वंगु २४ घण्टाया दुने देयन्यक १,०९६ म्हेसित कोरोना भाइरस संक्रमण पुष्टि जुगु दु।

देयन्यक ९ हजार ९१६ म्हेसिगु पीसीआर परीक्षण याउगुलि ९५७ म्ह व १ हजार ७७६ म्हेसिगु एन्टिजेन परीक्षण याउगुलि १३९ म्ह याना १ हजार ९६ म्हेसित कोरोना भाइरसया संक्रमण खनेदुगु धका स्वास्थ्य तथा जनसंख्या मन्त्रालयं धाउगु दु।

अथेहे वंगु २४ घण्टाय् कोरोना संक्रमणं १२ म्ह सीउगु दु स १ हजार ४ म्ह कोरोनामुक्त जुगु दु। थ्वनाप नेपालय् कोरोना संक्रमित जुपि ८ लाख ६ हजार ५१७ म्ह थ्यःगु दु सा ११ हजार ३०५ सी धुकुगु दु।

आःतक ७ लाख ८३ हजार ३९७ म्ह संक्रमणमुक्त जुइ धुकुगु दु।

जलवायु परिर्वतनसम्बन्धी सम्मेलनय् भाग कायेगु निति प्रधानमन्त्री शेरबहादुर देउवा कात्तिक स्वगूगु वाःय् ब्रिटेन वनिइगु जुगु दु।

सोमबाः च्वंगु मन्त्रिपरिषद् बैठकं ग्लास्गोमाय् जुइगु जयवायु परिर्वतनसम्बन्धी वल्र्ड लिडर समिटिइ भाग कायगु निति प्रधानमन्त्रीे नेतृत्वय् प्रतिनिधिमण्डल गठन यायेगु निर्णय याउगु दु धका सञ्चारमन्त्री ज्ञानेन्द्रबहादुर कार्की न जानकारी बिउगु दु।

वर्ल्ड लिडर समिट नोभेम्बर १–२ य् स्टकल्याण्डया ग्लास्गोमा जुइत्यंगु खः। थ्व न्हापागु प्रधानमन्त्रीया रुपं देउवाया न्हापागु विदेश भ्रमण खः।

सरकारं राष्ट्रिय खेलकुद परिषद् (राखेप)या सदस्य सचिव रमेश सिलवालयात बर्खास्त याउगु दु।

मन्त्रिपरिषदया थौं सोमबाः च्वंगु बैठकं बर्खास्तीया प्रक्रिया न्ह्यने यकेत अनुमति बिउगु दु धका छम्ह मन्त्रीं जानकारी बिउगु दु। सिलवाल २३ असार २०७६ य् न्हापागु पटक राखेप सदस्य सचिव नियुक्त जुगु खः।

राष्ट्रिय खेलकुद ऐन २०७७ या कारण दच्छि दुने हे पदमुक्त जुगुलि सिलवालयात केपी शर्मा ओली नेतृत्वया सरकारं १२ साउन २०७७ य् पुनः नियुक्त याउगु खः। ऐन कथं सदस्य सचिवया लागि आह्वान याउगु आवेदनय् २७ म्हेसिया निवेदन बिउगु खः।

नेपालभाषाया लोकंह्वाःगु ल्यायेसय् मय्जु बालांया च्वमि लक्ष्मण नेवाः आकाझाकां मन्त।

नेपालभाषा ख्यःया न्ह्यलुवाः, शिक्षक, नापं साहित्यकार त्रिशुलीया लक्ष्मण नेवाः (श्रेष्ठ) ७४ दँया वैशय् मदुगु खः। वयकः नेवाः गुथिया संस्थापक उपाध्यक्ष न खःसा पंचायत इलय् त्रिशुली वडा अध्यक्ष तक जुयादीगु खः।

मदुगु नेवाःयात स्वदँ न्ह्यः लहना पंचबीर सिरपापाखे न सम्मानित जुयादीगु खः। ताः ईनिसे क्यान्सर ल्वचं पिडित जुयादीम्ह वयकः यलया स्टार अस्पतालय् मदुगु खः।

वयकः वासः यायेगु झ्वलय् असोज ३० गते मदुगु खः। वयकःया स्वम्ह काय् व निम्ह म्ह्याय्पि दी।

नेपाल मण्डल टेलिभिजनया नायः नाप नेपाल संवत ११४१ न्हुदँ समारोह समितिया अध्यक्ष रमेश महर्जन थौं सोमबाः आकाझाकां मन्त।

महर्जनयात कोरोना संक्रमण जुयाच्वंगु खःसा वय्कः निमोनिया जुयाः थौं सोमवाः मदूगु खः। मदुम्ह महर्जन छम्ह उद्योगपति लिसें समाजसेवी खःसा वय्कः रत्न आभूषण महासंघया अध्यक्ष न ख। वयकया असामयिक निधनं नेवाः सन्चारख्यलय् तच्वयेक घाःलागु दु ।अथेहे, मदुम्ह महर्जन विवेकशील साझा पार्टीया केन्द्रीय दुजः नं खः।

कोरोनाया हुनिं मदुगुलिं अन्तिम श्रद्धाञ्जलि व शवयात्रा मयाःसे सेनापाखें तप्यंक पशुपति दीपय् यंकाः विद्युत शव दाहगृहय् अन्तिम संस्कार याइगु व अन्तिम संस्कार याये न्ह्यः सुथसिया १०ः३० ता इलय् अन्तिम श्रद्धाञ्जलि ज्याझ्वः जुइगु जानकारी मदुम्ह रमेश महर्जनया छेँजः स्रोतं जानकारी ब्यूगु दु । स्रोतया जानकारी कथं, रमेश महर्जनया म्हिगः दुने ल्वचं थियाच्वंसां नं ज्या व्यस्तताया हुनिं उगु ल्वय् अनभिज्ञ अवस्थाय् लानाच्वंगु व आकाझाकां उगु ल्वय् च्यापेजुइधुंकाः तिनि रमेश महर्जन अस्पताल भर्ना जुयादीगु खः धकाः धाःगु दु ।

थथे आकाझाकां ल्वचं च्यापेजुइधुंकाः अस्पताल भर्ना जुइधुंकाः इमर्जेन्सी रुपं उपचार यायेमाःगु व उपचारया झ्वलय् मदुगु लिसें कोरोना पुष्टि जूगु जानकारी छेँजः स्रोतं ब्यूगु दु ।

५६ दँया उमेरय् मत्यवं मदुम्ह रमेश महर्जन यल महानगरपालिका ७ वडा पिलाछेँया बासिन्दा खःसा वय्कःया जहान लिसें निम्ह म्ह्याय् व छम्ह काय् दी ।