Display Style:
Column Style
कमल थापा स्थानीय विकास मन्त्री
लहनान्यूज | चिल्लाथ्व द्वादशी ११३७ (मार्च ९ २०१७)
राष्ट्रिय प्रजातन्त्र पार्टिया नायः कमल थापा उपप्रधान लिसें स्थानीय विकास मन्त्री नियुक्त जूगु दु ।
प्रधानमन्त्री पुष्पकमल दाहालं थौं मन्त्रीमण्डल विस्तार यासें थापायात उपप्रधानलिसें स्थानीय विकास मन्त्री नियुक्त यानादीगु खः । माओवादि कोटाया स्थानीय विकास मन्त्री हितराज पाण्डेयात लित सःताः थापायात उगु मन्त्रालय ब्यूगु खः ।
अथे हे राप्रपाया प्रमुख सचेतक दिलनाथ गिरीयात पर्यटनमन्त्री दयेकूगु दु । कांग्रेस कोटाया पर्यटन मन्त्री जीवनबहादुर शाहियात लित सःताः गिरीयात उगु मन्त्रालय ब्यूगु खः ।
उकिया लिसें शाहियात खानेपानी तथा सरसफाइ मन्त्रालयया भाला ब्यूगु दु । न्हापा थुगु मन्त्रालय स्वयावःम्ह प्रेमबहादुर सिंहयात धाःसा विज्ञान तथा प्रविधि मन्त्रालयया भाला ब्यूगु दु ।
न्हूपिं मन्त्रीपिन्त थौं हे शपथ ग्रहण नं याकूगु दु । राप्रपापाखें राज्यमन्त्रीइ सिफारीस जूम्ह परशुराम तामाङं धाःसा कन्हय् शपथ ग्रहण यानादीगु ज्याझ्वः दु ।
थौंया विस्तारलिसें प्रचण्ड नेतृत्वया मन्त्रीमण्डलय् ४४ दुजः थ्यंगु दु । लिसें कमल थापा उप प्रधानमन्त्रीइ नियुक्त जूगुलिसें स्वम्ह उप प्रधानमन्त्री थ्यंगु दु ।
बिज्यासः द्यःयात पताः छात
लहनान्यूज | चिल्लाथ्व द्वादशी ११३७ (मार्च ९ २०१७)
श्री विज्यासः द्यःया झिंनिदँया कलेवर हिलेगु ज्याझ्वः अन्तर्गत द्यःयाथाय् पलिस्था पुजा यानाः पताः छायेगु ज्या क्वचाःगु दु ।
मूल गुरुजु यज्ञमानपति बज्राचार्यया निर्देशनय् मञ्जुश्री बज्राचार्य, दिनेशरत्न बज्राचार्य, नृपरत्न बज्राचार्य, सर्वज्ञरत्न बज्राचार्य, अष्टरत्न बज्राचार्य, मणिरत्न बज्राचार्य, मदनमुनि बज्राचार्य, दिपेन्द्र बज्राचार्य, चुडामणि बज्राचार्य, बाबुरत्न बज्राचार्यं पुजा यानादीगु खः।
उगु हे इलय् झिंनिदँ जात्राय् ग्वाहलि याःपि गुला बाजं खलः, दाफा बाजं खलः लिसें प्रचार प्रसारया ज्याय् ग्वाहालि याःपिं पत्रकारपिन्त नं सुभाय् पौ देछाःगु खः । सकलसित मूल गुरुजु यज्ञमानपति बज्राचार्यं सुभाय् पौ लःल्हानादीगु खः ।
थौं विश्व जँलास्येँ दिवस
लहनान्यूज | चिल्लाथ्व द्वादशी ११३७ (मार्च ९ २०१७)
थौं मार्चया निगूगु बिहिबाः, जँलास्येँ ल्वय् व मोटोपन धइगु नारालिसें हलिंन्यंक विश्व जँलास्येँ दिवस हनाच्वंगु दु ।
जँलास्येँ ल्वय् व थुकिं तापायेगु उपायबारे जानकारी बीगु आज्जुं दँय्दसं मार्चया निगूगु बिहिबाः विश्व जँलास्येँ दिवस हनेगु याइ । थुगुसीया १२क्वःगु विश्व जँलास्ये दिवस नेपालय् नं थीथी ज्याझ्वः यानाः हनाच्वंगु दु ।
नेपालय् छुं न छुं रुपं २५ लखम्ह स्वयां आपाः मनूत जँलास्येँ सम्वन्धी ल्वगि दुगु अनुमान दु । थौंकन्हय् दँय् ३द्वःम्ह मनूतय् जँलास्येँ फेल जुइगु याःगु चिकित्सकतय् धापू दु ।
जँलास्येँ ल्वय्या लक्षण अवस्थाय् जक खनेदइगु जूगुलिं दँय् छक्वः जँलास्येँ परीक्षण यायेमाःगुलिइ चिकित्सकतय्सं बः ब्यूगु दु ।
