Display Style:
Column Style
देयन्यक ३४०३ म्ह कोरोना संक्रमण पुष्टि
रसिया श्रेष्ठ | गुंलाथ्व एकादशी ११४१, भाद्र २ बुधवाः
वंगु २४ घण्टाया दुने देयन्यक ३४०३ म्ह कोरोना भाइरस संक्रमण पुष्टि जुगु दु।
स्वास्थ्य तथा जनसंख्या मन्त्रालयया कथं ११ हजार ८३९ म्हेसिगु पीसीआर परीक्षणय् २,६१३ म्ह व ४,९९९ म्हेसित एन्टिजेन परीक्षणय् ७९० म्ह याना ३,४०३ म्हेसित कोरोना संक्रमण पुष्टि जुगु खः।
मन्त्रालयया कथं वंगु २४ घण्टाया दुन २,१०४ म्ह संक्रमणमुक्त जुगु दु सा ४२ म्ह सीगु दु।
नेकपा एमाले विभाजन
लहानान्युज | गुंलाथ्व एकादशी ११४१, भाद्र २ बुधवाः
नेकपा एमाले विभाजन याना माधवकुमार नेपाल समूह न न्हुगु दल नेकपा एमाले समाजवादी दर्ताया लागि निर्वाचन आयोगमा निवेदन बिगु दु।
सरकारया सिफारिसय् राष्ट्रपति विद्यादेवी भण्डारीं संसदीय दल वा केन्द्रीय समितिं २० प्रतिशतं दल विभाजन याये फइगु राजनीतिक दलसम्बन्धी अध्यादेश हयेवं नेपाल समूह न न्हुगु दल दर्ताया निर्णय यागु खः।
नेता नेपालं एमालेया ५८ म्ह केन्द्रीय सदस्य नाप न्हुगु दल दताया लागि आवदेन बिगु खः। न्हुगु पार्टीया अध्यक्ष माधवकुमार नेपाल नाप वरिष्ठ नेता झलनाथ खनाल खः।
अथेहे ९५ म्ह सदस्यीय केन्द्रीय कमिटी गठन यागु धका नेता पाण्डें जानकारी बिगु खः। एमाले समाजवादीइ गुक्वःगु महाधिवेशननिसे नेपाल समूहय् दुपि स्थायी कमिटीया अधिकांश नेतापि मदु। भीम रावल, अष्टलक्ष्मी शाक्य, घनश्याम भुसाल, योगेश भट्टराई लगायतया नेतापिे नेता नेपालयात त्वतूगु दु।
येँ महानगरपालिका वडा नं. १२ या कार्यालय भवन पलिस्था जुल
लहनान्यूज | गुंलाथ्व एकादशी ११४१, भाद्र २ गते बुधबाः
येँ महानगरपालिका वडा नं. १२ या कार्यालय भवन पलिस्था जूगु दु । येँ महानगरपालिका वडा नं. १२ या वडा कार्यालय भवनया पलिस्था थौं येँ महानगरया मेयर विद्यासुन्दर शाक्यं यानादिगु खः ।
टेकूइ निर्माण जुइगु वडा कार्यालय भवनया लागत ४गू क्वति २५गू लख ३२द्वः व ४४८ ध्येबा जुइगु धाःगु दु । भवन २०७९ असार १५ गते निर्माण क्वचायेकेगु धाःगु दु । भवनया पलिस्था यासें मेयर शाक्यं येँ महानगरपालिकाया ३२गू हे वडा सुविधा सम्पन्न आधुनिक भवन दयेकेत थः तयार जूगु धयादिल ।
भवनया न्ह्यने ख्वाः झिगू मौलिकता हे कायम याना दनेया भाग धाःसा आधुनिकता कथं दयेकेगु वय्कलं धयादिल । खुत जाःया भवनया कार्यालयया लागि माःगु कार्यकक्ष, ५०म्ह क्षमताया कार्यक्र हल, भूमिगत तल्लाय् पार्किङया व्यवस्था व ६म्ह क्षमताया लिप्mटया तकं व्यवस्था जुइगु जूगु दु ।
