Display Style:
Column Style
प्रचार प्रसारया अभावय् ने.सं. छ्यलेमफुत
लहनान्यूज सम्वाददाता | कौलागा नवमि ११३६ (अक्टोबर २४ २०१६)
नेपाःया हे गौरव खयाः नं प्रचार प्रसारया अभावं यानाः थम्हं यक्व कुतः यानागु खःसां नेपाल सम्वतयात व्यवहारीक रुपं छ्यले मफूगु प्रधानमन्त्री पुष्पकमल दाहालं धयादीगु दु ।
नायः भीमसेनदास प्रधानया नेतृत्वय् थःत नापलाःवःगु न्हूदँ राष्ट्रिय समारोह समितिया प्रतिनिधि मण्डलयात प्रधानमन्त्री दाहालं देययात हे त्यासा मुक्त दयेकूगु घटनावलिलिसे स्वानाच्वंगु नेपाल सम्वत नेवाःया जक मखु देयया हे गौरव खः धयादिल । देयया नामं स्वनातःगु सम्वतयात सकल नेपाःमिया गौरव तायेकाः थम्हं राष्ट्रिय सम्वत घोषणा यानागु खःसां प्रचार प्रसारया हे अभावं व्यवहारय् छ्यलेत थाकूगु दाहालं धयादिल ।
नेवाःतयसं जक प्रचार यानाच्वंगु व न्हूदँ न्यायेका वयाच्वंगुलिं थौंकन्हय् नेपाल सम्वत नेवाःतयगु थें जक खने दयाच्वंगु धासें प्रम दाहालं आः थुकियात व्यवस्थित रुपं प्रचार प्रसार याना वनेमाःगु धयादिल । थःगु न्हापाया कार्यकालय् सुयागुं दवाव वा प्रभावं मखसें थम्हं अध्ययन यानाः हे नेपाल सम्वतयात राष्ट्रिय सम्वत घोषणा यानागु दाहालया धापू खः ।
न्हूदँ राष्ट्रिय समारोह समितिया नायः भीमसेनदास प्रधानं धाःसा राज्यं राष्ट्रिय सम्वत घोषणा याःसां सरकारी स्तरं हे व्यवहारय् मछ्यलाच्वंगु खँ तयादिल । लिसें नायः प्रधानं समितिपाखें नेपाल सम्वतयात बैंकया चेकय् छ्यले दयेमाःगु, नोटय् छ्यलेमाःगु, नेपाल सम्वत अध्ययन प्रतिष्ठान दयेकाः थुकिया अध्ययन न्ह्याकेमाःगु, राष्ट्रिय विभूति शंखधर साख्वाःया व नेपाल सम्वतया विषय पाठ्यक्रमय् दुथ्याकेमाःगु, नेपाल सम्वत न्हूदँ राज्य स्तरं हनेमाःगु, कोषया व्यवस्था यायेमाःगु लिसेंया माग दुथ्याःगु ज्ञापनपौ प्रम दाहालयात लःल्हानाद्यूगु खः ।
प्रम दाहालयात नापलायेत थौं प्रधानमन्त्री ज्याकू, सिंहदरवारय् न्हूदँ राष्ट्रिय समारोह समितिया नायः प्रधान, दुजःपिंलिसें सल्लाहकारपिं लक्ष्मीदास मानन्धर, डा.रत्नकमल वैद्य, पूर्वमन्त्रीपिं कृष्णगोपाल श्रेष्ठ, राजेन्द्र महर्जन, दिलिप महर्जन लिसेंया पुचः थ्यंगु खः ।
थक्वातय् नं शंखधरया सालिक
लहनान्यूज सम्वाददाता | कौलागा नवमि ११३६ (अक्टोबर २४ २०१६)
प्राचीन नेवाः बस्ती येँया थक्वातय् (थानकोटय्) नं शंखधरया सालिक तइगु जूगु दु ।
स्थानीय संस्था थक्वाः भिंतुना नेवाः खलःया न्ह्यलुवाय् शंखधरया सालिक दयेकाः थक्वाःया सिलाफलय् तयेत्यंगु खः । वइगु कौलागा आमै, लक्ष्मीपुजाया दिनस उगु सालिकया उलेज्या जुइत्यंगु खलःया नायः मोहनबहादुर बलामिं लहनान्यूजयात जानकारी बियादिल ।
