Display Style:
Column Style
यलय् नवनिर्वाचित जनप्रतिनिधिपिन्त भिन्तुना देछात
लहनान्यूज | तछलाथ्व पंचमि ११३७ (मे ३० २०१७)
ललितपुर उद्योग वाणिज्य संघं यल जिल्ला दुनेया नवनिर्वाचित जनप्रतिनिधि लिसें नेपाल उद्योग वाणिज्य महासंघया न्हूगु ज्यासना पुचःयात भिंतुना देछाःगु दु ।
थौं संघं यलय् छगू ज्याझ्वःया ग्वसाः ग्वयाः यल महानगरपालिकालिसें यल जिल्लाया नगरपालिका व गांपालिकाया नवनिर्वाचित जनप्रतिनिधिपिन्त भिंतुना देछाःगु खः । उगु हे ज्याझ्वलय् संघं उद्योग वाणिज्य महासंघया न्हूगु ज्यासना पुचःयात नं भिन्तुना देछाःगु खः ।
ज्याझ्वलय् यल जिल्लाया नवनिर्वाचित सकल जनप्रतिनिधि व महासंघयात संघया नायः सविन श्रेष्ठं खादां न्ययेकाः भिन्तुना देछानादिल । संघया निवर्तमान नायः अजरमान जोशीं स्वांया बुके देछानादिल ।
ज्याझ्वलय् यल महानगरपालिकाय् मेयरय् निर्वाचित चिरिबाबु महर्जन, उपमेयर गीता सत्यालया लिसें महालक्ष्मी नगरपालिका व गोदावरी नगरपालिकाया मेयर, वडाध्यक्षपिं सकलसित भिंतुना देछाःगु खः । उद्योग वाणिज्य महासंघपाखें महासंघया नायः भवानी राणायात भिन्तुना देछाःगु खः ।
संघया नायः सविन श्रेष्ठया अध्यक्षताय् जूगु ज्याझ्वलय् संघया वरिष्ठ उपाध्यक्ष रविन्द्रराज ताम्रकारं सुभाय् देछानादीगु खः ।
राज्यं यलयात स्वयेगु मिखा पाकेमाल
नुगः खँ तयेगु झ्वलय् उद्योग वाणिज्य महासंघया नायः भवानी राणां यलया हरेक नगरपालिका, गांपालिकालिसें वडाय् उद्योगया सम्भावना पहिचान यानाः उद्योग विकासय् जायेमाःगु धयादिल ।
यल महानगरपालिकाया नवनिर्वाचित मेयर चिरिबाबु महर्जनं थः यलया उद्योगी, व्यवसायीतलिसे जानाः न्ह्याःवनेत प्रतिवद्ध दुगु धयादिल । यलयात आर्थिक रुपं सबल दयेकेत यल दुनेया उद्योगीतयगु भूमिका अहम जुइगु खँय् मेयर महर्जनया बः खः ।
सुभाय् न्वचु तयेगु झ्वलय् संघया वरिष्ठ उपाध्यक्ष रविन्द्रराज ताम्रकारं राज्यं यलयात स्वयेगु दृष्टिइ ह्यूपाः हयेमाःगु धयादिल । येँ महानगरपालिकायात २ अर्ब धइथें बजेट फ्याःगु सरकारं यल महानगरपालिकायात उकिया बछि तक हे बजेट बी मफूगु खँय् ताम्रकारं कुंखिनादिल ।
तेज तीर्थ ट्रष्टया सिरपाः लःल्हात
लहनान्यूज | तछलाथ्व पंचमी ११३७ (मे २९ २०१७)
तेज तीर्थ ट्रष्टपाखें बीगु थीथी विधाय् योगदान ब्यूपिन्त बीगु स्वंगू सिरपाःत थौं लःल्हाःगु दु ।
थुगुसीया तेज तीर्थ साहित्य सिरपाः साहित्यकार फणिन्द्ररत्न बज्राचार्य व मिसा साहित्यकार शशिकला मानन्धरयात लःल्हाःगु दु । तेज तीर्थ ट्रष्टपाखें येँय् छगू ज्याझ्वः यासें बज्राचार्य व मानन्धरयात निक्वःगु तेज तीर्थ साहित्य सिरपाः लःल्हाःगु खः ।
अथे हे निक्वःगु तेज तीर्थ मानव अधिकार सिरपाः मानव अधिकारकःमि मुक्तिनाथ अधिकारीयात लःल्हाःगु दु । थुगु हे ज्याझ्वलय् निक्वःगु तेज तीर्थ पत्रकारिता सिरपाः युवा पत्रकार चन्द्रकिशोर झा व रमा लुइँटेलयात लःल्हाःगु दु ।
ज्याझ्वलय् गणतन्त्र नेपालया न्हापांम्ह राष्ट्रपति डा.रामवरण यादवं सिरपालं सम्मानित सकसितं दोसल्लां न्ययेकाः हनापौ लःल्हानादिल । तेज तीर्थ ट्रष्टया नायः तीर्थराम डंगोलं तका सिरपाः लःल्हानादिल ।
साहित्य सिरपाः व पत्रकारिता सिरपाःया राशि म्हतिं ५०द्वः तका खःसा मानव अधिकार सिरपाः १ लख तकाया खः ।
