Display Style:
Column Style
यल उद्योग वाणिज्य संघया लुँदँ हन
लहनान्यूज | चिल्लागा पंचमी ११३७ (मार्च १७ २०१७)
यल उद्योग वाणिज्य संघया ५०क्वःगु स्थापना दिवसया लसताय् यलय् स्वर्ण जयन्ती महोत्सवया ग्वसाः ग्वःगु दु ।
संघया नायः सविन श्रेष्ठया सभाध्यक्षताय् जूगु ज्याझ्वःया उलेज्या ज्याझ्वःया मू पाहां उद्योगमन्त्री नवीन्द्रराज जोशीं यानादिल ।
नुगः खँ तयेगु झ्वलय् उद्योगमन्त्री जोशीं वंगु फागुण महिनाय् क्वचाःगु लगानी सम्मेलनं महत्वपूर्ण उपलब्धि ल्हातय् लाःगु धयादिल । लिसें मन्त्री जोशीं उद्योग मन्त्रालय उद्योगी, व्यवसायीपिनिगु दक्वं समस्याया एक द्वारे समाधानया लागिं जानाच्वंगु नं धयादिल ।
नेपाल उद्योग वाणिज्य महासंघया नायः पशुपति मुरारकां लगानी सम्मेलनं व्यवसायीत उत्साहित जूगु धासें नेपालय् लगानीया गाक्कं व्हःताः दुगु प्रमाणित जूगु धयादिल । मुरारकां उगु सम्मेलनं वःगु लिच्वः कार्यान्वयनय् ग्वाहालि यायेत निजी ख्यः तयार दुगु धयादिल ।
ज्याझ्वलय् संघया पुलांपिं नायःपिं महेशलाल प्रधान अले चण्डीराज ढकाल, प्रमुख जिल्ला अधिकारी दिपक काफ्ले, संघया वरिष्ठ न्वकू रविन्द्रराज ताम्रकार लिसें नं थःथःगु नुगः खँ तयादीगु खः । स्वर्ण जयन्ती स्तम्भ दयेकेगु, वहःया पाँयम्वः निष्काशन, लिसें दछियंकं थीथी ज्याझ्वःया ग्वसाः ग्वयाः स्वर्ण जयन्ती हनेगु जानकारी वरिष्ठ न्वकू ताम्रकारं बियादिल ।
ज्याझ्वलय् राष्ट्रिय स्तरय् उत्पादकत्व अभिबृद्धि यायेगु आज्जुं राष्ट्रिय उत्पादकत्व पुरस्कार (नेशनल प्रडक्टीभिटी एवार्ड)या घोषणा नं जूगु खः । अथे हे स्रष्टा सम्मानपाखें वरिष्ठ कलाकार भिमरत्न शााक्य सम्मानित जुल । लिसें संघया ज्याथः दुजःपिं पुलांपिं अले वर्तमान कर्मचारपिं लिसें संघया संस्थापकपिन्त नं हंगु खः ।
व स्वयां न्ह्यः सुथय् यलया उद्योगी, व्यवसायी, स्थानिय बासिन्दा, सुरक्षाकःमिलिसेंया ब्वतिइ नसंचा ऊगु खः । लिसे सनिलय् शास्त्रीय संगीतलिसें दिपावली नं याःगु खः ।
संघया स्वर्ण जयन्तीया लसताय् वृहत साईकल र्याली अले हिदान ज्याझ्वः नं याःगु खः ।
यल उद्योग वाणिज्य संघया लुँदँ
लहनान्यूज | चिल्लाथ्व तृतीया ११३७ (मार्च १५ २०१७)
वि.सं. २०३३ साल चैत्र ४ गते नीस्वंगु यल उद्योग वाणिज्य संघं थःगु लुँ दँ अर्थात स्वर्ण जयन्ती दछियंकं थीथी ज्याझ्वः यासें हनीगु जूगु दु ।
संघं प्रेस विज्ञप्ति जारी यासें लुँदँ समारोहयात झःझः धायेक हनेगु नितिं संघया नायः सविन श्रेष्ठया कजिसुइ मू ग्वसाः खलः नीस्वनागु न्ह्यथंगु दु । लिसें ग्वसाः खलकय् संघया कार्यसमिति अले वस्तुगत संघया नायःपिं नं दुथ्याःगु न्ह्यथंगु दु ।
संघया लुँदँया ईयात स्मरणीय दयेकेत स्वर्णजयन्ती स्मारक स्तम्भ दयेकेगु नं संघं न्ह्यथंगु दु । लिसें लुँदँया हे लसताय् वहःया पायम्वः तकं पिथनेगु संघं जानकारी ब्यूगु दु ।
