Display Style:
Column Style
भारतं पिथंगु नक्सा स्वीकार्य मजूगु : नेकपा नायः दाहाल
लहना न्यूज | ने.सं. ११४० कछलाथ्व दसमि (२१ नोभेम्बर, २०१९), बसुवाः
सत्तारुढ नेपाल कम्युनिस्ट पार्टी (नेकपा)या नायः पुष्पकमल दाहालं भारतं पिथंगु नक्सा स्वीकार्य मजूगु धयादीगु दु ।
थौं बसुवाः पोखराय् सञ्चारकःमितलिसे खँल्हानादिसें नेकपाया नायः दाहालं धयादिल, ‘गुगुकथंया नक्सा सार्वजनिक याःगु दु, व नेपाःयात मान्य मजू ।’
लिपुलेकयात कयाः भारत व चीन दथुइ सहमति जुल धकाः वःगु इलय् थःम्हेस्यां भारतीय प्रधानमन्त्री नरेन्द्र मोदीलिसे ‘थ्व गलत जूगु दु, थुकियात कयाः पुनःविचाः याय्माः’ धयागु लुमंकादिसें वय्कलं धयादिल, ‘आः नं कालापानीलिसेंया फुक्क नक्सा दुने लाकेधुंकाः थ्व नेपाःयात सह्य जुइ फइमखु, मान्य जुइ फइमखु ।’
भारतया नक्साय् नेपाःया गम्भीर आपत्ति दुगु धयादिसें दाहालं थुकियात कयाः सरकारं नं न्ववायेधुंकूगु धयादिल । नेपाःया भौगोलिक अखण्डतायात कयाः फुक्क देय् छगू थासय् दनेगु धयादिसें ‘राष्ट्रिय अखण्डता, सार्वभौमसत्ताय् छुं गनं नं सम्झौता यायेगु, क्वमिलु जुइगु धइगु सवाल हे जुइमखु ।’ धयादिल ।
सरकारं नं भारतीय नक्सा स्वीकार्य जुइमखु धायेधुंकूगुलिं आः निगू देय् दथुइ सम्बाद जुइगु नं नायः दाहालं धयादिल ।
कालापानी व लिपुलेक नेपाःया अविभाज्य भूमि : नेपाली कांग्रेस
लहना न्यूज | ने.सं. ११४० कछलाथ्व दसमि (२१ नोभेम्बर, २०१९), बसुवाः
नेपाली कांग्रेसं नेपाःया भूमिइ जुइगु अतिक्रमण अस्वीकार्य जूगु धाःगु दु । कालापानी व लिपुलेक नेपाःया अविभाज्य भूमि जूगु धासें कांग्रेसं भारतं पिथंगु नक्सायात कयाः आपत्ति प्वंकूगु दु ।
नेपाली कांग्रेसया सभापति शेरबहादुर देउवां थौं विहिवाः नेपाःस्थित भारतीय राजदूत मञ्जिभ सिंह पुरीयात फोन यानाः नक्सायात कयाः थःपिनिगु पार्टीया ध्यानाकर्षण याकादीगु न्ह्यथंगु दु । देउवां राजदूत पुरीयात कालापानी व लिपुलेक नेपाःया अविभाज्य भूमि जूगु स्मरण तकं याकादीगु कांग्रेसया प्रवक्ता विश्वप्रकाश शर्मां जानकारी बियादीगु दु ।
कांग्रेस थुकियात कयाः मंकाः मत दयेकेत व वकथं हे कूटनीतिक माध्यमपाखें ज्यंकेत सरकारयात इनापं नं याःगु दु ।
२०१८ सालय् लिपुलेकय् जनगणना व राजश्व म्हयेगु ज्या जुइधुंकूगु
लहना न्यूज | ने.सं. ११४० कछलाथ्व दसमि (२१ नोभेम्बर, २०१९), बसुवाः
सरकारं भारतीय न्हूगु नक्साय् नेपाःया भूमि लाःगु विषयस भारतलिसे कुटनीतिक व राजनीतिककथं खँल्हायेगु धाःगु दु ।
मन्त्रिपरिषदया निर्णय सार्वजनिक यायेत ग्वसाः ग्वःगु पत्रकार सम्मेलनय् सरकारया प्रवक्ता सूचना तथा सञ्चारमन्त्री गोकुल बास्कोटां भारतया नक्साय् नेपाःया भूमि लाःगु खँय् समस्या ज्यंकेगु नितिं कुटनीतिक व राजनीतिककथं पहल यायेगु धयादिल । ‘यकःति ढंगं पिथंगु राजनीतिक नक्सायात जिमिसं अस्वीकार यायेगु व कुटनीतिक, राजनीतिक तहपाखें थुकियात ज्यंकेगु ज्या याय् ।’ मन्त्री बास्कोटां धयादिल ।
