Display Style:
Column Style
प्रधान सम्पादक पुष्कारलाल श्रेष्ठया स्वास्थ्य गम्भिर
लहनान्युज | चिल्लागा पारु ११३९ (मार्च २१ २०१९)
कामना न्युज पब्लिकेसनया प्रधान सम्पादक पुष्कारलाल श्रेष्ठ यलया भैंसेपाटी च्वंगु नेपाल मेडिसिटी अस्पतालया सघन उपचार कक्षय् छु दिं न्ह्य निसे वास याका वयाच्वगु खः ।
वःगु प्यला न्ह्यः न्हासय् समास्या वया बयोधाय् न्हासयु व ब्लुक्रसय् जँलास्येय् पत्थरीया शल्यक्रिया याःगु खः । जँलास्येय् पत्थरीया शल्यक्रिया लिपा वयकःया स्वास्थ्य थीथी समस्या वःगु खः । स्वास्थ्य थीथी समस्या कारणं थापाथली च्वंगु नर्भिक इन्टरनेसनल अस्पतालय् वासः याकेत भर्ना जुयादीगु खः ।
नर्भिक अस्पतालय् छु दिं वासः याका चिकित्सकपिनिगु सल्लाह कथं वयकःयात Guillain-Barré syndrome (GBS) virus यो संक्रमण जुगु आशंकां थप उपचारया निम्ति नर्भिकं भारतया हरियाणा च्वंगु मेदान्त अस्पताल रिफर याःगु खः । मेदान्त अस्पतालय् करिब निलाया उपचार लिपा उगु भाइरसया संक्रमणपाखें मुक्त यासे छेँय् लित हःगु खः ।
येँय् हयेधुंकाः छुं ई नर्भिक अस्पतालय् हे तयाः वासः याःगु लिसें फिजियोथेरापी लिसेंया विधिपाखें वासः याःगु खःसा स्वास्थ्य अवस्था सामान्य जुयावःगु स्थितिइ छेँय् हे तयाः फिजियोथेरापी लिसेंया विधिं वासः यायेफइगु चिकित्सकपिनिगु परामर्श कथं भैंसेपाटीइ च्वंगु निवासय् तःगु खः ।
थथे प्रधानसम्पादक श्रेष्ठया नियमित वासः यायेगु प्रक्रिया न्ह्यानाच्वंगु इलय् हाकनं वय्कःयात तच्वकं स्वास्थ्य समस्या खने दये धुंकाः आइतवाःनिसें नेपाल मेडिसिटी अस्पताल यंकाः सघन उपचार कक्षय् वासः याका वयाच्वंगु खः । वय्कःया नेपाल मेडिसिटी अस्पतालया सघन उपचार कक्षय् वासः याकाःच्वंसां नं वय्कःया स्वास्थ्य स्थिति जटिल व स्थिर अवस्थाय् हे दूगु वासः यायेगुलिं दुथ्याःपिं चिकित्सकपिन्सं जानकारी ब्यूगु दु ।
थ्वहे झ्वलय् श्रेष्ठया स्वास्थ्य स्थितिप्रति संचारकःमि, पासापिं, थःथितिपिं, राजनीतिक व्यक्तित्व, उद्योगी व्यवसायीलिसें फुक्क शुभेच्छुपिन्सं च्यूताः तसें वय्कःया स्वास्थ्य लाभया कामना यानाच्वंगु कामना प्रकाशनं विज्ञप्तिपाखें जानकारी ब्यूगु दु ।
आर्शिवाद, शुभेच्छा व कामनाय हुनिं प्रधान सम्पादक पुष्करलाल श्रेष्ठयाके ल्वय् प्रतिरोधात्मक क्षमता अप्वयाः हाकनं सक्रिय पत्रकारिता यायेगुलि सक्षम जुइगु अपेक्षा कामना प्रकाशनं तःगु दु ।
विसि क्याप्सया झिक्वःगु अभिभावक दिवस
नृपेन्द्रलाल श्रेष्ठ | सिल्लाथ्व द्धादशी ११३९ (मार्च १८ २०१९)
विसि क्याप्स मन्टेश्वरी स्कूलया झिक्वःगु अभिभावक दिवस येँया राष्ट्रिय नाचघरय् जूगु दु ।
स्कूलया निर्देशक राजु महर्जनया सभाध्यक्षताय् न्ह्याःगु उगु ज्याझ्वलय् येँ महानगरपालिकाया महानगरीय सहकारी विभागया प्रमुख सुमन अधिकारी विशेष पाहाँकथं झायादीगु खः ।
ब्वनेकुथिया संयोजक तुलसा ढुंगानां लसकुस यानाः न्ह्याकूगु ज्याझ्वलय् स्कूलया प्रिन्सिपल बिमा महर्जनं सुभाय् देछायादीगु खः ।
स्कूलया ब्वँमिपिन्सं थीथी म्ये, हुलाप्याखंलिसें क्यारिकेचर आदि न्ह्यब्वःगु उगु ज्याझ्वः रुद्र धमलां न्ह्याकादीगु खः ।
समीतपाखें तल वल्र्ड रेकर्ड
लहनान्युज | सिल्लाथ्व द्धादशी ११३९ (मार्च १८ २०१९)
गुरुकुल पब्लिक स्कूलया समीत तिमिल्सिनां छगू मिनेटय् सच्छिम्ह स्वयां अप्वः मनूतय्त घय्पुयाः वल्र्ड रेकर्ड तःगु दु ।
