नेवाः देय् दबूया दाङ घोराहिइ जुयाच्वंगु खुक्वःगु महाधिवेशनय् पवित्र बज्राचार्यं नायः दाबी याइगु जूगु दु ।

बज्राचार्यं थौं दाङय् विकसित परिस्थितीया हुनिं थम्हं नायः दाबी यायेगु क्वःछिनागु धयादीगु दु । दाङय् ब्वलंगु परिस्थितिं देयन्यंकया नेवाःतयगु संगठनात्मक सुदृढिकरणया लागिं देय् दबुलिइ न्हूगु नेतृत्व आवश्यक जूगु बज्राचार्यया धापू खः ।

गुगु कथं न्हापा सहमति जूगु धइगु खँ पिदन व बिलकुल हे गलत खःगु, नायःया प्रत्याशि बज्राचार्यं धयादीगु दु । विधानय् व्यवस्था हे मदुगु वरिष्ठ उपाध्यक्षय् सहमति जूगु धकाः म्वाःमदुगु हल्ला जक पिकाःगु वयकलं धयादिल ।

देय् दबूया वर्तमान नायः नरेश ताम्रकारं थम्हं अध्यक्ष पद मत्वःतेगु धयाच्वंगु हे इलय् आः पवित्र बज्राचार्यं नं नायः दाबी धाःबलय् देय् दबूया न्हूगु नेतृत्वया लागिं निर्वाचन हे जुइगु खनेदुगु दु ।

‘विखण्डनकारी खँग्वलं लकस स्यन’

थौं दबूया महाधिवेशनया उद्घाटन सत्रया झ्वलय् विशेष रुपं मल्ल के. सुन्दरया न्वचुं बांमलाःगु लकस दयेकूगु श्रोतं लहनान्यूजयात जानकारी ब्यूगु दु ।

नेवाः देय् दबूया संरक्षक मल्ल के. सुन्दरं ‘थौंया थुगु खुक्वःगु महाधिवेशनय् विखण्डनकारीत न्ह्यःने हे च्वनाच्वंगु दु’ धकाः न्वःवानाब्यूबलय् उकिं यक्व हे प्रतिनिधिपिं तंचाःगु व उकिं यानाः महाधिवेशनया लकसय् हे लिच्वः लाकूगु खँ वःगु दु ।