Display Style:
Column Style
पत्रकार दबू येँया दँमुँज्या क्वचाल
लहनान्यूज | चौलागा पारु ११३७ (अप्रिल १२ २०१७)
नेवाः पत्रकार राष्ट्रिय दबू, येँ जिल्लाया दँमुँज्या येँय् क्वचाःगु दु ।
पत्रकार दबू येँ जिल्लाया मदुम्ह दांभरिं सानुकाजी महर्जनयात श्रद्धान्जलि प्वंकुसें १ मिनेट मौन धारण यानाः ज्याझ्वः न्ह्याःगु खः । दँमुँज्यां पत्रकार दबू, येँ जिल्ला कार्यसमितिया दुजः राजेन्द्र सायमियात निमित्त दांभरिं नियुक्त याःगु दु ।
दँमुँज्याय् दबू, येँ जिल्लाया छ्यान्जे प्रजित शाक्यं वार्षिक प्रतिवेदन व भावी योजना न्ह्यब्वयादीगु खःसा निं दांभरिं राजेन्द्र सायमिं आर्थिक प्रतिवेदन न्ह्यब्वयादीगु खः । दुँमुँज्यां छ्यान्जेया वार्षिक प्रतिवेदन व नि.दांभरिंया आर्थिक प्रतिवेदन सर्वसम्मतिं पारित याःगु खः ।
नुगः खँ तयेगु झ्वलय् ज्याझ्वःया मूपाहां नेपालभाषा टाइम्स न्हिपौया पिकाकः लिसें पत्रकार दबूया सल्लाहकार रमेशकाजी स्थापितं नेवाः पत्रकारत थुकथं संगठित जुयाः न्ह्याःवनाच्वंगु लसताया खँ जूगु धयादिल । सकल नेवाः पत्रकारत छधी जुयाः संगठनया अझ सशक्त रुपं न्ह्यःने यंकेत मू पाहां स्थापितं छ्याता बियादिल ।
ज्याझ्वः पत्रकार दबू, येँ जिल्लाया नायः नातिकाजी महर्जनया अध्यक्षताय् जूगु खः ।
लहनां प्यम्ह भाषासेवीपिन्त हन
लहनान्यूज | चौलाथ्व पुन्हि ११३७ (अप्रिल ११ २०१७)
नेपालभाषाया रंगीन वाःपौ ‘लहना’या प्यदँ बुदिंंया लसता लाकाः प्यम्ह भाषासेवीपिन्त थीथी सिरपाःलिसें हंगु दु ।
लहना वाःपौया प्यदँ बुदिं हनेगु झ्वलय् येँय् ग्वसाः ग्वःगु ज्याझ्वलय् १०द्वः तका राशिलिसेंया ‘लहना धर्ममोति पत्रकारिता सिरपाः’ पत्रकार राजु शाक्ययात लःल्हात । लहनाया न्हापांगु बुदिंनिसें हे बिया वयाच्वंगु थुगु सिरपाः थुगुसी राससया प्रधान सम्पादक शाक्ययात लःल्हाःगु खः ।
अथे हे थगुनेनिसें न्ह्याकूगु १०द्वः तका राशिया ‘लहना सूर सम्मान’पाखें वरिष्ठ सिने पत्रकार बिजयरत्न असंबरेयात सम्मानित याःगु दु । नेपालभाषा, कला, संस्कृति ख्यलय् योगदान बियादीपिन्त बीगु थुगु सम्मान थुगुसी वरिष्ठ सिने पत्रकार लिसें संकिपा निर्देशक असंबरेयात ब्यूगु खः ।
लहनाया प्यदँ बुदिंया झ्वलय् थुगुसीनिसें मेगु न्हूगु निगू सिरपाः नं न्ह्याकूगु दु । व मध्ये २०द्वः तका राशिया ‘लहना पञ्चबीर सिरपाः’ नेवाः पत्रकारिता, प्राध्यापनय् ख्यलय् योगदान बियादीम्ह प्राध्यापक माणिकलाल श्रेष्ठयात लःल्हात ।
अथे हे थुगुसीनिसें हे न्ह्याकूगु ‘लहना मोहिनि सिरपाः’ पत्रकार सुनिल महर्जनयात लःल्हात । पत्रकारिता मार्फत नेवाः पहिचान व अधिकारया सः ल्ह्वनाच्वनादीम्ह पत्रकार महर्जनयात १०द्वः तका राशिया उगु सिरपाः लःल्हाःगु खः ।
