Display Style:
Column Style
सिद्धिदास प्रतिष्ठानया साहित्यिक मुँज्या
लहनान्युज | ञंलागा पंचमी ११३८ ( सेप्तेम्वर ३० २०१८ )
सिद्धिदास महाजुया १५१ क्वःगु बुदिंया लसताय् सिद्धिदास प्रतिष्ठानया ग्वसालय् ख्वपय् साहित्यिक मुँज्या जूगु दु । उगु ज्याझ्वलय् मूपाहाँ कथं योगेन्द्र प्रधान झायादीगु खःसा पाहाँ कथं राजा शाक्य, कृष्ण भक्त बोडे, गोविन्द मान श्रेष्ठ, त्रिरत्न शाक्यपिं झायादीगु खः ।
ज्याझ्वलय् श्याम आशा, शम्भु मान श्रेष्ठ, गोविन्द मान श्रेष्ठ, सौरभ शाक्य, धर्म राजकर्णिकार, हरिशरण शर्मा राजोपाध्याय, सुलोचना सैंजु, राजेन मानन्धर, नारद बज्राचार्य, राकेश भाजु, राजभाइ जकःमि, न्हुच्छे भक्त कवांग, पूर्ण बैद्य लगायतपिसं थःथःगु च्वसू ब्वनाःन्यंकादीगु खः ।
सिद्धिदास महाजुया मुल्यांकन वा अध्ययन याये बलय् उगु इलय्या परिस्थितियात बांलाक्क थुइकेमाः । चन्द्र सम्शेरयागु भाषा–साहित्य प्रति चरम दमन जुयाच्वंगु इलय् नेपालभाषा व साहित्यया नां हे कायेमज्यूगु इलय् सिद्धिदासं दकलय् अप्वः साहित्य सृजना यानाथकूगु खँ त्रिरत्न शाक्यं न्ह्यथनादिल ।
अथेहे च्वचूया झ्वलय् मुँज्या नायः हाडां नेवाःत नापनापं सिद्धिदासयात नं म्वाकातयेगु खःसा नेवाः तय्गु मू पहिचान नेवाः भाय् म्वाकातयेमाः, सिद्धिदासयागु भाषा म्वाःसा जाति म्वाइ धैगु भनाइ कथं न्ह्याःवनेगु खःसा प्रत्येक ब्वने कुथिइ मातृभाषा छगू अनिवार्य यायेमाःगु खँय् बः बियादिल । अथेहे प्रध्यानाध्यापक अर्यालं मातृभाषा संरक्षण व विकासया नितिं थःगु ब्वनेकुथिइ मातृभाषाया ब्वंकेत तत्पर जुयाच्वनागु खँ कंसे भाषा–साहित्यख्यःया अग्रजपिन्त ग्वाहालियानादीत नं इनाप यानादीगु दु ।
नरेन्द्र भक्त हाडाया सभाधक्ष्यताय् अमर बज्राचार्यं न्ह्याकादीगु उगु ज्याझ्वलय् गणेश भक्त शिल्पकारं लसकुस न्वचू तयादीगु खःसा लोकेन्द्र अर्यालं सुभाय् न्वचू तयादीगु खः ।
बुखँ नेवाः सूचना केन्द्र
किपा राजेन्द्र रञ्जित
ञंलागा पंचमी ११३८ ( सेप्तेम्वर ३० २०१८ )
प्यम्ह कवि पिनिगु चिनाखँ ब्वनेज्या
लहनान्युज | ञंलागा पंचमी ११३८ ( सेप्तेम्वर ३० २०१८ )
नविन प्रकाश श्रेष्ठ, नरेन्द्र मान श्रेष्ठ, राज अक्षोभ्य, रामेश्वर मिश्रण श्रेष्ठ प्यम्ह कवि पिनिगु मंकाः चिनाखँ ब्वनेज्या नेपालभाषा मंकाः खलः यल, त्यागलय् जूगु दु ।
नेपालमण्डल साहित्य प्रतिष्ठानया ग्वसालय् सुनिल बज्राचार्यं न्ह्याकादीगु उगु ज्याझ्वलय् संस्थाया नायः बद्रि बेदनां चिनाखँ ब्वनादीपिं कविपिन्त मतिनाया चिं ल्हानादीगु खः ।
ज्याझ्वलय् कविपिसं स्वपु–स्वपु यानाः निकः मुकं खुपु चिनाखँ ब्वनाःन्यंकादीगु खः ।
बुखँ नेवाः सूचना केन्द्र
किपू नगरपालिकय् सीसी क्यामर
लहनान्युज | ञंलाथ्व पुन्हि ११३८ ( सेप्तेम्वर २५ २०१८ )
किपू नगरपालिकया सुरक्षा यायेगु नितिं सीसी क्यामरा तयेगु ज्याः जुगु दु । छगु ज्याझ्वः दथुइ किपू नगरपालिकाया मेयर रमेश महर्जनं उगु ज्याझ्वःया उलेज्या यानादीगु खः ।
थुगु ज्याझ्वः किपू नगरपालिका सीसी क्यामराया नियन्त्रण महानगरीय प्रहरी प्रभाग किपूपाखेँ यायेत्यःगु खः ।
