लुँया भाः तोलां थौं न्यासः थहावंगु दु।

थौं तोला न्यासः थहावना ९० हजार ४ सय रुपैयाँ थ्यंगु दु धका  नेपाल सुनचाँदी व्यवसायी महासंघं धाउगु दु।

अथेहे वहः तोला न थौं झीतका थहावंगु दु। थौं तोलां झीतका थहावना ११ सय ७० रुपैयाँ थ्यंगु दु धका महासंघं धाउगु दु।

नेकपा (एकीकृत समाजवादी) न नेकपा (एमाले) परित्याग याना वःम्ह भानुभक्त जोशीयात स्थायी कमिटी सदस्य दयकूगु दु।

जोशीं, एमाले केन्द्रीय सदस्यपाखे राजीनामा बिया बिहीबाः एकीकृत समाजवादीइ दुहावंगु खः। वयात लसकुसयासे अध्यक्ष माधवकुमार नेपालं एमालेया मेपि नेतापि थःम्हेसिया नेतृत्व यानागु पार्टीइ वइ धका धाउगु खः।

एमाले अध्यक्ष केपी शर्मा ओली कम्युनिस्ट आदर्शपाखे च्युत जुइ धुकुगु, राष्ट्रियताया मामिलाय् आत्मसपर्णवादया नीति कागु धका दाबी यागु दु। वयकलं जोशीयात पार्टीया स्थायी कमिटी सदस्य दयकेगु घोषणा याउगु दु।

येँया इटुम्बहाः भाष्करदेव संकारित केशचन्द्रकृत परावत महाविहारय् २०४२ सालय् खुँया यंकुगुु यक्षिणीया मूर्ति लुगु दु।

थथे ३५, ३६ दँ न्ह्यः तंगु यक्षिणीया मूर्ति पुरातत्वया विद्यार्थी विवेक सिटौलां अमेरिकाया न्युयोर्क ‘मेट्रोपोलिटन म्युजियम अफ आर्टय् लुइकुगु दु।

वयकःया कथं मूर्ति संग्राहलयया भण्डारय् प्वः चिनातःगु अवस्थाय् लुगु खः।

नेपाल संवत आन्दोलनया न्ह्यलुवा, भाषासेवी, समाजसेवी नाप उद्याोगपति लक्ष्मीदास मानन्धरयात छगु ज्याझ्वः दथुइ हनेज्याझ्वः याउगु दु।

नेपाल संवत न्हूदँ राष्ट्रिय समारोह समिति ११४१ या ग्वसालय् लक्ष्मीदास मानन्धरयात नेपाल संवत न्हूदँ राष्ट्रिय समारोह समिति ११४१ या अध्यक्ष रमेश महर्जनं हना ज्याझ्वः यानादीगु खः।

समारोह समिति ११४१ या अध्यक्ष महर्जन दोसल्ला न्ययेका हनापौं लल्हानादीगु खः। पुर्व स्वास्थ्य राज्यमन्त्री तीर्थराम डंगोल, येँ महानगर १७ वडाध्यक्ष नबिन मानन्धर, देय् दबुया अध्यक्ष नरेश ताम्राकार नाप समारोह समितीया दुजःपिनिगु न उपस्थिति दुगु खः। 

नेपाली कांग्रेसया नेता प्रकाशमान सिंह व नेपाल कम्युनिष्ट पार्टी विप्लव पुचःया महासचिव नेत्रविक्रम चन्द विप्लव दथुइ भेटवार्ता जूगु दु।

नेता सिंहया निवास चाक्सीबारीइ थौं बुधवाः निम्ह नेतापि दथुइ भेटवार्ता जूगुु खः।

उगु भेटवार्ताय् मुलुकया लिपांगु राजनीतिक अवस्था व मेमेगु समसामयिक विषय नाप सहलह जूगु धाःगु दु।