Display Style:
Column Style
भारतया राजनीतिक नक्सायात नेपाल सरकारयात अमान्य
लहना न्यूज | ने.सं. ११४० कछलाथ्व नवमि (६ नोभम्बर, २०१९), बुधवाः
भारतं पिथंगु न्हूगु राजनीतिक नक्सायात नेपाल सरकारं मान्य मजुइगु धाःगु दु ।
परराष्ट्र मन्त्रालयं थौं बुधवाः छगू प्रेस विज्ञप्ति जारी यासें भारतया न्हूगु नक्सा मान्य मजुइगु धाःगु खः ।
परराष्ट्र मन्त्रालयं प्रेस विज्ञप्ति जारी यासें यकःति ढंगं याःगु छुं नं निर्णय नेपाःयात मान्य मजुइगु न्ह्यथनातःगु दु । अथे हे, कालापानी लागा नेपाःया भूभाग खः धइगु विषयस नेपाल सरकार स्पष्ट जूगु खँ नं न्ह्यथनातःगु दु ।
विज्ञप्तिइ न्ह्यथनातःगु दु, ‘निगू देय् दथुइ ज्यंके मानीगु सीमा सम्बन्धि विषयस निगू पक्षया थःथवय् सहमतिइ ज्यंकेमाःगु व यकःति ढंगपाखें याइगु छुं नं निर्णय नेपाल सरकारयात मान्य मजुइगु खँ स्पष्ट दु ।’
मन्त्रालयं सीमा समस्याया समाधान ऐतिहासिक दस्तावेज नापं तथ्य प्रमाणया लिधंसाय् कुटनीतिक माध्यमपाखें जुइमाःगु मान्यताय् दृढ जूगु तकं न्ह्यथनातःगु दु ।
सञ्चार माध्यमय् नेपाःया भूभागयात दुथ्याकाः भारतं न्हूगु नक्सा जारी याःगु विषययात कयाः विरोध जुया वयाच्वंगु दु ।
न्हुदँया लसताय् भिंतुना कालबिल ज्याझ्वः
लहनान्युज | कछलाथ्व सप्तमी ११४० (नोभेम्वर ३ २०१९)
न्हुदँ ११४०या लसताय् नेवाः न्ह्यलुवा जितेन्द्र साय्मिपाखे नेपालभाषाया साहित्यकार, पत्रकार नाप नेवाः न्ह्यलुवापिं दथुइ भिंतुना कालबिल ज्याझ्वः जुगु दु ।
उगु ज्याझ्वलय् प्रदेश न ३ या सांसद राजेश शाक्य, लुम्बिनी बिश्वबिद्यालयया पुलाम्ह उपकुलपति प्रा.डा. त्रिरत्न मानन्धर लगायत नेपालभाषा ख्यलय् च्वपिं थी थी ब्यक्तित्वपिनिगु उपस्थिति दगु खः ।
पत्रकार दबू यल जिल्लाय् अध्यक्ष सागर महर्जन
नृपेन्द्रलाल श्रेष्ठ | कछलाथ्व सप्तमी ११४० (नोभेम्वर ३ २०१९)
नेवाः पत्रकार राष्ट्रिय दबू यल जिल्लाय् अध्यक्ष सागर महर्जन निर्र्वािचत जुगु दु । दबूया शनिवाः क्वचाःगु स्वक्वःगु अधिवेशनय् महर्जनया अध्यक्षताय् न्हुगु कार्यसमिति ल्यःगु खः ।
उगु समिति उपाध्यक्षय् प्रशान्त माली, सचिव विकास माली, सहसचिव मञ्जु बज्राचार्य, कोषाध्यक्ष सुनील बज्राचार्य सर्वसम्मत ल्यःगु खःसा दुजलय् शनिराज शाक्य, रेगिसा महर्जन, अनुप शाक्य, रजत शाही व नरेश महर्जनयात न सर्वसम्मत ल्यःगु खः ।
अथेहे केन्द्रीय महाधिवेशनया लागि रुबी श्रेष्ठ, राजेश बज्राचार्य, कल्पना महर्जन, रमा तुलाधर बज्राचार्य,लक्ष्मी श्रेष्ठ,पूर्णिमा शाक्य ,बाबुकाजी महर्जन व सुशील शाहीयात पार्षद ल्यःगु खः ।
उगु ज्याझ्वलय् मूपाँहा प्रदेश नं ३ या सांसद् शोभा शाक्यं स्वक्वःगु अधिवेशनया उलेज्या यानादिगु खः। मूपाँहा सांसद् शाक्यं सञ्चार क्षेत्रय् दक्को सियागु सः थ्वयेकेगु नितिं सञ्चार क्षेत्र समावेशी दयेके माःगु खँय् बःबियादिसे थुकिया लागि पत्रकार दबू नं ग्यसु लाक्क ज्यायेमाः धका भिंतुना बियादिगु खः ।
ज्याझ्वलय् पत्रकार दबूया केन्द्रीय अध्यक्ष श्रीकृष्ण महर्जनं सञ्चार क्षेत्रयात समावेशी दयेकेगु निति दबू न निरन्तर ज्या याना वयाच्वनागु धयादिसे समावेशी सञ्चार हे जक संभव जुइ धका धयादिल ।
