Display Style:
Column Style
सुवर्ण शाक्यया ‘ग्वलाखँ’ सफू पितब्वज्या
नृपेन्द्रलाल श्रेष्ठ | कौलागा चर्तुदशी ११३९ (अक्टुवर २७ २०१९)
ओलम्पस क्लबया ग्वसालय् नेपाल संबत ११४० न्हूदँया भिंतुना कालबिल ज्याझ्वः जुगु दु ।
उगु ज्याझ्वलय् प्रा. सुवर्ण शाक्यया ‘ग्वलाखँ’ (च्वसु मुना) पितब्वज्या न्हूदँ राष्ट्रिय समारोह समिति ११४० या नायः रमेश महर्जनं यानादिगु खः ।
पितब्वज्या जुगु सफु ‘ग्वलाखँ’ (च्वसु मुना) या समिक्षा नेपालभाषा एकेदमीया सदस्य सचिव नाप नेवाः न्ह्यलुवा मल्ल के सुन्दरं यानादिगु खः । सफुतिइ दथ्याना च्वंगु च्वसु तसक सान्र्दभिक जुगु धयादिसे झीसं हनेगुु नखः मोहनी नखः व बिजया दशमी अले स्वन्ति नखः व तिहार धैगु छगू हे खः । झीगु संस्कृति बिकृति हया पंचाङ्ग निर्णायक समितिं म्ह पुजायात गोलमाल यायेगु स्वःगुलि खबरदारी यानादीगु दु । वयकल झीसं हनेगु नखः धडि पलाः स्वया मखु सुथय् छु तिथि क्यन न्हिच्छि व हे तिथि कथ काइ धका धयादिगु खः ।
सफूया च्वमि प्रा. शाक्यं झीस हना वया च्वनागु संस्कृति विधिवत रुपं मयासें करं जक पूवंकेगु स्वलधाःसा थुकिइ विकृति वइ धयादिसे संस्कृतियात विकृति मजुइक हने माःगु खँय् बःबियादिगु खः ।
उगु ज्याझ्वलय् साहित्यकार सरस्वती तुलाधर न सफुया बारे थःगु खँ तयादिगु खः ।
क्लबया नायः पवित्र बज्राचार्यया सभाध्यक्षताय् जुगु उगु ज्याझ्वलय् न्वकु ज्योति शाक्यं लसकुस यानादिगु खःसा ज्याझ्वः रोशन शाक्य न्ह्याकादिगु खः ।
सेभ नेवाः भ्यालीया भिंतुना कालविल ज्याझ्वः
लहनान्युज | कौलागा चर्तुदशी ११३९ (अक्टुवर २७ २०१९)
स्वन्ति नखः व न्हूदँ ११४० लसताय् सेभ नेवाः भ्यालीया ग्वसालय् लगं त्वालय् भिंतुना कालविल नाप तुच्चा ज्याझ्वः जुगु दु ।
उगु ज्याझ्वलय् मूपाँहा कथं येँ महानगरपालिकाया मेयर विद्यासुन्दर शाक्य लगं त्वाःया बौद्ध विद्धान हर्षमूनि शाक्यजुयात दोसल्लां न्ययका हनेज्या नं यानादीगु खः ।
उगु ज्याझ्वलय् बौद्ध विद्धान प्रा.डा. बज्रराज शाक्यजुं स्वन्ति नखःया महत्वयात कया थःगु नुगः खँ तयादीगु खः । ज्याझ्वलय् पाँहा भाषासेवी, साहित्यकार एवं समाजसेवी हितकरवीरसिंह कंसाकारया ब्बति कयादिगु खः । संस्थाया नायः शैलेश शाक्य लगंबरेजुया सभाध्यक्षताय् न्ह्याःगु खः ।
मंकाः दबू छेँया जग स्वन
नृपेन्द्रलाल श्रेष्ठ | कौलागा त्रयोदशी ११३९ (अक्टुवर २६ २०१९)
नेपालभाषा मंकाः खलःया मंकाः दबू छेँ दनेगु लागि थौं जग स्वने ज्या जुगु दु ।
