Display Style:
Column Style
आँखा दान समाजयात भौतिक सामान लःल्हात
नृपेन्द्रलाल श्रेष्ठ | दिल्लागा द्धादशी ११३९ (जुलाई २९ २०१९)
सेन्चुरी कमर्सियल बैंक लिमिटेड, यलया मानभवन शाखां ‘आँखा दान समाज’यात थीथी भौतिक सामान छगू ज्याझ्वःया दथुइ लःल्हाःगु दु ।
उगु ज्याझ्वलय् शाखाया बैंक मुख्य मेनेजर रन्जन खड्कां तिलगगां आँखा प्रतिष्ठानया सभाहलय्उगु सामान समाजयात लःल्हानादीगु खः ।
समाजया नायः साधुराम महर्जनया सभाध्यक्षताय् जूगु उगु ज्याझ्वलय् भागिरथ बज्राचार्य नं थःगु नुगः खँ तयादीगु खः ।
समाजया दुजः मोतिशान्ति शाक्यं लसकुस यानादीगु खः ।
संघनायक ज्ञाणपूर्णिकयात २५ गते अभिनन्दन याइगु
नृपेन्द्रलाल श्रेष्ठ | दिल्लागा एकादशी ११३९ (जुलाई २८ २०१९)
नेपाःया न्ह्यम्हम्ह संघनायक भिक्षु ज्ञाणपूर्णिक महास्थविरयात थ्वहे वइगु श्रावण २५ गते शनिवाः कुन्हु सार्वजनिक अभिनन्दन उपराष्ट्रपति नन्दबहादुर पुनया मुपाँहसूइ जुइ त्यःगु खः ।
मूपाँहा जुया झायादिइत्य उपराष्ट्रपति नन्दबहादुर पुनयात अखिल नेपाल भिक्षु महासंघ ब्बनापौ लल्हानादिगु खः ।
अखिल नेपाल भिक्षु महासंघया संयोजनय् थीथी बुद्ध धर्म सम्बन्धी संघसंस्थां वयकःयात अभिनन्दन याये त्यःगु खः । भिक्षु भिक्षुणी व सच्छिगु मल्याक बौद्ध संघसंस्थाया ब्बति दइगु उगु अभिनन्दन ज्याझ्वलय् ब्बति दइगु धका महासंघ धाःगु दु ।
नेपाया खुम्हम्हं संघनायक भिक्षु अश्वघोष महास्थविर मदे धुका वःगु बैशाख १ गते भिक्षुसंघं विधि कथं वयकःयात संघनायकया पदवी लल्हागु खः । भिक्षु महासंघया संरक्षक तक जुयादिम्ह वयकः विशेषतः अभिधर्मया गहन ज्ञाता न जुयादि ।
वयकःयात बुद्ध धर्मया ख्यलय् यानादिगु योगदानया कदर यासे बर्मा (म्यानमार) सरकारं अग्गमहापण्डित सासनधज धम्माचरियया उपाधिपाखे न विभुषित जुयादिइ धुकुगु दु ।
युवा बौद्ध समूहया अध्यक्षय् तुलाधर
लहनान्युज | दिल्लागा एकादशी ११३९ (जुलाई २८ २०१९)
युवा बौद्ध समूह, येँय जुगु वार्षिक साधारण सभाय् मदन बहादुर तुलाधरया अध्यक्षताय् १३ म्हसियाःगु न्हुगु कार्यसमिति ल्यःगु दु ।
उगु कार्यसमितिइ उपाध्यक्षय् र्निमला कंसाकार व राजु शाक्य, सचिव रजनी ताम्राकार, कोषाध्यक्ष कल्पना देवी तुलाधर व सहसचिवय् नानीशोभा मानन्धर च्वनादिगु दु । अथेहे दुजलय् युरिकाजी कंसाकार, ठूलो राजा शाक्य, अकिलशोभा ताम्राकार, विजयरत्न तुलाधर, रत्ना शाक्य, राजा शाक्य व धर्मशील शाक्ययात ल्यःगु दु ।
उगु साधारण सभाय् थःगु खँ तयादिसे पूर्व मन्त्री नाप समूहया सल्लाहकार डा केशवमान शाक्यं विगतय् धर्मनिरपेक्षताया मुद्दा न्ह्यने यंका जनजाति तयेत बुद्ध धर्म न्ह्यने हयेगु अभियानय् समूह नं उदाहरणीय ज्या याःगु खँ लुमकादिगु दुसा आ वइगु इलय् न उत्पीडित व लिउने लाना च्वंगु वर्गयात संगठित याना समावेशिताया मुद्दाय् ज्या याये माःगु धका वयकलं समूहयात सुझाव न बियादिगु खः ।
विसं २०३९ सालय् निस्वः थुगु समूह नं पञ्चशील अभियान व आदिवासी जनजाति तयेत बौद्ध जागरण शिविर सञ्चालन याना बुद्ध धर्म व दर्शनयात जनस्तरपाखे न्ह्यने हयेगु ज्या याना वयाच्वंगु दु ।
