Display Style:
Column Style
नेपाः चीन मेला न्ह्यानाच्वन
नृपेन्द्रलाल श्रेष्ठ | ञंलागा चर्तुदशी ११३८ ( अक्टुवर ८ २०१८ )
यलया नांजाःगु पाटन दरबार लागाय् वंगु शुक्रवाःनिसें नेपाः चीन मेला शुरु जूगु दु । अरनिको सांस्कृतिक तथा व्यावसायिक प्रबद्र्धन समाजं नेपाः व चीन दुथइ जनस्तरया स्वापू क्वातुकेगु कथं उगु मेला शुरु जूगु छगू पत्रकार सम्मेलनय् नं जानकारी ब्यूगु खः ।
थुगु मेला ऐतिहासिक ल्वहंहितिया न्ह्यःने व भण्डारखाल बगैंचाय् जुयाच्वंगु दु ।
न्यान्हुयकं न्ह्याइगु थुगु मेलाय् छगु ज्याझ्वः दथुइ पर्यटन मन्त्री प्रदिप ज्ञवाली यानादगिु खः ।
उगु मेलाय् नेपालय् उत्पादन जूगु थीथी हलंज्वलंया प्रबद्र्धनया नापनापं निगू देशया संस्कृति, संगीत, व्यवसायिक ज्ञान व सीपया कालबिल जुइकथंया सच्छिगू स्टल दुगु खःसा उकि मध्ये चीनय् उत्पादन जूगु हलंज्वलंया ख्वीगू स्टल दु ।
अथे हे उगु मेलाय् लाखेप्याखं, चचा प्याखं नं न्ह्यब्वय्गु ज्या जुयाच्वंगु दु । मेलाय् लुभुया टेक्सटायल उद्योगपाखें उत्पादन जुयाच्वंगु ढाका व सुतिपाखें दय्कातःगु यइपुस्सेच्वंगु थीथी डिजाइनया फेशन शोतकं जुयाच्वंगु दु ।
न्यान्हुतक न्ह्याइगु थुगु मेलाय् निगूलख स्वयां अप्वः मनूतसें अवलोकन याइगु समाजया दावी दु ।
रंजना लिपिया कार्यशाला गोष्ठी
लहनान्युज | ञंलागा त्रयोदशी ११३८ ( अक्टुवर ७ २०१८ )
नेपाल लिपि गुथि व येँ महानगरपालिकाया मंकाः ग्वसालय् पाटन क्याम्पसया सभाकक्षय् रंजना लिपि कार्यशाला गोष्ठी जुगु दु । उगु गोष्ठीया प्रदेश नम्बर ३ येँया क्षेत्र न. ८ क या सांसद राजेश शाक्यं उलेज्या यानादिगु खः ।
उगु गोष्ठीइ प्राध्यापक काशीनाथ तमोटं रंजना लिपिया ऐतिहासिक पक्षयात कया कार्यपत्र पेश यानादीगु खःसा उगु कार्यपत्रय् इतिहासकार डा. नयनाथ पौडेलं टिप्पणी यानादीगु खः ।
गुथिया प्राज्ञ शरद कसाः नं रंजना लिपाया आकारया विषयस कार्यपत्र न्ह्यब्वयादीगु खःसा उगु कार्यपत्रयात कया सह–प्राध्यापक डा. मिलनरत्न शाक्यं टिप्पणी यानादीगु खः ।
अथेहे मेगु स्वंगूगु कार्यपत्र रंजना लिपाया म्हसीका नेपालभाषा केन्द्रीय शिक्षण विभागया प्रमुख डा. ओमकारेश्वर श्रेष्ठं न्ह्यब्वयादीगु खःसा प्रा.डा. निर्मलमान तुलाधरं टिप्पणी यानादीगु खः ।
उगु गोष्ठीइ लिपांगु कार्यपत्र केन्द्रीय विभागया उप–प्राध्यापक राजनलाल जोशीं रंजना लिपिया सांस्कृतिक पक्षयात कयाः कार्यपत्र न्ह्यब्वयादीगु खःसा उगु कार्यपत्रय् प्रा.डा. चन्दा बज्राचार्यं टिप्पणी यानादीगु खः ।
ज्याझ्वलय् नेवाः न्ह्यलुवाः मल्ल के. सुन्दरं, गुथिया नायः निरञ्जनरत्न ताम्राकार व न्वकू अनिल स्थापितं थःथःगु तयादीगु खः ।
ज्याझ्वः गुथिया छ्याञ्जे पवित्र कसाः नं न्ह्याकादीगु खःसा दुजः निर्मल बज्राचार्यं संयोजन यानादीगु खः ।
ज्या व पृथुप्याख्यान सफू पितब्वज्या
लहनान्युज | ञंलागा त्रयोदशी ११३८ ( अक्टुवर ७ २०१८ )
