येँ थौंनिसे कोरोना विरुद्धया भेरोसेल खोपया निगुगु मात्रा बिइ त्यंगु दु। भेरोसेलया न्हापागु मात्रा लगे याये धुकपिन्स निगुगु मात्राया खोप बिइगु धका जिल्ला स्वास्थ्य कार्यालय काठमाण्डौ न धागु दु।

उगु कार्यालयया कथं भेरोसेल खोपया न्हापागु मात्रा कायेधुकूपि ५० दँ दुपिन्त थौं निगुगु मात्रा बिइत्यंगु खः। अथेहे विश्वविद्यालय व विद्यालयया प्राध्यापक, शिक्षक व कर्मचारी सार्वजनिक गाडीया चालक व सहचालकपिन्त थुगु खोप बिइत्यंगु खः।

येँया दक्को पालिकाय्–१ सय ४६ खोप केन्द्रया ब्यवस्था यागु दु। अथेहे, येँया राधास्वामी आइसोलेशन सेन्टर, सशस्त्र प्रहरी बल अस्पताल, वीर अस्पताल, त्रिवि शिक्षण अस्पताल, सिभिल अस्पताल, परोपकार प्रसूतिगृह तथा स्त्रीरोग अस्पताल, वीरेन्द्र सैनिक अस्पताल व नेपाल प्रहरी अस्पतालय् न खोप बिइगु जुइ धका स्वास्थ्य मन्त्रालयं धागु दु।

मदिक्क वाः वया ताँ भासे जुइगु, चलः वनन लुम्बिनी प्रदेशय थीथी जिल्लाया कम्ती न च्यागु थासय् सतक अवरुद्ध जुगु दु।

लुम्बिनी प्रदेश ट्राफिक कार्यालय बुटवलया कथं रुपन्देही, नवलपरासी, अर्घाखाँची, बर्दिया, गुल्मी व पाल्पाया थीथी थासय् सतक अवरुद्ध जुगु दु।

ट्राफिक कार्यालयया सूचना अधिकारी डिल्ली नारायण पाण्डेयया कथं अर्घाखाँचीया सदरमुकाम स्वाइगु गोरुसिंगे–सन्धिखर्क सतक चलः वया अवरुद्व जुगु दु। अथेहे नवलपरासी (पश्चिम) बर्दघाट नगरपालिका– १० लण्डनबृजस्थित पूर्व–पश्चिम राजमार्ग सतक खण्ड व सुनवल नगरपालिका–१२ बडेराया ड्राइभर्सन चुइकूगु दु।

अथेतु, रुपन्देहीया देवदह नगरपालिका–९ स्थित घोडाहा खुसिइ ताँ भासे जुया पूर्व–पश्चिम राजमार्ग अवरुद्ध जुग दु। अर्घाखाँचीया शितगंगा नगरपालिका– १२ बसेरीस्थित गोरुसिंगे–सन्धिखर्क सतकखण्ड न चलः वया अवरुद्ध जुगु दु धका अनया प्रहरीं धागु दु।

अथेहे पाल्पाया रम्भा गाउँपालिका–३ सितापहाडय् न चलः वया सिद्धार्थ राजमार्ग अवरुद्ध जुगु दु। बर्दियाया बांसगढी नगरपालिका–१ बबइस्थित कोहलपुर–सुर्खेत राजमार्ग सतक खण्ड न अवरुद्ध जूगु दु। गुल्मीया रुरु गाउँपालिका–२ पोखरीबगरय् न चलः वया रिडी–रुद्रबेनी सतकखण्ड अवरुद्ध जूगु दु।

चलः वया नारायणगढ–मुग्लिन सडकखण्ड अवरुद्ध जुगु दु।

अनया सतकय् चलः वयाच्वंगुलि म्हिगः चान्ह्यनिसे निखेर सतक अवरुद्ध जुगु धका प्रहरीं धागु दु। भरतपुर महानगरपालिका–२९ सेती दोभान व पाँचकिलोय चलः वंगु खः।

सतकय् चाः चिइकेत थौं शुक्रबाः सुथनिसे डोजर व जेसिबी छ्यला ज्या जुयाच्वंगु दु।

थौं यलय् ऐतिहासिक नृसिंह जात्रा जुइगु दु। यलया राजोपाध्याय ब्राम्हणपिनिगु उपाकर्म गुठीं दँय्दंस भाद्र कृष्ण पंचमीया दिं संचालन याइगु खः।

थौं थुगु जात्रा गाःबहाः न याइगु जुगु दु। उपाकर्म गुठीया सदस्यपि दथुइ ज्येष्ठताया आधारय् जात्रा पालपाः व पाः काम्हेसिगु छेँ न जात्रा शुरु याना यलय् नगर परिक्र याना उगु हे थासय् थ्यका जात्रा क्वचायकेगु परम्परा दु।

गाःबहाल निवासी कोमलेशानन्द राजोपाध्याय (कोमल जुजु) या छेँ न जात्रा न्ह्याका वय्कःया हे क्वचायेकिगु खः।

उगु जात्राय् प्रत्यक्ष भजन हाला, बाजं थानाः नृसिंह, लक्ष्मी, सरस्वती व प्रल्हादलिसें अप्सरा गणंपि दइ। थौं थुगु जात्रा गाबहाः, पिम्वहाः, क्वन्ति, कोबहाः, मंगः, लुँहिटी, इकुबहालः महाबौद्ध, टंगलः तिच्छु गल्ली, हौगः, पुर्णचण्डी लिसें थीथी थासय् चाःहिलिइ।

लः लः खः कबिता च्वयादीम्ह नेपालभाषाया नांजाःम्ह कवि पूर्ण वैद्य थौं मन्त।

वयकः थौं बिहिबाः बहनी यलया निदान अस्पतालय् मदुगु धका परिवारं धागु दु। परिवारपाखे बिगु जानकारी कथं कन्हय् सुथय् ९ ताःइलय् वयकःया पार्थिव शरीर अस्पतालं पितबिइधुक्कां अनंलिपा अन्तिम संस्कार पशुपतिइ याइगु धका धागु दु।

कवि पूर्ण वैद्ययात कब्जियत जुसेलिं वंगु भदौं २ गते यलया निदान अस्पतालय् भर्ना जुयादीगु खः। अस्पताल भर्ना यायेधुक्कां कोरोना भाइरसया परीक्षण यागुइलय् कोरोना पोजिटिभ खनेदुगु खः।

अक्सिजनया मात्रा म्हो जुगुलिं भेन्टिलेटरय् तया वय्कःया वासः जुयाच्वंगु खः। वयकःया जन्म विसं १९९७ , नेसं १०६० गुपुन्हि खुन्हू ख्वपया चोछें त्वालय् जूगु खः । वयकलं ‘सरासू’ (२०२१÷नेसं १०८४), लः लः खः (२०५२÷नेसं १११५) लगायतया सफू पिथनादिगु दु।

छुं दँ न्हय् वयकया  ‘लः लः खः’ चिनाखं सफूया अंग्रजी भासं अनुवाद जुया पिहांवगु खः। नेसं १०८४ (वि.सं. २०२१) य् वय्कयात ‘सरासू’ या  लागि नेपाःया हे न्हापांगु  साहित्यिक सिरपा ‘श्रेष्ठ सिरपा’ लःल्हागु खः।