Display Style:
Column Style
बिस्काः जात्रा सम्बन्धि अन्तरक्रिया क्वचाल
लहनान्यूज | चिल्लागा षष्ठी ११३७ (मार्च १८ २०१७)
नेवाः पत्रकार राष्टिय दबू ख्वपया कचाया ग्वसालय् थौं ख्वपय् ‘बिस्काः जात्रा, भ्रम व यथार्थ’ विषयक अन्तरक्रिया ज्याझ्वः क्वचाःगु दु ।
ज्याझ्वलय् प्रा.डा. पुरुषोत्तम लोचन श्रेष्ठ, संस्कृतिविद् ओम धौभडेल, संस्कृतिविद् विनोदराज शर्मा, बिस्काः जात्रा सम्बन्धि अध्येता गोपाल धौबन्जारं बिस्काः जात्रा सम्बन्धि ऐतिहासिक दसित न्ह्यब्वयेगु लिसें सामाजिक मान्यताय् आधारीत किम्बदन्तिया विश्लेषण यानादीगु खः ।
ज्याझ्वलय् नवासें प्रा.डा. पुरुषोत्तम लोचन श्रेष्ठं बिस्काः जात्रा धयागु बि अथवा सर्प सिनाः न्यायेकूगु जात्रा ख हे मखूगु दावी यानादिल । थ्व विश्वनाथ भैरवया जात्रा जूगुलिं विश्व जात्रा धाःगु व उकिं हे लिपा वनाः बिस्काः जात्रा जूवंगु वयकःया धापू खः ।
नवदुर्गा द्यः प्याखनय् च्यान्हु पुलांगु हि द्यःयात त्वंकीगु परम्परा ‘बिहि त्वनेगु’या दसु न्ह्यब्वसें डा. श्रेष्ठं ‘बि’या अर्थ पुलांगु अथवा बासि धयागु अर्थय् नं कायेज्यूगु धयादिल । व अर्थय् बिस्काः जात्रा धयागु प्राचीन जात्रा नं खःगु डा. श्रेष्ठं धयादिल ।
अथे हे संस्कृतिविद् विनोदराज शर्मां बिस्काः जात्राया पूजा न्ह्याकेबलय् ‘विश्वजात्रा महापर्वणी’ धकाः संकल्प वाक्य कायेमाःगु जूगुलिं नं थ्व विश्व जात्रा हे खःगु धयादिल । गोपाल धौबन्जारं किम्वदन्तियात पूवंक विश्वास यायेफइगु अवस्था मदुसां सर्प स्याःगुया अर्थ शत्रु नास याःगु अर्थय् कायेफइगु वा उगु इलय् शत्रुयात स्यानाः राज्यया रक्षा याःगु जुइफुगु धयादिल ।
संस्कृतिविद् ओम धौभडेलं बिस्काः जात्रा सम्बन्धि समाजय् प्रचलित थीथी किम्वदन्तिया जानकारी ब्युसें उकिया विश्लेषण नं यानादिल । लिसें धौभडेलं नेपालय् थीथी थासय् न्यायेकीगु बिस्काः जात्राया बारे नं जानकारी बियादिल ।
उकिया लिसें संस्कृतिविद् धौभडेलं बिस्काः जात्राया यःसिँलय् च्वनीगु ध्वजा विश्वया दक्कले ताःहाकःगु ध्वजा व नेपाःया झण्डायात हलिंया दक्कले पुलांगु राष्ट्रिय ध्वाँय् कथं गिनिज रेकर्डया नितिं दाबी यायेमाःगु धयादिल ।
ज्याझ्वलय् दबू ख्वप कचाया छ्यान्जे सिमान्त शिल्पकारं लसकुस न्वचु ब्युसें ज्याझ्वःया उद्देश्यबारे नं कनादीगु खः ।
पत्रकार दबूया न्याक्वःगु बुसादँ हन
लहनान्यूज | चिल्लागा षष्ठी ११३७ (मार्च १८ २०१७)
नेवाः पत्रकारतयगु राष्ट्रिय संगठन नेवाः पत्रकार राष्ट्रिय दबूया न्याक्वःगु स्थापना दिवस हंगु दु ।
दबू केन्द्रीय समितिया ग्वसालय् येँय् छगू ज्याझ्वः यासें स्थापना दिवस हंगु खः । दबूया केन्द्रीय नायः श्रीकृष्ण महर्जनया सभाध्यक्षताय् जूगु ज्याझ्वलय् दबूया केन्द्रीय दुजः सुरजवीर बज्राचार्यं लसकुस न्वचू बियादीगु खः ।
ज्याझ्वलय् दबुलिं याना वयाच्वंगु ज्याखँ व थीथी ज्याझ्वःया बारे मूछ्याञ्जे सुनिल महर्जनं जानकारी बियादिल ।
