Display Style:
Column Style
राष्ट्रपति भारत भ्रमणय् निन्हु सरकारी बिदा
लहनान्यूज | चौलागा पञ्चमि ११३७ (अप्रिल १६ २०१७)
सरकारं राष्ट्रपति विद्या भण्डारी भारत भ्रमणय् वनीगु व लिहांवइगु निन्हुं हे सार्वजनिक विदा बीगु क्वःछ्यूगु दु ।
आइतबाः च्वंगु मन्त्रिपरिषद मुँज्यां राष्ट्रपतिया भारत भ्रमण स्वीकृत यासें कन्हय् राष्ट्रपति भारत झाइगु दिनय् विदा बीगु क्वःछ्यूगु खः । लिसें राष्ट्रपति नेपाः झाइगु दिं शुक्रबाः नं विदा बीगु क्वःछ्यूगु दु ।
न्हापा जुजुपिनिगु विदेश भ्रमणया इलय् सार्वजनिक विदा बीगु प्रचलन दुगु खः । गणतन्त्र स्थापना लिपा थज्याःगु चलन चीकूगु खः ।
थुगु चलन चीकाछ्वःगुलिसें गणतन्त्र नेपालया न्हापांम्ह राष्ट्रपति विदेश भ्रमणय् झाःबलय् सार्वजनिक विदा मब्यूगु खः ।
राष्ट्रपति विद्या भण्डारी ३४ दुजःया टोलीलिसें भोलि भारत भ्रमणय् झायेत्यंगु खः । राष्ट्रपतिया रुपं वयकःया थ्व न्हापांगु विदेश भ्रमण खः ।
भारतया राष्ट्रपति प्रणव मुखर्जी वंगु कात्तिक १७य् नेपाल वःबलय् नं सार्बजनिक विदा ब्यूगु खः ।
बोडेय् म्येप्वाःयाः क्वचाल
लहनान्यूज | चौलागा चतुर्थी ११३७ (अप्रिल १५ २०१७)
बोडेय् थौं म्येप्वाःयाः क्वचाःगु दु ।
सौरमास कथं हनीगु म्ह्वः हे नेवाः जात्रापर्व मध्ये छगू बिस्काः जात्राया झ्वलय् थौं वैशाख २ गते बोडेय् म्येप्वाःयाः न्यायेकूगु खः । थुगुसी बोडेयाम्ह ४५दँयाम्ह बुद्धकृष्ण बाग श्रेष्ठं म्ये प्वाः खनादीगु खः ।
श्रेष्ठं थुगुसी न्याक्वःगु खुसी म्ये प्वाः खंकादीगु खः । थ्वयां न्ह्यः वयकलं २०६२ निसें २०६५ सालतक्क यानाः प्यक्वः म्ये प्वाः खंकादीधुंकूगु दु ।
चैत मसान्तया दिनय् बोडे महालक्ष्मी देगःया प्राङ्गणय् यःसिं थनेधुंकाः चि मनःसे अपसं च्वंम्ह श्रेष्ठं न्याक्वःगु खुसी म्ये प्वाः खनाः जात्रायात निरन्तरता बियादीगु खः ।
वैशाख २ गते सुथय् हे म्ये प्वाः खनाबीम्ह नकःमि नायकं थीथी द्यःगणया पूजा यानाः पाँचो गनेद्यःया प्राङ्गणय् दुगु फल्चाय् दबू दयेकाः म्येप्वाः खनाबीगु चलन दु । म्ये प्वाः खनीगु इलय् नायखिं लिसें थीथी बाजं थायेगु याइ ।
नकःमिं लछि न्ह्यःनिसें हे ताःहाकःगु मुलु दयेकाः चिकनय् चिकनय् थुनातयेगु याइ । व हे मुलुं थौंया दिनय् सकसिगु न्ह्यःने म्ये प्वाः खनाबीगु याइ ।
