कोरोना भाइरस (कोभिड–१९) संक्रमण नियन्त्रया लागि निषेधाज्ञा जारी भएपछि जुया बन्द जुयाच्वंगु आन्तरिक उडान थौनिसे शुरु जुइत्यंगु दु।

मन्त्रिपरिषदया निर्णय अनुसार संस्कृति, पर्यटन तथा नागरिक उड्डयन मन्त्रालयं थौंनिसे आन्तरिक उडान नियमित रुपं शुरु यायेगु निर्णय यागु खः।

आःयात साविक तुलनाय् ५० प्रतिशत उडान जक जुइ। नेपाल नागरिक उड्डयन प्राधिकरणं न्हि ६४ गु उडान जक यायेगु तयारी यागु दु।

बुद्ध एयरं न्हि ३१ उडानया अनुमति बिगु दु सा यति एयरलाइन्सं १५, श्री एयरलाइन्सं ७, सौर्य एयरलाइन्सं ३ उडान याये दइगु जुगु दु।

बोधिसत्व बिहारपाखे पत्रकार मञ्चयात स्वास्थ्य सुरक्षा सामाग्री हस्तान्तरण बोधिसत्व बिहार बुढानिलकण्ठं नेपाल पत्रकार मञ्चयात कोविड संक्रमणं बचे जुइगु लागि स्वास्थ्य सुरक्षा सामग्री प्रदान यागु दु।

मञ्चया केन्द्रीय कार्यालय बिहारया अध्यक्ष हुई गुआङं मञ्चया अध्यक्ष युवराज विद्रोहीयात उगु सामग्री हस्तान्तरण यागु खः। उगु सामग्रीइ व्यक्तिगत सुरक्षा सामाग्री –पीपीई) २००, केएन ९५ माक्स २००, सर्जिकल माक्स १० हजार, पञ्जा ५०० व सेनिटाइजर ५०० मि.लि.या २०० उपलब्ध यागु खः। सामग्री हस्तान्तरण यासे विहारया अध्यक्ष हुई गुआङं महामारीपाखे मानव जगतय् जुइगु  क्षति घटे यायेत व मनय् त्रास हटे यायेगु हे सकसिगु न्हापागु दायित्व खः धका धयादीगु खः।

सामग्री व उपकरणया अभावं गुलि अस्पतालय् अझ न सेवायात गुणस्तरीय दयकेफुगु मदुनि। अज्यागु संस्थायात व महामारी इलय् नय्गु हे समस्या दुपिनिगु परिवारपिन्त थःपिन्स नियमित ग्वाहालि याना च्वनागु दु धका धयादीगु दु। अथेहे मञ्चया अध्यक्ष युवराज विद्रोहीं, आम नागरिकपिन्त सुसूचित यायेगु ज्याय् न्ह्यने च्वना करीव ३ हजार पत्रकार कोरोना संक्रमण जुगु व करीव २० म्ह सीगु दु धका धयादीगु खः।

पत्रकारपिन्त कोविडं आर्थिक, सामाजिक व पारिवारिक समस्या सिर्जना जुगु दु। थुगु कारण गुलि ला पेशाकर्मी पेशापाखे विस्थापित जुइगु अवस्था तक वंगु दु। अथेहे मञ्चया कोविड समन्वय समितिया संयोजक चन्द्रमणि भट्टराई न प्राप्त सामाग्री प्राथमिकताया आधारय् पत्रकारपिन्त वितरण यायेगु जानकारी बियादीगु खः। जिमिसं पत्रकारपिनिगु पेशाय् टिके याना उमिगु पारिवारिक व्यवस्थापनया ज्या न यायेमागु अवस्था दु धका भट्टराई न धयादीगु दु।

उगु ज्याझ्वलय् इन्टरनेशनल यूथ सोसाइटीया अध्यक्ष डा. प्रियरत्न महर्जन, मञ्चया महासचिव विमलकुमार थापापिनिगु न ब्बति दुगु खः।

जननायक बीपी कोइराला मेमोरिया ट्रष्टं “बीपी कोइराला अध्ययन अनुसन्धान केन्द्र” भवनया पलिस्था जूगु दु ।

थौं उगु भवन कांग्रेस सभापति शेरबहादुर देउवा, बीपीया काय् डा. सशांक कोइराला व येँ महानगरपालिकाया प्रमुख विद्यासुन्दर शाक्यलिसें संयुक्त कथं पलिस्था यानादिल । उगु भवन दयेकेया नितिं येँ महानगरपालिकां २गू क्वःति ध्येबाया आर्थिक ग्वहालि तकं यानादिगु दु । उगु भवनया नितिं बागमती प्रदेश सरकारं ५०गू लख व ट्रष्टया १गू क्वःतिया लगानी जुई । मेगु ध्येबा दातापिं पाखें ग्वहालि काइगु धाःगु दु । भवन निर्माणया नितिं थ्यंमथ्यं ४गू क्वःति ५०गू लख मालिगु अनुमान याःगु दु । येँ महानगरपालिका वडा ५ या हाँडीगामय् निर्माण जुइगु उगु भवन निर्माणया लागि यँ महानगरपालिकालिसें प्रदेश सरकारपाखे नं ग्वहालि दूगु प्रतिष्ठानया महासचिव रामचन्द्र पोख्रेलं जानकारी बियादिल ।

