वंगु २४ घण्टाया दुने देयन्यक ३,२७४ म्हेसित कोरोना भाइरस संक्रमण पुष्टि जुगु दु।

११ हजार ५ सय ६५ म्हेसिगु पीसीआर परीक्षण यागुलि २ हजार ४५६ म्ह व ६ हजार १२४ म्हेसिगु एन्टिजेन परीक्षण यागुलि ८ सय १८ म्ह याना ३ हजार २७४ म्हेसित कोरोना भाइरस संक्रमण खनेदुगु धका स्वास्थ्य तथा जनसंख्या मन्त्रालयं धागु दु।

अथेहे २४ घण्टाया दुने थप कोरोना संक्रमणं २७ म्ह सीगु दु सा १ हजार ९२९ म्ह कोरोनामुक्त जुगु दु। थ्व नाप थौं मंगलबाः थपे जगु नाप नेपालय् कोरोना संक्रमितपि ७ लाख ३७ हजार २२९ म्ह थ्यंगु दु ।

अथेहे सीपि १० हजार ३५४ म्ह थ्यंगु दु सा ६ लाख ८७ हजार ६९ म्ह संक्रमणमुक्त जुगु दु।

भूगर्भ पिपिसी सिमेन्ट नेपाल गुणस्तर परीक्षणय् असफल जुगु दु।

नमूना परीक्षण् सिमेन्टया भारवहन क्षमता नेपाल गुणस्तर मापदण्ड बमोजिम मजुगु धासे नेपाल गुणस्तर तथा नापतौल विभागं धागु दु। गुणस्तर ‘फेल’ जुगुलि भूगर्भ सिमेन्ट उद्योग प्रालिपाखे उत्पादित दक्को प्रकारया पीपीसी सिमेन्टया बिक्रीइ रोक लगे यागु दु धका विभागया प्रवक्ता दिनानाथ मिश्रं जानकारी बिगु दु।

‘सिमेन्टं गुणस्तरहीन जुगुलि बिक्रीइ रोक लगे याना कम्पनीयात १५ दिं स्पष्टीकरण न्यंगु खः, स्पष्टीकरणया लिसः वयेव थप कारबाहीबारे निर्णय जुइ,’ प्रवक्ता मिश्रं धागु दु। सिमेन्टया कम्प्रेसिभ क्षमता परीक्षण यागु इलय् स्वन्हु दुने १६ एमपीए वयेमाःगुलि ९ जक वंगु खः।

अथेहे ७ दिं दुने भारवहन क्षमता २२ एमपीए वयेमाःगुलि १५ ज कवंगु धका विभागं धागु दु। विभागं कारवाहीलिपा अपोलो, क्र्याष्टल व देउराली ब्राण्डया पिपिसी सिमेन्ट बिक्रीइ रोक लगे यागु दु।

थौं शेयर बजाःया परिसूचक नेप्से सामान्य थहावंगु दु।

नेप्से थौं शून्य दशमलव २३ अङ्कं थहावना ३ हजार १६० दशमलव ३२ विन्दुइ थ्यंगु दु। थौं जलविद्युत्, विकास बैंक व फाइनान्स समूहया शेयर थहावंगु दु।

विकास बैंक समूहया शेयर २३२ अङ्क, जलविद्युत ११७, फाइनान्स १४१, उत्पादनय् ९० व माइक्रोफाइनान्स समूहया शेयर साढे ५ अङ्क थहावंगु दु। बैंक, व्यापार, होटल, बीमा व मेमेगु समूहया शेयर भाः क्वहावंगु दु।

थौं जोशी, हाइड्रो, रुरु जलविद्युत्, अरुण काबेली हाइड्रो, गुराँस फाइनान्स नाप १५ कम्पनीया शेयर १० प्रतिशतं थहावंगु दु। थौं २२१ कम्पनीया ३ करोड ६ लाख कित्ता शेयर १८ अर्ब २० करोड रुपैयाँ कारोबार जुगु खः।

दकलय् अप्वो अपी पावर कम्पनीया ८६ करोड ३८ लाख रुपैयाँ बराबरया शेयर किनबेच जुगु खः।

