Display Style:
Column Style
मदुम्ह डां.कमलप्रकाश मल्लयात लुमकल
लहनान्युज | कछलाथ्व नवमी ११४० (नोभेम्वर ६ २०१९)
मदुम्ह डां.कमलप्रकाश मल्लयात न्हापांगु पुण्य तिथिइ थौ कमलप्रकाश मल्ल प्रतिष्ठानया ग्वसालय् छगू ज्याझ्वः यासें वयकलं यानादिगु योगदानयात कया लुमका नेपाः ब्याकेट छगु ज्याझ्वः जुगु दु ।
प्रतिष्ठानया नायः जनकबि दुर्गालाल श्रेष्ठया सभापतित्वय् जुगु उगु ज्याझ्वलय् मदुम्ह मल्लयात लुमंका छगू मिनेट मौन धारणा याःगु खःसा ज्याझ्वलय् ब्वति काःपिं सकस्यां वयकःया किपाय् श्रदाया स्वां देछाःगु खः ।
नेपालभाषा साहित्य ख्यलय् वयकल यानादिगु ज्यायात कयाः साहित्यकार भुषण प्रसाद श्रेष्ठं खँ तयादियु खःसा ज्याझ्वलय् पुलाम्ह उपकुलपति केदार भक्त माथेमा, नांजाम्ह साहित्यकार अभि सुवेदी, अमेरिकाया संस्कृकितविद न्यान एस्टोलपिन्सं मल्लं यानादिगु योगदान यात कयाः नुखँ खँ तयादिगु खः ।
प्रतिष्ठानया छ्याञ्जे निर्मल तुलाधर ज्याझ्वया बारे कनादिगु खःसा ज्याझ्वः साहित्यकार रिना बानीया तुलाधरं न्ह्याकादिगु खः ।
यलय् सिटी नेटया ३८ क्वःगु सम्मेलन शुरु
नृपेन्द्रलाल श्रेष्ठ | कछलाथ्व नवमी ११४० (नोभेम्वर ६ २०१९)
यल महानगरपालिकां सिटी नेटपाखे यल दुनेय् दक्को सामुदायिक ब्बनेकुथिइ अनलाइन पाखे ब्बनेगु व्यवस्था यानागु धका थौं जुगु
सिटी नेटया ३८ क्वःगु सम्मेलनबारे जानकारी बिइगु लागि सतःगु पत्रकार सम्मेलन पाखे यल महानगरपालिकाया मेयर चिरीबाबु मर्हजन जानकारी यिबादुगु खःसा नाप ब्बनेकुथिइ प्रविधिमैत्री दयेकेत अनलाइन मार्फत ब्बनेगु व्यवस्था यानागु खँ न कनादिगु खः ।
सिटी नेटया ग्वाहालिं प्राकृतिक प्रकोपपाखे जुइगु क्षतिइ बचे जुइतनाप तधःगु विपत्तीया इलय् न मेपिनिगु ल्हाः फयेम्वाःगु न धयादिगु खः ।
यलया दुने २९ गु वडाय् सिटी नेटया सम्मेलनं भ्रमण बर्षया न्ह्यने संस्कृति संरक्षण यायेत ग्वाहालि जुइगु व भ्रमण वर्ष २०२० य् पर्यटक दुकायेत ग्वाहलि जुइगु भलसा न कयादिगु खः ।
मेयर महर्जनं विदेशय् सम्पदा संरक्षणया लागि तसक्क प्राथमिकताय् तइ तर थज्यागु ज्याय् नेपाल् धाःसा सम्पदा बचे यायेत बालाक ध्यान मबिउ धका न धयादिगुु खः ।
यल महानगरपालिकां सिटी नेट नाप वःगु २९ दँ निसे सहकार्य याना वयाच्वंगु खः ।
नेपालय् न्हापागु पटक जुइत्यःगु थुगु ३८ क्वःगु सिटी नेट सम्मेलनय् ब्बति कायेत थीथी देय् पाखे नगरप्रमुखपि सांस्कृतिक महत्व जाःगु सम्पदाय् यलध्वाका निसे यलया लाय्कु तक निघौ न्यासि वना चाःहिलिगु ज्याझ्वः न थौ तया तःगु खः । सिटी नेटय् नेपालय् १४ गु नगरपालिका दुथ्या ।
भारतं पिथंगु नक्सायात कयाः सांसदतसें कूटनीतिक पहल यायेत इनाप
लहना न्यूज | ने.सं. ११४० कछलाथ्व नवमि (६ नोभम्बर, २०१९), बुधवाः
भारत सरकारं पिथंगु न्हूगु नक्साय् नेपाःया भूभाग दुथ्याकेधुंकाः सांसदतसें सरकारया ध्यानाकर्षण याकूगु दु । उमिसं तत्काल कूटनीतिक पहल यासें नक्सा खारेज यायेत तकं इनाप याःगु दु
।
भारतं पिथंगु न्हूगु नक्साय् नेपाली कांग्रेसं गम्भीर ध्यानाकर्षण जूगु न्ह्यथंगु दु । कांग्रेस सांसद डिला संग्रौलां नेपाःया भूमियात अतिक्रमण यानाः नक्सा प्रदर्शन यायेगु अधिकार भारतयाके मदुगु धयादिसें सरकारयात कूटनीतिक पहल यायेत धयादिल । वय्कलं नेपाःया भूमि अतिक्रमण यानाः नक्सा प्रदर्शन यायेगु सुंयात नं अधिकार मदुगु धयादिसें सरकारयात थुगु विषयस प्रष्ट यायेत इनाप यानादिल ।
