प्राध्यापक डाक्टर गोविन्द केसीं नवनियुक्त स्वास्थ्य राज्यमन्त्री उमेश श्रेष्ठयात तत्काल पदमुक्त यायेत माग यागु दु।

डाक्टर केसीं थौं मंगलबाः प्रधानमन्त्री शेरबहादुर देउवायात खबरदारी पौै छ्वया पदमुक्त यायेत माग यागु खः। ‘नवनियुक्त स्वास्थ्य राज्यमन्त्रीं या त स्वास्थ्य व शिक्षा क्षेत्रय् दुगु थःगु दक्को लगानीपाखे तत्काल अलग हटे जुया स्वार्थय् द्वन्द्व जुइगु अवस्था अन्त याः।

नत्र धाःसा वयात तत्काल पदमुक्त याः,’ केसीं अथे धका च्वंगु खः। व्यापारी व व्यवसायीपिनिगु घुस नया खुँ वलं सांसद व मन्त्री जुम्ह मनू न थःगु व्यवसायया हित जुइगु कानून दयका नितीगत भ्रष्टाचार याम्ह खः धका डाक्टर केसीें दाबी यागु खः।

आइतबाः जक नियुक्त जुम्ह स्वास्थ्य राज्यमन्त्री श्रेष्ठ व्यापारी पृष्ठभूमियाम्ह खः।

राष्ट्रपति विद्यादेवी भण्डारीं त्रिवि शिक्षण अस्पतालय् स्वास्थ्य परीक्षण यागु दु।

वयकःया नियमित स्वास्थ्य परीक्षणया लागि थौं सुथय् त्रिवि शिक्षण अस्पताल वना राष्ट्रपतिया स्वकीय सचिव भेषराज अधिकारीं जानकारी बिगु खः।

स्वकीय सचिव अधिकारीं धयादीगु दु, ‘खासै तधःगु समस्या तु न मखु, नियमित चेकया लागि झागु खः,।’ राष्ट्रपति भण्डारी थौं सुथय् ९ बजे त्रिवि शिक्षण अस्पताल झागु खः।

प्रधानमन्त्री शेरबहादुर देउवा व नेकपा (माओवादी केन्द्र)या अध्यक्ष पुष्पकमल दाहाल दथुइ भेटवार्ता जुगु दु।

प्रधानमन्त्री निवास बालुवाटारय् थौं सुथय् भेटवार्ता जुगु दु धका प्रधानमन्त्री देउवाया स्वकीय सचिव भानु देउवां जानकारी बिगु दु। उगु भेटवार्तामा मन्त्रिपरिषद् विस्तार र सञ्चालनका विषयमा कुराकानी भएको स्वकीय सचिव देउवां धागु दु।

वंगु २९ असारय् प्रधानमन्त्री नियुक्त जूम्ह देउवा नेतृत्वय् मन्त्रिपरिषद कांग्रेस व माओवादीपाखे निम्ह निम्ह मन्त्री जुइ धुकुगु दु। अथेहे आइतबाः स्वास्थ्य राज्यमन्त्रीइ उमेश श्रेष्ठ नियुक्त यागु खः।

जसपाया आधिकारिकता सम्बन्धी विवाद क्वचागुलि मन्त्रिपरिषद विस्तार यायेगु तयारीइ देउवा दु ।

येँ महानगरपालिकाया प्रमुख विद्या सुन्दर शाक्यं थःगु कार्यकालय् हे दक्व वडाया वडा कार्यालय भवनया पुननिर्माण व न्हूगु निर्माणयात पूवंकेगु प्रतिबद्धता व्यक्त यानादिगु दु ।

थौं येँया वडा २१ या भवन शिलान्यास यायेगु झ्वलय् उगु प्रतिबद्धता प्वंकादिगु खः । वय्कलं थः निर्वाचित जुया न्हापांगु मुँज्याय् येँ महानगरपालिकाया केन्द्रिय कार्यालय व दक्व वडा कार्यालय भवनया पुननिर्माण व न्हूगु निर्माणयात प्राथमिकताय् तया ज्या यायेगु घाेषणा कथं हे ज्या न्ह्याकाच्वनागु धयादिल । मेयर शाक्यं थ्वसिबें न्ह्यः ३, ४, ९, १४, १८, २६ लगायतया वडा कार्यालय भवन पुननिर्माण जुया ज्या न्ह्यानाच्वंगु व छुं भवनया ज्या जुयाच्वंगु जानकारी बियादिल ।