न्यःदँ न्ह्यः पन्ना प्रसाद जोशीयागु जीवनीया लिधंसाय् शताब्दी पुरुष सत्यमोहन जोशीं च्वया तःगु ‘बैद्य बाः’ दबू प्याखं क्यनेगु व रंजित मल्लं च्वया तःगु ‘पृथुप्याख्यान’ नांयागु सफू सुनीता राजभण्डारीं अभिलेख सम्पादन यागु शताब्दी पुरुष सत्यमोहन जोशीया छेँय् छगु ज्याझ्वःयासें पितब्वज्या जूगु दु ।
लोक साहित्य परिषदया ग्वसालय् राजित बहादुर श्रेष्ठं व्यवस्थापनया नापनापं न्ह्याकादीगु उगु ज्याझ्वलय् परिषदया नायः प्रा. प्रेम शान्ति तुलाधरं लसकुस न्वचु तयादीगु खःसा डा. ज्योति तुलाधरं सफू पितब्वज्या यानादीगु खः ।
दबू प्याखनय् ब्वतिकयादीपिं प्याखंम्वःत व ग्वाहालि यानादीपिन्त शताब्दी पुरुष जोशीं सुभाय् पौ लःल्हानादीगु खः ।
बुखँ नेवाः सूचना केन्द्र किपाः राजेन्द्र रञ्जित
थेच्वय् ब्रम्हायणी द्यः पुर्णस्थापना
लहनान्युज | ञंलागा त्रयोदशी ११३८ ( अक्टुवर ७ २०१८ )
वंगु दँया माघ १९ गते थेच्वय् खुया यकूम्ह ब्रम्हायणी द्यःयात छगु ज्याभ्वःयासे विधि पुवकः पुजा याना पूर्ण स्थापन यागु दु ।
अथे द्यः खुयायंके धंका मालिमफुगु व मोहनीया नितिं द्यः मागु जुया ब्रम्हायणी द्यःया मूःल सनागुठी, क्वाना गुठी व न्ह्यक्ष गुठीया गुथियार मिलेजुया मंका कथं धेवाःल्हाना द्यः दयकेत ताः लागु खः ।
अथे द्यः दयकेत लुँ सिइत स्थानीय रमेश महर्जनपाखेँ ग्वाहलि यागु खः । स्वँगु गुठीया मूःथकली पिन्स पुजा याना द्यःयात उगु थासं जात्रा याना खतय् तया कुविया क्वःलाच्छि हया विधिवत क्षमा पुजा यागु खः ।
होम याना तान्त्रिक विधि कथं द्यःयात प्राण प्रतिस्थापन याना द्यःया आसनय् बिराज मान यायेगु ज्या जुगु दु ।
फंपिइ तःजिक हरिशंकार जात्रा क्वचाल
लहनान्युज | ञंलागा त्रयोदशी ११३८ ( अक्टुवर ७ २०१८ )
नेवाः वस्ति फपिं हरिशंकर द्यःया जात्रा जुगु दु । ञंला पुन्ही निसें न्ह्याइगु थुगु जात्रा झिंन्याहु तक जुइगु खः ।
ञंला पुन्हीया झिन्हु दयेका छ्वय्ला बू नखः हनीगु खःसा वयां कन्हय् कुन्हु जाभू याइगु परम्परा दु । जाभू कुन्हु हे क्वंद्यः नं जात्रा याना फंपीया मू जात्रा न्ह्याइगु खः ।
जात्रा न्ह्याकेत दकलय् न्हापां पशुपति मृगस्थिलीया कानफता जोगीपाखें तान्त्रीक बिधि पुजा याइ । उगु पुजायायेत छम्ह ग्वंगः व छम्ह मेय् बलि बिइमाःगु चलन दु । थुगु जात्रा
फंपीया न्हय्गु त्वालय् द्यःखःया जात्रा जुइ ।
जात्राय् न्हापांं कुमारीया द्यः, गोपालेश्वर द्यः, महालक्ष्मी द्यः, व शेषनारायण द्यःखः याना प्यगु खःया जात्रा चान्ह्य जुइु खःसा कन्हय् कुन्हु सुथय् सिन्दुर जात्रा जुइ ।
सिन्दुर जात्रा सनिलय् इन्द्रयणी, निलबाराही, दक्षीणकाली, महालक्ष्मी, कुमारी, शेषनारायणया द्यःखः जात्रा जुइगु खः । फंपी न्हय्गू त्वाः त्वालं द्यःखः जात्राया नितिं हइगु जूसां खुगु खः द्यःखःया जात्रा छन्हुं हे जुइ ।
कन्हय् कुन्हु तिनी गोपालेश्वर द्यःखः जात्रा लिपा फंपीया हरिशंकर जात्रा क्वचाइगु खः ।
