चीनं नेपालयात अनुदान ग्वहालि कथं तँसा १६ लख डोज कोभिडविरुद्धया खोप उपलब्ध याकूगु दु ।

स्वास्थ्य तथा जनसंख्या मन्त्रालयस छगू ज्याझ्वःया दथुइ चिनियाँ राजदुत होऊ यान्छीं स्वास्थ्य तथा जनसंख्यामन्त्री विरोध खतिवडायात खोप लःल्हानादिल । मन्त्री खतिवडां सरकारं थ्व हे दँय् दक्वं नेपालीयात खोप बीधुंकेगु योजनायात पूवंकेत खोप उपलब्ध याकूगुलिइ चीनप्रति आभार प्वंकादिल । वय्कलं चीन सरकारं नेपालयात ३४ लख डोज खोप अनुदान ग्वाहालिया रुपं उपलब्ध याकूगु नं जानकारी बियादिल ।

राजदुत यान्छीं नेपाल सरकारया कोभिडविरुद्धया अभियानय् साथ बीखंबलय् लय्ताःगु धयादिल । वय्कलं निन्हु लिपा चिनियाँ सेनां नेपाली सेनायात ३ लख डोज खोप उपलब्ध याकेगु जानकारी बियादिल ।

राजदुत यान्छीं कोभिड निर्मूल यानाः नेपालया सामाजिक, आर्थिक क्षेत्रयात अःपुकेत चीन सरकारं फुगु योगदान बीगु प्रतिवद्धता प्वंकादिल । नेपालं आःतक्क चीनं खरिद प्रक्रियामार्फत् १ क्वःति कोभिडविरुद्धया खोप हयेधुंकूगु दु ।

स्वन्ति नखःया स्वन्हुया दिं थौं लक्ष्मीपूजा । सनिलय् धनधान्य, ऐश्वर्य व सम्पन्नताया देवी महालक्ष्मीया पूजा आराधना यानाः श्रद्धा भक्तिपूर्वक लक्ष्मीपूजा यायेगु परम्परा दु ।

यचुपिचु यानाः बँ थिलाःतःगु छेँय् लक्ष्मीं बास याइगु मान्यता दु । थ्वहे लिधंसाय् थौं सुथय् छेँ न्ह्यःनय् चुकय् अले लँय् यचुपिचु यानाः साया गोबरं बँ थिलाः लक्ष्मी दुकायेगु चलन दु । छेँया झ्याः, लुखा, कोठा, कःसिनिसें स्वाहांनय् यचुपिचु यानाः दिपावली याइ ।

थ्व पर्वयात दिपमालिका न धाः । लक्ष्मीपूजा याइगु थौंया चान्हय्सित सुखरात्री न धाः । दछियंकं हनीगु प्यंगू मूमू रात्री मध्ये शिवरात्री, मोहरात्री, कालरात्री व सुखरात्री मध्ये कात्तिक कृष्ण पक्ष औंसीया चायात सुखरात्री धायेगु चलन दु ।

थौं सनिलय् छेँ न्ह्यःनय्या चुकनिसें मूलुखा जुयाः लक्ष्मी स्वनाःतःगु थासय् तक साया गोबर व स्यूचां इलाः लक्ष्मीया पलाः दयेकाः लँपु दयेकी । पलाःपतिकं मत च्याकाः झिलीमिली न याइ । दिपावली क्वचायेकाः पूजाकोठाय् मत, कलश व गणेद्यःनाप लक्ष्मी स्थापना यानाः तिसा, ध्यबा, वा, जाकी, सिसाफल व स्वांमाः छायाः विधिपूवंक्क लक्ष्मीया पूजा याइ ।

लक्ष्मीपूजालिपा म्ह्याय् मस्तय्त लक्ष्मीया प्रतीक भापियाः पूजा यानाः दक्षिणा तकं बीगु प्रचलन दु । थौंहे सनिलय्निसें भैलो म्हिती । भगवान् विष्णुं बलिराजायात यमपञ्चकया न्यान्हुकुन्हु स्वर्ग, मत्र्य व पाताल स्वंगुलिं लोकया शासन यायेफइगु कथं वरदान बियादीगु जनविश्वास दु ।

अनलिं वरदान चूलाकूम्ह बलिराजां भलो जुइमा धकाः छेँय्छेँय् थ्व म्ये हायेकूगु लुमन्तिइ भैलो म्हितेगु चलन सुरु जूगु धाइ ।