ज्याझ्वलय् दबूया सल्लाहकारपिं बरिष्ठ सिने पत्रकार विजयरत्न असंबरे, राष्ट्रिय समाचार समितिया प्रधान सम्पादक राजु शाक्य, वरिष्ठ पत्रकार पुष्करभक्त माथेमा व बरिष्ठ पत्रकार रमेशकाजि स्थापितं नेवाः पत्रकार राष्ट्रिय दबू दयेके धुंकाः नेवाः पत्रकारत संगठित जुया वनाच्वंगु खँय् च्वछायादीगु खः ।
दबूया केन्द्रीय नायः श्रीकृष्ण महर्जनं निगू दर्जन स्वयां आपाः जिल्लाय् दबूया कचा विस्तार जुइधुंकूगु जानकारी बियादिल ।
यल उद्योग वाणिज्य संघया लुँदँ हन
लहनान्यूज | चिल्लागा पंचमी ११३७ (मार्च १७ २०१७)
यल उद्योग वाणिज्य संघया ५०क्वःगु स्थापना दिवसया लसताय् यलय् स्वर्ण जयन्ती महोत्सवया ग्वसाः ग्वःगु दु ।
संघया नायः सविन श्रेष्ठया सभाध्यक्षताय् जूगु ज्याझ्वःया उलेज्या ज्याझ्वःया मू पाहां उद्योगमन्त्री नवीन्द्रराज जोशीं यानादिल ।
नुगः खँ तयेगु झ्वलय् उद्योगमन्त्री जोशीं वंगु फागुण महिनाय् क्वचाःगु लगानी सम्मेलनं महत्वपूर्ण उपलब्धि ल्हातय् लाःगु धयादिल । लिसें मन्त्री जोशीं उद्योग मन्त्रालय उद्योगी, व्यवसायीपिनिगु दक्वं समस्याया एक द्वारे समाधानया लागिं जानाच्वंगु नं धयादिल ।
नेपाल उद्योग वाणिज्य महासंघया नायः पशुपति मुरारकां लगानी सम्मेलनं व्यवसायीत उत्साहित जूगु धासें नेपालय् लगानीया गाक्कं व्हःताः दुगु प्रमाणित जूगु धयादिल । मुरारकां उगु सम्मेलनं वःगु लिच्वः कार्यान्वयनय् ग्वाहालि यायेत निजी ख्यः तयार दुगु धयादिल ।
ज्याझ्वलय् संघया पुलांपिं नायःपिं महेशलाल प्रधान अले चण्डीराज ढकाल, प्रमुख जिल्ला अधिकारी दिपक काफ्ले, संघया वरिष्ठ न्वकू रविन्द्रराज ताम्रकार लिसें नं थःथःगु नुगः खँ तयादीगु खः । स्वर्ण जयन्ती स्तम्भ दयेकेगु, वहःया पाँयम्वः निष्काशन, लिसें दछियंकं थीथी ज्याझ्वःया ग्वसाः ग्वयाः स्वर्ण जयन्ती हनेगु जानकारी वरिष्ठ न्वकू ताम्रकारं बियादिल ।
ज्याझ्वलय् राष्ट्रिय स्तरय् उत्पादकत्व अभिबृद्धि यायेगु आज्जुं राष्ट्रिय उत्पादकत्व पुरस्कार (नेशनल प्रडक्टीभिटी एवार्ड)या घोषणा नं जूगु खः । अथे हे स्रष्टा सम्मानपाखें वरिष्ठ कलाकार भिमरत्न शााक्य सम्मानित जुल । लिसें संघया ज्याथः दुजःपिं पुलांपिं अले वर्तमान कर्मचारपिं लिसें संघया संस्थापकपिन्त नं हंगु खः ।
व स्वयां न्ह्यः सुथय् यलया उद्योगी, व्यवसायी, स्थानिय बासिन्दा, सुरक्षाकःमिलिसेंया ब्वतिइ नसंचा ऊगु खः । लिसे सनिलय् शास्त्रीय संगीतलिसें दिपावली नं याःगु खः ।
संघया स्वर्ण जयन्तीया लसताय् वृहत साईकल र्याली अले हिदान ज्याझ्वः नं याःगु खः ।
यल उद्योग वाणिज्य संघया लुँदँ
लहनान्यूज | चिल्लाथ्व तृतीया ११३७ (मार्च १५ २०१७)
वि.सं. २०३३ साल चैत्र ४ गते नीस्वंगु यल उद्योग वाणिज्य संघं थःगु लुँ दँ अर्थात स्वर्ण जयन्ती दछियंकं थीथी ज्याझ्वः यासें हनीगु जूगु दु ।
संघं प्रेस विज्ञप्ति जारी यासें लुँदँ समारोहयात झःझः धायेक हनेगु नितिं संघया नायः सविन श्रेष्ठया कजिसुइ मू ग्वसाः खलः नीस्वनागु न्ह्यथंगु दु । लिसें ग्वसाः खलकय् संघया कार्यसमिति अले वस्तुगत संघया नायःपिं नं दुथ्याःगु न्ह्यथंगु दु ।