म्ये प्वाः खनेधुंकाः म्ये प्वाः खंम्ह मनूयात पथं दयेकातःगु अर्धचन्द्राकार महाद्वीप कुबिकाः देय् चाःहुकी । चाःहिलाः पाँचो गनेद्यःयाथाय् लिथ्यंकालि नकःमि नायकं म्येय् सुयातःगु मुलु लिकयाः महालक्ष्मीया चा म्येय् इलाबियाः मुलु गनेद्यःया देगलय् तानाबी ।
म्ये प्वाः खनीम्ह मनुखं नाट्यम्बरया पूजा यायेधुंकाः जक न्वःवाये, नये व मेपिन्त थीजीगु परम्परा दु ।
म्येप्वाःयाःयात सहकालया याः कथं नं काइ । ल्वय् मजुइमा, बालीनाली बांलायेमा, सकल जनतां सुख सीमा धइगु प्रार्थना कथं म्येप्वाःयाः न्यायेकेगु याःगु जनविश्वास दु ।
ख्वपय् थौं नं यःसिं त्वधुल
लहनान्यूज | चौलागा तृतीया ११३७ (अप्रिल १४ २०१७) \
ख्वपय् बिस्काः जात्राया न्यान्हुगु दिं, यःसिंख्यलय् म्हिगः थंगु यःसिं क्वथयेगु झ्वलय् थौं नं यःसिं त्वधूगु दु ।
थौं यःसिं क्वथयेगु झ्वलय् त्वधूसां छुं बांमलाःगु घटना धाःसा मजू । म्हिगः सनिलय् यःसिं थनेगु झ्वलय् नं यःसिं त्वधुलाः छम्ह सीगु खः ।
थौं सनिलया ५ताः ई जुयाः ३३ मिनेटय् ५५कु ताःहाकःगु यःसिं क्वथःगु खः । चैत मसान्तया दिनय् थनीगु यःसिं खाइसंल्हूकुन्हु क्वःथयेगु परम्परा कथं थौं यःसिं क्वःथःगु खः ।
म्हिगः न्हापा थनेत स्वःगु यःसिं त्वधुलेधुंकाः बहनी १०ताः इलय् शास्त्रोक्त विधि कथं पुजा यानाः मेगु यःसिं थंगु खः । व हे यःसिं थौं क्वथःगु खः ।
यःसिं क्वःथये धुनाकथं खलाँ त्वालय् भैलःद्यः व भद्रकालिया रथयात ल्वाकेगु परम्परा दु । बहनी दुमाजु देवीया जात्रा नं याइ ।
कन्हय् बिस्काः जात्राया खुन्हुगु दिं मध्यपुर थिमिइ सुथय् भुइसिन्हः सिन्दुर जात्रा जुइसा न्हिनय् बोडेय् म्येप्वाःयाः जुइ ।
थुगु बुखँ नं ब्वनादिसँ
सिद्धिचरण पत्रकारीता सिरपाः नरेशबीरयात
लहनान्यूज | चौलागा तृतीया ११३७ (अप्रिल १४ २०१७)
थुगुसीया सिद्धिचरण युवा पत्रकारिता सिरपाः पत्रकारलिसें नेवाः न्ह्यलुवा नरेशबीर शाक्ययात लःल्हाइगु जूगु दु ।
युवकवि सिध्दिचरण प्रतिष्ठानपाखें बिया वयाच्वंगु थीथी सिरपाःमध्ये २५द्वः तका राशिया युवा पत्रकारीता सिरपाः २०७४ नेपालभाषाया पत्रकारीता ख्यलय् न्हयगू पत्रपत्रिका पिथना वयाच्वंम्ह शाक्ययात बीगु क्वःछ्यूगु खः । नापं युवा पत्रकारिता सिरपाः २०७२ जयदेव भट्टराईयात व २०७३या सिरपाः पुष्पहरि क्याम्पाराईयात लःल्हाइगु जूगु दु ।