अधिवेशन तयारी समितिया संयोजक सुरजवीर बज्राचार्यया सभाध्यक्षताय् जुगु उगु ज्याझ्वलय् न्हुँद राष्ट्रिय समारोहसमिति ११४० या अध्यक्ष रमेश महर्जन, न्हुँद समारोह समिति यलया संयोजक नाप बौद्ध विहार संघया महासचिव सुरेन्द्र बज्राचार्य, ताम्रकार समाजया अध्यक्ष रवीन्द्रराज ताम्रकारपिन्स थःथःगु नुँगः खँ तयादिगु खः ।
प्रधानया प्यंगू सफू चिखिफ्यनेज्या
अमिर मैया रञ्जित | कछलाथ्व सप्तमी ११४० (नोभेम्वर ३ २०१९)
साहित्यकार अपर्णा प्रधानया प्यंगू सफू चिखिफ्यने ज्या जूगु दु ।
साहित्यकार प्रधानया ‘जि भमचा कतांमरि’ मूपाहाँ शताब्दी पुरुष सत्यमोहन जोशी, ‘झीगु साहित्यय् मथुरा साय्मि’ (नेपालभाषा) नेपालभाषा एकेडेमिया भाइस चान्सलर यज्ञरत्न धाख्वाः, ‘म र मेरो समय’ (खस भाषा) कृष्णलाल प्रधान व 'Time Of My Life' (अंग्रेजी भाषा) नेपालसाहित्य मन्दिरया नायः तिलक प्रकाश कायस्थं मंकाः कथं पितब्वज्या यानादीगु खः ।
पिदंगु सफू ‘म र मेरो समय’ साहित्यकार ईश्वरी मैया श्रेष्ठ व 'Time Of My Life' सिल्भिया राजोपाध्यायं भाय् हिलादीगु खः ।
मूपाहाँ जोशीं नेवाः साहित्ययात अग्रेजी भाषं भाय् हिलाः विश्वव्यापीकरण यायेमाःगु खँय् बःबियादिल ।
ज्याझ्वलय् साहित्यकार समाजसेवी हितकर वीर सिंह कंशाकार, समालोचक पूर्ण काजी ताम्राकार, डा. सुन्दरकृष्ण जोशी, उपन्यासकार मथुरा साय्मि लगायतपिसं पिदंगु सफू नापं च्वमि प्रधानया बारय् कुलादिल ।
भाइस चान्सलर धाख्वाःया सभाध्यताय् जुगु उगु ज्याझ्वः हसना लवजुं न्ह्याकादीगु खःसा बिमल ताम्राकारं लसकुस न्वचू तयादीगु खः ।
किपा–राजेन्द्र रञ्जित
मिसा दबूया स्वक्वःगु दँ मुँज्या
अमिर मैया रञ्जित | कछलाथ्व सप्तमी ११४० (नोभेम्वर ३ २०१९)
नेवाः मिसातयेगु राष्ट्रिय संगठन नेवाः मिसा दबूया स्वक्वःगु बुदिं क्वचाःगु दु ।
उगु ज्याझ्वलय् मूपाँहा कथं प्रदेस नं. ३ या सांसद शोभा शाक्यं उलेज्या यानादीसे निम्ह नेवाः मिसापिं नाप छम्हेसित ’रत्नदेवी प्रजापति सिरपाः’ लःल्हागु खः ।
खुगू दसक निसें भाषिक आन्दोलनय् मदिक्क न्ह्याना नेपालभाषा साहित्य सृजना नापं राजनितिक ख्यलय् नं सक्रिय रूपं न्ह्यज्याना च्वंम्ह मय्जु सुवर्ण केसरी चित्रकार, सुक्ष्मबिज्ञानय् पि.एच.डी यानादीम्ह न्हापाम्ह मिसा नापं संबैधानिक आयोगया नायः जुयादीम्ह डा. कयोदेवी यमियात दबूपाखें हंगु खः ।
अथेहे झिदँ न्ह्यःनिसें मदिक्क नेवाः मिसा अधिकार ख्यलय् ज्या यानादीम्ह छम्ह नेवाः मिसायात रत्नदेवी श्यामदास प्रजापति ट्रष्ट पाखेँ झिद्व तका दांया ‘रत्नदेवी प्रजापति सिरपाः’ इन्दिरा श्रेष्ठयात लःल्हागु खः ।
दबूया नायः रश्मिला प्रजापतिया सभाध्यक्षताय् जुगु उगु ज्याझ्वलय् नेवाः देय् दबूया मूछ्याञ्जे माइलाबाबु द्यला, न्हुदँ समारोह समिति ११४० या नायः रमेश महर्जन, नेपालभाषा मंका खलः यलया नायः ऋषि प्रसाद श्रेष्ठपिन्सं भिन्तुना न्वचु तयादिगु खःसा दबूया न्वकू कस्तुरी श्रेष्ठं लसकुस व दांभरी अर्चना तण्डुकारं सुभाय् देछा यानादीगु खः ।
किपा–राजेन्द्र रञ्जित
