Display Style:
Column Style
नेवाः इकोनोमिक्सयात कयाः सहलह क्वचाल
लहनान्यूज | दिल्लागा चतुर्दशी ११३७ (जुलाई २२ २०१७)
नेवाः आर्थिक क्रान्तिया मुद्दा ज्वनाः न्ह्यःने वःगु ह्याउँनिभाः पुचलं नेवाः इकोनोमिक्स विषयस छगू सहलह ज्याझ्वः याःगु दु ।
यलय् जूगु सहलह मुँज्याय् नेवाः अभियन्ता अनुप सिं सुवालं ‘नेवाः इकोनोमिक्स, नेवाः स्वायत्त राज्यय् नेवाः आर्थिक विकासया लँपु’ विषयस ज्यापौ न्ह्यब्वयादीगु खः ।
नेवाः इकोनोमिक्सया थीथी पक्षयात कयाः पुचः दयेकाः नं सहलह जूगु खः ।
ज्याझ्वलय् नेवाः इकोनोमिक्स ताःलाकेत योजना, नेवाः समाजय् नेवाः इकोनोमिक्स गुकथं छ्यलेगु व नेवाः इकोनोमिक्सया अवधारणा लागू यायेधुंकाः नेवाः समाजं पृष्ठपोषण गुकथं यायेगु, नेवाः इकोनोमिक्स छ्यलेत कार्ययोजना, यायेमाःगु, फइगु अल्पकालीन व दीर्घकालीन ज्याझ्वः विषयस पुचः सहलह जूगु खः ।
प्यंगू अलग अलग पुचलय् सोहनलाल प्रधान, धीरेन्द्र राजभण्डारी, धनबहादुर महर्जन व राकेश मास्के सहजकर्ता कथं च्वनादीगु खः ।
पुचः सहलहस ज्ञानबहादुर महर्जन, उज्वल बज्राचार्य, मोहनमान श्रेष्ठ, सानुमैयाँ बज्राचार्य अले अच्यूतरत्न बज्राचार्य, प्रकाश श्रेष्ठ, उमेश बस्नेत, देवनारायण महर्जनं ब्वति कयादीगु दु ।
मेगु निगू पुचलय् मनरत्न शाक्य, मनराजा रंजित, ज्ञानीशोभा महर्जन व यावदप्रसाद रंजीत अले दयाचन्द्र श्रेष्ठ, रविनमान महर्जन व प्रदिप रंजितं ब्वति कयादीगु खः ।
थुगु सहलहया मू सारयात कयाः याकनं हे छगू अन्तक्र्रिया ज्याझ्वः यायेगु ह्याउँनिभाः पुचलं न्ह्यथंगु दु । अन्तक्र्रियास नेवाः इकोनोमिक्सया अवधारणा व मूज्या न्ह्यब्वयाः उकी अन्तक्र्रिया यायेगु पुचलं न्ह्यथंगु दु ।
इहिपाया किपा धेंधेंबल्ला क्वचाल
लहनान्युज | दिल्लागा चःह्रे ११३७ (जुलाई २२ २०१७)
स्वनिगः दुनेया फोटोग्राफर मुनाः नीस्वनातःगु “काठमाण्डौ फोटोग्राफर एशोसियशन”या ग्वसालय् जूगु किपाः धेंधेंबल्ला कासाय् सिरपाः त्याकूपिन्त छगू ज्याझ्वःया दथुइ सिरपाः लःल्हाःगु दु ।
नांजाःपिं कलाकार जोडी मदनकृष्ण श्रेष्ठ व हरिवंश आचार्यपिं मूपाहांकथं झायादीगु खःसा वय्कपिन्सं सिरपाः त्याकूपिं सकसित सिरपाः लःल्हाय्गुया नापनापं सच्छिपाः बांलाःगु किपाःया किपालुमिपिन्त हनापौ नं लःल्हाय्गु ज्याझ्वः जूगु खः ।
उगु ज्याझ्वलय् देय्न्यंकया किपालुमिपिन्सं ब्वति कयादीगु खःसा थुकी मुक्कं १२०० पाः किपाः धेंधेंबल्लाय् दुथ्याःगु खः । उकी मध्ये १०० पाः किपाः धेंधेंबल्लाय् दुथ्याःगु खःसा दुथ्याःगु किपाः मध्ये चितवनया सुमन सापकोटां न्हाप सिरपाः त्याकेत ताःलागु खः ।
अथेहेतुं ल्यू सिरपाः ओमलाल अकेला व लियांल्यू सिरपाः मनोजरत्न शाहीपिन्सं त्याकादीगु खः । थथे सिरपाः त्याकूपिन्त क्यानन्पाखें थीथी उपहार नं ब्यूगु खः । दक्कलय् बांलाःगु किपाःया सिरपाः ल्यय्गु नितिं योगेन्द्रमान बस्नेत, बालकृष्ण श्रेष्ठ व रत्नमान आँसु निर्णायक जुयादीगु खःसा सिरपाः ज्याझ्वलय् पुलांपिं किपालुमिपिं मंगलमोहन श्रेष्ठ, बखतबहादुर चित्रकारया नापनापं एशोसियशनया सल्लाहकारपिं राजभाई सुवाल व मञ्जुकुमार श्रेष्ठ अले सिने पत्रकार विजयरत्न असंबरे, कलाकार निर्देशक व किपालुमि पवन जोशी नं बिशेष पाहांकथं झायादीगु खः ।
काठमाण्डौ फोटोग्राफर एशोसियशनया ग्वसालय् जूगु इहिपा किपा धेंधेंबल्ला कासाय् दुथ्याःगु १०० पाः किपाःया ब्वज्या श्रावण ९ निसें ११ गतेतक बबरमहलया आर्ट काउन्सिलय् जुइगु ग्वसाः खलःया नायः भवदेव थापां जानकारी बियादीगु दु ।