नेपाली कविता व लोकसाहित्य ख्यलय् विशिष्ट योगदान ब्यूम्हेसित बीगु ‘यूगकवि सिध्दिचरण सिरपाः २०७४’ धाःसा थुगुसी कवि लिसें लोकसंस्कृतिविद् प्रा.तुलसी दिवसयात लःल्हाइगु जूगु दु । सिरपाः १ लख तका राशियागु खः ।
प्रा.डा.गार्गी शर्माया कजिसुइ नीस्वंगु ल्यज्या उपसमितिपाखें सिरपाः त्याकामि व्यक्तित्वपिं ल्यःगु खः । उपसमितिइ डा.फणिन्द्रराज निरौला व डा.शैलेन्दु प्रकाश नेपाल दुजः दुगु खः ।
वइगु २०७४ ज्येष्ठ ९ गते युगकवि सिद्धिचरण श्रेष्ठया १०६दँया बुदिंया दिं लाकाः सिरपाः लःल्हायेगु प्रतिष्ठानं न्ह्यथंगु दु ।
ख्वपय् यःसिं त्वधुलाः छम्ह सित
लहनान्यूज | चौलागा द्वितीया ११३७ (अप्रिल १३ २०१७)
बिस्काः जात्राया प्यन्हुगु दिं थौं ख्वपय् यःसिंख्यलय् यःसिं थनेगु झ्वलय् यःसिं त्वधुलाः छम्ह सीगु दु ।
थौं ख्वपया यःसिंख्यलय् ५५कु दुगु यःसिं थनेगु झ्वलय् यःसिं त्वधुलाः मेपिं न्याम्ह घाःपाः जूगु दु । घाःपाः जूपिंलय् स्वम्हेसिया अवस्था तच्वः दुगु धाःगु दु ।
घटनाय् लानाः सीम्हेसित म्हसीके मफुनिगु ख्वप प्रहरीं न्ह्यथंगु दु । प्रहरीया कथं घटनाय् घाःपाः जूपिन्त ख्वपया थीथी अस्पतालय् वासः यानाच्वंगु दु ।
घाःपाः जूपिंलय् सुर्यविनायकयाम्ह २२दँया सुमन तज, लिवालियाम्ह ५०दँया रामकृष्ण दुवाल, ख्वप–११याम्ह ४८दँया बालकृष्ण लीला, कमलविनायकयाम्ह ५३दँयाम्ह कृष्णभक्त दुवाल, नासमनायाम्ह २८दँयाम्ह सुरेन्द्र खाति लाःगु दु ।
घटना बहनीसिया ७ः१५ताः ईपाखे जूगु खः ।
थौं हे न्हूगु यःसिं थन
यःसिं त्वधूसां मेगु न्हूगु यःसिं नं थौं हे थनेमाःगु परम्परा कथं मेगु यःसिं नं थनेधुंकूगु दु ।
नागया प्रतीक नालीगु निकू हलिंपताःलिसेंया यःसिंयात अष्टमातृकाया प्रतीक नालीगु च्यापु खिपतं सालाः थंगु खः । थुगु यःसिंयाके तइगु विश्वनाथ भैरवया ध्वजाया नामं हे ‘विश्वध्वजा यात्रा’ खँग्वःया अपभ्रम्स जुयाः बिस्काः जात्रा जूवःगु संस्कृतिविदतय् धापू दु ।
बहनीसिया १०ताः ईपाखे यःसिं थनेत ताःलाःगु खः ।
थौं हे सुथय् ख्वपया कुमाः त्वालय् ल्हाः मदुगु यःसिं थनेधुंकाः सनिलय् यःसिंख्यलय् ५५कु हाकःया ल्हाः दुगु यःसिं थनेगु परम्परा दु । दँया लिपांगु दिनय् थनीगु यःसिं कन्हय् कुन्हु दँया न्हापांगु दिनय् क्वःथली ।
