नेपाली कांग्रेसया नेता प्रकाशमान सिंहं सभापति पदया निगुगु चरणया निर्वाचनय् शेरबहादुर देउवायात समर्थन याउगु दु।

देउवायात नापलाना नेता प्रकाशमानं देउवायात हे समर्थन यायेगु जानकारी बिउगु दु। नापलाये धुका संचाःकःमिपि नाप खँ ल्हासे नेता सिंहं धाउगु दु, ‘झीसं निगुगु चरणया निर्वाचनय् देउवायात ग्वाहाली याना वनेगु निर्णय यानागु दु।’

निगु चरणया चुनावय् शेरबहादुर देउवा व शेखर कोइराला दथुइ प्रतिस्पर्धा जुइत्यंगु दु। सिंहं देउवायात समर्थन यायेगु निर्णय यायेवं देउवा सभापतिइ निर्वाचित जुइगु आः लगभग पक्का जुइ।

न्हापागु चरणया चुनावय् देउवां २२५८ व कोइरालां १७०२ मत काउगु खः। ३७१ मत कया स्वंगूगु थासय् प्रकाशमान सिंह, २५० मत कया प्यंगु थासय् विमलेन्द्र निधि व न्यागू थासय् कल्याण गुरुङ सभापति पदय् आः जुइगु  निगुगु चरणया निर्वाचनं पिहावंगु दु।

संघीय संसदया हिउँदे अधिबेशन थौंनिसें न्ह्याइगु जूगु दु । थौं न्हिनय् २ताः इलय् निगुलिं सदनया अधिबेशन न्ह्यायेत्यंगु खः ।

प्रमुख बिपक्षी एमालें सभामुख अग्नी प्रसाद सापकोटाया भुमिकाय् न्ह्यसः थँसें थ्वयां न्ह्यःया अधिबेशन ज्वःछि पंगः थंगु खः । अधिवेशनय् ६ अध्यादेशयात न्हापांगु मुँज्याय् न्ह्यब्वयेगु ज्याधलः दुगु संसद सचिवालयं न्ह्यथंगु दु ।

संघीय संसद्या झिक्वःगु अधिवेशन अन्तर्गत प्रतिनिधिसभाया न्हापांगु मुँज्याय् सामाजिक सुरक्षा न्हापांगु संशोधन अध्यादेश, २०७८ लिसें थीथी न्यागू अध्यादेश न्ह्यब्वयेगु ज्याधलः दु ।

संसद् सचिवालयया कथं मुँज्याय् गृहमन्त्री बालकृष्ण खाँणं नेपाल प्रहरी व प्रदेश प्रहरी (कार्य सञ्चालन, सुपरिवेक्षण, समन्वय), न्हापांगु संशोधन अध्यादेश–२०७८, तेजाब तथा घातक रसायनिक पदार्थ नियमन, अध्यादेश–२०७८ व सामाजिक सुरक्षा (न्हापांगु संशोधन) अध्यादेश–२०७८ न्ह्यब्वयादी ।

मुँज्याय् कानून, न्याय तथा संसदीय मामिलामन्त्री दिलेन्द्रप्रसाद बडुं यौन हिंसाविरुद्धया छुं ऐनयात संशोधन यायेगु अध्यादेश–२०७८ व फौजदारी कसुर तथा फौजदारी कार्यविधिसम्बन्धी छुं ऐन संशोधन यायेगु अध्यादेश–२०७८ न्ह्यब्वयेगु ज्याधलः दु ।

नेपाली कांग्रेसया १४क्वःगु महाधिवेशन अन्तर्गत म्हिगः जुगु मतदान‌ सभापति पदय् सु नं उम्मेदवारं बहुमत हये मफुत । मुक्कं ४द्वः ६सः व ८१ मतमध्ये देउवा. २द्वः २सः व ५८ मत चूलाकादीगु दु ।

सभापतिइ त्याकेत कुतुवंगु मत मध्ये ५०गू प्रतिशत सिबें अप्वः मत हयेमाःगु प्रावधान कथं देउवायात बहुमत हयेत ८२ मत मगाःगु खः ।

वय्कःया सतीम्ह प्रतिद्वन्दी शेखर कोइारालाया द्वःछि ७सः व २९ मत वःगु दु । अथे हे, प्रकाशमान सिंहं ३७१, विमलेन्द्र निधिं २४९ व कल्याण गुरुङया २० मत वःगु दु ।

थौं सुथय् ४ताः इलंनिसें न्ह्याःगु सभापति पदया मतगणनाय् शेरबहादुर देउवां अग्रता कयादीगु ख । सभापतिइ त्याकेत कुतुंवगु मतया ५१ प्रतिशत हयेमाःगु प्रावधान दु ।

सुं नं उम्मेदवारं उलि मत हये मफइगु खनेदुगुलिं सभापतिइ निगूगु चरणया निर्वाचन जुइगु जूगु दु । निर्वाचनय् मुक्कं ४द्वः ६सः व ७९ मत कुतुंवंगु खः ।

सभापतिया मतगणना क्वचायेधुंकाः आः मेगु पदया मत ल्याःखायेगु वा न्हापां सभापतिया लागिं निगूगु चरणया निर्वाचन यायेगु धइगु निर्णय निर्वाचन समितिं याइ ।

