Display Style:
Column Style
कोरोना भाइरस परिक्षण यायेत चिकित्सक दक्को पालिकाय् छ्वइगु
लहनान्युज | बछलाथ्व पारु ११४०, बैसाख १२ शुक्रवाः
कोरोना भाइरस रोकथाम तथा नियन्त्रणया लागि सरकारं दक्को पालिकाय् चिकित्सक व स्वास्थ्यकःमिपिन्त परिचालन याःगु दु । जनस्वास्थ्य अधिकृत, प्रयोगशालाया कर्मचारी व प्यारामेडिक्स वा नर्स छम्ह छम्ह दुगु टोली परिचालन याःगु धका स्वास्थ्य मन्त्रालयं धाःगु दु ।
मन्त्रालयया प्रवक्ता डा. विकास देवकाटां हरेक गाउँपालिकाय् छगु, नगरपालिकाय् २ गु, उपमहानगरपालिकाय् ३ गु व महानगरपालिकाय् ५ गु टोली परिचालित जुइ धका धयादिगु दु । इमिस कोराना शंकास्पद मनू व इपि नाप स्वापू दुपि मनू तयेगु स्वास्थ्य परीक्षण याइ ।
डा. देवकोटां, ‘कोभिड १९ या संक्रमणया रोकथाम व नियन्त्रणय् सहजीकरण यायेगु उद्देश्यं इमित अन परिचालन जुइ धका धाःगु दु ।’
जनशक्ति मगासा जक जिल्ला स्वास्थ्य कार्यालय, प्रादेशिक स्वास्थ्य निर्देशनालय, सामाजिक विकास मन्त्रालय व स्वास्थ्य तथा जनसंख्या मन्त्रालयय् माग याये फइ धका डा.देवकोटां धाःगु दु ।
कीर्तिपुर नगरपालिकां निगूगु चरणया राहत वितरण प्रक्रिया न्ह्याकल
नृपेन्द्रलाल श्रेष्ठ | बछलाथ्व पारु ११४०,बैसाख ११ गते
कीर्तिपुर नगरपालिकां निगूगु चरणया राहत वितरणया लागिं प्रकिया न्ह्यःने यंकूगु दु ।
संघीय सरकारं निगूगु चरणया राहत बीगु वा मबीगु धकाः निर्णय मयाःनिगु इलय् नं नगरपालिकाया कार्यपालिका बैठकं निर्णय यानाः निगूगु चरणया राहत वितरणया लागिं न्ह्यज्याःगु खः ।
स्थानीय सरकार ऐन २०७४या मर्म व संघीय सरकारं स्थानीय तहयात राहत वितरणया ज्या लःल्हाःगु अवस्थायात स्वयाः नगरपालिकां १ निसें १० वडाय् राहत आवश्यक जूगु परिवारय तथ्यांक मुंकाच्वनागु नगरपालिकाया उपप्रमुख सरस्वती खड्कां जानकारी बियादिल ।
तथ्यांक मुनेज्याय् राहत आवश्यक जूगु गुगुं नं परिवार त्वःमफीमा धकाः वडा ज्याकू, नगरनिसें वडास्तरतक्कया सर्वदलीय संयन्त्र गठन याःगु दु ।
‘दक्वं पक्षया सहभागिताय् तथ्यांक मुंकाच्वनागु दु । न्हापांगु चरणया राहत नं सर्वदलीय संयन्त्र मार्फत वितरण यानागुलिं राहत वितरण विवाद रहित हे जुल’ उपप्रमुख खड्कां धयादिल । निगूगु चरणय् राहत माःगु परिवारया ल्याः ५० प्रतिशतं थहांवनीगु नं उपप्रमुख खड्काया अनुमान दु ।
नगरपालिकां न्हापांगु चरणय् ४१सः व ५२ परिवारयात राहत ब्यूगु खः ।
थीथी जिल्लां उच्च शिक्षाया लागिं किपुलिइ च्वनावयाच्वंपिं गुलिखे विद्यार्थीतयसं राहत मब्यू धाःगु न्यनेदुनि धइगु न्ह्यसलय् नगरपालिका प्रमुख रमेश महर्जनं राहत वितरणया झ्वलय् वडापाखें व त्रिभुवन विश्वविद्यालयलिसे समन्वय यानाः नं राहत वितरण यानागु जानकारी बियादिल ।
सच्छि व ३५ विद्यार्थीतयत विश्वविद्यालय परिसरय्, अनलाईन फाराम जायेकूपिं ४सः व ५९ विद्यार्थीयात छेँय् छेँय् राहत इनागु नगरपालिकां न्ह्यथंगु दु । नगरपालिकाया कथं त्रि.वि महिला छात्रवासय् २०म्हेसित गाःगु व मिजं छात्रवासय् ७१म्हेसित गाक्क राहत वितरण याःगु दु ।
