Display Style:
Column Style
सः छगू फरक अभिव्यक्तिया साहित्यिक ज्याझ्वः
लहनान्युज | पोहेलाथ्व चतुर्दशी ११३९ (जनवरी १९ २०१९)
सः छगू फरक अभिव्यक्तिया ग्वसालय् निक्वःगु साहित्यिक ज्याझ्वः यलय् जूगु दु ।
उगु ज्याझ्वलय् बाखं स्वम्ह च्वमिपिं शान्त राज शाक्य, नरेश अमात्य, सुजिता महाजुपिसं ं न्यापु न्यापु ल्याखं मुक्कं झिंन्यापु चिबाखं ब्वने ज्याःजुगु खः ।
अथेहे उगु ज्याझ्वलय् कवि सुधिर ख्वविं बाखं च्वमिपिं स्वम्ह व ज्याझ्वलय् ब्वतिकयादीपिं मध्ये गोलाप्रथां केदार सितुयात मतिनाया चिं लःल्हाःगु दु ।
सुनिल बज्राचार्यं न्ह्याकादीगु उगु ज्याझ्वलय् डा. पुष्प राज राजकर्णिकार, राजा शाक्य, मथुरा सायमि, पुस्कर माथेमा, शरद कसाः लगायत थीथी संचारया पत्रकारपिसं ब्वति कयादीगु खः ।
बुखँ नेवाः सूचना केन्द्र किपा राजेन्द्र रञ्जित
गंकि–बसुन्धरा सिरपा मल्ल के. सुन्दरयात लःल्हात
नृपेन्द्रलाल श्रेष्ठ | पोहेलाथ्व नवमी ११३९ (जनवरी १५ २०१९)
नेपालभाषया आन्दोलनय् निरन्तर रुपं ताःइलंनिसें संघर्षरत व्यक्तित्व नेवाः न्ह्यलुवाःलिसें साहित्यकार मल्ल के. सुन्दरयात गंकि–बसुन्धरा सिरपा व जनगायक रामेश श्रेष्ठयात धुंस्वा सायमि सिर्जना सम्मान थौं छगु ज्याझ्वः दथुइ लःल्हाःगु दु ।
थौंया ज्याझ्वः मूपाहाँ जनकवि दुर्गालाल श्रेष्ठं त्वाःदेवाय् मत च्याकाः ज्याझ्वःया औपचारीक उलेज्या यानादीगु खः ।
नेवाः न्ह्यलुवाः मल्ल के. सुन्दरं च्वयादीगु व “लँपु थ्व पलाः” यात थुगुसी गंकि–बसुन्धरा सिरपा लःल्हागु सा तःदँ न्ह्यः निसे संगीत ख्यलय् लगे जुया च्वनादीम्ह रामेश श्रेष्ठयात वयकलं यानादीगु ज्याया कदर यासें धुंस्वा सायमि सिर्जना सम्मान याःगु खः ।
थौं जुगु उगु ज्याझ्वलय् मूपाहाँ जनकवि दुर्गालाल श्रेष्ठं सम्मानीत जुयादीपिन्त हनापौ लःल्हाना दीगु खःसा गंकि धुस्वां बसुन्धरा प्रतिष्ठानया नायः डा.अरुण सायमिं दोसल्ला न्यकेदीगु खः ।
उगु ज्याझ्वलय् मूपाहाँ जनकवि दुर्गालाल श्रेष्ठ, सम्मानीत जुयादीपिं मल्ल के. सुन्दर व जनगायक रामेश श्रेष्ठ न नुगँ खँ तयादीगु खः । अथेहे प्रतिष्ठानया नायः डा.अरुण सायमिं मल्ल के. सुन्दरं च्वयादीगु व “लँपु थ्व पलाः” यात खस भाषां भाय् हिलिगु न भाला कयागु धका थौं उगु ज्याझ्वलय् कनादीगु दु ।
साहित्यकार नाप प्रतिष्ठानया नायः डा.अरुण सायमिया सभाधक्ष्यताय् जुगु उगु ज्याझ्वलय् दुजः हरिहर शर्मा सुभाय् देछनादीगु खः । ज्याझ्व प्रतिसरा साय्मि न्ह्याकादीगु खः ।
थौं उगु ज्याझ्वलय् जनकलाकार रामेश श्रेष्ठं थःगु पुलांगु म्ये न हालादीगु खः ।
पुथ्वी नारायण राष्ट्रिय एकताया प्रतिक मखु –आहुति
नृपेन्द्रलाल श्रेष्ठ | पोहेलाथ्व सप्तमी ११३९ (जनवरी १३ २०१९)