तेज तीर्थ ट्रष्टपाखें थगुनेनिसें नेपालभाषाया साहित्य ख्यलय् तेज तीर्थ साहित्य सिरपाः, मानव अधिकारया ख्यलय् योगदान ब्यूगु संस्था वा व्यक्तियात तेज तीर्थ मानव अधिकार सिरपाः व पत्रकारिता ख्यलय् तेज तीर्थ पत्रकारिता सिरपाः बीगु न्ह्याकूगु खः ।
ज्यापु समाजपाखें यलया जनप्रतिनिधिपिन्त भिन्तुना
लहनान्यूज | तछलाथ्व चतुर्थी ११३७ (मे २९ २०१७)
ज्यापु समाज यलं, यल जिल्ला दुनेया मेयर, उपमेयरलिसें वडाध्यक्ष व सदस्यपिन्त भिन्ुतना देछाःगु दु ।
थौं समाजं यलय् छगू ज्याझ्वः यासें यल महानगरपालिकाया नवनिर्वाचित मेयर चिरिबाबु महर्जन, उप मेयर गीता सत्याललिसेंयात भिन्तुना देछाःगु खः ।
उगु हे ज्याझ्वलय् गोदावरी नगरपालिकाया मेयर गजेन्द्र महर्जन, उपमेयर मुना अधिकारी,, महालक्ष्मी नगरपालिकाया मेयर रामेश्वर श्रेष्ठ व उपमेयर निर्मला थापायात नं भिन्तुना देछाःगु खः ।
लिसें २९ वडाया नवनिर्वाचित सकल वडाध्यक्षपिन्त नं भिन्तुना देछाःगु खः ।
सकल नवनिर्वाचित जनप्रतिनिधिपिन्त कार्यकाल सफलताया भिंतुना लिसें नेवाः तजिलजि कथं धौसगं अले ख्येँय् सगं नं ब्यूगु खः ।
नुगःखँ तयेगु झ्वलय् समाजया नायः प्रेम महर्जनं सकल यलवासी व यलया जनप्रतिनिधिपिनि दथुइ स्वापू सतिकेत व अन्तक्र्रियात्मक स्वापू दयेकेत ज्याझ्वःया ग्वसाः ग्वयागु धयादिल ।
यल महानगरपालिकायात नमूना महानगरया रुपं विकास यायेगु हे थःगु आज्जु खःगु मेयर चिरिबाबु महर्जनं धयादिल ।
रत्नाकर महाविहारं सितिकं मोतियाविन्दुया अपरेसन याकल
बुखँ श्रोत : किशोर धुसः | तछलाथ्व पंचमी ११३७ (मे २९ २०१७)
२५६१औं बुद्ध जयन्ती समारोह समिति, रत्नाकर महाविहार, हःखबहाःया ग्वसालय् जूगु मिखा शिविरय् मोतियाबिन्दुया अपरेशन यायेमाःगु खनेदुपिनिगु थौं अपरेशन क्वचाःगु दु ।
वंगु बैशाख ९ गते समारोह समितिया ग्वसालय् व मोतिशान्ति शाक्यया कजिसुइ जूगु मिखा शिविरय् मोतियाबिन्दुया अपरेसन यायेमाःगु खनेदुपिं ४९म्ह मध्ये ४६म्हेसिया अपरेशन थौं तिलगंगा आँखा अस्पतालय् याःगु खः ।
३म्हेसिया धाःसा सुगरया मात्रा थहांवनाच्वंगु खनेदयाः अपरेशन लिछ्याःगु खः । अपरेशन याःपिं सकलसित थौं हे छेँय् लिछ्वःगु दु ।
सकसिगु अपरेशन सितिकं हे याकूगु खः । उकिया नापं निगः बसया व्यवस्था यानाः समारोह समितिपाखें हे सकलसित अस्पतालतक्क यंकूगु खः ।
अस्पतालय् यंकेगु लिसें अस्पतालय् हि जाँच याकेगु अले सकतां भ्वं दयेकाः अपरेसन कोथाय् यंकेगु तक हे समारोह समितिपाखें भाला कयाः अपरेसन जूगु खः ।
थौं थुगु अपरेसनलिसें २५६१क्वःगु बुद्ध जयन्तीया लसताय् रत्नाकर महाविहार, हखबाहाःया ग्वसालय् न्ह्यानाच्वंगु ज्याझ्वःया दकले लिपांगु ज्याझ्वः नं थौं क्वचाल ।
नेवाः म्येचाः व सफू ब्वज्या जुइगु
लहनान्यूज | तछलाथ्व पारु ११३७ (मे २६ २०१७)
नेपालभाषा एकेडेमीया ग्वसालय् थुगुसी नं तःजिगु सफू व म्येचाः ब्वज्याः जुइगु जूगु दु ।
नेपालभाषा एकेडेमीया ग्वसालय् थगुने थें हे थुगुसी नं तःजिक हे सफू व म्येचाः ब्वज्या जुइत्यंगु एकेडेमीया सदस्य सचिव मल्ल के सुन्दरं जानकारी बियादीगु दु ।
थुगुसी निक्वःगु ब्वज्या तमकःद्यःया देगः परिसर, जाउलाख्यलय् जुइगु सदस्य सचिव मल्लं जानकारी बियादीगु दु ।
थ्व हे वइगु तछला थ्व अष्टमिनिसें दशमी (जेष्ठ १९ निसें २१) तक स्वन्हुयंक जुइत्यंगु दु ।
ब्वज्याया झ्वलय् चिनाखँ मुँज्याया लिसें थीथी म्येहालामिपाखें सांगितिक ब्वज्या नं जुइगु जूगु दु ।
