Display Style:
Column Style
क्वन्ती थौं मेला
नृपेन्द्रलाल श्रेष्ठ | गुंलाथ्व पुन्हि ११३७ (अगष्ट ७ २०१७)
गुन्हुपुन्हीया कुन्ह थौं यलया क्वन्ती महाद्यःया थाय् तःधंगु मेला जूगु दु । कुन्ति महाद्यःयात कुम्भेश्वर महाद्यः नं धायेगु याः ।
थौं बहनीनिसें सोमवाः तकं अन मेलाय् दर्शनयाय्त अप्वं हे मनूत वइ । चान्हय् हे पुखुलिइ महाद्यःया मूर्ति तइगु खःसां जात्रा धाःसा पुन्हि खुन्हु विशेष कथं याइ । कुम्भेश्वर महाद्यःया मूर्ति अथे पुखुलिइ तइगु खः । थ्यंमथ्यं ३ फिट दुगु उगु मूर्ति तया पुजा आजा याइगु अले तःजिगु जात्रा तकंयाइगु खः ।
उगु पुखूया लः सिलु तिर्थपाखें वयाच्वंगु लः धकाः धायेगु याः । अथे हे सिलु तिर्थय् वनीगु इलय् हे क्वन्ति महाद्यःया पुखिलुइ लः जाया वइगु जुया नं सिलु तिर्थ नाप स्वापू दुगु पुखू नं धायेगु याना वयाच्वंगु दु । उकिं सिलु तिर्थय् म्वः ल्हुइगु झ्वलय् गुलि पुण्य लाइगु धार्मिक मान्यता दु ।
कुन्ति महाद्यःया पुखुलिइ म्वः ल्हुइगु इलय् उलि हे पुण्य लाइ धइगु मान्यता दु । मेलाय् स्वनिगः व स्वनिगलं पिनेया भक्तजनपिं नं वंगु दु । चान्हय् कुम्भेश्वर देगःया महाद्यःया मूर्तियात अन च्वंगु पुखुलिइ पुजारीतय्सं तइगु चलन दु ।
द्यः खतय् अथे महाद्यःया मूर्ति तइगुयात पुजा याइगु हे उगु मेलाया दक्ले आकर्षण खः । उगु इलय् पुखुलिइ धरब्वानाच्वंपिं नं यक्व दइगु खः ।
काठमाडौं मोडेल स्कुलय् खुइगु कुतः
नृपेन्द्रलाल श्रेष्ठ | गुंलाथ्व चतुर्थी ११३७ (अगष्ट ६ २०१७)
थनया खुसिबुँ स्थित काठमाडौं मोडेल स्कुलय् खुइगु कुतः जूगु दु । वंगु चान्हय् १०ः२२ ताः इलय् ब्वनेकुथिया लुखाफुसय जडान जुयाच्वंगु सीसीक्यामेराया केबल चफुनां सीसी क्यामेराय् क्षति याना ब्यूगु दु ।
सीसी क्यामेराय् कैद जूगु भिडीयो फुटेजय् ल्यायम्हचाम्ह मनुखं पःखाः गयाः खुइगु कुतः याःगु खनेदु ।
थुकियात कयाः प्रहरी प्रभाग सोह्रखुट्टे जानकारी बीगु ज्या जुइधुंकूगु दु । प्रहरी प्रभाग सोह्रखुट्टे पाखें उगु फुटेजत कयाः यंके धुंकूगु व थःगु पाखें अनुसन्धान न्ह्याकेगु बचं ब्यूगु दु । धका पिन्सिपल राजेन्द्र महर्जनं जानकारी बीया दीगु दु ।
शास्त्रीय चर्या नृत्य प्रतियोगिताय् बज्रयान चर्या मण्डल न्हाप
लहनान्युज | गुंलाथ्व चतुर्थी ११३७ (अगष्ट ६ २०१७)
