स्वास्थ्य तथा जनसंख्या मन्त्रालयया कथं थौं दकलय् अप्वो येँ जक ४५४म्हेसित कोरोना सक्रमण पुष्टि जुगु दु।

अथेहे, कास्कीइ १८१, यलय १६९, मोरङय् ११२ व ख्वपय् ९२ म्हेसित कोरोना संक्रमण पुष्टि जुगु दु।

अथेतु, मकवानपुरय् ५५, सुनसरीइ ५४, रुपन्देहीइ ५०, काभ्रेपलाञ्चोकय् ४६, चितवनय् ४५, झापाय् ३३, स्याङजाय् २९, नुवाकोटय् २३, जुम्लाय् २१, दोलखाय् १८, बाँकेय् ११ नाप धादिङ व सिन्धुलीइ १०÷१० म्हेसित कोरोना संक्रमण खनेदुगु धका स्वास्थ्य तथा जनसंख्या मन्त्रालयं धागु दु।

वंगु २४ घण्टाया दुने देयन्यक थप २,०६५ म्हेसित कोरोना भाइरस संक्रमण पुष्टि जुगु दु।

८,७५२ म्हेसिगु पीसीआर परीक्षण यागुलि १,५७७ म्हेसित व ४,३६५ म्हेसिगु एन्टिजेन परीक्षणय् ४८८ म्ह याना २,०६५ म्हेसित कोरोना संक्रमण खनेदुगु धका स्वास्थ्य तथा जनसंख्या मन्त्रालयं धागु दु।

अथेहे कोरोना संक्रमणपाखे थप २५ म्ह सीगु दुसा २,३३७ म्ह संक्रमणमुक्त जुगु दु धका धागु दु। थ्व नाप नेपालय् कोरोना संक्रमितपि ७ लाख ५६ हजार ७९२ म्ह थ्यंगु दु।

अथेहे नेपालय् सीपि १० हजार ६६३ म्ह थ्यंगु दु सा ७ लाख ८ हजार २३० म्ह संक्रमणमुक्त जुइ धुकुगु दु।

राजनीतिक दलसम्बन्धी अध्यादेश संविधान नाप ल्वागु व संवैधानिक मर्म विपरित जारी जूगु धासे सर्वोच्च अदालतय् दर्ता जूगु निवेदन संवैधानिक इजलासय् पेशी चढे जूगु दु।

तर थ्व स्वया न्ह्ययागु निवेदनय् चाङ जुगु धासे उगु निवेदनय् शुक्रबाः सुनुवाई जुइगु सम्भावना कम जूगु धका सर्वोच्च अदालतया स्रोतं धागु दु।

उगु निवेदन स्वया मेमेगु २०–२२ गु निवेदनय् सुनुवाई यायेमाःगुलि मेगु शुक्रबाः जक सुनुवाईया लागि पाः वइगु सम्भावना दु।

बुधबाः व शुक्रबाः सर्वोच्च अदालतया संवैधानिक इजलास च्वनिइगु खःसा शुक्रबाः जक न्हुगु निवेदन यागु सुनुवाईया पाः वइ।

अरनिको समाजं ज्यापु समाज यलयात छगु ज्याझ्वः दथुइ मास्क, स्यानिटाइजर, थर्ममिटर, पीपीई, फेससिल्ड लगायत कोभिड नियन्त्रणया स्वास्थ्य सामाग्री हस्तान्तरण यागु दु।

अरनिको समाजया अध्यक्ष डा.सर्वोत्तम श्रेष्ठं कोभिड–१९ महामारी नियन्त्रणय् ज्यापु समाजं महत्वपूर्ण भुमिका म्हितुगु धासे उगु समाग्री सुरक्षित जुइत छु भचा ग्वाहालि जुइगु भलसा कागु दु। ज्यापु समाजया अध्यक्ष चन्द्र महर्जन व वरिष्ठ उपाध्यक्ष सन्तमान महर्जनं महामारीयात लक्षित यासे समाजं क्वारेन्टाइन सञ्चालनय् हःगु व निकट भविष्यय् पोलिक्लिनिक सञ्चालनय् हयेगु योजना दु धका धागु दु।

अरनिको समाजं थ्व स्वया न्ह्यः स्वास्थ्य मन्त्रालययात ५ करोड रुपैया मूल्य बराबरया १ लाख पीसिआर टेष्ट किट, वीर, ट्रमा सेन्टर, प्रहरी, निजामती कर्मचारी अस्पताल, क्षेत्रपाटी निशुल्क चिकित्सालय, ललितपुर सामुदायिक स्वास्थ्य हृदय सेवा केन्द्र, महालक्ष्मी उद्योग वाणिज्य संघपिन्त स्वास्थ्य सामाग्री लल्हागु खः।

समारोहय् अरनिको समाजया महासचिव सुशील प्रजापति, डा. कृष्णगोपाल महर्जन व अरनिको सांस्कृतिक प्रर्वद्धन तथा व्यावसायिक समाजया अध्यक्ष अजरमान जोशी लगायत पिनिगु उपस्थिति दुगु खः।