प्रधानमन्त्री शेरबहादुर देउवां राजनीतिक अस्थिरता हयेगु कथं राजनीतिक दलसम्बन्धी अध्यादेश हःगु दु। थ्व नाप प्रमुख विपक्षी नेकपा एमाले व सत्तारुढ जनता समाजवादी पार्टी (जसपा) तछ्यात अपूइगु जुगु दु। मन्त्रिपरिषद थौं मंगलबाः च्वंगु बैठकं पास याना राजनीतिक दल सम्बन्धी अध्यादेशं संसदीय दल वा केन्द्रीय समितिइ २० प्रतिशत थ्यकल धासा दल विभाजन याये फइ धका उल्लेख यागु दु।

आः दुगु राजनीतिक दलसम्बन्धी ऐनय् संसदीय दल व केन्द्रीय समितिइ २० प्रतिशत थ्यकल धासा दल विभाजन याये फइगु प्रावधान दु। वंगु ८ वैशाख २०७७ य् तत्कालीन प्रधानमन्त्री केपी शर्मा ओलीं न दल विभाजनयात अपूकेगु कथं अध्यादेश हःगु खः। उगु इलय् संसदीय दल वा केन्द्रीय समितिइ ४० प्रतिशत थ्यकल धासा दल विभाजन याये फइगु प्रावधान तःगु खः।

तर उकिया तत्कालीन सत्तारुढ दल नेपाल कम्युनिस्ट पार्टी (नेकपा) दुने तधःगु विरोध जुगु खः। नेकपा विभाजन यायेगु कथं अध्यादेश हःगु धासे पुष्पकमल दाहाल प्रचण्ड, माधवकुमार नेपाल पक्षया नेतापिन्स विरोध यागु खः।

एमाले व जसपा तज्याइगु सम्भावना

प्रधानमन्त्री शेरबहादुर देउवां हगु दल विभाजन यायेत अझ अपूकेगु कथं राजनीतिक दलसम्बन्धी अध्यादेश हःगु खः।

प्रमुख विपक्षी नेकपा एमाले विभाजन योगु व सरकारयात संसद यागु पूरा कार्यकाल न्ह्याकेगु वयागु रणनीति दु। प्रधानमन्त्री देउवां हगु दल विभाजन यायेत अपूकेगु निति अध्यादेश हगु खः।

एमालेया निर्वाचन आयोगय् दर्ता जुगु केन्द्रीय कमिटीइ २०३ म्ह दु। उकि मध्ये छु भचा राजनीतिक नियुक्ति काये धुकुगुलि न्हुगु अध्यादेश कथं दल विभाजन यायेत नेपाल समूहयात ४० म्ह स्वया अप्वो केन्द्रीय सदस्यपि माः। एमालेया संघीय संसदीय दलय् १५१ म्ह सांसदपि दु। उकिइ २० प्रतिशतय् ३१ म्ह सांसदपि माः। नेपाल समूहयाके उलि ल्याः खने मदु। न्हुगु अध्यादेशं एमाले जक मखु, सत्तारुढ गठबन्धनय् दुगु जसपा न तज्याइगु खनेदु।

दलया वैधानिकता उपेन्द्र यादव समूहं काये धुकुगु दु सा महन्थ ठाकुर पक्षय् आः ३२ म्ह सदस्यी दलय् २० प्रतिशत अथे धइगु ७ म्ह सांसदपि दःसा न्हुगु दल दर्ता याये फइ। थुगु ल्याः ठाकुर पक्षयाके दु।

प्रदेश २ या प्रदेश प्रमुखय् हरिशंकर मिश्र नियुक्त यागु दु। सरकारया सिफारिसय् राष्ट्रपति विद्यादेवी भण्डारीं मिश्रयात मंगलबाः प्रदेश प्रमुखय् नियुक्त यागु खः।

वयकः महोत्तरीया मिश्र नेपाली कांग्रेसया पुलाम्ह नेता खः। राष्ट्रपति विद्यादेवी भण्डारीं प्रदेश प्रमुख राजेश झायात पदमुक्त याना मिश्रयात प्रदेश प्रमुख नियुक्त यानागु धका राष्ट्रपति कार्यालयया प्रवक्ता जगन्नाथ पन्तं जानकारी बिगु दु।

मन्त्रिपरिषदं सोमबाः च्वंगु बैठकं झायात पदमुक्त यासे महोत्तरीया मिश्रयात नियुक्त यायेगु सिफारिस यागु खः।