Display Style:
Column Style
श्रेष्ठ अपहरणया खँय् देय् दबूपाखें भत्सर्ना
लहनान्यूज | तछलागा षष्ठी ११३७ (जुन १६ २०१७)
तुलसीपुर नेवाः समाजया पूर्व नायः राजकुमार श्रेष्ठयात तत्काल अपहरणमुक्त यायेत नेवाः देय् दबुलिं जोडदार माग याःगु दु ।
देय् दबुलिं थौं विज्ञप्ति जारी यासें वंगु ज्येष्ठ २६ गते श्रेष्ठयात अपहरण यानायंकाः थौंतलें मुक्त मयाःगु खँय् नेवाःतयगु राष्ट्रिय संगठन नेवाः देय् दबूया गम्भीर ध्यानाकर्षण जूगु धाःगु खः ।
उगु हे विज्ञप्तिपाखें दबुलिं समाजसेवी लिसें दाङ तुलसीपुरया स्थानीय व्यवसायी श्रेष्ठयात अपहरणमुक्त याकेत सम्बन्धित निकाय व सरोकारवालातयत जोडदार माग याःगु दु ।
अपरहण थुज्वःगु ज्या कायरतापूर्ण जूगु धासें दबुलिं विज्ञप्ति मार्फत अपहरणया ज्यायात घोर भत्सर्ना नं याःगु दु ।
अपहरण गुकथं जुल :
तुलसीपुर नेवाः समाजया पूर्व नायः लिसें तुलसीपुरस्थित बुटवल वस्त्रालय न्ह्याका वयाच्वंम्ह व्यवसायी श्रेष्ठ वंगु शुक्रबाः अपहरणय् लाःगु खः ।
वंगु शुक्रबाः पलख लिपा लिहांवये धकाः छेँय् नं पिहांवंम्ह श्रेष्ठयात हतियारधारी पुचलं अपहरण यानायंकूगु प्रहरीं धाःगु दु ।
श्रेष्ठ गयावंगु बा १२ च १०७१ नम्बरया गाडी धाःसा सल्यानया रिमस्थित शितल बजारय् लूगु खः ।
श्रेष्ठलिसें घोराहियाम्ह रणबहादुर घर्ती नं अपहरणय् लाःगु खः ।
प्रहरीया कथं घर्ती भारतीय नम्बर प्लेटया गाडीइ न्ह्यःने वनाच्वंगु खःसा अपहरणकारीपिन्सं श्रेष्ठया गाडियात ताकेयानाः अप्पां कयेकेवं न्ह्यःने वनाच्वंगु घर्ती गयाच्वंगु भारतीय नम्बर प्लेटया गाडी नं दिकूगु खः ।
घर्तीं श्रेष्ठयात अपरहण यायेत वःपिं अपहरणकारीतयत म्हस्यू धायेवं इमिसं घर्तीयात नं अपहरण यानायंकूगु धाःगु दु ।
संगीतकःमि राजेश व रवियात मातृशोक
लहनान्यूज | तछलागा चतुर्थी ११३७ (जुन १३ २०१७)
गायक रवि हाडा व संगीतकार राजेश हाडाया मां जानकि हाडा मन्त ।
निमोनिया ल्वचं कयाच्वंम्ह मदुम्ह जानकी हाडा केएमसि अस्पताल सिनामंगलय् वासः याकेगु झ्वलय् म्हिगः चान्हय् १२ः०७य् मदुगु खः ।
लिपांगु इलय् वयकःया जँलास्येँया नं समस्या खनेदुगु खःसा न्ह्यपुइ हि नं कुंगु खः ।
थनिं झिन्हु न्ह्यः आकाझाकां निमोनियाया समस्यां अचेत जूम्ह वयकःयात केएमसि अस्पताल यंकूगु खः । वयां लिपा वयकःयात भेन्टिलेटरय् तयाः वासः यानाच्वंगु खः ।
उगु इलंनिसें अचेत हे जुयाच्वंम्ह वयकः म्हिगः चान्हय् मदुगु खः ।
मदुम्ह हाडाया थौं सुथय् पशुपति आर्यघाटय् अन्त्येष्टि यायेधुंकूगु दु ।
थौं ज्याःपुन्हि, दँया दक्कले ताःहाकःगु दिं
लहनान्यूज | तछलाथ्व पुन्हि ११३७ (जुन ९ २०१७)
थौं तछलाथ्व पुन्हि, नेवाःतय् थौंया दिंयात ज्याःपुन्हिया रुपं हनाच्वंगु दु ।
थौंया दिंयात दँया दक्कले ताःहाकःगु दिं कथं काइ । लिसें थौंया दिनय् छुं नं ज्या याये मत्यःगु दिं कथं नं कयातःगु दु ।
थौं छुं नं ज्या मयाइगु दिं जूगुलिं थौंकन्हय् ज्याःपुन्हियात नेवाः समाजयागु मौलिक श्रमिक दिवस कथं नं व्याख्या यायेगु यानाहःगु दु ।
