Display Style:
Column Style
यल सुनचाँदी व्यवसायी संघ राहत इन
लहनान्युज | बछलाथ्व पंचमी ११४०, बैसाख १६ मंगलवाः
यल सुनचाँदी व्यवसायी संघं थौं हःखः त्वालय् भारतीय मूलया बंगाली कालिगढ तय्त राहत बिउगु दु ।
लकडाउनया इलय् नेपालय् च्वनाच्वंपिं बंगाली मूलया कालिगढतय् नये त्वने समस्या जुगुलि थौं मंगलवाः कालिगढतय्त सःताः राहत बिःगु खः ।
संघ थौं बिःगु निसःम्ह कालिगढतय्त राहत कथं छम्हसित ५ किलो जाकि, ३ किलो आटा, १ किलो दाल, १ पाकेट चि, १ किलो चिनी बिःगु खः ।
संघं आः मेगु निगूगु चरणय् राहत नेपाली कालिगढतय्त बीगु खँ धाःगु दु ।
धोविचौरय् लकडाउनया इलय् निःशुल्क नकेगु व्यवस्था
नृपेन्द्रलाल श्रेष्ठ | बछलाथ्व पंचमी ११४०, बैसाख १६ मंगलवाः
थौंकन्ह्य सरकारया याना तःगु लकडाउनया कारणं अप्वों मनूतयेत नयेगु समस्या जुयाच्वंगु इलय् धोविचौर युवा समूहया सक्रिय ल्याम्हतय्सं न्हि न्हिं नयेगु व्यवस्था यानाच्वंगु दु ।
स्थानीय ल्याम्हतय् सक्रियताय् वंगु वैशाष ४ गते निसें थौंत लगात रुपं मनूतयेत नकेगु व्यवस्था याना वयाच्वंगु खः । उगु थासय् सनिलयया ५ बजे निसें ७ बजे करिव थौं कन्ह्य न्यासःम्ह मनू
तयेस नः वयाच्वंगु दु ।
स्थानीय निकायपाखें ग्वाहालि यानाच्वंगु दुसा स्थानीय संघ संस्था नाप मनू तयेस न नकेगु लागि व्यवस्था यानाच्वंगु दु ।
उगु थासय् नकेगु लागि स्थानीयपिन्स दयेका नका वयाच्वनागु दु धका किशोर मघिया लहनान्युजयात जानकारी बियादिगु दु
सुरुवातय् थःपिन्स ध्यबा म्हयाः नकेगु व्यवस्था यानागु खः, थौंकन्ह्य दाताय् सं स्वइच्छां जाकि, केँ, तरकरी बिया ग्वाहालि जुयाच्वंगु दु धका मघियां धयादिगु खः । अन मनूत तयेत सामाजिक दूरी कायम यानाः नकेगु ज्या जुयाच्वंगु दु ।
अन नकेगु लागि कामपा वडा नं १७ नापं प्रहरी प्रशासन व सेना नापया समन्वय यानाः ज्या जुयाच्वंगु खः ।
पूर्वसचिव उपाध्याययात जिल्ला अदालत त्वतिगु आदेश बिल
लहनान्युज | बछलाथ्व चौथि ११४०, बैसाख १५ सोमवाः
पूर्वसचिव भीम उपाध्याययात २५ द्धः धरौटीइ रिहा यायेत जिल्ला अदालत काठमाडौं आदेश बिःगु दु ।
अदालतया न्यायाधीश भरतमणि खनालया इजलासं थौं सोमवाः उपाध्याययात धरौटीइ त्वतेत आदेश बिःगु दु ।
सामाजिक सञ्जालय् प्रधानमन्त्री केपी शर्मा ओलीया चरित्र हत्या जुइ कथं गैरकानुनी विषय च्वःगु आरोपय् वयात वःगु वैशाख १० गते ज्वःगु खः ।
पूर्वसचिव उपाध्याय विरुद्ध आइतवाः साइबर क्राइमया मुद्दा दर्ता जुगु खः । वयात न्यादँ तक कैद सजाय बिइगु माग याःगु खः ।