सम्मानित सकलसित ज्याझ्वःया मू पाहां जनकवि दुर्गालाल श्रेष्ठं हनापौ लःल्हानादिल सा विशेष पाहां शिक्षाविद् राजु महर्जनं दोसल्लां न्ययेकादिल । तका सिरपाः धाःसा सिरपाःया दातापिन्सं लःल्हानादीगु खः ।
‘लहना धर्ममोति पत्रकारीता सिरपाः’ थः मांअबुया नामं समाजसेवी लक्ष्मण गमालं नीस्वनादीगु खःसा ‘लहना सूर सम्मान’या दाता सुरबहादुर श्रेष्ठ खः । ‘लहना पञ्चवीर सिरपाः’या दाता समाजसेवी पञ्चवीर सिं तुलाधर व मोहिनी श्रेष्ठं ‘लहना मोहिनी सिरपाः’ नीस्वनादीगु खः ।
उकियालिसें लहना वाःपौयात निरन्तर विज्ञापन बियाच्वंपिं प्यम्ह विज्ञापनदातापिन्त नं हंगु खः । येँपाखें आरबि फर्निसिङ सेन्टर, यलं देब आल्मुनियम इण्डस्ट्रियल कम्पनी प्रा.लि., ख्वपपाखें हिमालयन आइस व किपुलिं एमआर टेलरिंग सेन्टरयात हंगु खः ।
ज्याझ्वःया न्हापांगु ब्वय् हना ज्याझ्वः क्वचायेकाः निगूगु ब्वय् सांगितिक न्ह्यब्वयात न्ह्यब्वःगु खः । लचना चित्रकारया वाद्यवादनलिसें न्ह्याःगु सांगितिक न्ह्यब्वयाया झ्वलय् रीता महर्जन, सुरजबीर बज्राचार्य, दिपा महर्जन, भीम तुलाधर व अन्जन श्रेष्ठ, पंकज राजोपाध्याय, निशान्त गौचन, पंकज डंगोलं म्ये हालादीगु खःसा मिजला मानन्धर, कृपा बज्राचार्य, सुरज बसेल व आराध्यलक्ष्मी खड्गीं हुलाप्याखं न्ह्यब्वयादीगु खः ।
‘च्यः बुद्धिं थहां वयेफयेके माल’
ज्याझ्वःया न्हापांगु ब्वय् नुगःखँ तयेगु झ्वलय् जनकवि दुर्गालाल श्रेष्ठं नेवाःत दास मानसिकतां थहां वयेमाःगु धयादिल । छुं राजनैतीक वा मेमेगु स्वार्थय् तमक्यंसे नेवाः भावना नेवातयके दयेमाःगु खँय् जनकवि श्रेष्ठं बः बियादिल ।
अथे हे ज्याझ्वल् लहना धर्ममोति पत्रकारिता सिरपालं सम्मानित राजु शाक्यं नेपाःया मूलधारया पत्रकारिता नेवाःत म्ह्वः जूगु खँय् दुःख प्वंकुसें नेवाःत पत्रकारीता ख्यलय् सशक्त रुपं न्ह्यःने वयेमाःगु धयादिल ।
व हे कथं प्रा. माणिकलाल श्रेष्ठं थम्हं यानागु ज्यायात च्वछानाः थुकथं हंगु खँय् लयताःगु धयादिल । कला, व भाषा ख्यलय् थः निरन्तर न्ह्यानाच्वनेत लहना सूर सम्मानं थःत हःपाः ब्यूगु बिजयरत्न असंबरें धयादिल ।
पत्रकार सुनिल महर्जनं नेवाः मुद्दाय् नेवाःत स्पष्ट जुइमाःगु धयादिल । नेवाः मुद्दायात कयाः नेवाःतयत स्पष्ट दयेकेगु खँय् नेवाः पत्रकारतयगु अहम भुमिका दइगु खँय् महर्जनया बः खः ।
ज्याझ्वलय् लहना वाःपौया प्रकाशक नृपेन्द्रलाल श्रेष्ठं लसकुस यानादीग खःसा व्यवस्थापक सुरेन्द्रभक्त श्रेष्ठं सुभाय् देछानादीगु खः । उगु हे ज्याझ्वलय् लहना वाःपतिइ च्वसु च्वयादीपिं च्वमिपिं व विज्ञापनदातातयत मतिनाया चिं नं देछाःगु खः ।
सडक विस्तारया विरोधय् अनसन न्यान्हु थ्यन
