Display Style:
Column Style
नेपाल मोडेल स्कुलय् विज्ञान व सांस्कृतिक प्रदर्शनी
लहनान्युज | सिल्लाथ्व चतुर्दशी ११३९ (फ्रेअवरी १८ २०१९)
येँया बसुन्धराय् चव.गु नेपाल मोडेल स्कूलय् वंगु माघ २८ व २९ गते न्हय्क्वःगु नेपाल मोडेल शैक्षिक मेला २०७५ (विज्ञान, गणित, चित्रकलानापं सांस्कृतिक प्रदर्शनी २०७४) जुल ।
उगु प्रदर्शनीया उलेज्या नेपाल ललितकला प्रज्ञा प्रतिष्ठानया संस्थापक कुलपति नापं वरिष्ठ कलाकार किरण मानन्धर व त्रिभुवन विश्वविद्यालय् वनस्पति केन्द्रीय विभागया प्रा. डा. सञ्जयकुमार झा नं मंकाःकथं यानादीगु खः ।
उगु प्रदर्शनीइ निगू दर्जन स्वयां अप्वः वैज्ञानिक प्रयोग, गणितीय प्रयोग व स्वंगू दर्जनस्वयां अप्वः चित्रकलालिसें साँस्कृतिक ज्याझ्वः जूगु खः ।
उगु प्रदर्शनीइ प्यद्वःम्ह ब्वँमिपिं, स्वसःम्ह स्यनामि व द्वःछिम्ह अभिभावकपिन्सं अवलोकन याःगु खः ।
सः छगू फरक अभिव्यक्तिस मथुरा साय्मि
लहनान्युज | सिल्लाथ्व एकादशी ११३९ (फ्रेअवरी १६ २०१९)
नेपालभाषा ख्यलय् भाषा साहित्य च्वन्ह्याकेगु तातुनाः सः छगू फरक अभिव्यक्तिया ग्वसालय् थौं शनिवाः स्वक्वःगु साहित्यिक मुँज्या यलय् जूगु दु ।
सुनिल बज्राचार्यं न्ह्याकादीगु उगु ज्याझ्वलय् बरिष्ठ साहित्यकार बाखं च्वमि मथुरा साय्मिया याकः बाखं ब्वनेज्या जूगु दु ।
च्वमि साय्मिं बाध्यात्मक कुसंस्कारयात हाचांगाये मफयाः थःमांयात वासःयाये मफयाः म्वाके मफुगु चीमिपिनिगु नुगलय् हे तिक्क मिनिगु बाखं, विकासया नामय् सरकारं निर्मम पूर्ण ढंगं दमन यानाः डोजर आतंक यानाः नेवाःतय्गु छेँ थुनाब्यूगु बाखं, माया मतिनाया बाखं लगायत मुक्कं न्ह्यपु बाखं इन्क्लाब, गुथि, संस्कार, घाः, ला नःम्ह बुद्ध, प्रेम परीक्षा, भुलं नःगु विष ब्वनाः न्यंकादीगु खः ।
उगु ज्याझ्वलय् ज्ञानी राजा मानन्धरया ‘मतिनाया सवाः’ (चिबाखं मुना) मथुरा साय्मि, नरेश अमात्य, सुधिर ख्वबि स्वम्हसिनं मंकाः कथं चिखिफ्यनादीगु खः ।
ज्याझ्वलय् उपन्यासकार मथुरा साय्मियात मतिनाया चिं सुधिर ख्वबिं लःल्हानादीगु खः ।
बुखँ – नेवाः सूचना केन्द्र किपा – राजेन्द्र रञ्जित
प्रजातन्त्र दिवस, व्यवस्थापन उपसमितिया मुँज्या क्वचाल
नृपेन्द्रलाल श्रेष्ठ | सिल्लाथ्व दशमी ११३९ (फ्रेअवरी १५ २०१९)
थ्व हे वइगु फागुन ७ गते प्रजातन्त्र दिवसकया मूज्याझ्वलय् ब्बति काइपिनिगु लागि सम्माजनक च्वनेगु थाय्या लागि व्यवस्था यायेगु निर्णय यासें व्यवस्थापन उपसमितिया मुँ क्वचाःगु दु ।
बिहीवाः महानगरया प्रमुख नाप प्रजातन्त्र दिवस व्यवस्थापन उपसमितिया संयोजक विद्यासुन्दर शाक्यया अध्यक्षताय् च्वंगु मुँज्यां वःगु दँया समीक्षा यासें स्थानीय सरकारया प्रतिनिधियात आकर्षक सांस्कृतिक झाँकी नाप ब्बति कायेगु निर्णय यागु दु ।
महानगरं नेपाली सेना, नेपाल प्रहरी, सहरी विकास तथा भवन निर्माण विभाग, स्थानीय सरकार व नागरिक नाप समन्वयय् सम्पन्न यायेगु योजना दुगु महानगरया प्रमुख बिद्यासुन्दर शाक्यं जानकारी बियादीगु खः ।
थुुगु दँय् प्रजातन्त्र दिवस हनेत प्रधानमन्त्रीया अध्यक्षताय् मुल समारोह समिति गठन याःगु खःसा सूचना तथा सञ्चार मन्त्रीया संयोजकत्वय् प्रचार प्रसार उपसमिति, महानगर प्रमुखया संयोजकत्वय् मञ्च सजावट नाप व्यवस्था उपसमिति व येँ जिल्लाया प्रमुख जिल्ला अधिकारीया संयोजकत्वय् ग्राउण्ड, कवाज, व्यायाम, व्यवस्थापन समन्वय उपसमिति गठन याःगु खः ।