अथेहे वडा १२ या नं याकनं हे शिलान्यास जुइगु धयादिल । निर्वाचनया ईलय् बचं बिउगु कथं अप्वं धैथे ज्या यानागु व छुं छुं ज्या कानूनी व प्राविधिक समस्याया कारण जुइ मफुगु मेयर शाक्यं धयादिल । गुकिइ मुद्दाया हुनि महानगरपालिकाया केन्द्रीय भवन व छुं छुं वडा कार्यालय त अभंm नं दयेके फुगु मदुनि । येँ महानगरपालिकाय् थीथी विचाः तइपिं जनप्रतिनिधिपिं निर्वाचित जूसां नं थःगु कार्यकालय् कार्यपालिका व नगरसभाया दक्व निणर्य सर्वसम्मतिं न्ह्याका यंकेत सफल जूगु धासें मेयर शाक्यं हसना प्वंकादिल । महानगरपालिकां दक्व वडा भवन निर्माण यायेगु वलय् थःगु मौलिकता न्ह्यब्वइकथं व छगू हे स्वरुप जुइकथं भवन निर्माण याइगु जुगु दु ।

थथे झिगू परम्परागत शैलीं भवन निर्माण जूसां भवनया दुनेया स्ट्रक्चर धाःसा सेवाग्राहीयात ध्यान तया हे अपुइकथं निर्माण जुइगु धाःगु दु । ज्यावलय् महानगरया इञ्जिनयर प्रेमबहादुर श्रेष्ठं वडा २, ६, १२, २०, २२, २९ निर्माण प्रक्रिया न्ह्यानाच्वंगु व वडा १२, ३१, १६ नं निर्माणया नितिं ज्या जुयाच्वंगु धयादिल । वय्कलं थौं शिलान्यास जूगु वडा २१ या भवन भूकम्प प्रतिरोधी जुइगु नं धयादिल ।

उगु भवन खुत जाःया जुइगु नं धयादिल । गुकिइ न्हापांगु भुइँ तला वडा कार्यालयया नितिं, न्हापांगु तला गुठीया लागि व ल्यं दनिगु तला नं वडा कार्यालय् हे जुइगु धाःगु दु । भवनया न्यागूगु तल्लाय् धाःसा ५०म्ह तक्कया क्षमताया हल बनेजुइगु नं धयादिल । वडा कार्यालय भवन २ क्वति ६गू लख ९०द्वया लागतय् निर्माण जुइत्यंगु खः । थ्वः भवन अपाङ्ग व ज्याथजिथि मैत्री लिसें लिप्mट तक्कं दइगु धाःगु दु । शिलान्यास ज्याझ्वलय् पूलाँम्ह मन्त्री कृष्णगोपाल श्रेष्ठ, प्रदेश सांसद डाक्टर अजयक्रान्ति शाक्यलिसेंया पिनिगु ब्वति दूगु खः ।

स्वास्थ्य मन्त्रालयया कथं थौं स्वनिलय् थप ९९९ म्हेसित कोरोना संक्रमित थपे जुगु दु। अथेहे थौं येँ जक ६७७ म्हेसित कोरोना सक्रमित जुगु दु।

अथेतु ख्वपय् १२५ म्ह व यलय् १९७ म्हेसित कोरोना संक्रमण खनेदुगु धका मन्त्रालयं धागु दु। अथेहे येँ आः ५ हजार ९१० म्ह सक्रिय संक्रमितपि दु सा १ हजार ९४९ म्ह सी धुकुगु दु।

स्वास्थ्य मन्त्रालयया कथं झापाय् ३१४, मोरङय् १२०, सुनसरीइ १०६, नवलपरासी पूर्वय् १०५ व चितवनय् ९८ म्ह कोरोना संक्रमण पुष्टि जुगु दु। अथेहे मकवानपुरय् ८४, कास्कीइ ६२, धादिङय् ६१, रुपन्देहीइ ५३, काभ्रे व सिन्धुपाल्चोकय् ३०÷३० म्ह, नुवाकोटय् २९, धनकुटा व रामेछापय् २१÷२१ म्ह कोरोना संक्रमण जूगु दु।

बागलुङय् १८, इलामय् १७, दाङय् १६, अर्घाखाँचीइ १४, पाल्पाय् १२ व नवलपरासी पश्चिमय् १० म्ह कोरोना संक्रमित थपे जूगु दु धका स्वास्थ्य तथा जनसंख्या मन्त्रालयं धागु दु।