लहनान्यूज | चौलाथ्व त्रयोदशी ११३७ (अप्रिल ९ २०१७)
स्वनिगःया थीथी थासय् जुयाच्वंगु सडक विस्तारया विरोधय् कुहांवःपिं पिडितपिन्सं न्ह्याकूगु रिले अनसन थौं न्यान्हु थ्यंगु दु ।
उपत्यकाव्यापी सडक विस्तार पिडित संघर्ष समितिया आव्हानय् न्ह्यानाच्वंगु रिले अनसनय् थौं १४म्ह अनसन च्वंगु खः ।
थौंया अनसनय् सडक विस्तार पिडितपिनिगु आन्दोलनयात नेवाः मिसा दबुलिं नं ऐक्यवद्धता क्यंगु खः । आन्दोलनय् ऐक्यवद्धता क्यँसें मिसा दबूया पदाधिकारी, दुजःपिं नं अनसन च्वंगु खः ।
थौं अनसन च्वंपिन्त संघर्ष समितिया नायः सुमन सायमिं खादा कोखायेकादीगु खः । थौं अनसनया न्यान्हु थ्यनेधुंकलं नं सरकार व सरोकारवाला निकायपाखें थःपिन्त छुं हे कथं प्रतिक्रिया मवःनिगु संघर्ष समितिपाखें न्ह्यथंगु दु ।
सरकारया बेवास्तां जनता थःगु भुमिं हे विस्थापित जूगुप्रति राज्ययात छुं हे वास्ता मदुगु प्रमाणित जूगु संघर्ष समितिया नायः सायमिं धयादिल । आः थःपिं थ्व स्वयां नं सशक्त आन्दोलनय् वनाः आमरण अनसन च्वनेगु मानसिकताय् थ्यनेधुंकूगु वयकलं धयादिल ।
*संघर्ष समितिया नायः सुमन सायमि जुइमाःथाय् द्वनाच्वंगुलिइ भिंकागु जुल ।
पत्रकार दबूया पत्रकारिता तालिम न्ह्यात
लहनान्यूज | चौलाथ्व त्रयोदशी ११३७ (अप्रिल ९ २०१७)
नेवाः पत्रकार राष्ट्रिय दबूया ग्वसालय् स्वन्हुयंकया पत्रकारिता तालिम थौंनिसें यलय् न्ह्याःगु दु ।
यल क्षेत्र नं २ का सांसद् चन्द्र महर्जनया निर्वाचन क्षेत्र विकास ज्याझ्वः अन्र्तगत जिल्ला समन्वय समितिया कजिसुइ दबूया ग्वसालय् न्ह्याःगु पत्रकारिता तालिमया थौं यलय् उलेज्या याःगु खः । तालिमया उलेया सांसद् चन्द्र महर्जनं यानादिल ।
तालिमया उलेज्या यासेंसांसद् महर्जनं स्थानीय तगिंयागु अधिकारया अभ्यासयात प्रभावकारी व जवाफदेही दयेकेत स्थानीय सञ्चार माध्यम व पत्रकार उत्पादन यायेगु ज्यायात प्राथमिकता बीमाःगु धयादिल । नेपाली समाजया विविधता सञ्चार ख्यलय् प्रतिविम्बित याकेत सञ्चार ख्यः समावेशी जुइमाःगु आवश्यकता नं सासंद् महर्जनं न्ह्यथनादिल ।
अथे हे पत्रकार दबूया केन्द्रीय नायः श्रीकृष्ण महर्जनं सञ्चार ख्यःयात समावेशी दयेकेत, मातृभाषा माध्यम पत्रकारितायात सशक्त दयेकेगु आज्जु कथं छगू जातीय समुदायपाखें म्ह्वतिं छम्ह पत्रकार उत्पादन यायेगु आज्जुं तालिमया ब्वतिमिपिं ल्ययागु जानकारी बियादिल ।
ताम्रकार समाजया नायः रवीन्द्रराज ताम्रकारं सञ्चार ख्यलय् थःगु गतिविधि, एजेण्डाया कभरेजया लागिं सम्बन्धित सरोकारवालापिनिगु अग्रसरता जरुरी दुगु धयादिल ।