येँया तारकेश्वर नगरपालिका, नेपालटारय् च्वंगु गुरुकुल पब्लिक स्कूलया च्यागू तगिमय् ब्वनाच्वंमह १४दँ दुम्ह तिमिल्सिनां छगू मिनेटया दुने ११३म्ह मनूतय्त घय्पूगु खः ।
पुलांम्ह रक्षामन्त्री भीमसेनदास प्रधान मूपाहाँलिसें तारकेश्वर नगरपालिकाया प्रमुखया विशेष पाहाँकथं झायादीगु उगु ज्याझ्वलय् तिमिल्सिनां उगु रेकर्ड तय्त ताःलाःगु खः । थ्व स्वयां न्ह्यः
अमेरिकाया जसोन राइटरं सन् २०१७ अक्टोबलय् ८६म्हेसित घय्पुयाः तःगु वल्र्ड रेकर्डयात समीतं त्वाःथःगु दु ।
ज्याझ्वलय् समीतया सफलताया नितिं विद्यालय परिवार, वय्कःया अभिभावकलिसें विशिष्ट पाहाँपिन्सं भिन्तुना देछासें देय् व ब्वनेकुथिया प्रतिष्ठा थकाय्गु नितिं महत्वपूर्ण योगदान ब्यूगुलिं लसता प्वंकूगु दु ।
सः छगू फरक साहित्यिक ज्याझ्वः
लहनान्युज | एकादशी ११३९ (मार्च १७ २०१९)
साहित्यया बिकासया नितिं प्यक्वःगु ज्याझ्वः सः छगू फरक अभिव्यक्तिया ग्वसालय् शनिवाः इखालखु, यलय् स्वम्ह बाखं च्वमी पाखे चिबाखं ब्वने ज्या जूगु दु ।
उगु ज्याझ्लय् बाखंच्वमिपिं गोविन्द मान श्रेष्ठं (क्या फसाद, पुस्तान्तरण, छिगु गन्तव्य, धौ खुँ नेताजु न्हूगु नेपाः), प्रेम कृष्ण निडरं (त्वःता तःपिं दोहंत, खिचाच, सः, भुत ल्वहं, इज्जत), रत्न कोजुं (पालिका बुल्डोजर, घाः व भुजिं, हाकुम्ह भौ, हाइब्रीड वा पुसा तुती ख्वः मदुगु खाता याना न्यापु न्यापु चिबाखं ब्वनाः न्यंकादीगु खः ।
ज्याझ्वलय् बाखच्वंमिपिन्त कवि सुधिर ख्वविं मतिनायाचिं लःल्हानादीगु खःसा ब्वति कयादीपिं मध्ये लुमन्तिचिं धन लक्ष्मी महर्जनं सुनिल महर्जनयात लःल्हानादीगु खः । नर्मदेश्वर प्रधानं उगु ज्याझ्वः न्ह्याकादीगु खः ।
बुखँ – नेवाः सूचना केन्द्र किपा – राजेन्द्र रञ्जित
फोनिज ३ नम्बर प्रदेशया अध्यक्षय् पेमा
नृपेन्द्रलाल श्रेष्ठ | एकादशी ११३९ (मार्च १७ २०१९)
नेपाल आदिवासी जनजाति पत्रकार महासङ्घ(फोनिज) ३ नं प्रदेश नुवाकोटय् जुगु न्हांपागु महाधिवेशय् पेमा लामायात अध्यक्षय् ल्यःगु दु । शुक्रवाः चान्हय क्वचाःगु अधिवेशनय् लामाया अध्यक्षताय् २० म्हसिया कार्यसमिति निर्विरोध ल्यःगु खः ।
उगु कार्यसमिति उपाध्यक्ष युवराज श्रेष्ठ, मिसा उपाध्यक्ष अन्जु डिम्दोङ, महासचिव सुरजकुमार भुजेल, सङ्गठन सचिव पूर्णिमा स्याङ्बा, संस्थागत सचिव श्याम रानामगर, कोषाध्यय् पूर्णभक्त दुवालयात सर्वसम्मत ल्यःगु खः ।
अथेहे दुजलय् बाबुकाजी श्रेष्ठ, विनोद श्रेष्ठ, सहिला तामाङ, रामशरण माझी, लक्ष्मी शाक्य, सम्झना श्रेष्ठ, कुन्जला पुलामी, डोल्मा शेर्पा, राजेश रुम्बा तामाङ, जीवन लिम्बू, नवीन रानामगर, राजेश बज्राचार्य, पुष्पा राई हाययात न सर्वसम्मत ल्यःगु खः ।
उगु अधिवेशनं दिलबहादुर लामाया संयोजकत्वय् स्वम्हेसियाःगु अनुशासन समिति न ल्यःगु दु । समितिया दुजलय् राजकुमार शाक्य व रिदेन महर्जनयात ल्यःगु खः ।
नवनिर्वा्चित कार्यसमितिले शुक्रबार नै पद तथा गोपनियताको शपथ लिएका छन् । शनिवाः छगु ज्याझः यासे न्हुपि निर्वाचित पिन्त प्रमाण पत्र लःल्हाना पद व गोपनियताया शपथ नकुगु खः ।
शुक्रवाः जुगु उगु अधिवेशनय् ३ नं प्रदेशया १३ जिल्लाया १२० प्रतिनिधि व पर्यवेक्षकपिन्सं ब्बति काःगु खः ।
उगु अधिवेसनय् दोलखाया पत्रकार राजेन्द्र मानन्धर, फोनिज जिल्ला समिति रासस जिल्ला प्रतिनिधि नवदीप श्रेष्ठ व कान्तिपुर टेलिभिजनया जिल्ला संवाददाता राजकृष्ण श्रेष्ठयात न हने ज्या याःगु खः ।