मंकाः खलःया थःगु हे जग्गा विजेयश्वरी बज्र होटेलया ल्यूने मंकाः दबू छेँया जग येँ महानगरपालिकाया मेयर विद्यासुन्दर शाक्य जग स्वना दिगु खः । उगुु ज्याझ्वलय् उपमेयर हरिप्रभा खडगी श्रेष्ठ, मंका खलःया नायः दुर्गालाल श्रेष्ठ व पद्मरत्न तुलाधरया जहान निलशोभा तुलाधरजुपाखें बज्रयानी विधिकथं मंकाःरुपं यानादीगु खः ।
थुगु जग स्वनेज्याझ्वःया झ्वलय् मूपाहां मेयर विद्यासुन्दर शाक्य, मंकाः खलःया न्वकु मल्ल के सुन्दर, संघीय सांसद जीवनराम श्रेष्ठ, नेपाल सम्वत राष्टिय न्हूदँ समारोह समितिया नायः रमेश महर्जन, नेवाः देय् दबुया मूछ्याञ्जे माइला बाबु द्यःला, कामपा १५ वडा अधक्ष्य ईश्वर मान डंगोलपिन्सं थःथःगु नुगः खँ तयादीगु खः ।
मंकाः खलःया नायः जनकवि दुर्गालाल श्रेष्ठया सभाध्यक्षताय् जुगु उगु छ्याञ्जे राजा शाक्यं लसकुस न्वचु विया खःसा सुभाय् न्वचु दांभरिं गणेश सायमिं बियादीगु खः ।
मंकाःदबू छेँ दनेया नितिं अष्टरत्न बज्राचार्य बज्रयानी विधिकथं पुजाआजा याना बिज्यागु खःसा जजमान प्रताप मान शाक्य जुयादीगु खः । ज्याझ्वलय् आपालं नेपालभाषा भाषासेवीपिनिगु उपस्थिति दुगु खः ।
मंकाःदबू छेँ दनेया नितिं जग्गा कविकेशरी चित्तधर ह्रदयपाखें १० आना दान बियादीगु खःसा मेगु बाकी जग्गा वय्कःयाके हे मंकाः खलकं दँय्दसं त्यःछिं त्यः फ्वना वःगु दामं न्यना कयादीगु खः ।
जातिय समाजपाखे भिंतुना
नृपेन्द्रलाल श्रेष्ठ | कौलागा त्रयादशी ११३९ (अक्टुवर २६ २०१९)
नेवाः समाजय् लागु झीखुगु जातिय समाजपाखे थौं भिंतुना कालबिल ज्याझ्वः जुगु दु ।
येँया बसन्तपुरय् जुगु ज्याझ्वलय् येँ महानगरपालिकाया मेयर बिद्यासुन्दर शाक्य, उपमेय्र हरिप्रभा खड्गी श्रेष्ठ, बरिष्ठ प्रहरी उपरीक्षक उमेश जोशी, १८ वडा अधक्ष्य न्हुच्छेकाजी डंगोल पिनिगु उपस्थीति दुगु खः ।
जातिय समाजया नितिं मनोज नेवाः खड्गी संयोजन यानादिगु झीखुगु जाति समाजपिं नेपाल खड्गी सेवा समिति, स्यस्यः समाज, बज्राचार्य समन्वय परिषद, द्यःला समाज संघ, रजक समुदाय बिकास संघ, ज्यापु महागुथि नेपाः, चित्रकार (पुं) समाज, नेपाल तण्डुकार समाज, पुतुवार बिकास समाज, राजोपाध्याय समाज, केन्द्रिय मानन्धर संघ, कपालि समाज, कसाः तःधं गुथि, नापित झीगु गुथि समाज, नेपाल मालि समाजपिनिगु मंकाः ग्वसालय् जुगु खः ।
भिंतुना कालबिल ज्याझ्वः
नृपेन्द्रलाल श्रेष्ठ | कौलागा त्रयादशी ११३९ (अक्टुवर २६ २०१९)
उपत्यका सडक बिस्तार पिडित सर्घष समितिं थौं स्वन्ति नाप नेपाल संवत ११४० या लसताय् भिंतना कालबिल ज्याझ्वः याउगु दु ।
कालिमाटि एफ टेनय् जुगु उगु ज्याझ्वलय् सर्घष समिति अध्यक्ष सुमन साय्मि, सर्घष समितिया सल्लाहकार अधिवक्ता शंकर लिम्वु, प्रा.डा. कृष्ण भट्टचनपिन्स न्हुगु दँ ११४०, स्वन्ति नाप छठ पर्वया लसताय् भिंतुना देछाना दिगु खः ।
