सप्तकोसी नदीइ लःया बहाव अप्वोगुलि ब्यारेजय् खतराया संकेत क्यनेवं ह्याउगु मतः च्याकूगु दु।

निरन्तर वाःवया सप्तकोसीइ लःया बहाव अप्वोया वंगुलि ह्याउगु मतः च्याकूगु खः। बुधबाः सुथय् करिब २ लाख ६१ हजार क्युसेक लःया बहाव मापन जुगु कन्ट्रोल टावरं धाउगु दु।

कोसी ब्यारेजया ५६ मध्ये ४२ गु लुँखाः चायकूगु दु। स्थानीय प्रशासनं खुसिया नदी तटीय क्षेत्र व जःखः च्वना च्वंपिन्त सतर्क जुइत सूचं जारी याउगु दु।

आः प्रदेश नम्बर–१ या पहाडी व तराई क्षेत्रय् आः न तसकं वाः वयाच्वंगु दु।

सुदूरपश्चिम प्रदेशय् आइतबाः निसे मदिक्क वाः वःगु कारण खुसिँबाः नाप चलः वया १५ म्ह मनु सी धुकुगु दु।

सुदूरपश्चिम प्रदेश प्रहरी कार्यालय धनगढीया कथं डोटीइ गुम्ह, बैतडीइ प्यम्ह व डडेलधुराय् निम्ह सी धुकुगु दु। प्रदेश प्रहरी कार्यालयया प्रवक्ता प्रहरी वरिष्ठ उपरीक्षक बिक्रम चन्दं डोटीया जोरायल गाउँपालिका–४ य् अन्दाजी ४२ दँ दुम्ह शेरबहादुर बिक, वया काय् १८ दँ दुम्ह मोहन बिक, १३ दँ दुम्ह पवित्रा बिक व १६ दँ दुम्ह रविन बिक चलखं सीगु दु धका जानकारी बिउगु दु।

डोटीया हे जोरायल गाउँपालिका–३ या ६३ दँया जोगी सार्की, शिखर नगरपालिका–११ या ३६ दँ मन्दरा बलायर, सायल गाउँपालिका–६ मेल्लेखय् चलः वना १४ दँया सागर कुन्जेडा व १० दँया आशिष कुन्जेडा सीउगु दु धका प्रहरी वरिष्ठ उपरीक्षक चन्दं धाउगु दु।

सामाजिक सद्भावया पक्षयात पुस्तान्तरण यायेगु उदेश्यं येँ महानगर वडा ३ य् थौं मंकाः सिन्ह टिइगु व जेष्ठ नागरिक सम्मान ज्याझ्वः जुगु दु।

उगु ज्याझ्वलय् पूर्व उपप्रधानमन्त्री ईश्वर पोखरेल, महानगरया मेयर विद्यासुन्दर शाक्य व वडाध्यक्ष दीपक के. सी. न दोसल्ला न्येयका नाप रुद्राक्षया मालां सम्मान याउगु दु।

वया लिपा जेष्ठ नागरिकपिन्त सिन्ह टिइकेगु ज्याझ्वः जुगु खः। पूर्व उपप्रधानमन्त्री पोखरेलं, मोहनी सकसिया भाषाभाषी व जातजातियात सामाजिक सद्भावया सुत्रय् तःगु दु धका उल्लेख याउगु दु। थ्व थः व थं सम्बन्ध स्थापना यायेगु ई न खः धका नेता पोखरेलं धाउगु खः।

जेष्ठ नागरिकपिनिगु सहज जीवनया लागि येँ महानगरपालिकां महानगर विशेष भत्ताया व्यवस्था यानागु दु। ज्याझ्वलय् महानगरया मेयर शाक्यं धाउगु दु, हरेक वडाय् जेष्ठ नागरिक मनोरञ्जन केन्द्र दयकेत्यनागु दु। जेष्ठ नागरिकमैत्री पार्क निर्माण यायेत्यनागु दु।

स्वास्थ्य उपचारयात सहज दयकयेत प्रणाली विकास यात्यनागु दु। मोहनी सिन्हयात समावेशी दयकेत स्वयाउगु खः। थन जिमिसं जात छुटे यानागु मदु। वडाय् न्ह्याउगु न जातयापि दु सा जेष्ठ नागरिकपिन्त सःतागु दु धका मेयर शाक्यं धाउगु दु।

सुनसरीया धरानय् चलखं निम्ह मस्त सीउगु दु।

मदिक्क वाः वया चलः वया धरान उपमहानगरपालिका– १३ नागेश्वर मार्ग च्वपि निसान राईया च्यादँ दुम्ह म्ह्याय् निसु व प्यदँ दुम्ह काय् निहान राई सीउगु खः।

मंगलबाः न्हिनसिया पौने २ बजे चलः वया टिनया छेँ ल्हाउगु खःसा निम्ह मस्त अझ न बेपत्ता जुयाच्वंगु दु। घटनाया जानकारी वयेव इलाका प्रहरी कार्यालय धरानपाखे उद्धारया लागि प्रहरी टोली खटे जुगु दु।

उद्धारय् खटे जुपि प्रहरी टोलीं न्हिनसिया साढे ३ बजे निम्ह हे मस्त मृत अवस्थाय् लुगु दु धका प्रदेश प्रहरी कार्यालय विराटनगरं जानकारी बिउगु दु।

प्रतिनिधिसभाया बैठक निन्हु लिपा लिहावंगु दु। प्रतिनिधिसभाया बैठक थ्व हे वइगु कार्तिक ९ गतेया लागि सःतूगु खः।

तर, ९ गते प्रमुख विपक्षी नेकपा एमाले न पालिका अधिवेशन याउगुलि प्रतिनिधिसभाया बैठक लिजाउगु धका संसद सचिवालयं धाउगु दु।

९ गते एमाले न देयन्यक पालिका अधिवेशन याइगु जुगु दु। सभामुख अग्निप्रसाद सापकोटां प्रतिनिधिसभा नियमावली २०७५ या नियम ६ या उपनियम ३ बमोजिम कथं बैठक कार्तिक ११ गते न्हिनय् २ बजे बैठक सःतिइगु क्वछिउगु दु धका संसद सचिवालयया महासचिव डा.भरतराज गौतमं छगु सूचं पिकया जानकारी बिउगु दु।