Display Style:
Column Style
एन प्याब्सन यलया स्वक्वःगु अधिवेसन क्वचाल
लहनान्यूज | चिल्लाथ्व चतुर्दशि ११३७ (मार्च ११ २०१७)
निजी बिद्यालयं गुणस्तरीय शिक्षा सर्वसुलभ यानाच्वंगु ज्याया कदर राज्यं यायेमागु खँय् बः ब्युसें एन प्याब्सन यल जिल्लाया स्वक्वःगु जिल्ला अबिधेसन यलय् क्वचाःगु दु ।
ज्याझ्वःया मूपाहां लिसें नेशनल प्याब्सनया केन्द्रीय नायः कर्णबहादुर शाहीं निजी बिद्यालयं शिक्षा ख्यलय ब्यूगु योगदानयात राज्यं नकारात्मक कथं कायेमज्यूगु धयादिल । अथेहे यल जिल्लाया प्रमुख जिल्ला अधिकारी दिलनाथ पुरीं ऐन, नियम दुने च्वनाः निजी बिद्यालयं बिद्यार्थीतयत शुल्क कायेमाःगु बिचाः तयादिल ।
ज्याझ्वलय् नेशनल प्याब्सनया यल जिल्ला नायः राजेश महर्जनं देशया शिक्षाया बिस्तार व सर्वसुलभ यायेत सरकारं निजी बिद्यालयया संगठनया बिश्वास नं कायेमाःगु खँय् बः बियादिल ।
न्हूगु नेतृत्वय राजेश महर्जन
एन प्याब्सन यलया थौं क्वचाःगु अधिवेशनं राजेश महर्जनया हे नेतृत्वय् न्हगु ज्यासना ल्यःगु दु ।
निदँया लागिं ल्यःगु न्हूगु कार्यसमितिइ बरिष्ठ न्वकू हरि सैढाई, मेपिं न्वकुलिइ गोबिन्द पोखरेल, बिकेश महर्जनयात ल्यःगु दु । अथे हे छ्यान्जेय् तारा सापकोटा, दांभरिं संगम महर्जन, ल्यू छ्यान्जे जितबहादुर क्षेत्री, ल्यू दांभरिं पदय् रमेश कोइराला चयन जूगु दु ।
दुजलय उमिता बज्राचार्य, रेणुका बज्राचार्य, गोपाल अधिकारी, बिकास महर्जन, सीपी पराजुली व सिंहराज थापायात ल्यःगु दु ।
पत्रकार दबू ख्वपया साधारण सभा क्वचाल
लहनान्यूज | चिल्लाथ्व चतुर्दशी ११३७ (मार्च ११ २०१७)
नेवाः पत्रकार राष्ट्रिय दबू ख्वप जिल्लाया न्याक्वःगु साधारण सभा थौं ख्वपय् क्वचाःगु दु ।
ज्याझ्वलय् ख्वप जिल्लाया प्रमूख जिल्ला अधिकारी द्रोण पोखरेलं ख्वप जिल्लाय् संचारकःमितयगु हे कारणं न्हापाया तुलनाय् यक्व हे ह्यूपाः वगु धयादिल । बिस्काः जात्राय् दुगु बिकृति चीकेत नं स्थानीय पत्रकारं योगदान बीगु आशा प्रजिअ पोखरेलं प्वंकादिल ।
दबूया केद्रीय नायः श्रीकृष्ण महर्जनं पत्रकारतयसं राज्य व जनता दथुइ ताँ जुयाः ज्या यायेमाःगु धयादिल ।
ज्याझ्वलय् शिल्पकार समाज नेपालया नायः पुरुषोत्तम शिल्पकारं समाजया उत्थानय् पत्रकारपिनिगु महत्वपूर्ण भूमिका दइगु खँय् बः बियादीगु खः । लिसें भक्तपुर पर्यटन विकास समितिया न्वकू रामसुन्दर भेलें ख्वपया पर्यटन, सांस्कृतिक व ऐतिहासिक महत्वया बारे जः व्हलेत पत्रकारतयत इनाप यानादिल ।
ख्वप जिल्लाया नायः ईश्वर खाइजुया सभाध्यक्षताय् जूगु ज्याझ्वःया उलेज्या प्रजिअ पोखरेलं यानादीगु खः ।
रामशेखरया लुमन्तिइ बिचाः मुँज्या जुल
लहनान्यूज | चिल्लाथ्व चतुर्दशि ११३७ (मार्च ११ २०१७)
नांजाःम्ह साहित्यकार, कलाकार व निर्देशक रामशेखर नकःमि मदुगु झिंस्वन्हुया पुण्य तिथिस नेवाः जागरण रामशेखर ग्वाहलि पुचःया ग्वसालय् बिचाः मुँज्या जूगु दु ।