थुगु ज्याझ्वलय् राष्ट्रपति, उपराष्ट्रपति, प्रधानमन्त्री, उपप्रधान मन्त्री नाप मन्त्री, प्रधानन्यायाधीश, सुरक्षा निकायया प्रमुख, प्रदेश नाप स्थानीय सरकारया प्रमुख व स्थानीय सरकारया प्रतिनिधि लगायत जनसाधारणपिनिगु ब्बति दइ ।
इजरायलय् नेपाली राजदूत डा.अञ्जान शाक्ययात विशिष्ट सम्मान
नृपेन्द्रलाल श्रेष्ठ | सिल्लाथ्व दशमी ११३९ (फ्रेअवरी १५ २०१९)
इजरायलया लागि नवनियुक्त नेपाली राजदूत डाक्टर अन्जना शाक्यं म्हिगः विहीवा इजरायली राष्ट्रपतिया ज्याकुथि थःगु ओहोदाया प्रमाण–पत्र इजरायली राष्ट्रपति रेउभेन रिभ्लीनयात पेश याःगु दु
ओहोदाया प्रमाण–पत्र पेश यायेगु ज्याझ्वलय् इजरायली राष्ट्रपतिया ज्याकुथिं विशिष्ट सम्मान गार्ड अफ अनर इजरायली सरकारं नेपाली राजदूत डाक्टर शाक्ययात बिया अत्यन्त विशिष्ट सम्मान बिइगु ज्या न जुगु खः ।
नेपाली राजदूत डाक्टर शाक्य नाप लायेगु झ्वलय् इजरायली राष्ट्रपति रेउभेन रिभ्लीन नेपालय् न्ह्ययेगु हे प्रदेशय् इजरायलया सेन्टर अफ एक्सिलेन्सी अर्थात इजरायली प्रविधिया तालिम केन्द्र खोले यायेगु लागि प्रस्ताव तःगु खः ।
इजरायली उच्च प्रविधिया कृषि, सूचना–प्रविधि, कम्प्युटर इञ्जिनियरिङ, मेडिकल, शिक्षा नाप एडभान्स टेक्नोलोजीया सेन्टर अफ एक्सिलेन्सी खोल यानार नेपालयात ग्वाहालि यायेत याःगु इनाप राष्ट्रपति रिभ्लीनं सकारात्मक रुपं कयादिगु दु ।
उगु भेटवार्ताय् नेपाली राजदूत डाक्टर शाक्यं नेपालया राष्ट्रपति विद्यादेवी भण्डारी नाप प्रधानमन्त्री केपी शर्मा ओलीेया सन्देश व नेपाल भ्रमणया ब्बनापौ न्ह्यब्बयादीगु खः ।
हस्तकला व संस्कृतिया विकासय् चीन ग्वहालि याइगु
नृपेन्द्रलाल श्रेष्ठ | सिल्लाथ्व अष्टमी ११३९ (फ्रेअवरी १३ २०१९)
यलया कला, संस्कृतिया विकासया लागि चीनं ग्वहालि यायेत सांस्कृतिक अध्येयतापिं तयार दु ।
वल्ड क्राफ्ट काउन्सिलपाखें यलयात विश्वया ३५ औं कलाया नगरी घोषणा जुगु कथं माःगु ज्यायायेत सहकार्य यायेगु इच्छा प्वःकुगु दु ।
निवृत प्राध्यापक सु हाओया नेतृत्वय् वल्गु चिनिया“ टोलीं थौं बुधवाः यलया लाय्कु लागाय् यल महानगरपालिका– १६ या वडाअध्यक्ष निर्मलरत्न शाक्यं खादा न्ययेका लसकुस यानादीगु खः ।
उगु ज्याझ्वलय् चिनिया“ टोलीं हस्तकला, संस्कृतिया प्रर्वद्धन यायेत सहकार्य यायेगु इच्छा व्यक्त याःगु खः । वडाअध्यक्ष शाक्यं १६ वडा कला, मूर्त, अर्मूत संस्कृति दुगु थाय् खः । अन वडाय् ६० प्रतिशत स्वया अप्वो हस्तकला व्यवसायी दुगु लि बृहत कला व सांस्कृतिक महोत्सव यात्यःनागु धका जानकारी न बियादीगु खः
थुगु पुचलं विश्वसम्पदा सूचीकृत यलाया लाय्कु अवलोकन यासें बखुबहालय् वना वरिष्ठ संस्कृतिविद् सत्यमोहन जोशीयात न नाप लानादीगु खः । टोलीया नेतृत्व यानादीम्ह प्राध्यापक सुहाआें जोशीपाखें सन् १९६३ सालय् नेपाली व नेपाल भाषा सयेकादीगु खः । उगु इलय् नेपाली भाषा स्यनेत जोशी पेकिङ्ग झायादीगु खः । उगु पुचलं हिरण्यवर्ण महाविहार गोल्डेन टेम्पलय् न अवलोकन याःगु खः ।
‘हस्तकला नगरीको उत्सव, कला संस्कृतिको महोत्सव’ धइगु नारा ज्वना थ्वहे वइगु चैत्र १३ निसे १७ गते तक महोत्सव जुइ त्यःगु खः ।