नेवाः ग्वाहालि पुचलं थौं छगु ज्याझ्वः दथुइ न्हुदँ ११३९ या लसताय् म्हिगः शनिवाः भिंतुना कालबिल ज्याझ्वः यागु दु ।
उगु ज्याझ्वःया मूवक्ता कथं च्वमि नाप बिचारक बिश्वभक्त दुलालं (आहुति) पुथ्वी नारायण राष्ट्रिय एकताया प्रतिक मखु धयादीसे म्हिगः शाहा जुजुुपिन्स थःगु पक्षय् इतिहास च्वका तःगुनि धाःथे राष्ट्रिय एकताया प्रतिक खःथे च्वःगु खः धका धयादीगु खः । पुथ्वी नारायण शाहनं थःत गुबलय् नेपाःमि धका मधासे गोर्खाली धका धायेगु याना च्वंगुनि थ्व नेपाः एकिकरण मजुसे गोर्खा राज्य बिस्तार खः धका थःगु खँ तयादीगु खः ।
अथेहे मूवक्ता आहुतिं थन स्वनिगः दुने नेवाः तयेगु कला संस्कृति मथुपिन्स शासन यान च्वगुनि थःपि गयेयाना सम्पति मुकिगु जक ध्यान तया च्वंगुनि सतक बिस्तारया नामय् नेवाः तयेगु कला संस्कृतिया स्यंका च्वंगु न धयादीगु खः ।
उगु ज्याझुवलय् मूपाँहा कथं गजल च्वमि भुषणप्रसाद श्रेष्ठं वल्र्ड बडि बिल्डिङ्ग च्यापियन महेश्वर महर्जनयात हनापौ लःल्हासे सम्मान यानादीगु खः । ज्याझ्वलय् सतक बिस्तार पिडिकया संयोजक सुमन साय्मि न थःगु नुगः खँ तयादीगु खः ।
हलिं नेवाः दबूया तःमुँज्या स्थगित
नृपेन्द्रलाल श्रेष्ठ | पोहेलाथ्व षष्ठी ११३९ (जनवरी १२ २०१८)
नेवाः तय्गु अन्तरराष्ट्रिय संगठन हलिं नेवाः दबू (वर्ल्ड नेवाः अर्गनाइजेशन), नेपाः देय् मू कवःया निक्वःगु तःमुँज्याय् संघीय समाजवादी फोरमया सह अधक्ष्य लिसें प्रतिनिधिसभाया दुजः राजेन्द्र प्रसाद श्रेष्ठयात वय्कलं नेवाः आन्दोलनय् यानादीगु योगदानयात कदर यासे थांैं सम्मान याःगु दु ।
हलिं नेवाः दबूया दुजः नापं जुयाच्वाना दीम्ह श्रेष्ठं मांभासं शिक्षा, आवास सम्बन्धी हक लगायतया कानुन निर्माणय् उत्पीडिततय्गु पक्षय् संशोधन याकाः पारित यायेत मूवंगु भूमिका म्हिता दीगु लिसें पहिचान व सङ्घीयताया आन्दोलनय् नेतृत्वदायी भूमिका म्हिता दीगु खः ।
सङ्घीय गणतन्त्रय् समेत नेपाल कम्युनिष्ट पार्टी नेतृत्वया सरकारं नेपाली व अंग्रेजी भासं जक आखः ब्वंकेगु व संस्कृत शिक्षायात अलग विधा जुइगु यानाः विधेयक दर्ता याःगुलि वयकलं भाषिक अधिकारवादीतय्गु पक्षय् विधेयकय् संशोधन दर्ता यानाः मांभासं शिक्षाया निंतिं कानुन दय्केगु ज्याय् विशेष भुमिका म्हिता दीगु खः ।
अथे हे भविष्यय् मुआब्जा ब्युसां जिइगु यानाः सतक विस्तारया नामय् नेवाःतय्त विस्थापित यायेछिंक ओली सरकारं हःगु आवास सम्बन्धी विधेयकयात न राज्यया अधिनायवादी सोच धकाः विरोध याःसे वय्कलं संशोधन दर्ता याकाः पीडिततय् पक्षय् विधेयक संशोधन याकेत ताःलाःगु खः ।