गृहमन्त्रीयात थुगु विषयस न्ह्यसः तयागु धयादिसें वय्कलं नेपाःया भूमियात आक्रमण व सीमा क्वत्यलाः भारतं नक्सा सार्वजनिक याःगु इलय् सरकार सुम्क च्वनाच्वंगुलिं न्ह्यसः दंगु धयादिल । वय्कलं राष्ट्रिय सवालया विषय जूगुलिं तत्काल राष्ट्रिय समहमतिया लकस दयेकाः फुक्क दलया मुँज्या सःतेत नं इनाप यानादिल । थुगु विषयस सरकारं संसदया विशेष अधिवेशन नं सःतेमाःगु संग्रौलाया धापू खः ।
नेकपाया सांसद झपट रावलं सरकारयात तत्काल कूटनीतिक पहल यानाः थःपिनिगु भूमि याकनं हे लित कायेत इनाप यानादिल । वय्कलं धयादिल, ‘ताःई न्ह्यःनिसें भारतीय विस्तारवादी नीति विरुद्ध राष्ट्रवादी देशभक्तपिन्सं सः थ्वयेकाच्वंगु इलय् भारतं नेपाःया ३७०गू वर्ग किलोमीटर भूभाग थःगु नक्सादुने तःगु दु । थुगु पलाः विरुद्ध न्ह्यज्यायेत फुक्क देशभक्तपिन्त अपील यानाच्वना ।’
नेपाल मजदुर किसान पार्टी (नेमकिपा)या सांसद प्रेम सुवालं भारतं नेपाःया भूभाग दुथ्याकाः पिथंगु नक्सा खारेज यायेत माग यानादिल । वय्कलं नेपालं तत्काल कूटनीतिक माध्यमपाखें अन्तर्राष्ट्रियकरण यायेमाःगु धयादिल ।
राज्य व्यवस्था समितिया सभापति शशि श्रेष्ठं लिपुलेक व कालापानीया विषयस म्हिगः मंगलवाःया मुँज्याय् नं सः तःगु खः । वय्कलं नेपाःया भूमि क्वत्यःगु विषय राष्ट्रियता, सम्बेदनशीलता व सार्वभौमिकतालिसे स्वाःगुलिं समितिइ गम्भीर सहलह यायेगु तयारीइ दुगु नं धयादिल ।
युनिसेफया कार्यकारी निर्देशक यलया लाय्कुलि
लहनान्युज | कछलाथ्व नवमी ११४० (नोभेम्वर ६ २०१९)
युनिसेफया कार्यकारी निर्देशक हेनरिता एच फोरेले नाप युनिसेफ साउथ एशिया क्षेत्रीय निर्देशक जिन गो, युनिसेफ नेपालया प्रतिनिधि एल के उइस यलया लाय्कु स्वयेगु लागि झायादिगु दु ।
निर्देशक फोरेलेयात लाय्कुलि यल महानगरपालिकाया उपप्रमुख गीता सत्यालं लसकुस यानादिगु दु ।
थौं बुधवाः सुथय् कार्यकारी निर्देशक फोरेले यलया कृष्ण मन्दिर, मुलचुकः, रुद्रवर्ण महाविहार, मंगाहिटीइ झायादिगु खः ।
ऐतिहासिक तथ्यं नं कालापानी व लिपुलेक नेपाःया भूभाग
लहनान्यूज | ने.सं. ११४० कछलाथ्व नवमि (६ नोभम्बर, २०१९), बुधवाः
प्रधानमन्त्री केपी शर्मा ओलीया परराष्ट्र मामिला सल्लाहकार डा. राजन भट्टराईं ऐतिहासिक तथ्यं नं कालापानी व लिपुलेक नेपाःया भूभाग जूगु धयादिसें थःपिं उगु हे मान्यताय् अडिग जूगु स्पष्ट यानादीगु दु ।
थौं बुधवाः रिपोर्टस क्लब नेपालया साक्षात्कार ज्याझ्वलय् न्ववानादिसें डा. भट्टराईं धयादिल, ‘कालापानी नेपाःया भूभाग खः । ऐतिहासिक तथ्यं नं थ्व हे धाइ । झीगु मान्यता नं थ्व हे खः ।
सन् १९६२निसें अन च्वनाच्वंपिं भारतीय सेना चिला वनेमाः । कालापानी लिसेंया फुक्क सीमा विवाद ज्यंकेमाः ।’
सीमा विवाद कूटनीतिक टेबलय् च्वनाः ज्यंकेमाःगुलिइ वय्कलं बः बियादिल । यकःति ढंगपाखें याःगु निर्णय अमान्य जुइगु खँ धयादिसें डा. भट्टराईं धयादिल, ‘न्ह्याथेंजाःगु समस्याया समाधान कूटनीतिक निष्कर्षय् थ्यंकेमाः ।’
