येँ महानगरया मेयर विद्यासुन्दर शाक्यं वडा २८ य् झीगु इच्छुमती पार्क व प्रदेशसभा सदस्य केशव स्थापितं शंकरदेव क्याम्पसपाखे प्रदर्शनी मार्ग स्वाइगु टुकुचा कोरिडोर शुभारम्भ यागु दु।

पार्क महानगरं निर्माण यागु खःसा कोरिडोर प्रदेशसभा सदस्य स्थापितं संसद कोषपाखे निर्माण यागु खः। पार्कया लागत ३७ लाख ७० हजार खःसा कोरिडोर करीब १ करोड ३८ लाख रुपैयाँ खः। कोरिडोर १ सय ४० मिटर लम्बाई दुगु खः।

उगु ज्याझ्वःया उलेज्या याये धुका येँ महानगरपालिकाया मेयर शाक्यं, छगु वडाय् छगु पार्क दयकेगु नीति कथं सार्वजनिक जग्गा संरक्षण याना अन पार्क दयकाच्वनागु खः धका धयादीगु खः। ‘बजेटया समस्या मदु। स्थानीय विवाद मजूसा न्ह्यागू ज्यायास अपू। जिमिसं टुकुचा खुसिइ जवं खवं वनेजिइक दयेका।’ शाक्यं विकास निर्माण व निर्माणय् विरोध यायेगु प्रवृत्तिइ खँ ल्ह्यायेगु तर ज्या मयाकेगु, ज्या जुलकि हाकन जस कायेत हानाथाप यायेगु चरित्र हावी दु धका धयादीगु खः।

वडा व वडानाप स्वागू सिमानाय् विकासया सन्दर्भय् मेयर शाक्यं धयादीगु दु, रानीपोखरीया न्हापागु चरणया ज्या सम्पन्न जुगु दु। दोस्रो चरणय् शान्तिवाटिका विकास यायेत्यनागु दु। वडा १ य् कमलपोखरीया न्हापागु चरणया ज्या क्वचाये धूकूगु दु। थुकिइ दोस्रो चरणया जुयाच्वंगु दु।

अथेहे प्रदेशसभा सदस्य स्थापितं, खुसि सिथय् कोरिडोर दयकेत सू नाप समन्वय यायेम्वा। टुकुचा कोरिडोर निर्माण यायेत समाज कल्याण परिषदया स्वामित्व माग यागुे सन्दभैय् वयकलं धयादीगु दु, ‘महानगरया विकासय् अवरोध यायेगु परिषदनाप समन्वय यायेगु मखु, सम्पत्ति महानगरं कागु विघटनया खँ ल्ह्वनेमाः।’ टुकुचाय् छेँ दयकूपिनिगु छेँ थुनेमाः। टुकुचा गन गन बाः वनाच्वंगु दु। अन अन कोरिडोर दयकेमाः। दरबार दुने न कोरिडोर दयकेमाः।’

पार्क निर्माण यायेत सार्वजनिक जग्गा पहिचान याना वडां १० लाख रुपैयाँ खर्च याना पखाः दयकागु खः।वडा २८ या अध्यक्ष भाइराम खड्गीं, भौतिक पूर्वाधार विकास विभागया डिजाइन व उपभोक्ता समितिया सक्रियतापाखे पार्क निर्माण यानागु धका धागु खः।

नेपाल पञ्चाङ्ग निर्णायक विकास समितिं थुगुसी न्यायेकीगु येँयाः जात्रा यागु साइत पित बिउगु दु ।

समितिं पित बिउगु साइत कथं थ्वः हे वइगु भदौ २३ गते सुथय् १०ः५२ बजे यःसिं कायेगु लागिं वन प्रस्थान जुइ । वकुन्हु हे बहनी ७ः२७ बजे सिमा पालेगु शुरु जुइसा भदौ २९ गते सुथय् १०ः३४ बजे यःसिंयात नगर प्रवेश याकी।

अथेहे असोज २ गते शनिवाः सुथय् ६ः५१ बजे यःसिं थनीगु साइत पित बिउगु दु । असोज ३ गते कुमारीया रथ क्वःने सालीसा असोज ४ गते थःने साली । असोज ८ गते शुक्रवाः बहनी १०ः३६ बजे यःसिं क्वःथली ।

यःसिं क्वःथलेवं उगु दँया येँयाः क्वचाइ । कोरोना महामारीया कारणं थगुने येँयाः मन्यायेकूगु खःसां थुगुसी धाःसा जात्रा न्यायेकेगु कथं तयारी न्ह्यानाच्वंगु दु ।

महाधिवेशनबारे खनेदुगु व्यवहारिक समस्यायत सम्बोधन यायेगुबारे नेपाली कांग्रेसय् सहमति जुटे जुगु दु।