संघया लुँदँया ईयात स्मरणीय दयेकेत स्वर्णजयन्ती स्मारक स्तम्भ दयेकेगु नं संघं न्ह्यथंगु दु । लिसें लुँदँया हे लसताय् वहःया पायम्वः तकं पिथनेगु संघं जानकारी ब्यूगु दु ।
चैत्र ४ गते संघया स्थापना दिं कुन्हु धाःसा सुथय् हे संघया दुजःपिं, स्थानिय प्रशासन, प्रहरी प्रशासन, लिसें स्थानिय वासिन्दापिनिगु ब्वतिइ मंगलबजारं नसंचा उलेत्यंगु दु । व हे दिंकुन्हु न्हिनय् स्थापना दिवसया मू ज्याझ्वः नं याइगु जूगु दु ।
स्थापना दिवसया मू ज्याझ्वलय् लोगो उलेज्या, स्मारिका विमोचन, छात्रवृत्ति वितरण, ज्याथः दुजः लिसें कर्मचारी सम्मान, श्रष्टा सम्मान लिसेंया ज्याझ्वः नं जुइगु संघं न्ह्यथंगु दु । बहनी मंगलबजारय् दिपावली, शास्त्रीय संगीत ज्याझ्वः, संघया गतिविधीया किपा ब्वज्या नं यायेत्यंगु दु ।
दछियंकं जुइगु लुँदँया ज्याझ्वःया प्रचार यायेकथं चैत्र ५ गते सुथय् साइकल ~यालीया ज्याझ्वः तयातःगु दु । लिसें मंगलबजारय् हिदान नं जुइ ।
संघं थःगु लुँदँया लसताय् नेपालय् स्थापित अले कार्यरत औद्योगिक प्रतिष्ठान वा व्यक्ति मध्ये उत्पादन प्रक्रिया, व्यवस्थापन, उत्पादकत्व, गुणस्तर व वजार, जनशक्ति विकास, रोजगारी आदी ख्यःया मूल्याङकन यानाः राष्ट्रियस्तरया “राष्ट्रिय उत्पादकत्व पुरस्कार (नेशनल प्रडक्टीभिटी अवार्ड)” नं बीत्यंगु दु । थुगु सिरपाःया नितिं उद्योग मन्त्रालय, नेपाल उद्योग वाणिव्य महासंघ, आर्थिक पत्रकार संघ लिसेंया प्रतिनिधी दुथ्याःगु निर्णायक मण्डल तकं संघं गठन यायेधुंकूगु दु ।
देय् दबूया अधिवेशनयात कयाः भेला
लहनान्यूज | चिल्लागा द्वितीया ११३७ (मार्च १४ २०१७)
देय् दबूया खुक्वःगु अधिवेशनयात कयाः थौं देय् दबू खुक्वःगु अधिवेशन ग्वसा खलकं येँय् सहलह मुनाया ग्वसाः ग्वःगु दु ।
ज्याझ्वलय् थःगु बिचाः तःपिन्सं देय् दबूया अधिवेशन जुइ मफयाच्वंगुलिइ कमजोरी गनथाय् जुयाच्वन धइगु नि लुइकेमाःगु बिचाः तःगु खः । छु गुगु कमजोरीं यानाः अधिवेशन जुइ मफयाच्वंगु धइगु लुइके मफयकं अधिवेशन सुथां लाके थाकूगु वक्तापिन्सं धाःगु खः ।
केन्द्रिय समिति अनुपस्थित जूगु मुनाय् आपाःसिनं अधिवेशनयात कयाः केन्द्रिय समिति गम्भीर मजूगु बिचाः तःगु खः । अधिवेशनयात कयाः सहलह जुइगु मुनाय् केन्द्रिय समितिया पदाधिकारी, दुजःलिसें संरक्षक, सल्लाकारपिनिगु अनुपस्थितीं अधिवेशन यायेगु बिचाः हे मदुगु खःला धइगु न्ह्यसः वक्तापिन्सं तःगु खः ।
खुक्वःगु अधिवेशन ग्वसाः खलःया कजि विजय तण्डुकारं अधिवेशनयात कयाः निगू धार खने दयाच्वंगुलिं उकियात छगू हे धारय् हयेमाःगु धयादीगु खः ।
नुगःखँ तयेगु झ्वलय् नेवाः देय् दबूया पुलांम्ह छ्यान्जे पवित्र बज्राचार्यं व्यक्तिगत स्वार्थयात छखे तयाः देय् दबूयात गुकथं बल्लाकेगु धइगु बिचाः यायेमाःगु धयादिल । अथे हे देय् दबूया पुलांम्ह छ्यान्जे नरेशबीर शाक्यं विवादयात चीकाः अधिवेशन सुथां लाकेगु नितिं सकलें जायेमाःगु धयादिल ।
सहलह मुँज्याय् ग्वसाः खलःया दुजः विष्णु चित्रकार, देय् दबूया सल्लाहकार डा.सुमित्रा मानन्धर, सल्लाहकार प्रकाश पालिखेलिसें नं विवादयात छखे तयाः देय् दबूया अधिवेशनयात हे प्राथमिकताय् तयेमाःगु धयादीगु खः ।