राहत माःपिं विद्यार्थीं नगरपालिकाया अनलाईन फारम जायेकेफइगु नं नगरपालिकां न्ह्यथंगु दु । सरकारया निर्देशन कथं व समस्याय् लाःपिं सकसितं राहत वितरणय् प्राथमिकताय् तयागु नं वयकःया धापू दु ।
गुलिखे मनूतयुं एकद्वार प्रणालीमार्फत राहत वितरण यायेगु सरकारया नीति मल्यूगु व नगरपालिकायात जानकारी मब्यूसे राहत वितरण याःगु नं वयकःया धापू दु ।
नगरपालिकां आःतक्क ५१ लख तका ज्वलिंज्वःया राहत इनेधुंकूगु दुसा पूर्व निर्धारित कीर्तिपुर महोत्सवया लागिं फ्याःगु १ करोड तका नं विपद् कोषय् तयागु प्रमुख महर्जनं जानकारी बियादिल । नगरपालिकां थ्व हे बैशाख १६ गतेनिसें न्यान्हुतक्क महोत्सव यायेगु धकाः वंगु माघय् निर्णय याःगु खः ।
‘राहतया लागिं संघीय सरकारया जक ख्वाः मस्वःसे नगरपालिकाया स्रोतसाधनं फत्तले ज्या याये । संघीय सरकारं धेबा ब्यूसा ला बां हे लाइ । मब्यूसां नगरपालिकां राहतया लागिं थप ज्या न्ह्यःने यंके’ प्रमुख महर्जनं धयादिल ।
वाग्मती प्रदेश सरकारं राहत वितरणया लागिं नगरपालिकायात १२ लख तका ब्यूगु खः । येँ महानगरपालिकां आःतक्क राहत वितरणया ज्या न्ह्याकातःगु दुसा निगूगु चरणया राहत इनेगु निर्णय मेगु नगरपालिकां मयाःनि ।
लकडाउन ताःहाकयावंलिसें राहतया माग याइगु परिवारया ल्याः नं अप्वया वनाच्वंगु दु ।
येँया मस्जिदय् च्वंपिन्त नं कोरोना परीक्षण न्ह्याकल
लहना न्यूज | ने.सं. ११४० बछलाथ्व पारु (२४ अप्रिल २०२०), शुक्रवाः
सरकारं येँय् च्वंगु मस्जिदय् च्वंपिं फुक्कसिगु कोरोना भाइरस (कोभिड–१९) परीक्षण शुरु याःगु दु । उदयपुरया मस्जिदय् च्वंपिं मनूतय्के कोरोनाया संक्रमण खनेदयेधुंकाः येँय् च्वंगु मस्जिदय् दुपिं फुक्कसिगु परीक्षण न्ह्याकूगु स्वास्थ्य विभागया महानिर्देशक महेन्द्रप्रसाद श्रेष्ठं जानकारी बियादीगु दु ।
विभागया महानिर्देशक श्रेष्ठयाकथं म्हिगः विहिवाःनिसें थनया मस्जिदय् च्वंपिं मनूतय्त परीक्षण पोलिमरेज चेन रियाक्सन (पीसीआर) न्ह्याकूगु खः । वय्कःया कथं म्हिगः विहिवाः ७६म्हेसिगु परीक्षण याःगु व ल्यंदनीपिनिगु थौं परीक्षण जुयाच्वंगु दु । येँय् निम्ह दुगु अनुमान याःगु दु ।
उदयपुरया त्रियुगा नगरपालिकाया भुल्केय् च्वंगु मस्जिदय् २७म्हेसिके कोरोना संक्रमण खनेदुगु खः । उपिं मध्ये स्वम्ह येँय् वंगु खंगु महानिर्देशक श्रेष्ठं जानकारी बियादीगु दु ।
राष्ट्रपतिपाखें निगुलिं अध्यादेश खारेज
लहना न्यूज | ने.सं. ११४० बछलाथ्व पारु (२४ अप्रिल २०२०), शुक्रवाः
राष्ट्रपति विद्यादेवी भण्डारीं दल विभाजनया प्रावधान छ्वासुकेगु व संवैधानिक परिषद सम्बन्धि निगुलिं अध्यादेश खारेज यानादीगु दु ।
थौं शुक्रवाःया मन्त्रीपरिषदया मुँज्यां निगुलिं अध्यादेश लित कायेगु निर्णय यायेवं राष्ट्रपति विद्यादेवी भण्डारीं खारेज यानादीगु खः । वंगु सोमवाः जारी जूगु उगु अध्यादेशयात कयाः प्यखेरं विरोध जूगु खः ।
राष्ट्रपति भण्डारीं मन्त्रीपरिषदया सिफारिसकथं नेपाःया संविधानया धारा ११४या उपधारा (२०)या खण्ड (ख)कथं अध्यादेशत खारेज जूगु राष्ट्रपतिया ज्याकुथिं न्ह्यथंगु दु ।