नृत्य निर्देशक संघ नेपालया ग्वसालय् जूगु यल जिल्ला ब्यापि शास्त्रीय चर्या नृत्य प्रतियोगिता बज्रयान चर्या मण्डल श्रीबहालं त्याकूगु दु । ब्वतिकाःगु १३ गू पुचःयात ल्यूने लाकाः मण्डलं न्हापा सिरपा त्याकूगु खः । मण्डलं बज्रयोगिती चर्या नृत्य न्ह्यब्वःगु खः ।
आरती शाक्य, अञ्जु शाक्य, लहना शाक्य, अलस्का शाक्य, निस्ला शाक्यं स्यानामि नानीबाबु बज्राचार्य (माइला गुरुजुं) स्यनादीगु चचाप्याखं दकले बांलागु प्याखंकथं ल्यज्या जुलसा थुगु प्याखं स्यनामि बज्राचार्यं दकले बांलाम्ह प्याखं स्यनामिया सिरपाः नं त्याकादिल ।
कासाय् सम्यक आजिविका अध्ययन केन्द्रया श्रृजनाबज्राचार्य, स्मृति बज्राचार्य, समृद्धि बज्राचार्य, मिजला शाक्य, श्रृति शाक्यं राजु शाक्यं स्यनादीगु कुमारी चचाप्याखं न्ह्यब्वसें ल्यू सिरपा त्याकादिलसा लियांल्यू यशोधर महाविहार चर्या नृत्य मण्डलया एलिसा बज्राचार्य, आस्ना बज्राचार्य, श्रीया बज्राचार्य, यचू बज्राचार्य, श्रृष्टि बज्राचार्यं न्ह्यब्वःगु हेमरत्न बज्राचार्य (हेम गुभाजु) व माइला गुरुजुया निर्देशनय् न्ह्यब्वःगु पञ्चबुद्ध चचाप्याखनं त्याकूगु खः ।
हःपाः सिरपा धाःसा नेपालभाषा मंकाः खलः यलया गरिमा महर्जनं मञ्जुश्री चचाप्याखं न्ह्यब्वयाःत्याकूगु खः ।
सिरपा त्याकादीपिन्त दसिपौलिसें छसीकथं न्हाप १५ द्वः, ल्यू १० द्वः, लियांल्यू ५ द्वः व हःपाः ३ द्व तकाः सिरपा नं देछाःगु खःसा शिल्ड वइगु श्रावण २६ गते राष्ट्रिय नृत्य महोत्सव २०७४ या लसताय् जुइगु ज्याझ्वलय् देछायेगु ग्वसाः खलकं धाःगु दु ।
संघया केन्द्रीय उपाध्यक्ष संजय शर्मा राजोपाध्यायया सभापतित्वय् जूगु कासा ज्ञानबहादुर महर्जनया कजिसुइ न्ह्याःगु खः ।
कासाय् वरिष्ठ नृत्य निर्देशक विणा जोशी, चर्या गुरु यज्ञमानपति बज्राचार्य, वरिष्ठ नृत्य निर्देशक चन्द्रमान मुनिकार निर्णायक मण्डलय् च्वनादीगु खः ।
ज्याझ्वलय् पाहाँ कलाकारकथं शेरबहादुर महर्जन, कास्पल कपिलश्रेष्ठ व दृष्टिविहिन न्हूच्छे महर्जनं म्ये न्ह्यब्वयादीगु खःसा ललितपुर कल्चरया सनीसा महर्जन, सेरेना महर्जन व सेविकां सुनीता महर्जनया निर्देशनय् नेपालभाषाया म्ये “लिक्क वया जितः धालवं” य् प्याखं न्ह्यब्वयादीगु खःसा ज्ञानशिखा बोर्डिङ हाइस्कुलया ब्वमिपिं प्रशंसा महर्जन, रिया महर्जन, श्रृजा अवाले, मनिषा श्रेष्ठ, एलिना मगर, रोजिना पोखरेलं गौतम नकर्मीया निर्देशनय् “त्यो डाँडामा कोइली करायो” म्येय् तामाङ सेलो हुलाप्याखं न्ह्यब्वयादिल ।