थौं यमपञ्चकया निन्हूया दिं थौं क्वः व खिचायात पुज्याना हनाच्वंगु दु । थुगुसी क्वः व खिचा पूजा छन्हू हे लाःगु हुनिं पुज्याना हनाच्वंगु दु ।

म्हिगः बहनी यमदीपदान न्ह्यासां नं सुन्ती धाःसा थौं निसें जक न्ह्याःगु पञ्चांग निर्णय समितिं न्ह्यथंगु दु ।

थौं सुथय् क्वःयात ब्वना साःगु भिंगु नसा नका पुज्याना हनाच्वंगु दु । क्वःयात यमदूतया कथं पूज्याना वयाच्वंगु दु । युगान्तरय् क्वःयात सूचं कालबिल याःनिम्ह प्राणीया कथं काइगु जुगुलिं क्वःयात पुज्यानावयाच्वंगु खः ।

अथेहे थौं खिचा पूजा नं जूगुलिं खिचायात पूजा याना साःगु नसा नका हनाच्वंगु दु । कात्तिक कृष्ण चतुर्दशीया दिं खिचाया पूजा याना साःगु नसा नकेगु याःसा यमलोकया यात्रा याइबलय् यमराजया पहरेदारया रुपय् मू लुखाय् च्वनिपिं श्याम व सबल नाँया खिचां अपुक लँपू त्वःताबिइगु धार्मिक भलसा दु ।

छेँय् खिचा लहिबलय् मुटु व मधुमेह थेंज्यागु ल्वयेय् मजुइगु आधुनिक वैज्ञानिक मान्यता दु । वैवस्वत मन्वन्तर कुलय् जन्म जूम्ह खिचा आः लोकप्रिय छेँय् लहिम्ह जनावरया रुपय् तकं स्थापित जूगु दु । क्वः व खिचायात यमदूतया रुपय् नालेगु याः ।

कात्तिक कृष्ण चतुर्दशीया हे दिं हनिगु नरक चतुर्दशी नखः धाःसा कन्हय् सुथय् हनेमाःगु  पञचाङग निर्णायक समितिं न्ह्यथंगु दु । थौं सुथय् अरुणोदयकाल सिवें न्ह्यः चतुर्दशी तिथि मलाःगुलिं कन्हय् हनेगु निर्णय जूगु समितिं न्ह्यथंगु दु ।

नेपाल संबत ११४२ न्हूदँया लसताय् सिन्हं स्वां खलः न मोतरसाइकल ्याली व बसन्तपुरय् मंकाः म्ह पुजा यायेगु ज्याझः दु।

छगु पत्रकार सम्मेलनयासे खलःया संरक्षक मनोज नेवाः खड्गीं खलः मोतरसाइकल ्याली याना वयाच्वनागु नीन्यादँ थ्यनिगु जानकारी बियादीगु खः। उगु मोतरसाइकल ्याली कछला थ्व पारु कार्तिक १९ गते येँया बसन्तपुरं सुरु जुया येँ, यल, ख्वप, किपू चाःहिला येँ क्वाइगु जानकारी बियादीगु खः। खलःया संरक्षक खड्गीं उगु मोतरसाइकल ्याली ब्बति कायेगु निति छु हे शुल्क लगे जुइमखु धका न जानकारी बियादीगु खः।

मोतरसाइकल ्यालीया उलेज्या येँ महानगरपालिकाया मेयर बिद्यासुन्दर शाक्यं यानादी धका धयादीगु खः। अथेहे बहनि ६ बजे बसन्तपुरय् तजिक मंकाः म्हपूजा यायेगु ज्याझ्वः दु धका पत्रकार सम्मेलनय् जानकारी बियादीगु खः। म्हपुजा न निशुल्क जुइ धका धयादीगु दु। उगु मंकाः म्हपूजाय् अमेरिका, जर्मनया राजदुतपि नाप कलाकारपि न ब्बति काइगु धका जानकारी बियादीगु खः।

खलःया संरक्षक खड्गीं बसन्तपुरय् जुइगु मंकाः म्हपुजाय् छु न शुल्क लगे जुइमखु म्हपुजा यायेगु मं दुपिन्स सिन्हं स्वां खलःया ज्याकूथि बसन्तपुर स्वापू तयादीत पत्रकार सम्मेलनपाखे इनाप याउगु दु।