सरकारं संवैधानिक परिषद (काम, कर्तब्य, अधिकार व कार्यविधि) सम्बन्धि (न्हापांगु संशोधन) अध्यादेश, २०७७ व राजनीतिक दल सम्बन्धि (निक्वःगु संशोधन) अध्यादेश, २०७७ हःगु खः ।
आपूर्ति व्यवस्था अपुइकेगु मेयर शाक्यया कुतः, सरोकारवालानाप सहलह
नृपेन्द्रलाल श्रेष्ठ | चौलागा चतुर्दशी ११४०, बैसाख १० बुधवाः
येँ महानगर दुने आपूर्ति व्यवस्था अपुकेगु लागि येँ महानगरपालिकां सरोकारवालानाप सहलह न्ह्याकुगु दु । कोरोना भाइरस रोकथाम तथा नियन्त्रणया लागि सरकारं जारी याःगु लकडाउन लम्वे जुगुलि आपूर्ति व्यवस्थाय् छु भचा असहज जुगुलि सहज यायेत येँ महानगरपालिकां सरोकारवालापि नाप सहलह न्ह्याकुगु दु ।
येँ महानगरपालिकाया मेयर बिद्यासुन्दर शाक्यया अगुवाइलय् जुगु उगु सहलहलय् महानगरपालिकाया प्रमुख प्रशासकीय अधिकृत एकनारायण अर्याल, काठमाडौँ जिल्लाया प्रमुख जिल्ला अधिकारी जनकराज दाहाल, सहसचिव राजेश्वर ज्ञवाली लगायतपिन्स न ब्बति कयादिगु खः ।
उगु बैठकय् येँ महानगरपालिकाया मेयर शाक्यं महानगर दुने आपूर्ति व्यवस्थाय् एक रुपता हयेगु विषयय् सहलह जुगु धका जानकारी बियादिगु खः । ‘लकडाउनया इलय् आपूर्ति व्यवस्थाय् एक रुपता कायम यायेगु आर्थिक गतिविधियात चलायमान दयेकेइगु विषयय् यक्को जोड बियाःगु,’ मेयर शाक्यं धयादिगु खः, ‘आः लकडाउनया अवस्थाय् अतिविपन्न, असाहय व मजदुरयात जक राहतया व्यवस्था यायेगु मखु थः हे न्यायेफुपिन्त न वातावरण दयेके बिइमाःगु अवस्था दु । थुगु विषयय् जिमिसं गम्भीर जुया सहलह याना फयाफतले सहज वातावरण निर्माण यायेगु जुइ ।’
उगु सहलहयु मेयर शाक्यं आः येँ महानगरपालिकापाखे जक ६२ द्धः ७२२ म्हसित राहत बिइ धुन व १४ द्धः व ५१७ म्हसित जा नका च्वनागु जानकारी न बियादिगु खः । ‘येँ महानगरपाखे थुलि मछि मनू तयेत राहत वितरण यानागु व जा नकेगु ज्या जुगु धका धयादिसे, ‘थुलि याना न नयेगु समस्या वया गामय् वनेत बाध्य जुगु बुखँ वयाच्वगु दु धका धयादिसे । नयेगु समस्या याना गामय् वनेगु अवस्था बिइ मखु धका जिमिसं पटक–पटक धया वयाच्वनागु दु, आः न सुयात नयेगु समस्या दु सा नकेत जिमि तयार दु धका धयादिगु दु ।’
मेयर शाक्यं आतक येँ महानगरपालिका दुने ८५६ म्हसित र्यापिड टेष्ट यायेगु झ्वलय् दक्को सिगु रिपोर्ट नेगेटिभ वःगु आतक याःगु अवस्थाय् येँय् सुरक्षित दु, हथाय् चाया स्वनिगः पिहा मवनेत न महानगरवासीयात इनाप याःगु दु । महानगरपालि दुनेया पसः गुवलय् वडां गुवलय् प्रहरीं बन्द यायेगु व गुुवलय् चायेकेगु बिइगुलि समस्या वःगुलि समन्वय याना न्ह्या वनेगु जुइ धका धयादिगु दु ।
लकडाउनयात पूर्णतयाः पालना यानादिगुलि व्यवसायीपिन्स सकारात्मक भूमिका म्हितुगु धका मेयर शाक्य सुभाय् न बियादिगु दु ।
उगु सहलहलय् प्रहरी नायब महानिरीक्षक (डिआइजी) विश्वराज पोखरेल, उद्योग परिसंघया अध्यक्ष शतिशकुमार मोर, अफ कमर्शया अध्यक्ष राजेशकाजी श्रेष्ठपिनिगु सहभागी दुगु खः ।