कांग्रेस सभापति नाप प्रधानमन्त्री शेरबहादुर देउवा व वरिष्ठ नेता रामचन्द्र पौडेल पक्ष दथुइ शुक्रबाः बहनि बालुवाटारय् जुगु छलफलय् कार्यतालिका कथं महाधिवेशन प्रक्रिया न्ह्यने यकेगु व जिल्ला सभापतिपिनिगु माग सम्बोधन यायेगु बारे सहमति जुगु दु।

सभापति देउवा नाप सहमतिबारे ब्रिफिङ यायेत पौडेल समूह आन्तरिक छलफलय् जुटे जुगु दु। पूर्वमहामन्त्री प्रकाशमान सिंहया निवास चाक्सीबारीइ थौं शनिबाः सुथनिसे सुरु जुगु छलफलय् पौडेल समूहया शीर्ष नेतापि नाप छु जिल्ला सभापतिपि न सहभागी जुगु खः।

बैठकय् नेता पौडेल, पूर्वमहामन्त्री सिंह, पूर्वसहमहामन्त्री डा. रामशरण महत, केन्द्रीय सदस्यपि बलबहादुर केसी, डा. मिनेन्द्र रिजाल, दिलेन्द्र बडु, डा. शेखर कोइराला लगायतपि दुगु खः।

अथेहे नुवाकोट जिल्ला सभापति जगदीश्वरनरसिंह केसी, धादिङ जिल्ला सभापति रमेश धमला, काठमाडौं जिल्ला सभापति सबुज बानियाँ, बर्दिया सभापति सञ्जय गौतमपि न सहभागी जुगु खः। कांग्रेसं केन्द्रीय निर्वाचन समिति न शुक्रबाः तक ४८ जिल्लाया क्रियाशील सदस्यता सूची सार्वजनिक याये धुकुगु दु। 

यलय् मल्ल जुजु सिद्धिनरसिहंया पालानिसे संचालन जुयावयच्वंगु ऐतिहासिक नृसिंह जात्रा स्वास्थ्य सुरक्षाया मापदण्ड पालना यासे जात्रा क्वचागु दु।

यलया गाःबहालय् दुनेचुकं नृसिंहयात विशेष तान्त्रिक पुजा यासे सुरु जुगु यात्रा यलया थीथी थासय चाहिला अन हे थ्यका क्वचागु खः। यलया खुम्ह कुलया राजोपाध्याय समुदायया वरिष्ठताया आधारय् पालंपाः दक्कोसिया व्यवस्थापनय् जिम्मा कया नृसिहं जात्रा संचालन याइ। थुगु पालीइ गाः बहाःया कोमलेशाननद राजोपाध्यायया परिवारं सञ्चालन यायेगु जिम्मा कागु खः।

नृसिहं जात्राय् बाजं, प्रत्यक्ष भजन नाप नृसिहं सहित लक्ष्मी, सरस्वती ,भक्त प्रल्हादया टोलीं यलया गाःबहाः, पिम्बहाः, बंगलामुखी, कोबहाः, मंगलबजाः, सुन्धारा, इकुबहाः, महाबौद्ध, टंगल, तिच्छु गल्ली, हौगल, इखालखु, पूर्णचण्डी लगायत थीथी थासय् यात्रा याइगु चलन दु। थुगु पालीइ कोरोना भाइरसया संक्रमण जोखिम जुगुलि जात्रा साधारण किसिमं सामाजिक दूरी कायम याना संचालन यायेगु याइ।

कार्तिक प्याखं झ्वलय् पिहावइगु नृसिहंयात उग्र रुपया नृसिहं माने याइसा भदाय् पिहावइगु नृसिहंयात शान्त स्वभाव कथं काइ। नेपाल सम्बत ७५१ अर्थात विक्रम सम्वत १६८८ निसे थुगु जात्रा निरन्तर सञ्चालन याना वयाच्वंगु लिखित दस्ताबेज दु।

राष्ट्रपति विद्यादेवी भण्डारीं कायममुकायम प्रधानसेनापति प्रभुराम शर्मायात प्रधानसेनापतिइ नियुक्त यागु दु।

नेपालया संविधान धारा २६७ या उपधारा ( ५) बमोजिम मन्त्रीपरिषद् या सिफारिसय् आःयाम्ह नेपाली सेनाया कायम मुकायम जिम्मेवारी कयाच्वनादीम्ह बालाधिकृत रथी प्रभुराम शर्मायात प्रधानसेनापतिइ नियुक्त यागु दु।

प्रधानसेनापति पूर्णचन्द्र थापाया स्वदँया पदावधि वइगु भदौ २४ गते क्वचाइगु खः। पदावधि क्वचाइगु लच्छि न्ह्य साउन २५ गतेनिसे विदाय् च्वगुलि जेष्ठताया आधारय् शर्मा कायममुकायम प्रधान सेनापति तोकयागु खः।