येँ सुथय् १० बजे तक पसः चायेके बिइगु
नृपेन्द्रलाल श्रेष्ठ | बछलाथ्व चौथि ११४०, बैसाख १५ सोमवाः
येँ महानगरपालिकां लकडाउनया इलय् बजारय् सहज दयेकेगु लागि स्थानीय प्रहरी नाप समन्वय याना सुथय् १० बजे तक बजा चायेके बिइगु व्यवस्था मिले याये त्यःगु दु ।
सरकारं न्याक्वःगु चरणया लकडाउनया ई थपे यासे वैशाख २५ गते तक यायेगु निर्णय याःगुलि येँ महानगरपालिकाया ४५ क्वःगु कार्यपालिका बैठकं थःथे निर्णय याःगु खः ।
येँँ महानगरपालिकाया मेयर बिद्यासुन्दर शाक्यया सभाधक्ष्यताय् जुगु उगु बैठकय् लकडाउनया इलय् आपूर्ति व्यवस्थाय् एक रुपता हयेत आर्थिक गतिविधियात तक थप चलायमान याये माःगु सुझाव वडाध्यक्षपिन्स बिःगु खः ।
येँ महानगरपालिकाया मेयर शाक्यं वडाध्यक्षपिन्त सामाजिक दूरी कायम याना बजारय् सहज दयेकेत स्थानीय प्रहरीनाप समन्वय न्यायेगु मिइगु व्यवस्था मिले यायेत इनाप यानादिगु खः । बैठकं कोरोना नियन्त्रणया लागि वडाय् छ्वया हःगु बजेट, वडापाखे ज्या जुगु, राहत वितरणया लागि संकलित विवरण, ¥यापिड डाइग्नोष्टिक परीक्षण, राहत वितरण, निःशुल्क भोजन व्यवस्थापन लगायतया बिषयय् केन्द्रीत जुगु खः ।
कोरोना भाइरसया संक्रमण रोकथाम व नियन्त्रण यायेत येँ महानगरपाखे सम्पन्न जुगु ज्याया समीक्षा यासे मेयर शाक्यं आतक महानगरं ६८ द्धः व ६१७ म्हसित राहत वितरण याये धुकुगु जानकारी बियादिगु खः ।
अथेहे, १९ द्धः व ७२३ म्हसित थी थी वडापाखे निःशुल्क नयेगु व्यवस्था यानागु दु धका जानकारी बियादिगु खः । ‘कोरोना संक्रमणया सम्भावना जुपिन्त अस्पताल तक सम्म यकेत येँँ महानगरपालिका यासहकार्यय् सञ्चालिन नेपाल एम्बुलेन्स सेवां लकडाउनया इलय् २२१ म्हसित सेवा काये धुकुगु धका धयादिगु खः,’ वयकलं, ‘१०२ नं. य् स्वापू तया सेवा काये फइगु उगु एम्बुलेन्सं आतक १७६ म्हसिया निशुल्क सेवा काये धुकेगु दु ।
अथेहे थुगु इलय् न्हिनय् १५३३ म्ह व चान्ह्य ८४५ म्हसिया सेवा काःगु दु धका जानकारी बिगु दु ।
उगु बैठकं महानगर कोरोना संक्रमण, रोकथाम तथा नियन्त्रण कोषपाखे तधःगु वडा, बिचइगु व चिधःगु वडायात मेगु थप निकासा छ्वयेगु निर्णय याःगु दु । तधःगु वडाय् १५ लाख, बिचःगु वडाय् १० लाख व चिधःगु वडाय् ५ लाख थप निकासा यायेगु अनुमोदन याःगु दु । अथेहे फोहोर व्यवस्थापनया लागि ककनी गाउँपालिकाकाय् प्रभावित वडाय् राहतया लागि १५ लाख व धुनिवेँसी नगरपालिकाका वडा १ या लागि ३ लाख बिइगु बैठकं अनुमोदन याःगु दु ।
थौंया अक्षय तृतीया नं लकडाउनं प्रभावित