चैत्र ४ गते संघया स्थापना दिं कुन्हु धाःसा सुथय् हे संघया दुजःपिं, स्थानिय प्रशासन, प्रहरी प्रशासन, लिसें स्थानिय वासिन्दापिनिगु ब्वतिइ मंगलबजारं नसंचा उलेत्यंगु दु । व हे दिंकुन्हु न्हिनय् स्थापना दिवसया मू ज्याझ्वः नं याइगु जूगु दु ।
स्थापना दिवसया मू ज्याझ्वलय् लोगो उलेज्या, स्मारिका विमोचन, छात्रवृत्ति वितरण, ज्याथः दुजः लिसें कर्मचारी सम्मान, श्रष्टा सम्मान लिसेंया ज्याझ्वः नं जुइगु संघं न्ह्यथंगु दु । बहनी मंगलबजारय् दिपावली, शास्त्रीय संगीत ज्याझ्वः, संघया गतिविधीया किपा ब्वज्या नं यायेत्यंगु दु ।
दछियंकं जुइगु लुँदँया ज्याझ्वःया प्रचार यायेकथं चैत्र ५ गते सुथय् साइकल ~यालीया ज्याझ्वः तयातःगु दु । लिसें मंगलबजारय् हिदान नं जुइ ।
संघं थःगु लुँदँया लसताय् नेपालय् स्थापित अले कार्यरत औद्योगिक प्रतिष्ठान वा व्यक्ति मध्ये उत्पादन प्रक्रिया, व्यवस्थापन, उत्पादकत्व, गुणस्तर व वजार, जनशक्ति विकास, रोजगारी आदी ख्यःया मूल्याङकन यानाः राष्ट्रियस्तरया “राष्ट्रिय उत्पादकत्व पुरस्कार (नेशनल प्रडक्टीभिटी अवार्ड)” नं बीत्यंगु दु । थुगु सिरपाःया नितिं उद्योग मन्त्रालय, नेपाल उद्योग वाणिव्य महासंघ, आर्थिक पत्रकार संघ लिसेंया प्रतिनिधी दुथ्याःगु निर्णायक मण्डल तकं संघं गठन यायेधुंकूगु दु ।
देय् दबूया अधिवेशनयात कयाः भेला
लहनान्यूज | चिल्लागा द्वितीया ११३७ (मार्च १४ २०१७)
देय् दबूया खुक्वःगु अधिवेशनयात कयाः थौं देय् दबू खुक्वःगु अधिवेशन ग्वसा खलकं येँय् सहलह मुनाया ग्वसाः ग्वःगु दु ।
ज्याझ्वलय् थःगु बिचाः तःपिन्सं देय् दबूया अधिवेशन जुइ मफयाच्वंगुलिइ कमजोरी गनथाय् जुयाच्वन धइगु नि लुइकेमाःगु बिचाः तःगु खः । छु गुगु कमजोरीं यानाः अधिवेशन जुइ मफयाच्वंगु धइगु लुइके मफयकं अधिवेशन सुथां लाके थाकूगु वक्तापिन्सं धाःगु खः ।
केन्द्रिय समिति अनुपस्थित जूगु मुनाय् आपाःसिनं अधिवेशनयात कयाः केन्द्रिय समिति गम्भीर मजूगु बिचाः तःगु खः । अधिवेशनयात कयाः सहलह जुइगु मुनाय् केन्द्रिय समितिया पदाधिकारी, दुजःलिसें संरक्षक, सल्लाकारपिनिगु अनुपस्थितीं अधिवेशन यायेगु बिचाः हे मदुगु खःला धइगु न्ह्यसः वक्तापिन्सं तःगु खः ।
खुक्वःगु अधिवेशन ग्वसाः खलःया कजि विजय तण्डुकारं अधिवेशनयात कयाः निगू धार खने दयाच्वंगुलिं उकियात छगू हे धारय् हयेमाःगु धयादीगु खः ।
नुगःखँ तयेगु झ्वलय् नेवाः देय् दबूया पुलांम्ह छ्यान्जे पवित्र बज्राचार्यं व्यक्तिगत स्वार्थयात छखे तयाः देय् दबूयात गुकथं बल्लाकेगु धइगु बिचाः यायेमाःगु धयादिल । अथे हे देय् दबूया पुलांम्ह छ्यान्जे नरेशबीर शाक्यं विवादयात चीकाः अधिवेशन सुथां लाकेगु नितिं सकलें जायेमाःगु धयादिल ।
सहलह मुँज्याय् ग्वसाः खलःया दुजः विष्णु चित्रकार, देय् दबूया सल्लाहकार डा.सुमित्रा मानन्धर, सल्लाहकार प्रकाश पालिखेलिसें नं विवादयात छखे तयाः देय् दबूया अधिवेशनयात हे प्राथमिकताय् तयेमाःगु धयादीगु खः ।
थँबहिलिइ चकंद्यःया जात्रा क्वचाल
लहनान्यूज | चिल्लागा पारु ११३७ (मार्च १३ २०१७)