तालिमया उलेज्या ज्याझ्वलय् पत्रकार दबूया केन्द्रीय न्वकू लिसें प्रशिक्षण विभागया कजि सुरजवीर बज्राचार्य, मू छ्यान्जे सुनिल महर्जन, पत्रकार दबू यलया छ्यान्जे राजेश बज्राचार्यं सञ्चार ख्यःयात समावेशी दयेकेत न्हूगु प्रतिभापिन्त पत्रकारिताय् आर्कषित यानाः क्षमता थकायेत सम्बन्धित समुदायलिसें राज्यया अग्रसरता आवश्यक दुगु खँय् बः बियादिल ।
सैद्धान्तिकलिसें प्रयोगात्मक अभ्यास याकेगु धाःगु तालिमय् ३५म्ह प्रशिक्षार्थिया ब्वति दु ।
मास्टर एन्ड मिस नेवाः किन्डरगार्टेन क्वचाल
चौलाथ्व द्वादशी ११३७ (अप्रिल ८ २०१७)
मास्टर अनय महर्जन व मिस समीरा महर्जन न्याक्वःगु मास्टर एन्ड मिस काठमाडौं नेवाः किन्डरगार्टेनया उपाधि त्याकेत ताःलाःगु दु ।
येँय् क्वचाःगु न्याक्वःगु मास्टर एन्ड मिस नेवाः किन्डरगार्टेनय् मास्टर अनय महर्जनं मास्टर काठमाडौं नेवाः किन्डरगार्टेनया उपाधि त्याकूगु खःसा मिस समीरा महर्जनं मिस काठमाडौं नेवाः किन्डरगार्टेनया उपाधि त्याकूगु खः ।
ब्वनेकुथिया ब्वँमि मस्तयके आत्मविश्वास ब्वलंकेगु व सुलाच्वंगु प्रतिभा न्ह्यब्वयेगु आज्जुं काठमाडौं नेवाः किन्डरगार्टेनं न्यादँ न्ह्यःनिसें याना वयाच्वंगु थुगु धेंधें बल्लाखय् मू टाइटलया लिसें मुक्क १०गू विधाय् मस्तयत ल्यःगु खः ।
धेंधें बल्लाखय् बेस्ट ड्रेसया उपाधी रुनिक महर्जन, बेस्ट वाक लिसा महर्जन, मोस्ट इनर्जेटिक प्रणय प्रजापति, बेस्ट परफर्मेन्स पुन्हिला महर्जन, बेस्ट स्माइल सुभिक शाक्य, बेस्ट नेपालभाषा सरिशा महर्जन, बेस्ट स्पोकन नमन महर्जन व बेस्ट पर्सनाय्लिटी सिद्धिका मानन्धरं त्याकेत ताःलाःगु खः ।
त्याकामि मस्तयत ज्याझ्वःया मूपाहां प्रतिसरा सायमि, विशेष पाहां दिपकरत्न तुलाधर, ब्वनेकुथिया फाउण्डर रबिन महर्जन व निर्देशक राजेन्द्र महर्जनं दसि—पौ, लुमन्तिया चिं व सिरपाः लःल्हानादीगु खः ।
कल्पना बज्राचार्य व काठमाडौं युथ अर्केष्ट्राया सी.ई.ओ. सबिन मुनिकारया ल्यज्यां त्याकामि क्वःछ्यूगु खः ।
ब्वनेकूया दिक्षान्त समारोह नं क्वचाल
व स्वयां न्ह्यः ज्याझ्वःया न्हापांगु ब्वय् ब्वनेकुथिइ मचा तगिं क्वचायेकूपिं मुक्कं २५म्ह मस्तयत हंगु खः ।
दिक्षान्त समारोह ज्याझ्वःया उलेज्या मू पाहां कवयित्री प्रतिसरा सायमिं यानादिल । ब्वनेकुथिया संस्थापक भाजु रबिन महर्जनया सभापतित्वय् जूगु ज्याझ्वलय् नेपालभाषा माध्यमं ब्वंकीगु थीथी स्कूलया कजि, प्रधानाध्यापकपिनिगु उपस्थिती दुगु खः ।
ज्याझ्वलय् नेवाः बस्ती नेवाः स्कुलया कजि दिपकरत्न तुलाधर विशेष पाहां कथं झायादीगु खः । नेपालभाषाया माध्यमं ब्वंकीगु स्कुल जगत सुन्दर ब्वनेकुथिया प्रिन्सिपल माया मानन्धर, नेवाः स्कुल थेच्वया प्रिन्सिपल नबिन थेच्वमि, मन्टस्सरी लिटिल वल्र्डया प्रिन्सिपल रेणुका बज्राचार्यया नं उपस्थिति दुगु खः ।