बिकाश | बछलाथ्व तृतीया ११४०
थौं बछलाथ्व तृतीया, अक्षय तृतीया । मुक्कं हलिं हे कोरोना भाइरस (कोभिड १९) या संक्रमणया मारय् लानाच्वंबलय् थौंया अक्षय तृतीया नं थुकिं प्रभावित जूगु दु ।
कोरोना संक्रमण रोकथाम व नियन्त्रणया लागिं नेपाल सरकारं देयन्यंक लकडाउन जारी यानातःगु अवस्थाय् थुगुसीया अक्षय तृतीया नं प्रभावित जूगु खः ।
लकडाउनया अवस्थाय् दान धर्म आदिया ज्या यायेत नं मछिंगु अवस्था दुसा बजार बन्द जुयाच्वंगु अवस्थाय् साखः ति त्वनेगु वा त्वंकेगु ज्या नं उलि जुयाच्वंगु खनेमदु ।
न्हापा न्हापा थौंया दिनय् त्वाःत्वालय् साखःति दयेकाः लँजुवाःतयत नं त्वंकेगु याइगु खः ।
थौं दिनय् म्वःल्हुयाः नीसी यानाः विशेष कथं छ्वया सत्तु व साखः ति दान यायेगुया नापं नयेगु व त्वनेगु याइगु खः ।
थौंया दिनय् याइगु स्नान व दानयात विशेष महत्वलिसें स्वयेगु याः ।
थौं याइगु स्नान, दान, ध्यान र जप लिसेंया पुण्य कर्मया फल गबलें नाश मजुइगु खँ थीथी पुराणय् न्ह्यथनातःगु दु ।
वैशाख शुक्ल तृतीया अर्थात थौंया दिनय् भच्चा जक दान याःसा यक्व फल चूलाइगु व थुगु फल अक्षय अर्थात् गबलें नाश मजुइगु जूगुलिं थुगु दिनयात अक्षय तृतीया धाःगु मान्यता दु ।
छ्वया सत्तु व साखः तिं शरीर स्वस्थ्य दयेकातयेत ग्वाहालि याइगु लिसें ल्वय् लिसे ल्वाइगु प्रतिरोधात्मक क्षमता नं बल्लाकीगु धयातःगु दु ।
तांन्वइगु इलय् सिचुकीगु नसा ज्वलंया रुपं नं सत्तु नयेगु व साखः ति त्वनेगु याइ ।
थौंया दिनयात महाःद्यः पार्वतीया इहिपा जूगु दिनकथं नं कयातःगु दु । महाःद्यः पार्वतीया इहिपाः जूगु दिं जुयाः हे थौं सुयां इहिपा याःसा साइत स्वयेम्वाःगु मान्यता समाजय् दु ।
नारायण द्यःया खुगूगु अवतारया रुपं कयातःम्ह परशुरामया जन्म नं थौंया हे दिनय् जूगु विश्वास यानातःगु दु ।
अक्षय तृतीया दिंया स्वापू महाभारतलिसे नं दयाच्वंगु खनेदु ।
पाण्डवत १२झँ वनवास च्वंबलय् छन्हु दुर्वासा ऋषि उमिगु भिखाचाय् वल । द्रौपदीं दुर्वासा दुथे फुथे सत्कार यानाः नकल । द्रोपदीया सत्कार खनाः लयताःम्ह दुर्वासां द्रौपदीयात छगः अक्षय थल बिल ।
उगु हे इलय् दुर्वासां द्रौपदीयात अक्षय तृतीयाया महत्व बारे नं कनावन । थुगु दिनय् पृथ्वीइ सुनां नं विष्णयात विधि पूवंकाः पूजा याःसा वा चना, सत्तु, मौसमी, कापः व लः जायेकातःगु घः दान याःसा वयागु छेँया धुकू गबलें मप्वनीगु जनविश्वास दु ।
थ्व व हे बाखंया लिधंसाय् नं अक्षय तृतीया दिंया महत्व थहांवंगु खः ।