थँबहिया चकंद्यः अर्थात सिंहसार्थबाहुया जात्रा थौं झःझः धायक क्वचाःगु दु ।
होलीपुन्हिया कन्हयकुन्हु न्यायेकीगु थुगु जात्राय् थँबहीया चकंद्यःया जात्रा यायेगु याइ । जात्राया झ्वलय् चकंद्यःया मूर्तियात येँया थीथी लागाय् चाःहिकेगु लिसें द्यःयात अबीर ईकेगु याइ ।
ह्याउँगु ख्वाःपाःया चकंद्यःयात दच्छिइ छक थ्व हे जात्राया इलय् जक पितहयेगु याइ । थँबहिया पमाय् अर्थात प्रधानतय् थः आजु कथं काइम्ह चकंद्यःयात इमिसं गरुड जुजु वा गरुड आजु नं धायेगु याः ।
जात्राया झ्वलय् चकंद्यःयात थँबहि, ज्याथा, कुसुबियालाछि, असं, वंघः, हनुमानध्वाखा, मरुइ चाःहिकाः प्याफः, न्यत, थायमरु, थँहिटी क्वाःबहा जुया थँहिटिइ हे थ्यंकाः क्वचायेकेगु याइ । थँहितिइ थ्यंकाः द्यःयात लसकुस यानाः दुने बिज्याकेगु धुंकाः जात्रा क्वचाइ ।
चकंद्यः अर्थात सिंहसार्थबाहु बनेज्याया झ्वलय् ल्हासा वंबलय् यक्षणीपिनिगु जालय् लाःगु व अनं यक्षणीतयगु पन्जां बिस्युं वयेत तालायेधुंकाः नं यक्षणीत येँय् हे थ्यंकःवःगु व थन करुणामयया कृपां सकल यक्षणीतयगु संहार यानाः सकसिगु उद्धार याःगु किम्वदन्ति चकंद्यःलिसे स्वानाच्वंगु दु ।
यक्षणीतयगु ल्हातं बचे जुयाः वयेत ताःलाःगु व सकल यक्षणीतयगु संहार याःगु लसताय् सिंहसार्थबाहुयात अबीरं इलाः जात्रा यानाः लसकुस याःगु जनविश्वास दु । व हे कथं आःतक नं चकंद्यःयात अबीरं इलाः जात्रा यायेगु याना वयाच्वंगु दु ।
हरिसिद्धिइ नेपाःया दक्कले पुलांगु प्याखं क्यन
लहनान्यूज | चिल्लाथ्व पुन्हि ११३७ (मार्च १२ २०१७)
देयन्यंक फागु पुन्हि हनाच्वंगु इलय् थौं जलय् धाःसा नेपाःया दक्कले पुलांगु द्यःप्याखं धयातःगु जलप्याखं अर्थात हरिसिद्धि प्याखं क्यंगु दु ।
विक्रम सम्वत न्ह्याये स्वयां न्ह्यः हे न्ह्याःगु धयातःगु थुगु प्याखं दथुइ दिना वनेधुंकाः अमर मल्लं हाकनं न्ह्याके ब्यूगु इतिहासय् उल्लेख दु । न्हापा सम्वाद सहितया नाटकया रुपय् न्ह्यब्वया वयाच्वंगु थुगु प्याखं लिपा वयाः भावनृत्यया रुपय् ह्यूगु विज्ञतय् धापू दु ।
हरिसिद्ध नाच, जँलू द्यःया प्याखं धकाः नं म्हस्यूगु थुगु प्याखं यल स्वनिम्ह त्वाःया राजोपाध्याय कुलया नांजाःम्ह तान्त्रिक गुरु गयो जुजुं फूच्वं हरिसिद्धि द्यःयात स्थापित याकाः प्रचलनय् हःगु प्याखं कथं कयातःगु दु ।
रामायणया आरण्य काण्ड व किस्किन्धा काण्डय् आधारित प्याखं १८ब्वय् ब्वथलाः न्ह्यब्वयेगु याइ ।
सुग्रीवपाखें बालीया वध, नारदं सुग्रीव व ताराया हाकनं इहिपाः याकाब्यूगु, मालीं स्वांमाः हयाः हनुमानयात ब्यूगु लूलिसें क्वचाइगु प्याखनय् वाद्यवादनपाखे दमोखिं, प्वांगा, भुस्याहा, छुस्याहा व ताः थायेगु याइ ।
थुगु प्याखं सन्तान मदुपिनिगु नितिं नं विशेष महत्व दुगु प्याखं खः । प्याखंया न्हापांगु चरणया स्वक्वःगु खुसीया दिपाःया इलय् सुनां न्हापांगु खुसी द्यःयात भागियायेत ताःलाइ वया सन्तान दइ धइगु जनविश्वास दया वयाच्वंगु दु ।
