राजधानी दैनिकया अध्यक्ष महेन्द्र शेरचन कोरोना संक्रमणं मन्त।

६७ दँ दुम्ह शेरचन सशस्त्र प्रहरीया एपीएफ अस्पतालय् बुधबाः बहनि मदुगु खः। निवाः न्ह्यः कोरोना संक्रमण पुष्टि जुगु खः।

पशुपतिस्थित आर्यघाटय् थौं सुथय् ११ बजे वयागु अन्त्येष्टि याइ धका पारिवारिक स्रोतं धागु दु। मदुम्ह शेरचन मिडिया अलाइन्सया उपाध्यक्ष व विज्ञापन बोर्डया सदस्य न खः।

मदुम्ह शेरचनया जहान नाप स्वम्ह काय् व छम्ह म्ह्याय् दी।

रोजगारीया झ्वलय् अफगानिस्तानय् वंपि २८८ म्ह नेपाःमिपिनिगु उद्धार यानागु दु धका परराष्ट्र मन्त्रालयं धागु दु।

मन्त्रालयया कथं मित्रराष्ट्रपि नाप निरन्तर कुतः व समन्वयय् २८८ म्ह नेपाःमिपिनिगु उद्धार याना येँ हःगु दु। भदौ १ गते सुथय् ११८ म्ह व चान्ह्य ८४ म्ह व भदौ २ गते सुथय् ६१ म्ह व बहनि २५ म्ह येँ हःगु खः।

अफगानिस्तानपाखे उद्धार याना थप नेपाःमिपि नेपाल हयेगु प्रकृया न्ह्याकगु दु धका परराष्ट्र मन्त्रालयं धागु दु। उद्धार याना सामाखुशीइ सरकारं व्यवस्थापन याना होल्डिङ सेन्टरय् तयेगु व स्वास्थ्य मापदण्ड कथं कोभिड–१९ या परीक्षणलगायत प्रक्रिया याना छेँ छ्वयेगु तयारी यागु दु।

बागमती प्रदेशया मुख्यमन्त्री अष्टलक्ष्मी शाक्य नियुक्त जुगु दु। वयकलं थौं बुधबाः हे पद व गोपनीयताया शपथ कागु दु।

एमाले दुने माधवकुमार नेपाल समूहय् दुम्ह नेता नेपालं न्हुगु पार्टी दर्ता यायेवं हे मुख्यमन्त्री नियुक्त यागु खः। न्हुगु पार्टी गठनय् नेता नेपालयात साथ मबिउम्ह शाक्ययात एमालेें वाग्मती प्रदेश संसदीय दलं बुधबाः हे दलया नेता ल्यंगु खः।

वयकःयात संसदीय दलया नेताय् निवर्तमान मुख्यमन्त्री डोरमणि पौडेलं हे प्रस्ताव यागु खः। एमालेपाखे बागमती प्रदेश सभाय्् ५६ म्ह सांसद दु।

कुल ११० सांसद दुगु बागमतीइ बहुमतया लागि ५६ सांसद आवश्यक दु। एमालेया सांसदया हे बलं पौडेलयाके बहुमत दु। बागमतीइ ओलीपक्षया ३५ व माधवपक्षया २१ म्ह सांसद दु।

प्रदेशय् प्रमुख प्रतिपक्ष नेकपा माओवादी केन्द्र २३, नेपाली कांग्रेस २२, विवेकशील साझा ३, नेपाल मजदुर किसान पार्टी २, राप्रपा २ व छम्ह स्वतन्त्र सांसद दु।

शेयर कारोबार मापक नेप्से परिसूचक आःतक हे दकलय् उच्च विन्दुइ थ्ंयगु दु। बुधबाः नेप्से परिसूचक ३ हजार २ सय न्ह्यने थ्यका न्हुगु रेकर्ड कायम जुगु दु।

थ्व स्वया न्ह्यः ३ हजार १७९ अंकय् थ्यका न्हुगु रेकर्ड कायम जुगु खः। नेप्से परिसूचक नाप कारोबारय न थौं बुधबाः उत्साह खनेदुगु दुगु। कारोबार रकम धासा २१ अर्ब ६४ करोड स्वया न्ह्यने थ्यका न्हुगु रेकर्ड तोडे याये फुगु मदुनि।

नेप्से परिसूचक ३८ दशमलव २८ अंकं थहावना ३ हजार १९८ दशमलव ६० अंकय् थ्यंगु दु। ‘क’ वर्गया कारोबार मापन यायगु सेन्सेटिभ इन्डेक्स न ४ दशमलव ८३ अंकं थहावंगु दु। कारोबार रकम न २१ अर्ब स्वया अप्वो थ्यंगु दु।

थौं जुगु १ लाख ८८ हजार ४५४ कारोबारपाखे २२८ कम्पनीया ३ करोड ६५ लाख ९ हजार ७५१ कित्ता शेयर किनबेच जुगु खः। उकिइ कारोबार रकम २१ अर्ब ३१ करोड ३४ लाख ८९ हजार २६९ कित्ता रुपैयाँ थ्यंगु दु।

वंगु २४ घण्टाया दुने स्वनिगलय् ९९३ म्हेसित कोरोना संक्रमित जुगु दु। उकि मध्ये येँ ७११ म्हेसित कोरोना सक्रमण जुगु दु सा यलय् १६० म्ह व ख्वपय् १२२ म्ह संक्रमित जुगु दु।

स्वास्थ्य तथा जनसंख्या मन्त्रालयया कथं कास्कीइ ३१५, झापाय् १८३, मोरङय् १४६, व चितवनय् ११५ म्हेसित कोरोना संक्रमण पुष्टि जुगु दु।

अथेहे सुनसरीइ ८६, रुपन्देहीइ ६१, काभ्रेपलाञ्चाय् ५७, मकवानपुरय् ५६, कैलालीइ ४३, नवपलपरासी पुर्व व दाङय् ३९÷३९ , नुवाकोटय् ३४, गोरखा व स्याङजाय् ३०÷३० म्ह, इलाम व बागलुङय् २८÷२८ म्ह, सुर्खेतय् २३, सिन्धुपाल्चोक व लमजुङय् २२÷२२ म्ह व बर्दियाय् २० म्ह कोरोना संक्रमण खनेदुगु दु।

जुम्लाय् १९, पर्वत व म्याग्दीइ १७÷१७ म्ह, पाल्पा व बाँकेय् १६÷१६ म्ह, धनकुटा व धादिङय् ११÷११ म्ह व तनहुँइ १० म्हेसित कोरोना संक्रमितपि थपे जुगु दु धका स्वास्थ्य तथा जनस्ख्या मन्त्रालयं धागु दु।