थ्वहे दथुई फोहोर व्यवस्थापन केन्द्र सिसडोलय् थ्यनिगु सतक स्यनाच्वंगुलिं येँया फोहोर वान्छ्वय मपूmगु मेयर शाक्यं धयादिगु दु । आः स्वनिगःया थीथी शहरय् फोहोर मुंगु दु धाःसा महानगरं फोहोर मयंकुबलये दुगन्ध अप्वयाच्वंगु दु ।
येँ महानगरपालिकाया मेयर विद्याुसुन्दर शाक्यं वर्षाया हुनिं सिसडोल सतकखण्डय् चलः वनिगु व लँ स्यनाच्वंगुलिं अपुक्क गाडी यंके मपूmलिं फोहोर व्यवस्थापन यायेमफुगु धयादिल ।
मेयर शाक्यं वर्षा दिइवं सहज कथं फोहोर व्यवस्थापन जुइगु धयादिल । वय्कलं बञ्चरेडाँडाया ज्या याकनं हे क्वचायेका महानगरपालिकायात लःल्हायेत नं सरकारलिसे माग याःगु दु ।
अथेहे सिसडोलनिसें बञ्चरेडाँडाँ तक्क वनिगु लँ नं विभागं याकने हे दयेकाबिल धाःसा फोहोर व्यवस्थापनया समस्या ज्यनिगु वय्कया धापू खः ।
एमालेया १४म्ह सांसदपि पदमुक्त मयायेत संसद सचिवालय
लहानान्युज | गुंलाथ्व एकादशी ११४१, भाद्र २ बुधवाः
एमालेया १४म्ह सांसदपि पदमुक्त मयायेत संसद सचिवालय नेकपा एमालेया १४ म्ह सांसदपिन्स अध्यक्ष केपी शर्मा ओलीं यागु कारबाही कथं थःपिन्त पदमुक्त मयायेत माग यासे संसद सचिवालय निवेदन बिगु दु।
१४ म्ह सांसदपिन्स मंकाः कथं पौ कया विरोध खतिवडा व जीवनराम श्रेष्ठ संसद सचिवालय वंगु खः। सरकारं दल विभाजन सम्बन्धी अध्यादेश हया पार्टी तछ्यागु स्वयेवं एमाले अध्यक्ष केपी शर्मा ओलीं मंगलबाः वरिष्ठ नेता माधवकुमार नेपाल नाप १४ म्ह सांसदपिन्त पदमुक्त यायेत संसद सचिवालय पौं छ्वंगु खः।
उमिसं दलया ह्वीप उल्लंघन यागुलि कारबाही यानागु धका पौं च्वंगु खः। तर १४ म्ह सांसदपिन्स थःपिन्त यागु कारबाहीलय् हे न्ह्यसः तःगु खः। २७ वैशाखय् तत्कालीन प्रधानमन्त्री ओलीं विश्वासया मत कागु इलय् संसदीय दलं ह्वीप मतःगु व ३ साउनय् प्रधानमन्त्री शेरबहादुर देउवायात मत बिगु आधारय् कारबाही यायेगु सर्वोच्च अदालतया फैसला विपरीत खः धका धागु खः।
नेप्से दकलय् अप्वो विन्दुइ थ्यन
रसिया श्रेष्ठ | गुंलाथ्व एकादशी ११४१, भाद्र २ बुधवाः
शेयर कारोबार मापक नेप्से परिसूचक आःतक हे दकलय् अप्वो विन्दुइ थ्यंगु दु।
बुधबाः नेप्से परिसूचक ३ हजार २ सय माथि थ्यका न्हुगु रेकर्ड कायम जुगु दु। थ्व स्वया न्ह्यः ३ हजार १७९ अंकय् थ्यका न्हुगु रेकर्ड कायम जुगु खः।
नेप्से परिसूचक नाप कारोबारय् न बुधबाः उत्साह खनेदुगु खः। कारोबार रकमं धासा २१ अर्ब च्वया थ्यका न्हुगु रेकर्ड तोडे यागु खः।
