Display Style:
Column Style
येँ महानगरपालिकाया मेयरय् विद्यासुन्दर निर्वाचित
लहनान्यूज | तछलाथ्व तृतीया ११३७ (मे २८ २०१७)
येँ महानगपालिकाया मेयर पदय् नेकपा एमालेया उम्मेदवार विद्यासुन्दर शाक्य यक्व हे मतलिसें त्याःगु दु ।
शाक्य ६४द्वः, ९सः व १३ मत हयाः मेयरया नितिं निर्वाचित जुयादीगु खः । वयकःया निकटतम प्रतिद्वन्दि नेपाली कांग्रेसया राजुराज जोशीया ४५द्वः २सः व ६९ मत वःगु खः ।
विवेकशील नेपाली पार्टिया रन्जु दर्शना २३द्वः, ४सः व ३९ मतलिसें स्वंगूगु थासय् लात । अथे हे साझा पार्टिया किशोर थापाया १८द्वः ६सः व ९६ मत वःगु खः ।
उपमेयरय् धाःसा नेपाली कांग्रेसया हरिप्रभा खड्गी ५८द्वः ९सः व ५३ मतलिसें निर्वाचित जूगु दु । वयकःया निकटतम प्रतिद्वन्दि राप्रपाया राजाराम श्रेष्ठया ३४द्वः, ९सः ५४ मत वःगु खः ।
येँ महानगरपालिकाया निर्वाचनया मेयर व उपमेयर पदय् नेकपा एमाले व राप्रपां तालमेल याःगु खः ।
बुद्ध मूर्ति उलेज्या जुल
लहनान्यूज | तछलाथ्व तृतीया ११३७ (मे २८ २०१७)
यलया थैनास्थित यशोधर बौद्ध माध्यामिक विद्यालयस बुद्धया मूर्ति उलेज्या याःगु दु ।
थौं विद्यालयस छगू ज्याझ्वः यासें बुद्ध मूर्तिया उलेज्या याःगु खः । ज्याझ्वलय् भिक्षु महासंघया नायः मिक्षु मैत्री महास्थवीर व नेपालया नितिं श्रीलंकाया राजदूत स्वर्णलता परेरां मूर्तिया उलेज्या यानादिल ।
ज्याझ्वलय् भिक्षु महासंघया नायः भिक्षु मैत्री महास्थवीर, श्रीलंकाया राजदूत स्वर्णलता परेरा, बौद्ध विश्वविद्यालयया डिन भद्ररत्न बज्राचार्यं वौद्ध धर्म व बुद्धं इनाबिज्याःगु ज्ञानया विषयस न्वःवानादीगु खः ।
उगु हे ज्याझ्वलय् बुद्ध मूर्ति दयेकेत ग्वाहालिमिपिन्त हनापौलिसें खादां न्ययेकाः हंगु खः ।
यशोधर माध्यामिक विद्यालयया प्रधानाध्यापिका रमिला शाक्यं लसकुस यानादीगु ज्याझ्वलय् विद्यालय व्यवस्थापन समितिया सल्लाहकार पुर्णमान शाक्यं सुभाय् देछानादीगु दु ।
विश्व महिनावारी स्वच्छता दिवस हन
लहनान्यूज | तछलाथ्व तृतीया ११३७ (मे २८ २०१७)
थौं मे २८, हलिंन्यंक विश्व महिनावारी स्वच्छता दिवस हनाच्वंगु दु ।
व हे झ्वलय् नेपालय् नं थीथी संघसंस्था जानाः मिसातय् थी मज्यू जुइगु अर्थात महिनावारी सम्बन्धि सचेतनामूलक ज्याझ्वः याःगु दु ।
गुथि, वाटर एड, एन्फो लिसें थीथी संघसंस्था जानाः यलया लगंख्यलय् मिसातय् महिनावारी सम्बन्धि सचेतनामूलक ज्याझ्वः याःगु खः ।
ज्याझ्वलय् मदनकृष्ण श्रेष्ठ, रवि डंगोल लिसेंया कलाकार अले थीथी ख्यलय् आवद्ध पेशाकःमिपिनिगु उपस्थिति दुगु खः ।
मिसातय् थी मज्यू जुइगु इलयया परिस्थितीयात छुं भचा सां थुइकेगु ल्याखं ज्याझ्वलय् मदनकृष्ण श्रेष्ठ, रवि डंगोल लिसें नं मिसातयसं छ्यलीगु स्यानिटरी पायड थम्हं छ्यलाः स्वःगु खः ।
उगु हे ज्याझ्वलय् मोफसलया ब्वनेकूया विद्यार्थीपिन्सं काःगु महिनावारी व उकिया मान्तयालिसे सम्बन्धित किपाया ब्वज्या नं जूगु खः ।
सामान्यतः मिसातय् २८न्हुइ छः न्यान्हुतक्क थी मज्यू जुइगु ल्याखं न्यागूगु ला मेया २८ तारीख कुन्हु थुगु दिवस हनेगु याःगु खः ।
