Display Style:
Column Style
थौं न निसे न्ह्यात कीर्तिपुर महिला महोत्सव
नृपेन्द्रलाल श्रेष्ठ | चिल्लागा चतुर्दशी ११३९ (अप्रिल ४ २०१९)
किपू नगरपालिका पलिस्था जूगु २३ दँ क्यंगु लसताय् थौं न निसें ‘कीर्तिपुर महिला महोत्सव ११३९’ न्ह्याःगु दु ।थुगु महोत्सव थौं न निसे २३ गते शनिवाःतक न्ह्याइगु खः ।
थौं बिहिवाः छगु ज्याझ्वः दथुइ येँ १० प्रतिनिधि सभाया सांसद राजन केसी उलेज्या यानादीगु खः ।
किपूया मेयर रमेश महर्जनया सभाधक्ष्यताय् जुुगु थुगु ज्याझ्वलय् प्रदेश न ३ या सांसद पुकार महर्जन,उप मेयर सरस्वती खड्का नाप किपू नगरपालिकाया १ निसे १० तकया वडा अधक्ष्यपिनिगु उपस्थिति दुगु खः ।
किपूया पुलांगु बस्ती दुने लाःगु वडा १, २, ३ व १० य् न्ह्याइगु खः। उगु लागाया महिला समूह व आमा समूह सक्रिय रुपं न्ह्यच्यूगु दुसा किपू लागाया मिसापिन्सं उत्पादन याःगु थीथी हलंज्वलंया स्टललिसें थीथी त्वालय् थीथी नसाज्वलंया स्टल तयातःगु खः ।
पूर्ण ताम्राकारयात ‘भिक्षु हिरा साहित्य सिरपाः’
लहनान्युज | चिल्लागा त्रयोदशी ११३९ (अप्रिल ३ २०१९)
उदाय समाजया न्ह्यक्वःगु तःमुँज्य ज्याझ्वलय् वंगु नांजाम्ह साहित्यकार पूर्ण ताम्राकारयात ‘भिक्षु हिरा साहित्य सिरपाः’ लःल्हायेगु ज्या जूगु दु ।
ताःई न्ह्यःनिसें नेपालभाषा व साहित्य ख्यलय् ज्वःमदूगु योगदान बियाः वया च्वनादीगुलिं साहित्यकार ताम्राकारयात ‘भिक्षु हिरा साहित्य सिरपाः’ देछागु खः ।
दँय् दँसं छम्ह उदाय समुदायया साहित्यकारयात लःल्हाइगु ‘भिक्षु हिरा साहित्य सिरपाः’ अमेरिकाय् च्वनादीम्ह बाखंच्वमि केशरमान ताम्राकारं थः अबु भिक्षु रत्न ताम्राकार व मां हिरादेवी ताम्राकारया नामं नीस्वनातःगु सिरपाः खः ।
सक्वय् गिरिजाप्रसादया बुदिं हन
लहनान्युज | चिल्लागा त्रयोदशी ११३९ (अप्रिल ३ २०१९)
महाकवि गिरिजा प्रसाद जोशीया ८१ क्वःगु बुदिं सक्वय् तःजिक हंगु दु ।
उगु ज्याझ्वलय् मूपाहाँ कथं बरिष्ठ साह्त्यिकार मथुरा सायमि, शंखरापुर नगरपालिकाया मेयर सुवर्ण श्रेष्ठ व उप–मेयर शुक्र लक्ष्मी श्रेष्ठ विशेष पाहाँ कथं झायादीगु खः ।
अथेहे पाहाँ कथं आख्यानकार नारायण ढकाल, ६ नं वडा अध्यक्ष राधाकृष्ण श्रेष्ठ व ७ नं वडा अध्यक्ष विष्णु प्रसाद श्रेष्ठपिं झायादिगु खः ।
महाकवि जोशीया बिचाः कथं देय् न्ह्याःवंगु खःसा न्यादँ खुदँया दुने हे देसय् स्यलाःगु ह्यूपा वइगु खइ तर राष्ट्र गैर जिम्मेवार नेता तय्गु बिचालं देय् न्ह्यानाच्वंगुलिं न्हिंयान्हिथं देय् अतिकं दयनीय अवस्थाय् लानावनाच्वंगु खँय् वरिष्ठ इञ्जिनियर राजदास श्रेष्ठं दुख प्वंकादिल ।