पलिस्था ज्यावलय् न्ववासें कांग्रेस सभापति देउवां बीपीया योगदानयात कदर याना भवन निर्माणया नितिं येँ महानगरपालिका लिसें ग्वहालि यानादिपिन्त पार्टीपाखें शुभाय् देछानादिल । बीपी राजनीतिक, साहित्यिक व सामाजिक व्यक्तित्वया तःमिं जुयादि’, देउवां धयादिल, बीपीया लुमन्ति झि सकसिनं यायेमा । वय्क विद्वान जक मखु राष्ट्रवादी व समाजवादी नेता तकं जुयादि ।’ थ्यंमथ्यं निगू मिनेट जक न्ववानादिम्ह देउवां वइगु ईलय् दक्वः नेपाःमिपिनि नितिं थ्वः केन्द्र बीपीया ख्याति व वय्कया बारे अध्ययन अनुसन्धान यायेगु केन्द्रया रुपय् बल्लाक्क दनिगु भलसा कयाच्वना धयादिल । ज्यावलय् सम्बोधन यासें कांग्रेस महामन्त्री व बीपी काय् सशांक कोइरालां बीपीया लुमन्तिइ भवनया पलिस्था जूगु दिंया महत्वकथं कयागु धयादिल ।

येँ महानगरपालिकाया मेयरज्यूयात सुभाय् बियादिल, मेयुज्यू नं बजेट बियादिल, उकिया लिधंसाय् थौं पलिस्था नं जुल । भवन ला संरचना जक खः । अन आत्मा दयेमा, आत्मां हे बः बिइगु खः । आत्मा दयाच्वनिकथं अध्ययन अनुसन्धान केन्द्रयात न्ह्याकादिसं ।’ वय्कलं धयादिल । ज्यावयात सम्बोधन यासें येँ महादगरपालिकाया प्रमुख शाकयं थः छुं ईलय् बीपीया विचाः न्यनेत व स्वयेत सार्वजनिक ज्यावलय् तकं वनागु लुमंकुसें थौं वय्कया हे लुमन्तिइ निर्माण जुइत्यंगु बीपी अधययन अनुसन्धान केन्द्र भवनया पलिस्था ज्याझ्वय् दुथ्याय् दुबले तसकं लसतां जाःगु धयादिल ।

मेयर शाक्यं, छुं ईलय् तापाक्क न्यनेगु व स्वयेगु व थम्हेसियां सम्मान यानाम्ह मनुया लुमन्तिइया भवनयात ग्वहालि यायेखन तसकं लय्ताकाच्वना’ धयादिल । ज्याभ्mवलय् कांग्रेस सभापति शेरबहादुर देउवापाखे ताकेता याना दुर्घटनापाखें देय्यात बचे यायेत इनाप यानादिल । बीपीं २०१५ सालय् हःगु दुई तिहाइ लिपाः तत्कालिन शासकपाखें लिछ्यात’ शाक्यं धयादिल, आः या नेतृत्वपाखें मुलुकयात गुगुनं दुर्घटना मजुइक देय्यात बचे याना न्ह्यावनिइ धैगु भलास कयाच्वना’ शाक्यं थः स्वर्गीय बीपीया कार्यकर्ता मजुसां नं छम्ह अनुयायी जूगु स्मरण यानादिल । देय् थपूया नितिं जीवन समर्पण यानादिपिं दक्व नेतापि हनेबःपिं जुयादि’, वय्कलं धयादिल । ज्याझ्वलय् उपमेयर हरिप्रभा खड्गी श्रेष्ठलिसें थीथी लागाया व्यक्तित्वपिनिगु ब्वति दूगु खः ।

शेयर बजाःया परिसूचक नेप्से थौं बुधवाः सामान्य घटे जुगु दु।

नेप्से थौं चार दशमलव १३ अङ्क कुहावया २ हजार ८२३ दशमलव ८७ विन्दुइ कुहावंगु खः। थौं बैंकिङ समूहया शेयर चार अङ्क, व्यापारय् २२ अङ्क, होटल समूहय् ५०, माइक्रो फाइनान्सय् ४७, जीवन बीमा समूहय् ११२ व लगानी समूहया शेयर १०५अङ्क घटे जुगु दु। विकास बैंक, जलविद्युत्, फाइनान्स, निर्जीवन बीमा, उत्पादन व मेमेगु समूहया शेयर धासा थहावंगु दु।

२२० कम्पनीया १ करोड ६२ लाख कित्ता शेयर ५ अर्ब ८३ करोड रुपैयाँया किनबेच जुगु खः। दकलय् अप्वो नेपाल इन्स्योरेन्स कम्पनीया ३० करोड रुपैयाँया शेयर किनबेच जुगु खः।

थौं एचआईडीसीएलया शेयर दकलय् अप्वो ४ प्रतिशत वया अप्वो घटे जुगु खः । समग्र बजाः घटे जूसा पोखरा फाइनान्स, सेन्ट्रल फाइनान्स, नेपाल फाइनान्स, मल्टिपर्पोज फाइनान्स व प्रोग्रेसिभ फाइनान्सया शेयर भाः १० प्रतिशतं थहावंगु दु।