१७ वडाय् त्याःपिन्त भिन्तुना देछात
नृपेन्द्रलाल श्रेष्ठ | तछलाथ्व तृतीया ११३७ (मे २७ २०१७)
वंगु बैसाख ३१ गते क्वचाःगु स्थानीय तहया चुनावय् येँ महानगरपालिका १७ वडाय् त्याःपिन्त एमाले १७ वडा कमिटिपाखें भिन्तुना देछाःगु दु ।
कमिटिपाखें येँय् छगू ज्याझ्वः यासें १७ वडाय् निर्वाचित जनप्रतिनिधिपिन्त भिंतुना देछाःगु खः । उगु हे ज्याझ्वलय् निर्वाचनया झ्वलय् ग्वाहालि याःपिं ग्वाहालिमिपिन्त सुभाय् नं देछाःगु खः ।
नुगः खँ तयेगु झ्वलय् १७ वडाया वडाध्यक्षय् निर्वाचित नबिन मानन्धरं थःगु पारिश्रमिक स्वास्थ्य व शिक्षाया ख्यलय् अले गरिब असहायपिनिगु लागिं छ्यलेगु घोषणा यानादिल ।
नेकपा एमाले १७ वडा कमिटिया नायः पुष्प पुजारीया नायकय् जूगु ज्याझ्वलय् एमाले क्षेत्र न ७ या सांसद रामबीर मानन्धर मूपाहां कथं झायादीगु खः ।
वंगु बैसाख ३१ गते क्वचाःगु स्थानीय तहया निर्वाचनय् येँ महानगरपालिका १७ वडाया वडाध्यक्षय् नेपाली काग्रेसया नबिन मानन्धर त्याःगु खःसा वडा सदस्यय् नेपाली काग्रेस जितेन्द्र खड्गी व एमालेया बाबुराजा महर्जन, मिसा सदस्यय् कमला महर्जन अले कबिता दास त्याःगु खः।
महानगरय् निगू पार्टिया धेंधें बल्लाः
लहनान्यूज | बछलागा नवमि ११३७ (मे २० २०१७)
देयया प्यंगू महानगरपालिका मध्ये येँय् नेकपा एमालेया उम्मेदवार विद्यासुन्दर शाक्य न्ह्यःने लानाच्वंगु दु ।
न्हिनसिया १२ताः ईतक्क सार्वजनिक जूगु मत परिणाम कथं एमाले उम्मेदवार शाक्यया १६५२१ मत थ्यंगु दुसा नेपाली कांग्रेसया उम्मेदवार राजुराज जोशीया ११२९५ मत जूगु दु ।
उपमेयरय् धाःसा नेपाली कांग्रेसया उम्मेदवार हरिप्रभा खड्गी (श्रेष्ठ) १०९६१ मतलिसें न्ह्यःने लानाच्वंगु दु ।
यल महानगरपालिकाय् नेपाली कांग्रेसया उम्मेदवार चिरिबाबु महर्जन १६३८६ मतलिसें न्ह्यःने दुसा नेकपा एमालेया हरिकृष्ण व्यन्जनकारया १४५४० मतलिसें निगूगु थासय् दु ।
उपमेयरय् नं नेपाली कांग्रेस हे न्ह्यःने लानाच्वंगु दु । नेपाली कांग्रेसपाखें उपमेयरया उम्मेदवार गीता सत्यालया ९२४१ मत थ्यंगु दु ।
पोखरा महानगरपालिकाय् एमालेया मानबहादुर जिसिया १७३७२ मत दुसा वयकःया निकटतम प्रतिद्वन्दि नेपाली कांग्रेसया रामजी कुँवर धाःसा १३३८ मतं ल्यूने लानाच्वंगु दु । कुँवरया १६०३४ मत दु ।
उपमेयरय् एमालेया मंजुदेवी गुरुङ १६३६९ मतलिसें न्ह्यःने दु ।
भरतपुर महानगरपालिकाय् धाःसा नेकपा एमालेया उम्मेदवार देवी ज्ञवाली व नेपाली कांग्रेस व माओवादि केन्द्रया मंकाः उम्मेदवार रेणु दाहाल दथुइ तच्वःगु धेंधें बल्लाः जुयाच्वंगु दु ।
एमालेया ज्ञवालीया १५१५५ मत दुसा दाहाल वयकःया स्वयां ३५४ मतं जक ल्यूने दु । दाहालया १४८०१ मत थ्यंगु दु ।
देयन्यंकया लिच्वलय् नेकपा एमालें १०४ थाय् त्याकाः दक्कले न्ह्यःने दुसा नेपाली कांग्रेस ९९थाय् त्यानाः निगूगु थासय् लानाच्वंगु दु । नेकपा माओवादि केन्द्र ४६ थाय् त्यानाः स्वंगूगु थासय् लानाच्वंगु दु ।