दाफा भजन स्यनेज्याया जुल
लहनान्युज | दिल्लागा दशमी ११३९ (जुलाई २७ २०१९)
साँस्कृतिक संरक्षण नापं साँस्कृतिक हस्तान्तरण यायेगु मूतातुना तया यलया खपिन्छेँ त्वालय् वंगु गुला न्ह्यः २०७५ कार्तिक ८ गते निसें न्ह्यागु दाफा भजन स्यनेज्या २०७६ श्रावण ९ गते त्वाःलय् च्वंम्ह नासः द्यःया थाय् चा च्वनालि श्रावण १० दाफा पिदन ।
बुलुहुँ लोपोन्मुख जुया वनाच्वंगु नेवाः साँस्कृतिक बाजा स्यने कने यायेगु हे मू हाथ्याया जुयाच्वंगु थ्व इलय् न्हू पुस्ताया ८५ म्हसिया सक्रियता पूर्वक ब्वतिकाःगु खः ।
उगु दाफा भजन स्यनेज्याया मू खिं गुरु अष्टलाल महर्जन खःसा मू म्येँ गुरु मोतिलाल महर्जन स्यनादिगु खः । दाफा स्यनेज्या सुथांलाकेत ग्वहालिमि कथं खिं गुरुपासा भुवन महर्जन व म्यँेय् गुरुपासा किसलाल महर्जन च्वनादीगु खः ।
थुगु दाफा स्यनेज्याय् खिं व म्ये हालेगुलिइ परम्परागत ल्याखं सिइबिया न्हाप ल्यू लाःगु घोषणा याइगु खः । थुकथं खिं थायेगुलिइ राजन महर्जन न्हाप व किशोर महर्जन ल्यूलागु खः । अथेहे म्यें श्रीषन महर्जन न्हाप व दिवेश अवाले ल्यूलागु खः ।
यलया लिच्छवि जुजु बसन्तदेवया पालय् (शक सम्बत ४५२)स पलिस्था याना तःगु जःधुं, लिक्क च्वंगु तुंगः व यलया आकाश भैरव (ह्यगृव भैरव) विराजमान जुयाच्वंगु लिच्छवि त्वाः खपिन्छेँ त्वालय् साँस्कृतिक परम्परा न्ह्याकेत समस्या वयधुंकुगु अवस्था खः ।
थथे साँस्कृतिक परम्परायात पुस्तान्तरण यायेगु हथाय् जूसां तबि न्ह्याके मफयाच्वंगु खः । थ्वसिबें न्हापा २०५४ सालय् दाफा स्यनेज्या जूगु खः ।
मेयर बिद्यासुन्दरं लखुतिर्थया शिलान्यास यात
नृपेन्द्रलाल श्रेष्ठ | दिल्लागा दशमी ११३९ (जुलाई २७ २०१९)
येँ महानगरपालिका मेयर विद्यासुन्दर शाक्यं महानगरय् खाली विरोध जक जुगु धइगु खँ कनादिगु दु ।
थुगु खँ थौं येँया १५ वडाय् बिष्णुमती खुसिइ सिथय्े लख तीर्थ पुननिर्माणया शिलान्यास यायेगु झ्वलय् यँे मनपाया मेयर शाक्यं सम्पदा पुननिर्माणया योजना दयेका सहलहया लागि वडाय् छ्वया सहलह कायेगु यासा छु लिसः मवइगु तर ज्यायेगु झवलय् पगः थनेगु जक ज्या जुया च्वःगु खँय् दुःख प्वकादिल ।
महानगरं लखुतिर्थ पुननिर्माणया लागि ५० लाख खर्च यायेगु योजना दुगु धका मेयर शाक्यं जानकारी बिया दिसे पुननिर्माणया बिस्तृत परियोजना प्रतिवेदन तयार यायेत थुकिगु खर्च अप्वो जुःसा महानगरं जिम्मेवारी कायेगु जुइ धका बचं न बियादिगु दु ।
थौं जुगु उगु ज्याझ्वलय् महानगर प्रवक्ता नाप १५ वडाध्यक्ष ईश्वरमान डंगाल न महानगरया हरेक ज्याझ्वलय् विरोध जक जुया च्वंगुलि इलय् याये माःगु योजना पुरा याये मफया च्वंगु दु धका धयादिगु दु ।
उगु ज्याझ्वलय् शिलान्यास समारोह पुननिर्माण समितिया संयोजक सुवर्ण डंगोल, पूर्व संसद सदस्य लक्ष्मीदास मानन्धरपिन्सं लखु तीर्थ पुननिर्माण याये फत धाःसा नेपाल मण्डलवासी तयेगु गौरवा ज्या जुइगु धइगु धारणा तयादिगु खः ।
पुननिर्माणया लागि नेपाल राइजिङ् अमेरिका (गैर आवासीय नेपालीया संस्था, अमेरिकाया सियाटलय् च्वपिनिगु) २५ लाख बराबर ग्वाहालि दुगु खः ।