महाकवि गिरिजा प्रसाद जोशीया विषयलय् दुग्यंक व्यक्तित्व न्ह्यब्वइगु कथं सुनांनं सफू पिथनीगु जुल धासा न्यागू लख तका दां ग्वाहालि यायेगु बचं श्रेष्ठं बियादीगु खः ।
उगु ज्याझ्वः यचु जोशीया सभाधक्ष्याताय् जुगु खःसा चन्दा श्रेष्ठं न्ह्याकादीगु ज्याझ्वलय् गोविन्द मान श्रेष्ठं लसकुस यानादीगु खः ।
बुखँ : नेवाः सुचना केन्द्र किपा: राजेन्द्र रंजित
महाकवि गिरिजाप्रसादया बुदिंया हन
लहनान्युज | चिल्लागा त्रयोदशी ११३९ (अप्रिल ३ २०१९)
महाकवि गिरिजाप्रसाद जोशीया ८१ क्वःगु बुदिंया लसताय् मंगलवाः नेपालभाषा केन्द्रीय विभाग यल ध्वाकाय् गिरिजाप्रसादया बुदिं हनाः सिरपाः लःल्हायेगु नाप न्यागु गू सफू चिखिफ्यने ज्याझ्वः न जूगु खः ।
उगुु ज्याझ्वलय् मूपाँहा कथं कृष्णगोपाल श्रेष्ठ झायादीगु खः । सत्यहेरा अनुसन्धान सिरपाः त्याकादीपि रविन श्रेष्ठ व राकेश महर्जनयात मूपाँहा कृष्णगोपाल श्रेष्ठं हनापौ व सिरपाया दाता उजेली डंगोलं १० द्वः तका दां लःल्हानादीगु खः ।
अथेहे उगु हे ज्याझ्वलय् न्यागु अनुसन्धानात्मक कृतित त्रिप्रसाद धौभडेलया ‘नसंफाःगु चा उपन्यासया बैचारिक पक्ष’, राकेश महर्जनया ‘भृकुति उपन्यासया ऐतिहासिक तत्व’, किशोर नेपालीया ‘पांगाया सायाः’, पूर्ण कुमार श्रेष्ठया ‘न्हू प्रेष्टि नेपाःया च्वसू सर्वेक्षण’ व रविन्द्रराज ताम्राकारया ‘सन्ध्या टाइम्सया सम्पादकीय’ मू पाहाँ श्रेष्ठ, विषेश पाँहापिं प्रदेश न.३ या सांसद नरोत्तम बैद्य, कृष्ण लाल महर्जन, वल्र्ड नेवाः अर्गनाइजेशनया नायः सिजन श्रेष्ठ, नेवाः देय् दबूया नायः नरेश ताम्राकार, व सिरपाःया दाता डंगोलं मंकाः कथं चिखिफ्य यानादीगु खः ।
विभागया प्रमुख डा. ओमकारेश्वर श्रेष्ठया सभाधक्ष्यताय् जुगु उगु ज्याझ्वलय् दबूया नायः श्रेष्ठं नेपालभाषायात राज्य व नेपाल सरकारं स्थानीयतहलय् छ्यलाबुलाया भाय्कथं मान्यता बीधुंकूगुलिं उकियात कार्यान्वयन यायेमाःगुलि बः बियादिल ।
बुखँ : किपा नेवाः सुचना केन्द्र
वाःफयेनं लाना मदुपिनिगु परिवारयात न्यागु लख बिगु
लहनान्युज | चिल्लागा द्धादशी ११३९ (अप्रिल २ २०१९)
नेपाल कम्युनिस्ट पाटीया अध्यक्ष पुष्पकमल दाहाल प्रचण्डं बारा व पर्साय् वाःफयेनं लाना मदुपिनिगु परिवारयात पार्टीपाखे छगु परिवारयात म्हति ५ लख तक बिगु घोषणा यानादीगु दु ।
थौं बाराया फेटा गाउँपालिका ६ बरैनियाँ थ्यकादीम्ह प्रचण्डं पार्टीपाखे वाःफयेनं लाना मदुपिनिगु परिवारयात म्हति न्यागु लाख बिइगु घोषणा यानादीगु खः।
आइतवाः बहनि वःगु वाः फयेनं बारा व पर्साय् २७ म्हसिया अप्व मनूत मदुगु खः ।
