Display Style:
Column Style
चाइनाया छात्रबृत्ति परीषद्यात लसकुस
लहनान्यूज सम्वाददाता | कौलागा द्वादशि ११३६ (अक्टोबर २७ २०१६)
अरनिको समाजं चाइनाया छात्रबृत्ति परीषदया प्रमूखलिसें दुजःपिन्त लसकुस ज्याझ्वः याःगु दु ।
समाजं येँय् छगू ज्याझ्वः यासें छात्रबृत्ति परीषद्या प्रमुख वाङ सेककंगलिसें मेपिं दुजःपिन्त लसकुस याःगु खः ।
ज्याझ्वलय् परीषद्या प्रमुख वाङं चिकित्सा शिक्षाया ख्यलय् अरनिको समाजं नेपाःमि बिद्यार्थीपिनिगु नितिं च्वछासें थज्याःगु ज्याया हुनिं हे थःपिन्सं समाज मार्फत नेपाःया विद्यार्थीपिन्त छात्रबृत्ति बिया वयाच्वनागु व थुकियात निरन्तरता बीगु धापू तयादिल । अथे हे परिषद्पाखें नवासें चाङ पिङं चाइनाया संकिपायात नेपाःया भासं अनुवाद यानाः चाइनाया बाखं नेपाःमिपिनि दथुइ हःगु खँय् च्वछानादिल ।
अरनिको समाजया वरिष्ठ न्वकू डा. मनोजमान श्रेष्ठं चाइना चिकित्सा शिक्षा कायेत वनीपिं नेपाःमिपिन्सं फयेमालाच्वंगु समस्याया खँय् परिषदयागु ध्यान सालादीगु खः । लिसें डा. श्रेष्ठं परिषदं बिया वयाच्वंगु ग्वाहालिया नितिं सुभाय् नं देछानादिल ।
उगु ज्याझ्वलय् समाजपाखें परिषद्यात मतिनाया चिं लःल्हाःगु खःसा परिषदं नं चाइनाया लुमन्ति चिं समाजयात लःल्हाःगु खः ।
बाजं खलःयात केपू लःल्हात
लहनान्यूज सम्वाददाता | कौलागा द्वादशि ११३६ (अक्टोबर २७ २०१६)
न्हूदँ ११३७ समारोह समितिं न्हूदँया समारोहस बाजं थाइगु बाजं खलःतयत केपू लःल्हाःगु दु ।
समितिं येँय् छगू ज्याझ्वःया ग्वसाः ग्वयाः बाजं खलःतयत केपू लःल्हाःगु खः । ज्याझ्वलय् १३० स्वयां आपाः बाजं खलःतयत केपू लःल्हाःगु खः ।
थौं हे समितिं नासः पूजा नं याःगु दु । नासः पुजा क्वचायेकाः पूजाया प्रसाद ग्रहण यायेगु ज्या नं जूगु खः ।
ज्याझ्वलय् न्हूदँ राष्ट्रिय समारोह समिति ११३६ या नायः डा. महेशमान श्रेष्ठ, समारोह समितिया सल्लाहकार नेवाः न्ह्यलुवाः लक्ष्मीदास मानन्धर, पूर्वमन्त्री तीर्थराम डंगोललिसें नं नेपाल सम्वतयात राज्यं व्यवहारीक रुपं हे राष्ट्रिय सम्वतया थाय् बीमाःगु खँय् बः बियादीगु खः ।
दाफा महोत्सव खुलातक्क जुइगु
लहनान्यूज सम्वाददाता | कौलागा एकादशि ११३६ (अक्टोबर २६ २०१६)
नेपालमण्डल टेलिभिजनं ग्वसाः ग्वयेत्यंगु दाफा महोत्सव खुलातक्क जुइगु जूगु दु ।
थौं नेपालमण्डल टेलिभिजनं महोत्सवया जानकारी बीत यलय् ग्वसाः ग्वःगु पत्रकार सम्मेलनय् स्वला न्ह्याकेगु योजना दुगु महोत्सव खुलातक्क न्ह्याइगु धाइगु खः । न्हापा सच्छिगु पुचःया ब्वति दइगु अनुमान याःगुलिइ २सलं मल्याक्क पुचलं महोत्सवय् ब्वति काःवःबलय् महोत्सवयात खुला न्ह्याकेत्यनागु जानकारी पत्रकार सम्मलेनय् बिल ।
पत्रकार सम्मेलनय् नेपालमण्डल दाफा महोत्सव निर्देशन समितिया नायः संस्कृतिविद डा.सत्यमोहन जोशीं राज्यं स्वंगू स्वंगू प्रतिष्ठान दयेकातलं नं तनावनेत्यंगु अमूर्त संस्कृतिप्रति सुनां नं ध्यान मब्यूगु धासें थज्याःगु महोत्सवं थुगु पक्षय् राज्यया नं ध्यान सालीगु धयादिल । पिने पिने देशय् हरेक जातीय पुचःया थःथःगु अर्केष्ट्रा बाजं दःसां नेवाःतय् मदुगुलिइ थुगु महोत्सवं दाफा बाजंयात हे नेवाः अर्केष्ट्राया रुपं विकास याइगु सम्भावना दुगु डा.जोशीया धापू खः ।
