नेपाली कांग्रेसया सहमहामन्त्रीइ आदिवासी जनजातिपाखे भीष्मराज आङदाम्बे निर्वाचित जूगु दु।

बिहीबाः चान्ह्य क्वचागू मतगणनामा विकास लामायात ७९८ मतं पराजित यासे आङदाम्बे निर्वाचित जगु खः ।

४६८१ मत कुहावंगुलि सभापति शेरबहादुर देउवाया प्यानलपाखे उम्मेदवार जूम्ह आङदाम्बे न २७११ मत काउगु खःसा डा. शेखर कोइरालाया प्यानलपाखे उम्मेदवार विकास लामां १९१३ मत काउगु खः।

नेपाली कांग्रेसया सहमहामन्त्री (मिसापाखे) डिना उपाध्याय निर्वाचित जूगु दु।

बिहीबाः चान्ह्यः जूगु मतगणनाय् कमला पन्तयात ४२८ मतं बूका सहमहामन्त्रीइ निर्वाचित जूगु खः।

सभापति शेरबहादुर देउवाया प्यानलपाखे उम्मेदवार उपाध्यायं २५३३ मत काउगु खःसा डा. शेखर कोइरालाया प्यानलपाखे उम्मेदवार जूम्ह पन्तं २१०५ मत काउगु ख।

नेपाली कांग्रेसया सहमहामन्त्रीइ दलितपाखे जीवन परियार निर्वाचित जूगु दु।

बिहीबार चान्ह्यः क्वचागु  मतगणनाय् मानबहादुर विश्वकर्मायात ३७ मतं पराजित यासे जीवन निर्वाचित जुगु खः।

डा. शेखर कोइरालाया प्यानलपाखे उम्मेदवार जूम्ह परियारं २२१५ मत काउगु खःसा सभापति शेरबहादुर देउवाया प्यानलपाखे उम्मेदवार जूम्ह मानबहादुरं २१७५ मत काउगु खः।

अथेहे गंगा सुनारं मत २२९ काउगु खः।

वंगु २४ घण्टाया दुने देयन्यक थप १८४ म्हेसित कोरोना भाइरस संक्रमण पुष्टि जूगु दु।

७ हजार २ सय ३० म्हेसिगु पीसीआर परीक्षण याउगुलि १६० म्ह व ३ हजार ७ सय ८८ म्हेसिगु एन्टिजेन परीक्षण याउगुलि २४ म्ह याना १८४ म्हेसित कोरोना भाइरसया संक्रमण दुगु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं निम्ह सीउगु दु सा २६७ म्ह कोरोनामुक्त जुगु दु।

रक्षामन्त्री मिनेन्द्र रिजालं प्रधानमन्त्री शेरबहादुर देउवायात राजीनामा बुझे याउगु दु।

रक्षामन्त्री रिजालं प्रधानमन्त्रीया सरकारी कार्यालय सिंहदरवारय् वना राजीनामा बुझे याउगु खः।

थ्व स्वया न्ह्यः नेपाली कांग्रेसया महामन्त्रीया उम्मेदवार बिउगुलि रिजालं प्रारम्भिक मतपरिणाम वयेव हे राजीनामा घोषणा याउगु खः।

रिजालयात प्रधानमन्त्री शेरबहादुर देउवां वंगु असोज २२ गते रक्षामन्त्रीइ नियुक्त याउगु खः।