नृत्य निर्देशक संघ नेपाल स्थापना जूगु दच्छि दुगु लसताय् न्हापांगु स्थापना दिवस हनेगु झ्वलय् थुगु ज्याझ्वः ग्वसाः ग्वःगु खः ।
जनप्रतिनिधियात सम्मानयात
नृपेन्द्रलाल श्रेष्ठ | गुंलाथ्व त्रयोदशी ११३७ (अगष्ट छ २०१७)
येँ महानगरपालिकाया मेयर बिद्यासुन्दर शाक्य, उपमेयर हरिप्रभा खड्गी श्रेष्ठ व वडा १३ या अध्यक्ष धुब्रनारायण मानन्धरयात थौं छगु ज्याझ्वः दथुइ हनेज्या यागु दु ।
नमो हारती वचत तथा ऋण सहकारी संस्था(एफ एच एफ हारती ग्रुप) व रोटरी क्लब अफ काठमाण्डौं वेष्ट नेपाल कालिमाटीया मंकाः ग्वसालय् उगु ज्याझ्वःजुगु दु ।
हारती ग्रुपया अध्यक्ष सरोज श्रेष्ठं मेयर बिद्यासुन्दर शाक्य, उपमेयर हरिप्रभा खड्गी श्रेष्ठ व वडा १३ या अध्यक्ष धुब्रनारायण मानन्धर यात हनापौ लःल्हाना दिगु खः । उगु ज्याझ्वलय् जेष्ठ नागरिक पिंत न सम्मान यागु दु ।
उगु सम्मान ज्याझ्वः लिपा न्हिच्छि यकं हिदान, मिखा जाँच, सुगर नाप स्वास्थ्य शिविर नं जुगु खः ।
खस भाषायात कामकाजया मान्यता बियाः झगः ल्हागु दु
लहनान्युज | गुंलाथ्व त्रयोदशी ११३७ (अगष्ट छ २०१७)
हलिं नेवाः दबू, नेपाः देय् मूकवःया ग्वसालय् थौं यलया सातोआकी भबनय् ‘हलिंया नेवाः भबिष्य व हलि नेवाः दबू’ बिषलय् जुगु कार्यशाला गोष्ठीया उलेज्या मूपाहाँ बरिष्ठ बामबुद्धिजीबि प्रा.माणिकलाल श्रेष्ठ छगु ज्याझ्वःया दथुइ उलेज्या यानादीगु दु ।
उगु ज्याझ्वलय् दबूया कार्यबाहक नायः शाक्य सुरेनं ‘हलिंया नेवाः भबिष्य व हलि नेवाः दबू’ बिषलय् छगु कार्यपत्र न्ह्यब्बयादीगु खः । कार्यपत्रयात कया जुनिबज्र बज्राचार्य, ज्यो. र्कितिबदन जोशी, शुशिला शाक्य, गणेश भक्त शिल्पकार, व बिद्युत बज्राचार्र्य कार्यपत्रयात कया थःथःगु जिज्ञासा तयादीगु खः ।
उगु ज्याझ्वलय् मूपाहाँ प्रा. श्रेष्ठं सिकिमया मुख्यमन्त्री पवन चाम्लिङं सिकिमय् फुक्को भाषायात राष्ट्रिय मान्यता ब्युगु दु । तर नेपालय् धाःसा खस भाषायात जक कामकाजया भाषाया मान्यता बियाः झगः ल्हागु दु धयादिल ।
दबूया महासचिब रश्मिला प्रजापतिं लसकुश यानादिगु उगु ज्याझ्वलय् दबूया पुलापिं नायः नरेन्द्रभक्त हाडा, पुष्कर माथेमा, नेवाः अर्जनाइजेशन अफ अेरिकाया नायः बबिता प्रधान श्रेष्ठ व डा.महेशमान श्रेष्ठं थःथःगु नुगः खँ तयादीगु खः ।
दबूया ल्यु दांभरि सुदय शिलाकारं न्ह्याकादीगु उगु ज्याझ्वलय् दांभरि सुरेन्द्रभक्त श्रेष्ठ सभाय् देछानादीगु खः ।