लक्ष्मीपुजाया दिनय् प्रधानमन्त्री पुष्पकमल दाहालं उगु सालिक उलेज्या यानादीत्यंगु खः ।
नायः बलामिं उगु दिनय् सुथय् ८ताः इलय् सिलाफलय् छगू ज्याझ्वः यासें प्रधानमन्त्रीया ल्हातं सालिकया उलेज्या जुइगु बलामिं कनादीगु दु ।
दान्यहिरा सिरपाः लःल्हात
लहनान्यूज सम्वाददाता | कौलागा नवमि ११३६ (अक्टोबर २४ २०१६)
नेपालभाषा एकेदमिपाखें साहित्य व कलाकारीता ख्यलय् पालंपाः यानाः दँयदसं लःल्हाना वयाच्वंगु दान्यहिरा सिरपाः, दान्यहिरा हःपाः सिरपाः लिसें थुगुसीनिसें न्ह्याःगु दान्यहिरा हःपाः सिरपाः लःल्हायेगु ज्या यलय् क्वचाःगु दु ।
नेपालभाषा एकेदमिं यलय् ग्वसाः ग्वःगु छगू ज्याझ्वःया दथुइ थुगुसीया दान्यहिरा सिरपाः साहित्यकार लिसें उपन्यासकार मथुरा सायमियात लःल्हात । अथे हे दान्यहिरा हःपाः सिरपाः साहित्यकार नारद बज्राचार्ययात लःल्हात ।
व हे कथं थुगुसीनिसें न्ह्याकूगु दान्यहिरा विज्ञान प्रविधि सिरपाः रमेशमान सिंहयात लःल्हात । वैकल्पिक उर्जाया ख्यलय् ताः ई न्ह्यवनिसें बिया वयाच्वंगु योगदानया नितिं सिंहयात सिरपाः लःल्हाःगु खः ।
सम्मानित स्वम्हं व्यक्तित्वपिन्त नेपालभाषा एकेदमिया चान्सलर चित्तरन्जन नेपालीं हनापौ, स्वांया बुके एकेदमिया सदस्य सचिव मल्ल. के सुन्दर व तका सिरपाः दाता यज्ञरत्न धाख्वालं लःल्हानादिल । स्वांमाः शताब्दि पुरुष संस्कृतिविद् डा. सत्यमोहन जोशीं कोखायेकादिल ।
दान्यहिरा सिरपाः ५०द्वः तका राशिया खःसा दान्यहिरा हःपाः सिरपाः व दान्यहिरा विज्ञान प्रविधि सिरपाः २५द्वः÷२५द्वः तका राशिया खः । सिरपाःया दाता साहित्यकार यज्ञरत्न धाख्वाः खः ।
उगु हे ज्याझ्वलय् नेपालभाषा एकेदमिया भाइस चान्सलर लिसें साहित्यकार यज्ञरत्न धाख्वाःया १२गूगु सफू ‘तुतां’ नं विमोचन जुल । संस्कृतिविद्, शताब्दि पुरुष डा. सत्यमोहन जोशीं सफूया उलेज्या यानाद्यूगु खः ।
- थःथःगु ख्यलय् योगदानया कदर स्वरुप सिरपाः
सिरपा लःल्हाये स्वयां न्ह्यः ज्याझ्वलय् स्वम्हं सम्मानित व्यक्तित्वपिनिगु म्हसिका ब्वनाः न्यंकूगु खः ।
प्रा. प्रेमशान्ति तुलाधरं साहित्यकार मथुरा सायमि व साहित्यकार नारद बज्राचार्यया म्हसिका ब्वनाः न्यंकादिल । ने.सं. १०८० निसें साहित्य ख्यलय् निरन्तर च्वसा न्ह्याकाच्वनादीम्ह साहित्यकार, उपन्यासकार मथुरा सायमिया आःतक्क ८ बाखं सफू, १० उपन्यासलिसें २२ सफू पिदनेधुंकूगु दुसा मेम्ह सम्मानित नारद बज्राचार्यं ५०दँ न्ह्यःनिसें साहित्य च्वसा न्ह्याकाच्वनादीगु दु ।
अथे हे मेम्ह सम्मानित वैज्ञानिक रमेशमान सिंहजुया म्हसिका डा. दिनेश भुजुं ब्वनाः न्यंकादिल । बैकल्पिक उर्जाया ख्यलय् योगदान बिया वयाच्वनादीम्ह सिंह पोलिमर टेक्नोलोजिइ विद्यावारिधि यानादीम्ह खः ।
शान्तिया कामना यासें कथिन चीवरदान