थौं हे यलया लायकुलिइ च्वंगु मल्ल जुजुया सिंहासनयात कृष्ण देगःया फलय् ब्वयेगु याइ । लिसें थौं हे यलया कात्ति दबुलिइ श्रीनिवास मल्लं च्वयातःगु ३२पु भजन हालेगु नं याइ ।
कात्ति दबुलिइ च्वनाः ३२ ग्वारा थानाः दाफा म्ये हालेगु याइ ।
थौंया दिं ताःहाकः नं जुइगु व ज्या नं मयाइगु जूगुलिं म्हाइपु छ्यायेत पुचः मुनाः भजन हालेगु यानातःगु धापू दु ।
हलिमय् जुन २१यात ताःहाकःगु न्हि नालातःगु दुसा सन् १९८१ निसें थुकुन्हु हे विश्व संगीत दिवस हनेगु यानाच्वंगु दु ।
तर नेवाः समाजय् धाःसा मल्लकालंनिसें हे दँया दक्कले ताःहाकःगु दिं ज्याःपुन्हियात संगीत महोत्सव वा संगीत दिवसया हे रुपं हनेगु याःगु खनेदु ।
खास्तिइ तःगु डिजिटल स्क्रीन चीकल
लहनान्यूज | तछलाथ्व द्वादशी ११३७ (जुन ६ २०१७)
येँया खास्तिइ (बौद्धय्) तयातःगु डिजिटल स्क्रीन थौं चीकूगु दु ।
व्यवसायिक छ्यलाबुलाया नितिं अनया स्थानीय गुथि छगुलिं उगु स्क्रीन तःगु खःसा सम्पदा प्रेमीपिनिगु व्यापक आलोचन धुंकाः थौं प्रहरीं चीकूगु खः ।
थौं न्हिछि धइथें बिकाः येँ महानगरपालिका, पुरातत्व विभाग, नगर प्रहरी, गुथि संगठन, बौद्ध विकास समिति लिसेंया संघसंस्थाया प्रतिनिधिया टोलीं स्क्रिन चीकूगु खः ।
थौं अन तयातःगु स्क्रीन दक्वं लिकायेधुंकूगु दुसा ल्यं दुगु ज्वलं नं कंस बिहिबाः तक्क चीकेगु गुथिं न्ह्यथंगु दु । प्राविधिक मगानाः ज्या थौं पूमवंगु न्ह्यथंगु दु ।
खास्तिया हे छगू गुथिं छन्हुया लागिं धासें विज्ञापन क्यनेगु आज्जुं उगु डिजिटल स्क्रिन तःगु खः ।
उगु स्क्रीन तयेधुंकाः ऐतिहासिक व धार्मिक क्षेत्रय् अथे स्क्रिन तयाः बौद्ध स्तुपा कुरुप खनेदुगु धासें व्यापक आलोचना जूगु खः ।
त्रिपिटक अन्तर्गतया निगू सफू नेपालभासं
लहनान्यूज | तछलाथ्व नवमि ११३७ (मे ३ २०१७)
त्रिपिटक अन्तर्गतया निगू महत्वपूर्ण सफू पटिसम्भिदामग्ग अले धम्मसङ्गणीका नेपालभासं पिदंगु दु ।
वीरपूर्ण सफूधुकूया ग्वसालय् यलया रत्नाकर महाविहारय् जूगु ज्याझ्वलय् उपसंघनायक अले अनुवादक डा. ज्ञानपूर्णिक महास्थवीरं निगुलिं सफूया विमोचन यानादिल ।
नुगः खँ तयेगु झ्वलय् पटिसम्भिदामग्गया अनुवाद डा.ज्ञानपूर्णिक महास्थविरं बुद्ध नेपालय् बूगु धकाः लयताइपिं झी दथुइ म्ह्वः हे मनुखं जक बुद्ध दर्शनया अध्ययन यायेगु याःगु धयादिल ।
धम्मसङ्गणीया अनुवादक अनागारिका अग्गञाणीं थुगु ग्रन्थ अभिधर्मया मूल आधार अले सार जूगुलिं अर्थकथाया वर्णन स्वयाः अनुवाद यानागु धयादिल ।
अखिल नेपाल भिक्षु महासंघया महासचीव कौण्डण्य महास्थविर थुगु सफू पिकायेत यक्वं हे ई बियाः जानादीम्ह धकाः डुण्डबहादुर वज्राचार्ययात च्वछानादिल ।
निगू सफूया मू १२५० तका तयातःगु दुसा सफू विमोचन ज्याझ्वलय् द्वःछि तकां उपलब्ध याकूगु खः । लिसें विमोचन ज्याझ्वलय् सफू न्याःपिन्त त्रिपिटक परिचय सफू छगू नं तँसा कथं ब्यूगु खः ।
त्रिपिटक अन्तर्गतया थुगु निगू महत्वपूर्ण सफू नेपालय् न्हापांगु खुसी पिदंगु लिसें आःतक भारतय् तक नं पिमदनीगु पिकाकः वीर पूर्ण पुस्तकालयं न्ह्यथ.गु दु ।