दबूया कार्यवाहक नायः शाक्य सुरेनया सभाधक्ष्यताय् जूगु तःमुँज्याया उलेज्या सत्रय् शताब्दी पुरुष सत्यमोहन जोशीं नेवाःतय्गु न्हूगु पुस्तां भाय् त्वःतावंगु अले उमि मांबौया नं थः मस्तय्
मांभाय् मल्हाःसा जिउ धइगु चिन्तनं संसारय् तःगु भाय् थें नेवाःभाय् नं तनावनीगु अवस्था वयाच्वंगुलिं चिन्ता व्यक्त यानादिल । वय्कलं नेवाः जातिया उत्थानया निंतिं मांभासं आखः ब्वंकेमाःगु खँय् बः बिया दिल ।
सांसद राजेन्द्र श्रेष्ठं नेवाःतय्गु आन्दोलन यक्व न्ह्यःनिसें न्ह्यानावयाच्वंसां न्हापा भाषिक जागरण व साहित्य सेवा पाखेजक केन्द्रित जूगुलिं राजनीतिक परिवर्तन उलिमछि जुलं नं नेवाःतय्सं उकिया लबः कायेमखंगु खँ कनादिल ।
वय्कलं ओली नेतृत्वया वर्तमान सरकारं पृथ्वी नारायण शाह न याःगु थःगु सामन्ती साम्राज्य विस्तारयात पञ्चायती शैलीइ राष्ट्रिय एकता दिवस धकाः घोषणा याःगुयात कुँखिउसे नेकपाया अध्यक्ष लिसें प्रधानमन्त्री ओली पुनर्उत्थानवादी जूगु द्वपं बिया दिल । वय्कलं आः नेकपा राप्रपाय् दुब्यूसां जिल धया दिल ।
दबूया मूछ्याञ्जे रश्मिला प्रजापतिं न्ह्याकादीगु उगु ज्याझ्वलय् न्वकू गणेशराम लाछिं लसकुस यानादीगु खः ।
तःमुँज्याय् नेवाः देय् दबूका अध्यक्ष नरेश ताम्राकार, दबूया नेपाः देय् मूकवःया संस्थापक नायः नरेन्द्रभक्त हाडा, नेवाः न्ह्यलुवा डा. महेशमान श्रेष्ठ लगायतया वक्तापिसं न भिंतुना न्वचु बियादीगु खः ।
थौं जुगु उगु तःमुँज्या बिशेष कारणं थौं न्हुगु नेतृत्व ल्यय् मफुगु दु । आः चुनाव गबलय् जुइ धइगु खँ लिपा सुचं बिइइ धकाः दबूया नायः शाक्य सुरेनं जानकारी बियादीगु खः ।
नातिबज्र बिचाः मुँज्या जुल
नृपेन्द्रलाल श्रेष्ठ | पोहेलाथ्व षष्ठी ११३९ (जनवरी १२ २०१८)
भाषासेवी नाप साहित्यकार नातिबज्र बज्राचार्य मदुगुलिं थौ येँया भोताहिति दगु बहालय् बिचाः मुँज्या यानाः वयकःया योगदानयात लुमक्यःगु ज्या जुगु दु ।
थौं जुगु उगु बिचाः मुज्याय् नेवाः देय् दबू, प्रतिभा साहित्यिक परिवार, च्वसापासा, नेपालभाषा ऐकेदेमि, नेवाः जागरण मञ्चं मंकाः ग्वसालय् जुगु खः ।
उगु बिचाः मुँज्याय् जनकवि दुर्गालाल श्रेष्ठं व लोककबि राजभाई जकःमिं नातिबज्रयात लुमंका चिनाखँ ब्बनादीगु खः ।
अथेहे नेवाः न्ह्यलुवाः मल्ल के. सुन्दर, साहित्यकार राजा शाक्य, साहित्यकार डा.पुष्पराज राजकर्णिकार, त्रिरत्न शाक्य, गायक जुजु कजि रंजित पिन्सं नं नातिबज्रया योगदानयात कयाः नुँगः खँ प्वंकादिगु खः ।ग्वसाः खलः पाखें नेवाः देय् दवूया नायः नरेश ताम्राकारं दुःखं कपिं छेँ जःपिन्त विचाः हायकादिगु खः ।
साहित्यकार शरद कसाः नं न्ह्याकादिगु उगु मुज्याय् थथिी ख्यःया ब्यक्तिपिन्सं मदुम्ह नातिबज्रया किपाय् स्वा देछाना छगू मिनेट मौन धाराणा याःगु खः । ः