लहनान्यूज सम्वाददाता | कौलागा अष्टमि ११३६ (अक्टोबर २३ २०१६)
देशय् शान्ति, मैत्री व समृद्धिया कामना यासें सलंसः भिक्षु व भिक्षुणीपिनिगु उपस्थितिइ राजधानीइ कथिन चीवर दानया ग्वसाः ग्वल ।
द्रव्यमानसिंह तुलाधर (भाईराजा) व बसन्धरा तुलाधरं राजधानीया भृकुटीमण्डपस्थित बुद्ध विहारय् थुगु ज्याझ्वःया ग्वसाः ग्वयादीगु खः । तुलाधर त्यपुया आव्हानय् ज्याझ्वलय् थ्यंपिं भिक्षुपिनिगुपाखें शीलप्रार्थना व प्रवचन याःगु खः ।
व धुंकाः तुलाधर त्यपुलिसें बुद्ध धर्मप्रति आस्था तइपिं सलंसःम्हेसिनं भिक्षुभिक्षुणीपिन्त न्हियान्हिथंया जीवनय् मदयकं मगाःगु च्याता ज्वलं (अष्टपरिष्टकार) दान याःगु खः । दानं मनय् दुगु लोभ व कञ्जुस भाव चिलावनीगु विश्वास लिसें उपस्थित दातापिन्सं थम्हं फुथे नगद लिसें थीथी ज्वलं दान याःगु खः ।
भिक्षुपिं असार पुन्हिनिसें कतिपुन्हितक्क छगू हे विहारय् च्वनाः ध्यान व ज्ञानया अभ्यास (वर्षावास) यायेधुंकाः जक उगु दान बीगु परम्परा दुगुलिं स्थविरवाद बुद्ध धर्मय् थुगु दानयात दुर्लभ कथंया दानया रुपं काइ । गौतम बुद्धया पालनिसें हे न्ह्यानावयाच्वंगु थुगु परम्परा कथं थुगुसी बुद्ध विहारय् अखिल नेपाल भिक्षु महासंघया मू छ्यान्जे तकं खःम्ह भिक्षु कौण्डन्य, भिक्षु सुद्धिको व भिक्षु धम्मदत वर्षावास च्वनाद्यूगु खः ।
दानया महिमा ब्वलंकीगु थुगु पर्वय् अष्टपरिष्टकार दानय् प्राप्त जुइगु धेबा लुम्बिनीइ नेपाःमिनिगु पाखें दयेकाच्वंगु थेरवाद बुद्ध विहार दयेकेगु ज्याय् खर्च यायेगु नं मू छ्यान्जे भिक्षु कौण्डन्यं जानकारी बियादिल । ‘अष्टपरिष्टकार दानपाखें म्हइगु धेबा व भिक्षुपिन्त प्राप्त जुइगु दानया निश्चित धेबा लुम्बिनीइ विहार दयेकेगु ज्याय् खर्च यायेगु नीति न्हापा थें थुगुसी नं निरन्तरता बियागु दु । ’मू छ्यान्जे भिक्षु कौण्डन्यं लहनान्यूजयात धयादिल ।
भिन्तुना र्यालिया नितिं जनकबिया चिनाखँ
लहनान्यूज सम्वाददाता | कौलागा अष्टमि ११३६ (अक्टोबर २३ २०१६)
वइगु कछलाथ्व पारुया दिनस ने सं ११३७ न्हूदँया लसताय् येँया बसन्तपुरं न्ह्याइगु सांस्कृतिक र्यालीइ जनकवि दुर्गालाल श्रेष्ठं च्वयादीगु भिंतुना चिनाखँ मंकाः कथं हालीगु जूगु दु ।
जनकवि श्रेष्ठं न्हूदँया र्याली सांस्कृतिक जूगु हुनिं उकिया म्हसीका उकथं हे ल्यंकातयेत भिंतुना चिनाखँ मंकाः कथं हालेछिंक च्वयागु खँ कनादीगु दु ।
जनकवि श्रेष्ठया भिंतुना चिनाखँ मंकाः कथं हालाः र्यालीइ ब्वति कायेगु नितिं न्हूदँ राष्ट्रिय समारोह समितिया दुजः रमिता बज्राचार्यं व्यवस्थापनया ज्या यानाच्वंगु दु । बज्राचार्यया कथं जनकवि श्रेष्ठं च्वयादीगु चिनाखँ र्यालीइ मंकाः कथं हालाः वनेगु नितिं रिहर्सल जुइत्यंगु दु ।