३ न वडा अध्यक्ष राजेन्द्र महर्जनया सभाधक्ष्यताय् जुगुु ज्याझ्वलय् किपूया थीथी राजनीतिक दलया प्रतिनिधि तक उपस्थित जुयादिगु खः ।
किपू नगरपालिकाया थी थी न्ह्यगु थासय् झिगः सीसी क्यामरा तगु खः ।
नेवाः साँस्कृतिक बाज ब्वज्या जुल
लहनान्युज | ञंलाथ्व त्रयोदशी ११३८ ( सेप्तेम्वर २३ २०१८ )
येँया पुन्हीया लसताय् नायः खिंबाजं खलकं येया मरुध्वाखाय् यागु नेवाः साँस्कृतिक बाजं ब्वज्यालिसें भिन्तुना कालबिल ज्याझ्वः जुगु दु ।
उगु ज्याझ्वलय् मूपाँहा येँ महानगरपालिकाया उपमेयर हरिप्रभा खड्गीं नेवा साँस्कृतिक मौलिक बाजंया संरक्षण याये माःगुलि बः बियादीगु दु । महानगरपालिकां संस्कृतियात ल्यका तयेत बजेट फ्याना तयागु दु धकाः न धयादिगु खः ।
ज्याझवलय नेपाल खड्गी सेवा समितिया संरक्षक मनोज नेवाःखड्गीं ज्याझ्वलय् कुमारी, गणेश व भैरबया खः जात्राय् थीथी बाजं खलःतय्सं ब्वति कयाः न्ह्याइपुकेगु लिसें थःगु मौलिक पहिचान ल्यंका तयेगु नितिं नं झी सकले मिले जुया वनेमाः धयादिल ।
अथेहे ज्याझ्वलय् नायः खिंबाजं खलया नायः बिजय शाहीं थीथी बाजंखलःतय्गु दथुइ मिलेजुयाः येँया नखःयात सभ्य व भव्य कथं हनेगु नितिं थुगु ज्याझ्वः यानागु धकाः धयादिइगु खः ।
सक्वय् देबीप्याखं ल्हुइकल
लहनान्युज | ञंलाथ्व त्रयोदशी ११३८ ( सेप्तेम्वर २३ २०१८ )
कायः अष्टमि कुन्हु सक्वय् चच्छियंक दबुली दबुली देबीप्याखं ल्हुइकीगु ज्या जुल । देबीप्याखं ल्हुइकीगु दिंनिसें मालश्री धुन व म्ये पुइगु खःसा मालश्री धुन व म्ये हालेवं मोहनि नखः सुुरु जुइगु भाःपीगु खः ।
सक्वय् देबी, चण्डी व भैरब धकाः स्वम्ह द्यःपिन्त मालश्री राग म्ये हालाः खिं, ताः, पँयताः, नायखिं, छुस्या व म्वाय्लिं पुयाः, थानाः प्याखं ल्हुइकीगु खःसा म्येया प्रत्येक बोलकथं देबी, दानब, दैत्यपिन्त संहार याःगुया गाथा न्ह्यब्वइगु खः ।
देबीपिन्त वसः, तिसा, ख्वाःपाः, मतू, किकिंपा, खड्ग, पात्राें छाय्पिइकिसा भैरब छम्हेसित धाःसा हाकुगु वसः व हाकुगु ख्वाःपालं छाय्पिइकिगु खः । देबीप्याखं सुरु याय् न्ह्यः सक्वया गुँ बिहारय् (बज्रयोगिनी) कलः पुजा वनाः अनया ह्याउँख्वाः माजुयागु स्वपाः किकिंपाः कया हयाः द्यः जुइपिन्त तिसानापं मतु छुकाबीगु खः ।
उगु किकिंपाः छुकेवं हे द्यः जुइपिं खाना वइगु लू स्वय्बलय् द्यःया शक्ति द्यः जुइपिंके दुबिनिगु खः धइगु थुइकेफु । व हे शक्तिं सक्वय् चच्छि द्यः खानाः देबीप्याखं ल्हुइकिगु खः ।
देबीप्याखं पिदनेत थनया नासःद्य पुज्याना समे, भ्वय्, सीकाभ्वय् नय्धुंकाः दकलय् न्हापां सक्वया चलाखु त्वाःया देबीदबुलि प्याखं ल्हुइकाः झिंनिगू ताल पिब्वइ । उकि मध्ये देबी खुब्व तालय् ल्हुइकिसा ख्याःकवं व बेताल खुब्व ल्हुइकिगु खः । सक्वय् देबीप्याखनय् दैत्य पात्र धाःसा दइमखु । दैत्य जुइम्हसित धाथें कःवनिगु भाय् सक्वय् दैत्य प्याखंम्वः दइमखु । दैत्यया प्रतीककथं दबुलिया ल्वहँतय् मिच्याक्क खड्गं पालिगु लू खनेदु ।
खिं थाःम्हेसिनं ताल द्वंकल धाःसा वयात हे ल्हातय् घाःपाः जुइक खिं प्वाःगंक खड्गं पालिगु लू नं इलय्ब्यलय् खनेदु । थुगु देबीप्याखं सक्वय् च्यागू त्वालय् ल्हुइकिगु खः । ४गू दबुलिइ, प्यंगू माथं वंगु दबुली ल्हुइकिगु खः ।