जँलास्येँ ल्वचं तापायेत गाक्क लः त्वनेगु, धुम्रपान अले मध्यपान मयायेगु लिसें शारीरिक व्यायाम यायेगु लिसें नयेगु त्वनेगुलिइ ध्यान बीत चिकित्सकतय्गु छ्याता दु । ४०दँ पुलेधुंकाः जँलास्येँया शुद्धीकरण यायेगु क्षमता म्ह्वः जुयावनीगुलिं थहांवंगु उमेरलिसें जँलास्येँया नं सुसाःकुसाः यायेमाःगु जँलास्येँ विशेषज्ञतय्गु धापू दु ।
नेपाल सरकारं जँलास्येँ ल्वचं पिडित विरामीया लागिं वालय् स्वकःतक्क डायलासिस सेवा सितिकं बीगु ज्याझ्वः हःगु दु । तर देशय् सकभनं डायलासिस सेवा हे मथ्यंबलय् विरामीतय्त सास्ती जुयाच्वंगु दु ।
नारी दिवसय् मिसा पत्रकारपिं सम्मानित
लहनान्यूज | चिल्लाथ्व एकादशि ११३७ (मार्च ८ २०१७)
अन्तर्राष्ट्रिय मिसा दिवसया झ्वलय् थौं पत्रकारिता ख्यलय् ताः इलंनिसें क्रियाशील न्याम्ह मिसातयत हंगु दु ।
१०७क्वःगु अन्तराष्ट्रिय मिसा दिवसया झ्वलय् नेवाः पत्रकार राष्ट्रिय दबू महिला विभागं यलय् छगू ज्याझ्वः यासें मिसा पत्रकारपिन्त सम्मान याःगु खः । दबूया महिला विभागं रमा कर्णजित, सुचित्रा श्रेष्ठ, शर्मिला गुरुङ्ग, रचना श्रेष्ठ व सरस्वती कर्माचार्ययात हंगु खः ।
वयकःपिन्त नेपाल पत्रकार महासंघया न्वकू अनिता बिन्दुं हनापौ लःल्हानादिल । अथे हे नेवाः पत्रकार राष्ट्रिय दबूया केन्द्रीय नायः श्रीकृष्ण महर्जनं खादां न्ययेकादिल ।
व स्वयां न्ह्यः सम्मानित मिसापिन्त पत्रकार दबूया केन्द्रीय न्वकू लिसें महिला विभागया कजि मिरा राजभण्डारी अमात्यं नेवाः तजिलजि कथं ख्येँय् सगं बियादिल ।
ज्याझ्वलय् वरिष्ठ पत्रकार पुष्कर माथेमा, नेवाः पत्रकार राष्ट्रिय दबू महिला विभागया दुजःपिं रेणुका श्रेष्ठ, मञ्जु बज्राचार्य, पूर्णिमा शाक्य, रमिता त्वायनाबासुं नुगःखँ तयादिल ।
ज्याझ्वःया वक्तापिन्सं सञ्चार ख्यलय् मिसा पत्रकारतयत न्ह्यःने यंकेत पत्रकार महासंघ लिसें सञ्चार सम्बद्ध थीथी संघसस्थां एकिकृत रुपं पलाः न्ह्याकेमाःगुलिइ बः बिल । लिसें मिसा पत्रकारया दक्षता, क्षमता थकायेगुलिसें प्रोत्साहन नीति नालेमाःगु वक्तापिन्सं धाःगु खः ।
थौं अन्तर्राष्ट्रिय नारी दिवस
लहनान्यूज | चिल्लाथ्व एकादशि ११३७ (मार्च ८ २०१७)
थौं मार्च ८, हलिंन्यंक थीथी ज्याझ्वः यानाः अन्तर्राष्ट्रिय नारी दिवस हनाच्वंगु दु ।
१९११स न्हापांगु खुसी अस्ट्रिया, डेनमार्क, जर्मेनी, स्वीट्जरल्यान्ड आदि देशय् महिला दिवस हंगु खः । लिपांगु इलय् वयाः देशय् वःगु ह्यूपाःलिसें नेपालय् नं मिसा सशक्तिकरणया सः थ्वयेकुसें तःजिक नारी दिवस हनेगु चलन न्ह्याःगु दु ।
सन् १९८९स न्हापांगु खुसी अमेरिकाया न्यूयोर्कय् कापः कारखानाय् ज्या याइपिं मिसातयसं थःत जूगु शोषण, असमानता विरुद्ध आन्दोलन याःगु खः । उकिया निदँ लिपा सन् १९११स अन्तर्राष्ट्रिय समाजवादी पुचलं डेनमार्कया कोपनहेगनय् मिसाया अधिकार व इमिगु आन्दोलनया समर्थनय् सम्मेलन याःगु खः ।
थुगु सम्मेलनय् १७ देय्या सच्छिम्ह स्वयां आपाः मिसातयगु ब्वति दुगु खः ।
अन्तर्राष्ट्रिय नारी दिवसया झ्वलय् थौं सरकारं सार्वजनिक विदा नं ब्यूगु दु ।