२०१८ सालय् हे लिपुलेक क्षेत्रय् जनगणना जूगु व राजश्व म्हयेगु नितिं अड्डात दुगु वय्कलं न्ह्यथनादिल । कूटनीतिक व राजनीतिक तगिमं हे थुगु समस्या ज्यनीगु नं बास्कोटां विश्वास प्वंकादिल ।
सरकार गम्भीरतापूर्वक देसया सीमा रक्षा, सार्वभौम स्वाधीनताया रक्षाया नितिं प्रतिबद्ध जूगु नं प्रवक्ता बास्कोटां धयादिल । लिपुलेक व कालापानीइ जक सीमा समस्या मदुगु न्ह्यथनादिसें ऐतिहासिक तथ्यया लिधंसाय् सीमा समस्याया समाधान मालेगु नं मन्त्री बास्कोटां धयादिल ।
‘सीमालिसे सम्बन्धित विषयवस्तु खालि अनया जक मखु, मेमेथाय् च्वंगु सीमालिसे सम्बन्धित विषय ज्यंकेगु ल्यं दनि ।’ मन्त्री बास्कोटां धयादिल ।
शंखधर दिवस हन
नृपेन्द्रलाल श्रेष्ठ | कछलाथ्व दशमी ११४० (नोभेम्वर ७ २०१९)
नेपाल संवत् न्हूदँ राष्ट्रिय समारोह समिति ११४० शंखधर दिवस उपसमितिया ग्वसालय् येँया १५ वडाय् लखतीर्थय् थौं छगु ज्याझ्वः यासे शंखधर दिवस हने ज्या जुगु दु ।
नेपाःया मौलिक संवत नेपाल संवतया प्रवर्ततक शंखधर साख्वाःयात सरकारं कछलाथ्व दशमी कुन्हु राष्ट्रिय विभूति घोषणा याःगु दिंयात लुमका शंखधर दिवस हनाः वयाच्वंगु खः । थौया ज्याझ्वलय् शंखधरया किपातय् स्वांमा देछाना ज्याझ्वः न्ह्याकुगु खः।
थौं जुगु उगु ज्याझ्वलय् मूपाँहा येँ महानगरपालिकाया मेयर विद्यासुन्दर शाक्य झायादीगु खःसा सांसद जीवनराम श्रेष्ठ, १५ वडाया जनप्रतिनिधिपिं नाप नेपालभाषा ख्यःया हनेबहःपि, लखुतीर्थ संरक्षण समितिया नायः सुवर्ण डंगोललिसें १५ वडाया थीथी क्लब, संघसंस्थाया दुजःपिं उपस्थित जूगु खः ।
न्हूदँ समारोह समिति ११४० या नायः रमेश महर्जनया सभाध्यक्षताय् जूगु उगु ज्याझ्वलय् शंखधर दिवस उपसमितिया कजि उदय पसः खलःपाखें लसकुस यानादीगु खः।
न्युयोर्कय् मंकाः म्हपुजा
लहनान्युज | कछलाथ्व दशमी ११४० (नोभेम्वर ७ २०१९)
नेवाः नखः न्युयोर्कया ग्वसालय् न्ह्यक्वस्गु मंकाः म्हपुजा ज्याझ्वः नाप न्हूदँ नेपाल सम्वत ११४० नगुमाया पितब्बज्या जुगु दु । उगु ज्याझ्वलय् नेवाः समुदायया दुजःपिलसे थीथी संस्था व दुजःपि नापं विदेशी पाहाँपिन्स ब्वति काःगु ख ।
संस्थाया मूछ्याञ्जे डा.नरेश मान शाक्यं न्हूदँ ११४० या लसताय् म्हपुजाय् ब्बतिकापिन्त भिंतुना देछाना पाहाँपिनिगु म्हसिका बियादिगु खः । ज्याझ्वलय् न्युर्योक सिटीया ज्याक्सन हाइतया शेर्पा किदुगया हलय जुगु खः । उगु ज्याझ्वलय् अजयमान छोचूं म्ह पुजाया महत्वया व म्हपुजा मन्त्रविधि ब्वना बिधी पूर्बक ज्या न्ह्याकादिगु खः ।
ज्याझ्वलय् मूपाहाँ नेपाल कन्सुलेटया महाबाणिज्यदुत पुष्पराज भट्टराइ नं नेपाल सम्वत ११४०या नगुमाः पितब्बज्या यानादिसें नेपाल सम्वतया महत्वया खँ कनादिगु खः ।
संस्थाया छ्याञ्जे संगीता छोचूं, ल्यूदांभरी सालोनी वन्त, दुजःपिं नम्रता प्रधान, राधिकाकुमारी श्रेष्ठ, कान्तेश्वरी डंगोल, श्रुती अमात्य, अनिता बज्राचार्य, लघु शाक्य, मोहिनी कर्माचार्य, मैना बज्राचार्य, उजिला प्रधान, सबिना शाक्य, मोनालिसा बज्राचार्य, दिपा महर्जन व मधु श्रेष्ठपन्स म्हपुजा यानादिगु खः।