किपू नगरपालिका वडा नं. २ पीगनय् पुनर्निर्माण याःगु पीगं फल्चा व सामुदायिक भवनया मूपाहाँ किपू नगरपालिकाया प्रमुख रमेश महर्जनं उलेज्या यानादीगु दु। छगू ज्याझ्वलय् मूपाहाँ नगर प्रमुख महर्जनं उगु फल्चा व भवनया उलेज्या यानादीगु खः ।

मूर्त व अमूर्त सम्पदाया संरक्षण व सम्बद्र्धनय् मद्दिक्क ज्या यानाच्वंगु किपू नगरपालिकां पीगनय् च्वंगु थुगु फल्चा व भवन दयेकेत बजेट ब्यूगु खःसा वडा नं. २ पाखें नं बजेट तयाब्यूगु खः। थुगु पुनर्निर्माण जूगु फल्चा किपूया ताःहाकःगु फल्चा मध्ये छगू खः । थुगु फल्चा न्हय्कवःया खः ।फल्चा व सामुदायिक भवनया उलेज्या यानादिसें नगर प्रमुख महर्जनं झीगु म्हसिका जुयाच्वंगु मूर्त सम्पदात वंगु तःभुखाचं ध्वस्त धयाथें जूगुलिं किपू नगरपालिकां माःगु ग्वहालि याना पुनर्निर्माण यानाच्वनागु खँ न्ह्यथनादिल ।

आःतक फल्चा जक थ्यंमथ्यं ३६ गू पुनर्निर्माण यायेधुनागु दुसा आः छुं दिं लिपा हाकनं स्वंगू प्यंगू फल्चा दयेके क्वचाइगु जानकारी बियादिल । नगर प्रमुख महर्जनं थुगु मूर्त सम्पदायात आय आर्जन यायेगु ज्याय् छ्यलेमाःगु खँय् बः बियादिल । अथहे उप–प्रमुख सरस्वती खड्कां मूर्त व अमूर्त सम्पदाया संरक्षणंयाना न्हूपुस्तायात सम्पदा लःल्हाये फइगु धयादिसें नगरपालिकां धेबा खर्चयाना दयेकूगु मूर्त सम्पदात क्यना पर्यटकत वयेकेगु लकस दयेकेमाःगु धयादिल । उप–प्रमुख खड्कां नगरपालिकां विकास यायेगु झ्वलय् भौतिक कथंजक मखुसे थीथी मूर्त व अमूर्त सम्पदातय्गु संरक्षण यायेगु ख्यलय् उल्लेख्य ज्या यानाच्वनागु धयादिल ।

ज्याझ्वलय् किपू नगरपालिका वडा नं. १ या अध्यक्ष हर्ष महर्जन, वडा नं. ६ या अध्यक्ष न्हुच्छेबहादुर महर्जनं नं थःथःगु नुगःखँ तयादीगु खःसा वडा नं. २ या थीथी विकास निर्माणया ज्याय् योगदान यानादीपिं थीथी उपभोक्ता समितिया दुजःपिंत हना पौ लःल्हानादिसें हनादीगु खःसा थीथी बाजंखलःपिंत पचिमा, बाँसुरी, तबला लःल्हानादीगु खः । अथेहे ईन्द्रायणी क्लबयात टेबल टेनिस बोर्ड व माइक सहित स्पिकर लःल्हानादीगु खः ।

ब्याडमिण्टनया राकेट व शटल कक नं लःल्हानादीगु ज्याझ्वलय् वंगु यंलाया इलय् पीगं सीकेगु धेंधेंबल्ला कासाय् निर्णायक जुयादीपिं प्रयागमान प्रधान, डा. वज्रमुनि वज्राचार्य व विरेन्द्र विनु शाक्य व लक्ष्मण महर्जनयात नं सुभाय् पौ बियादिसें हनादीगु खः । कपू नगरपालिका वडा नं. २ या अध्यक्ष रमेशमान डंगोलया सभापतित्वय् जूगु फल्चा उलेज्या व हना ज्याझ्वलय् सभापति डंगोलं सुभाय देछानादीगु खःसा सन्तोष महर्जन व सविना नापितं ज्याझ्वः न्ह्याकादीगु खः ।

येँ महानगरपालिका वडा नम्बर १०य् मदन भण्डारी कलेज भवनया शिलान्यास जूगु दु ।

महानगर प्रमुख विद्यासुन्दर शाक्यं कामपा वडा १० देवीनगरस्थित कलेज परिसरय् न्हूगु भवन दयेकेत शिलान्यास यानादीगु खः ।शिलान्यास धुंकाः नवासें महानगर प्रमुख शाक्यं शैक्षिक गुणस्तर थकायेत महानगरं लगानी नं थकयागु धयादिल ।

सार्वजनिक निर्माण विभागया प्रमुख रामबहादुर थापायाकथं न्ह्यानाच्वंगु आर्थिक दँय् ज्याझ्वः क्वचाइगु कथं कलेज भवन दयेकेत महानगरं ५ करोड तका आर्थिक ग्वहालि याइ ।थुकिया न्हापांगु किस्ता बी धुंकूगु दुसा ल्यं दनिगु धेबा ज्याया प्रगतिया लिधंसाय् बियायंकीगु धाःगु दु ।

कलेजया कथं र भवन निर्माणया लागत १० करोड तका खः । थ्व हे आर्थिक दँया असार मसान्त दुने निर्माण क्वचायेकेगु आज्जु कयातःगु दु ।