देयन्यक २४ घण्टाया दुने थप ३,४२१ म्हेसित कोरोना संक्रमण पुष्टि जुगु दु।

स्वास्थ्य मन्त्रालयया कथं १२२४० म्हेसिगु पीसीआर परीक्षणय् २३९१ म्ह व ५०३२ म्हेसिगु एन्टीजेन परीक्षण यागुलि १०३० म्ह याना ३,४२१ म्हेसित कोरोना संक्रमण पुष्टि जुगु दु।

अथेहे वंगु २४ घण्टाय् कोरोना संक्रमणं २५ म्ह सीगु दु सा १ हजार ६८६ म्ह कोरोनामुक्त जुगु दु। थ्व नाप नेपालय् कोरोना संक्रमितपि आः ६ लाख ८२ हजार ९४७ म्ह थ्यंगु दु।

उकि मध्ये ९ हजार ९,७३८ म्ह सी धुकुगु दु सा ६ लाख ४५ हजार ३०१ म्ह संक्रमणमुक्त जुइ धुकुगु दु।

सेयर बजाःया परिसूचक नेप्से ८.२४ अंक घटे जुगु दु। आइतबाः आःतक हे दकलय् अप्वो विन्दुइ थ्यंगु परिसूचक सोमबाः धासा लगानीकर्तापिन्स नाफा बुकिङ यायेवं सामान्य ‘करेक्सन’ जुया ३ हजार ५०.४२ अंकय् कुहावंगु खः।

आइतबाया तुलनाय् थौं प्रतिधितोपत्र कारोबार ल्याः व रकमय् न गिरावट वंगु खः। सोमबाः निगुगु बजारय् २२३ कम्पनीया ३ करोड ३० लाख ६१ हजार ४४७ कित्ता सेयर १ लाख ३७ हजार २४२ पटक खरिद बिक्री जुगुलि कारोबार रकम १४ अर्ब १३ करोड ९७ लाखय् सीमित जुगु खः।

आइतबाः ४ करोड अप्वो कित्ता सेयर निगुगु बजाःया कारोबारय् १४ अर्ब ३० करोड स्वया अप्वो थ्यंगु दु। आइतबाः कारोबार जुगु १४ उपसमूह मध्ये च्यागु उपसमूह वाँउसे च्वसा न्यागु उपसमूह थौं ह्यायउसे च्वंगु दु। थौं आइतबाः दकलय अप्वो थहावंगु बैंकिङ उपसमूह ४३.३० अंकं ऋणात्मक जुगुलि जलविद्युत उपसमूह धासा १०२.६२ अंक थहावंगु दु। सोमबाः ११० कम्पनीया सेयर भाः थहावंगुलि ६६ कम्पनीया भाः कुहावंगु दु।

अथेहे न्ह्यगू कम्पनीया सेयर भाः स्थिर जुगु दु। थौं बिशाल बजार कम्पनी, जानकी फाइनान्स, रिडी, माउण्टेन व ग्रिनलाइ हाइड्रोपावरया सेयर भाः १० प्रतिशतं थहावंगु दु। थौं एनआईसी एसिया डिबेन्चर, पोखरा फाइनान्स, सनराइज, लक्ष्मी बैंकको सेयर भाः कुहावंगु दु।

थौं ङादी ग्रुप पावर कम्पनीया सेयर भाः दकलय् अप्वो ३९ करोड ३० लाख कारोबर जुगु खः। ३३ करोड बढीया सेयर खरिद बिक्री जुगुलि हिमालयन डिष्टिलरीया निगु थासय् लागु खः।

येँ महानगरपालिकाया मेयर विद्यासुन्दर शाक्यं निर्दलीय प्रधानमन्त्रीं देशया नेतृत्व याना च्वंगु धका धागु दु।

थौं येँ महानगरपालिका वडा–२१ कार्यालय  नाप श्री पचली भैरव गुथिया नाच घरयागु भवन शिलान्यास यायेगु झ्वलय् अथे धयादीगु खः। ‘झीसं दलीय प्रधानमन्त्रीया पक्षय् दु, दलीय व्यवस्थायात परिपक्क दयके माः,’ मेयर शाक्यं धयादीगु दु, ‘तर, अदालतया परमादेशं निर्दलीय प्रधानमन्त्री न देशय् नेतृत्व यानाच्वंगु दु। आः देशय् दलया प्रधानमन्त्री मदु।’ शाक्यं आः स्थानीय तह व प्रदेशय् दलीय व्यवस्था दु सा प्रधानमन्त्री निर्दलीय जुगु धका दाबी यानादीगु खः।