लहनान्यूजलिसे खँ ल्हासें महोत्सवया नितिं दाफा पुचलं क्यंगु थुकथंया उत्साहं थःपिन्त नं तःधंगु हःपाः ब्यूगु नेपालमण्डल टेलिभिजनया प्रवन्ध निर्देशक भाइकाजी महर्जनं धयादिल । दाफा संस्कृतियात ल्यायम्ह पुस्ताया दथुइ यंकेत थुकथंया महोत्सवया लिसें थःपिन्सं फुकथं पलाः न्ह्याकाः तुं वनेगु महर्जनया धापू खः ।
पत्रकार सम्मेलनय् निर्देशन समितिया नायः डा.जोशीलिसें न्वकू नेपाल डंगोल, छ्यान्जे श्रीकृष्ण महर्जन, दुजः रामकृष्ण दुवाललिसें नं पत्रकारपिन्सं न्यंगु न्ह्यसःया लिसः बियादीगु खः ।
- क्वःपुजानिसें दाफा महोत्सव
वइगु कौलागा त्रयोदशि (कार्तिक १२) शुक्रबाःया क्वःपुजाया दिनय् यलया ललितपुर मलय् राष्ट्रपति विद्यादेवी भन्डारीं दाफा महोत्सवया उलेज्या यानादीगु जूगु दु ।
खुलातक्क न्ह्याइगु महोत्सवय् येँ, यल, ख्वपया लिसें मकवानपुर, काभ्रे, भोजपुर, दोलखापाखें २सलं मल्याक दाफा पुचःया ब्वति दु । २सलं मल्याक्क पुचलं पालंपाः वाःया शुक्रवाः व शनिबाः थःथःगु न्ह्यब्वया न्ह्यब्वइ ।
महोत्सवया उलेज्याकुन्हु वरिष्ठ वाद्यगुरु न्हुछेबहादुर डंगोल व वाद्यगुरु धर्म मुनिकारया निर्देशनय् सच्छिम्ह स्वयां आपाः कलाकारपिन्सं न्ह्यब्वइगु नेवाः अर्केष्ट्रालिसें महोत्सवया झ्वलय् छम्हेसिनं २०गः दबदब थाइगु, व हे कथं छम्हेसिनं १९गः क्वंचाखिं थाइगु न्ह्यब्वयात महोत्सवया विशेष आकर्षण जुइगु ग्वसाः खलकं न्ह्यथंगु दु ।
ज्याझ्वलय् दाफा बाजं मू विधा कथं न्ह्यब्वयेत्यंगु दुसा ल्यू विधाकथं थीथी बाजंया तालय् ख्वाःपाः प्याखं, लाखय् प्याखं, ख्याः, कवं प्याखंलिसें धिमय् प्याखं, बाँसुरी बाजनय् प्याखं आदि न्ह्यब्वयेगु जानकारी ब्यूगु दु । थीथी दाफा पुचलय् महर्जन, डंगोल, मुनिकार, तुलाधर, श्रेष्ठ, मानन्धरलिसेंया जातीय पुचःया ब्वति दु ।
महोत्सवपाखें तनावनेत्यंगु दाफा संस्कृतियात च्वन्ह्याकेत तिबः बीगु लिसें दृश्य अभिलेखीकरण नं यायेगु आज्जुं महोत्सव यायेत्यनागु नेपालमण्डल टेलिभिजनं न्ह्यथंगु दु ।
न्हूदँ राष्ट्रिय समारोह समितिया मुँज्या क्वचाल
लहनान्यूज सम्वाददाता | कौलागा दशमि ११३६ (अक्टोबर २५ २०१६)
न्हूदँ राष्ट्रिय समारोह समिति ११३७ या पुर्ण कार्यसमितिया मुँज्या थौं येँय् च्वंगु दु ।
समितिया नायः भीमसेनदास प्रधानया अध्यक्षताय् च्वंगु मुँज्याय् सकसिनं थःथःगु भालाया तयारी बारे जानकारी बीगु झ्वलय् आर्थिक कवःया कजि अमृत ताम्राकारं प्रस्तावित आम्दानी व खर्च न्ह्यब्वयादिल । ताम्राकारं प्रस्तावित आम्दानी कथं ७,००,००० लख तका व प्रस्तावित खर्च ४,५०,००० तकाया ल्याःचाः न्यंकादिल ।
संचार कजि नृपेन्द्रलाल श्रेष्ठं न्हूदँया ज्याझ्वःयात कयाः थीथी संचार माध्यमय् पिदनाच्वंगु बुखँ, च्वसुया जानकारीलिसें संचार माध्यमतलिसे जुयाच्वंगु समन्वयया विषय कनादिल । व हे कथं सांस्कृतिक कजि पंचनारायण महर्जनं थुगुसी २सः स्वयां आपाः बाजं खलकं र्यालीइ ब्वति काइगु धयादीगु खः ।
