अवस्था जुइमाल व नखःया इलय् हिउपाः वःगु खने दयेमाल।’

अथेहे गृहसचिव टेकनारायण पाण्डे न नखःया इलय्  बजाः भाः थहावनिइगु, म्याद सिधगु खाद्य सामाग्री व हाकु बजाः रोके यायेगु ध्यान बिइत निर्देशन बिउगु दु।

लुँया भाः थौं हाकन कुहावंगु दु।

म्हिगः तोलां ३ सय रुपैयाँ थहां वंगु खःसा थौं हाकन स्वसः कुहावंगु दु। नेपाल सुन चाँदी व्यवसायी महासङ्घया कथं थौं लुँ तोलां ८९ हजार रुपैयाँ तोके याउगु दु धका धाउगु दु।

अथहे, थौं वहःया भाः न कुहावंगु दु। थौं तोलां न्यातक कुहावंगु दु।

वहः तोलां न्यातका कुहावया ११ सय ५५ रुपैयाँ कारोबार जुगु दु।