मदुम्ह रामशेखरयात लुमंकाः छगू मिनेट मौन धारण यानाः न्ह्याकूगु ज्याझ्वलय् नीलकाजि शाक्यं धारणी पाठ नं यानादीगु खः । ज्याझ्वलय् ग्वाहालि पुचःया नायः निरञ्जनरत्न शाक्यं शोक प्रस्ताव ब्बनादीगु खः ।
बरिष्ठ सिनेपत्रकार बिजयरत्न असंबरें मदुम्ह रामशेखर कला ख्यःया ज्वः मदुगु थां खः धकाः धयादिल । नेवाः न्ह्यलुवा मल्ल के सुन्दरं मदुम्ह छम्ह साहित्यकार जक मखसें क्रान्तिकारि तकं खःगु धयादिल ।
ज्याझ्वलय् जनगायक भुगृराम श्रेष्ठ, कलाकार गणेश सायमि, नकःमि समाजया नायः जितेन्द्र नकःमि, नेवाः जागरण मंचया नायः सुजिव बज्राचार्यं मदुम्ह रामशेखरया कला व भाषा ख्यलय् योगदानया बारे न्वःवानादीगु खः ।
ग्याँसया भाः २५तका थहांवन
लहनान्यूज | चिल्लाथ्व त्रयोदशि ११३७ (मार्च १० २०१७)
जा थुइगु ग्याँसया भाः थौं शुक्रबाः बाचानिसें थहांवनीगु जूगु दु ।
नेपाल आयल निगमं शुक्रबाः चान्हसिया १२ताः इलंनिसें लागू जुइगु यानाः ग्याँसया भाः १३सः व ७५ तका थ्यंकूगु दु । थ्वयां न्ह्यः ग्याँसया भाः १३सः व ५० तका जुयाच्वंगु खः ।
ग्याँसय् आयल निगमया घाटा लगातार अप्वयाच्वंगुलिं २५तका भाः थकयागु निगमं न्ह्यथंगु दु । पेट्रोल व डिजेलया धाःसा यथावत हे तःगु दु ।
थौंकन्हय् निगमयात ग्यासय् प्रतिसिलिन्डर ३स व १३ तका अले ५१ पैसा घाटा दु । भाः थहांवने धुंकाः २सः व ८८ तका अले ५१ पैसा घाटा जुइ ।
निगमं थौंकन्हय् चिकनय् लय् झण्डै ४० करोड घाटा फयेमाला च्वंगु दु । डिजेलय् प्रतिलिटर ४ तका व ७ पैसा घाटा फयाच्वंगु निगमयात पट्रोलय् धाःसा १ तका व २३ पैसा लवः दु ।
भारतीय प्रहरीं कयेकूगु गोलिं नेपाःमि सित
लहनान्यूज | चिल्लाथ्व द्वादशी ११३७ (मार्च ९ २०१७)
कञ्चनपुरया नेपाल भारत सीमावर्ति क्षेत्र पुनर्वासय् भारतीय प्रहरीं कयेकूगु गोलिं लानाः छम्ह नेपाःमि सीगु दुसा प्यम्ह घाःपाः जूगु दु ।
भारतीय प्रहरीया गोलिं लानाः पुनर्वास नगरपालिका ८ याम्ह २५दँयाम्ह गोबिन्द गौतम सीगु खः । गोलिं लाःम्ह गौतमयात धनगढीस्थित अस्पताल यंकूबलय् चिकित्सकं मृत घोषणा याःगु खः ।
पुनर्वासया दशगजा क्षेत्रय् कलभर्ट दयेकेगु झ्वलय् विवाद जूबलय् भारतीय प्रहरीं नेपाःमिपिन्त गोलिं कयेकूगु स्थानीयं धाःगु दु । भारतीय सुरक्षाकःमिलिसें वःपिं भारतया सीमावर्तिया स्थानीयं नेपाःमिपिन्त अप्पां कयेकूगु स्थानीयया धापू दु ।
छुं ई न्ह्यः उगु क्षेत्रय् आःयात खुसि च्वय् कच्ची कलभर्ट दयेकेत भारतीय व नेपाली अधिकारीतय् दथुइ सहमति जूगु खः । व हे कथं म्हिगःनिसें पुनर्वास नगरपालिकां कलभर्ट दयेकेगु ज्या न्ह्याकूगुलिइ भारतीय सीमा सुरक्षा बलं थुनाब्यूगु खः ।
कलभर्ट थुनाब्यूगु विरोधय् ब्वज्या यानावंगु नेपाःमितय्त भारतीय प्रहरीं गोलिं कयेकूगु धाःगु दु । वंगु चान्हय् ल्वाभःलिसें वःपिं भारतीय एसएसबीया जवानतयसं नेपाःमिपिन्त छेँ त्वःताः वनेत ख्याच्वः ब्यूगु नं स्थानीयं धाःगु दु ।