क्यालेन्डर कवःया कजि देवदास मानन्धरया कथं थुगुसी न्हूदँया क्यालेन्डर ५द्वःपाः पिदनीगु जूगु दु । समितिया सल्लाहकार समाजसेवी, उद्योगी लक्ष्मीदास मानन्धरं थुगुसी नं न्हापा लिपा थें थम्हं फक्व बांलाक नासः पुजा न्यायेकेगु धयादिल ।
व हे कथं व्यवस्थापन समितिया दुजः राजेश शाक्य, शैलेस शाक्य, मचाराजा महर्जन व रविन श्रेष्ठ, मिसा कवःया कजि नानीमैयाँ महर्जन, व्यवस्थापन समितिया कजि उमेश स्थापित, माइक व मंच व्यवस्थापन समितिया कजि ज्योति शाक्यलिसें नं थःथःगु भालाय् लाःगु ज्याया तयारीया बारे जानकारी बियादीगु खः ।
न्हूदँया पाः काइपिं म्ह्वः जुयावनाच्वन
लहनान्यूज सम्वाददाता | कौलागा दशमि ११३६ (अक्टोबर २५ २०१६)
यलय् न्हूदँ समारोहया पाः काइपिं म्ह्वः जुया वनाच्वंगु धाःगु दु ।
न्हूदँ नेपाल सम्वत ११३७या ज्याझ्वःया जानकारी बीत थौं यलय् ग्वसाः ग्वःगु पत्रकार सम्मेलनय् नेपाल भाषा मंकाः खलः, यलया नायः ऋषिप्रसाद श्रेष्ठं निदँ लिपाया समारोहया नितिं यलय् न्हूदँया समारोहया नेतृत्व काइपिं खने मदनिगु परिस्थितीयात कुलादिल । प्यंगू द मंकाः समाजं पालंपाः नेतृत्व काइगु कथं निदँ लिपा पाः काइम्ह सु धइगु क्वःमज्यूगुलिं आकिवंयात हे समस्या वयेफुगु धयादिल ।
लिपा पाः काइगु संस्थाया प्रतिनिधि वर्तमान कार्यसमितिया छ्यान्जे च्वनीगु परम्परा कथं आकिवंया समारोह समिति गठन जुइबलय् हे निदँ लिपा पाः काइम्ह निश्चित जुइधु्ंकेमाःगु श्रेष्ठं जानकारी बियादिल ।
थुगुसी धाःसा ल्वहँकःमि समाजपाखें मोतीलाल शिल्पकार नायः ल्यःगु खःसा आकिवं नेतृत्वया पाः काइगु संस्थाया ल्याखं स्यस्यः समाजपाखें सुवर्णमान अमात्य छ्यान्जे च्वनादीगु खः ।
- थुगुसीया न्हूदँया ज्याझ्वः सार्वजनिक
थौं यलय् ग्वसाः ग्वःगु पत्रकार सम्मेलनय् थुगुसीया न्हूदँया समारोहया ज्याझ्वः नं सार्वजनिक याःगु दु ।
पत्रकार सम्मेलनय् न्हूदँ समारोह समिति ११३७ या नायः मोतीलाल शिल्पकारं जानकारी बियादीकथं न्हूदँया दिं कछलाथ्व पारु ११३७ या दिनस सुथय् यलया मंगलय् नं बाजंगाजंलिसेंया र्यालि न्ह्याइगु जूगु दु । उगु र्यालीं यलया सापारु रुट चाःहिलाः क्वचाइगु जूगु दु ।
ज्याझ्वःया उलेज्या प्रधानमन्त्री पुष्पकमल दाहालं यानादीगु जूगु दुसा र्यालि धुंकाः सिरपाः इनेगु ज्याझ्वलय् उद्योगमन्त्री नवीन्द्रराज जोशी झाइगु समारोह समितिं न्ह्यथंगु दु ।
समितिं न्ह्यथंकथं र्यालीइ ब्वति काइगु बाजं खलः, त्वाः, संघसंस्था आदियात गोलाप्रथाकथं यल उपमहानगरपालिकापाखें छसिकथं ५द्वः, ३द्वः व २द्वः तका सिरपाः नं बीत्यंगु दुसा हःपाः कथं मेगु १५ ब्वतिमिपिन्त द्वःछि तकाया सिरपाः नं बीत्यंगु दु । व हे कथं व्यानर लिसें र्यालीइ ब्वति काइगु खलःपुचः, मिसा पुचः, संघसंस्थायात नेपालभाषा मंकाः खलः यलपाखें मोतीलाल शिल्पकारया नामं नीस्वनातःगु ५द्वः, ३द्वः व २द्वः तकाया मोति सिरपाः व दसिपौ नं बीगु जूगु दु ।
वयां न्ह्यः, न्हू दँ समारोह समिति ११३७ अन्तर्गत रोट्र्याक्ट क्लब अफ ललितपुरया ग्वसालय् कौलागा आमै ११३६ या सनिलय् सीइता मतयाः जुइत्यंगु दु । व हे कथं न्हूदँया दिनय् कछलाथ्व पारु कुन्हु सुथय् नेपाल विद्यार्थी दबूया ग्वसालय् मोटर साइकल र्याली नं जुइत्यंगु दु ।