‘दलयागु ह्वीप लगे मजुइगु प्रधानमन्त्री धासा निर्दलीय प्रधानमन्त्री खः । थ्व विडम्वनापूर्ण अवस्था खः,’ वयकल धयदीगु दु, ‘संविधान निर्मातापिन्त जिगु न्ह्यसः याये चाहे जू। छु संविधानय् च्वयेगुतू अन निर्दलीय प्रधानमन्त्रीया परिकल्पना यागु दु ला? कि संविधानयो अपव्याख्या याना निर्दलीय प्रधानमन्त्री दयकूगु खःला?’ वयकल संविधान च्वयेगु इलय् थ्व परिकल्पना यागु मदुला धका धयादीसे उकिया अपव्याख्या यागु जुएफु धका धयादीगु खः।

‘दलया ह्वीप लगे मजुइगु, दलया ह्वीप माने मजुइपि सांसदपिन्त दलं कारवाही याये मदुइगु थथे न जुइला? म्हिगः झितः गु व्यवस्थाया विरुद्धय् वना आः उगु हे व्यवस्थापाखे घ्वाना यंकूगु दु,’ वयकलं धयादीगु दु, ‘थ्वे गलत खः ।थ्व चाँहि प्रतिगमन खः। आः प्रधानमन्त्री दयकूगु प्रक्रिया हे प्रतिगामी खः। दलीय प्रधानमन्त्री दयकेगु मेगु विकल्प मदु धका वयकल धयादीगु खः। ‘आः स्थानीय तहया निर्वाचन फागनुय् जुइगु दु।

उगु इलय् झीसं जनताया छेँ वना धायेमाः। झीसं ०४६ साल न्ह्यःयागु निर्दलीय प्रधानमन्त्री मखु बहुदलीय व्यवस्था लिपा दलीय प्रधानमन्त्री मालगु खः,’ शाक्यं धयादीगु दु, ‘दलीय व्यवस्थायात बल्लाकेत झी छप्प जुइमाः। जि गगन थापा, विश्वप्रकाश शर्मापिन्त देशय् निर्दलीय मखु दलीय प्रधानमन्त्री माः धका न्ववायेगु आँट यायेत सुझाव बिइ।

नेपाली कांग्रेसया वरिष्ठ नेता रामचन्द्र पौडेलं माओवादी केन्द्रया अध्यक्ष प्रचण्डया जहान सिता दाहालयात नापलागु दु।

पौडेल थौं सोमबाः सुथय् खुमलटार वना दाहालयात नाप लागू खः। प्रचण्डया म्ह्याय् गंगा दाहालं उगु किपाः सामाजिक सन्जालय् सार्वजनिकयासे पौडेल स्वास्थ्य अवस्थाबारे जानकारी कावंगु धका उल्लेख यागु खः।

थ्व स्वयान्ह्यः कांग्रेस सभापति शेरबहादुर देउवा प्रधानमन्त्री न खुमलटारय्वना सीता दाहालयात नापलागु खः।

जनता समाजवादी पार्टीया कार्यकारिणी सदस्य रेशम चौधरी निर्वाचन आयोग वंगु दु।

जसपाया आधिकारिकता विवाद निरुपणया लागि निर्वाचन आयोगं हस्ताक्षर सनाखत यायेत दक्को केन्द्रीय कार्यकारिणी सदस्ययात थौं सोमबाः सःतूगु खः।

चौधरी थौं उकिया लागि डिल्लीबजार कारागारपाखे आयोगय् वंगु खः। चौधरीयात प्रहरीं गाडी हःगु् खः। चौधरीं थःम्हेसिया पार्टीया अध्यक्षपि उपेन्द्र यादव व महन्थ ठाकुरनाप सल्लाह याना हस्ताक्षर यायेगु धका धागु खः।