येँया राष्ट्रिय नाचघरय् सनिवाः जूगु ज्याझ्वलय् हुलाप्याखंया ख्यलय् तसकं नांजाःपिं शंकर बिसी व पार्वति राईलिसें बज्रयोगिनी कला केन्द्रया पुचलं हुलाप्याखं व मेमेपिं कलाकारपिन्सं नाटक व म्येहाला न्यंकादीगु खः ।
सफू बिमोेचन
लहानान्युज | दिल्लागा चःह्रे ११३७ (जुलाई २२ २०१७)
नेपाल ज्योतिष परिषद् उपत्यका समितिपाखें ग्वसाःग्वःगु ज्योतिस डा. बिरेन्द् प्रसाद कायष्ठं च्वयादिगु ‘ज्योतिष व रोग’ नांया सफू पितब्वज्या याःगु दु ।
ख्वपय् जूगु उगु सफू पितब्वज्या समारोहया मू पाहाँकथं संसदया सांसद नारायण मान बिजुक्छेँ यानादिगु खः ।
उगु सफूतिइ थीथी राशिकथं गुगु ल्वचं याकन कइगु व उकिया लिच्वः गुकथं लाइगु व उकिया समाधान यायेत गुकथं ज्योतिष शास्त्र छ्यलीगु धैगु बारे च्वयातःगु धकाः ग्वसाः खलकं जानकारी ब्यूगु दु
न्हय्दँ लिपा ख्वपय् गुंलाया इलय् चीभाः धलं दनीगु
लहनान्युज | दिल्लागा त्रयोदशी ११३७ (जुलाई २१ २०१७)
ख्वपय् सवा लाख चैत्य दयेकेगु धार्मिक पर्व गुंला धलं तःजिक हनेगु तयारी याःगु दु । न्हिया न्हिथं चीभाः मयासे छछा जकः नया धलंदनीपिन्सं चीबाहाः थाइगु चलन दु । थुगुसी धलं दनीपिं खुइगुम्हं मल्याक दइ धकाः धाःगु दु ।
अथे हे धलं दनेगु नाप नापं बाजं थाना चीबहाः नं चाःहिउ वनीगु चलन नं दु । रफत सञ्चार क्लबय् शुक्रवाः ग्वसाःग्वःगु पत्रकार भेटघाट ज्याझ्वलय् गुंला लच्छि धलं ब्यवस्थापन समितिं न्हय्दँ लिपा हनेत्यनागु गुंला पर्वया नितिं दक्वं तयारी पूवने धुंकल धकाः जानकारी बिउगु दु ।
ज्याझ्वलय् समितिया सचिव रामकृण मानन्धरं गुंला पर्व बुद्ध धर्मवालम्बी नेवाःतय्गु जक मखुसें सकल नेपाःमी पिनिगु ऐतिहासिक पर्व खः धयादिल । वय्कलं गुंला हनेगु नितिं आर्थिक अभाव जुसां नं मानन्धर समुदायतय्गु ग्वहालीइ थुगुसी थुगु पर्व न्ह्याकेत्यनागु जानकारी बियादिल ।
न्हियान्हिथं नेकुं बाजा, धाः बाजा व नायःखीं बाजं थाना लिक्क लाःगु बहाःबहि, व चिबहाःद्य याथाय् वनेगु चलन दु । थुगु पर्वय् प्यदँदुपिं मचात निसें च्यय्दँ दुपिं ज्याथः ज्याथीपिन्सं नं ब्वति कयादी धकाः जानकारी बिउगु दु ।
अथेहे लच्छि यंकं न्ह्याइगु थुगु गुंला पर्वय् स्वनिगः लगायत लिक्क लाःगु चैत्य व बिहारयालिसें बौद्ध व हिन्दु धार्मिक तिर्थ स्थलया तकं परिक्रमा याना धंलं दनेगु थाय् थथुसालय् क्वचायेकेगु यायेगु चलन दुगु तकं वय्कलं धयादिल ।
दँमुँज्या व बासुरी पिथनेज्या
लहनान्युज | दिल्लागा त्रयोदशी ११३७ (जुलाई २१ २०१७)
यलया सलिछेँ भजन मंकाः खलःया झिंगुक्वःगु दँमुँज्या व बासुरी स्यनेज्या समापन समारोह जूगु दु । शुक्रवाः यलया नागबहालय् विशेष समारोहया दथुइ उगु कथंया ज्याझ्वः याःगु खः ।
सलिछेँ मंकाः खलःया नायः प्रकाशकाजि डंगोलया नायःसुइ जूगु उगु ज्याझ्वलय् यल महानगरपालिकाया मेयर चिरिबाबु महर्जन मूपाहां अले यल महानगरपालिकाया उपमेयर गिता सत्याल विशेष पाहां जुयादीगु खः । ज्याझ्वलय् बासुरी प्रशिक्षक व स्यानामिपिन्त दसिपौ लःल्हायेगु ज्या जूगु खः ।
उगु ज्याझ््वलय् एसईयी पासः जूपिन्त भिंतुना पौ लःल्हायेगु ज्या जूगु खःसा थीथी ब्यक्तित्वपिन्सं मंकाः खलः व बासुरी स्यनेज्या नाप नापं नेवाः संस्कृतिया बारे थःथःगु बिचाः प्वंकादीगु खः ।
ज्यापु समाजया प्रतिनिधिनिसें थीथी ब्यक्तित्वपिं पाहां जुयादीगु उगु ज्याझ्वलय् न्ह्याइपुक हुलाप्याखं तकं न्ह्यब्वःगु खः
