सरकारं न्यूनतम साझा कार्यक्रम सार्वजनिक यागु दु।

गठबन्धनय् आबद्ध शीर्ष नेतापिनिगु उपस्थितिइ थौं आइतबाः प्रधानमन्त्री तथा मन्त्रिपरिषद् कार्यालय ग्वसाः ग्वंगु पत्रकार सम्मेलनय् सरकारया न्यूनतम साझा कार्यक्रम सार्वजनिक यागु दु।

स्वास्थ्य सामग्री खरिदय् जुगु अनियमितता छानबिन यायेगु व दोषी खनेदुपि व्यक्ति व संस्थायात कारबाही यायेत न्यूनतम साझा कार्यक्रमय् उल्लेख यागु दु।

नेपाल आदिवासी जनजाति पत्रकार महासंघ (फोनिज) न २०७७ व २०७८ या ‘आदिवासी जनजाति राष्ट्रिय पत्रकारिता पुरस्कार’(फोनिज अवार्ड)पाखे पुरस्कृत जुइपिनिगु नां सार्वजनिक यागु दु।

वंगु दँय् कोरोना महामारीया कारण स्थागित जुगु पुरस्कार व थुगु दँया नाप च्याम्हेसित पुरस्कृत जुइपिनिगु नां फोनिज सार्वजनिक यागु दु। फोनिजया महासचिव मनोज घर्तीमगरं छगु विज्ञप्ती पिकया फोनिज अवार्ड–२०७७ पाखे पत्रकार आङदावा शेर्पा, मौसम रोका मगर, कुमार यात्रु व राजकुमार दिक्पाल पुरस्कृत याइगु जुगु दु धका धागु दु।

अथेहे फोनिज अवार्ड–२०७८ पाखे तिलक पुन, रचना श्रेष्ठ, इन्द्रजीत मुखिया व भवानी बराल पुरस्कृत यायेगु जुइ धका धागु दु। फोनिजं थुगु दँय् ‘फोनिज मातृभाषा पत्रकारिता सम्मान’ तक प्रारम्भ यागु दु। ‘फोनिज मातृभाषा पत्रकारिता सम्मान–२०७८’ पाखे थारु भाषाय् प्रकाशित जुयाच्वंगु ‘पहुरा दैनिक’ व लिम्बू भाषां प्रकाशित जुयाच्वंगु ‘तान्छोपा मासिक’ यात मंकाः कथं सम्मानित यायेगु निर्णय जुग दु धका विज्ञप्तीइ उल्लेख दु।

पत्रकारिता पुरस्कार व मातृभाषा सम्मानयो राशी २० हजार रुपैयाँ दु। फोनिजं थःगु २२ क्वःगु स्थापना दिवस व विश्व आदिवासी दिवसया लसताय् साउन २७ गते च्याम्ह वरिष्ठ पत्रकारपिन्त पुरस्कार व निगु मातृभाषी संचार संस्थायात सम्मान प्रदान यायेत्यंगु खःः।

सत्ता गठबन्धनया नेतापिन्स सरकारं न्यूनतम साझा कार्यक्रमयात अन्तिम रुप बिगु दु। उगु कार्यक्रम थौं न्हिनसिया ४ बजे सिंहदरबारं सार्वजनिक यागु दु धका नेतापिन्स धागु दु।

कार्यक्रमयात अन्तिम रुप बिइत गठबन्धन दलया शीर्ष नेता व कार्यदल सदस्यपि दथुइ थौं सुथय् बालुवाटारय् छलफल जुगु खः। उगु छलफलं कार्यदलयात अन्तिम रुप बिइगु जुइ धका छम्ह सदस्यं जानकारी बिगु दु।

कांग्रेस, माओवादी केन्द्र व जसपाया नेतापि दुथ्यागु कार्यदलं सरकारया साझा न्यूनतम कार्यक्रमया प्रतिवेदन तयार याना साउन २४ गते शीर्ष नेतापिन्त बुझे यागु खः। उकियात थौं अन्तिम रुप बिइत्यंगु खः।

लुँया भाः थौं तोलां १५०० सय रुपैयाँ क्वहावंगु दु।

शुक्रबाः ९१ हजार ५ सय रुपैयाँ कारोबार जगु छापावाल लुँ थौं आइतबाः ९० हजार रुपैयाँय् कुहावंगु दु।

अथेहे तेजावी लुँ  तोलां १ हजार ४५० रुपैयाँ कुहावंगु दु। वंगु शुक्रबाः छगु तोलां ९१ हजार रुपैयाँ कारोबार जुगुलि तेजावी लुँ थौं ८९ हजार ५५० रुपैयाँ कायम याना कारोबार जुगु खः।

अथेहे वहः तोलां २५ रुपैयाँ कुहावया तोलां १२४० रुपैयाँ काराबोर जुगुलि थौं १२६५ रुपैयाँ न कारोबार जुगु दु।

नेकपा एमालेया सचिव योगेश भट्टराईयात मातृशोक जुगु दु।

भट्टराईया मां महेन्द्रादेवी भट्टराई थौं शनिबाः ९५ दँय् मदुगु खः।

परिवारं बिगु जानकारी कथं अन्तिम संस्कार कन्ह्यः आइतबाः सुथय् पशुपति आर्यघाटय् याइ धका धागु दु।