Display Style:
Column Style
हल्चोक आकाश भैरवय् बिशेष पुजा
नृपेन्द्रलाल श्रेष्ठ | ञंलाथ्व एकादशी ११३८ ( सेप्तेम्वर २० २०१८ )
हल्चोकय् थौं बिहिवाः ञंलाथ् एकादशी कुन्ह द्यया आँगछेँय् पुजा जुगु दु ।
येँया जात्रा वलय् पिहा वइगुु हल्चोक आकाश भैरव, चण्डि व कुमारी (सवः द्य) स्वम्ह द्यःया नाप, पार्वती, महाद्य, गंगा, आकाशदेवी, बाराही, दक्षिणकाली नाप महाकालीया ख्वाःपाः व तिसाःया पुजा जुगुु दु ।
हल्चोकय् झीनिदँ जात्रा न दु । उगु जात्रा वःगु बि स २०७० सालय् जुगु खः । ञंलाथ्व एकादशी कुन्हु पुजा जुइ वलय् झीनिदँ जात्रा थः छपु द्यः जुयागु खः उम्ह द्ययात पुजा यायेमाःगु परम्परा दु ।
येँया जात्रा इलय् पिहा वहेमापिं आकाश भैरव, चण्डि व कुमारी (सवः द्य) स्वम्ह द्यःया लँपु छायेगु लागि कुन्हु हल्चोकं ञंलाथ्व पारु चित्रकारया थाय् यंकिगु खः ।
लँपु छाय्गु ज्या येँया मासंगल्लिइ च्वंच्वनादीम्ह तेज बहादुर चित्रकारं याना वयाच्वनादीगु खः । वयकलं वंगु वि.सं. २०२८ सालं निसें मदिक्क च्वया वया च्वनादीम्ह चित्रकारं प्यंगू पुस्ता न्ह्यःनिसें थुगु ज्यायात निरन्तरता बियावया च्वनादीगु खः ।
लँपु छाय्गु ज्या क्वचायेका चित्रकारं एकादशी कुन्हु पुजा याना उगु स्वम्ह द्यःया ख्वाःपा गुथीयारयात लःल्हाइगु खः ।
थेच्वःय तुसिखुचा द्यःया पुजा जुल
लहनान्युज | ञंलाथ्व एकादशी ११३८ ( सेप्तेम्वर २० २०१८ )
थेच्वः यंलाथ्व एकादशी बिहिवाः कुन्हु ऐतिहासिक नापं सांस्कृतिक रुपं महत्वपूर्ण जाःगु तुसिखुचा द्यः स्वागु दु ।
थेच्वया नेवाः तय्सं स्वर्गया जुजु ईन्द्र द्यःयात तुसिखुचा द्यः धकाः धायेगु या । तुसिखुचा द्यःयात स्वाना पुजा यासें तुसि इना नकिगु न अनु परम्परा दु ।
उगु द्यः थेच्वया च्वय्लाछि व क्वय्लाछि लागाय् ब्वज्या यायेगु याइ । तर च्वय्लाछिइ न्हापा यक्व हे तुसिखुचा द्यः ब्वज्या याना तइगु खःसा थौंकन्हय् धाःसा थुगु द्यःया ब्वज्या याइपि म्हो जुया वने धुकुगु दु ।
सक्वय् पद्म रत्न अभिनन्दन
लहनान्युज | ञंलाथ्व एकादशी ११३८ ( सेप्तेम्वर २० २०१८ )
पद्म रत्न ज्याजंक्वया लसताय् सक्वय् पद्म रत्नयात अभिनन्दन ज्याझ्वः जूगु दु ।
उगु ज्याझ्वलय् मूपाहाँ कथं नरेश वीर शाक्य नाप पाहाँ कथं सुरेश किरण मानन्धर, किरण शाक्य, यचु जोशी, कान्छा तिवारी, कुञ्ज जोशी लगायतपिं झायादीगु खः ।
ज्याझ्वलय् भिंतुना पुचःयात नेपालभाषा, जातिया संरक्षणया ज्याय् पला न्ह्याका वनेफयेमा धैगु तातुना राजदास श्रेष्ठपाखें न्याद्वः तका दां व हनापौ लः ल्हागु खः ।
इ. राजदास श्रेष्ठया नायःसुइ जुगु ज्याझ्वलय् शैलेन्द्र श्रेष्ठं न्ह्याकादीगु खःसा सुर्ज नारायण श्रेष्ठं सुभाय् न्वचू तयादीगु खः ।
बुखँ नेवाः सूचना केन्द्र, किपा राजेन्द्र रञ्जित
ख्वपय् थौं निगु सफु पिदन
नृपेन्द्रलाल श्रेष्ठ | ञंलाथ्व दशमी ११३८ ( सेप्तेम्वर १९ २०१८ )
साहित्यकार नाप पत्रकार जितेन्द्र रसिकया च्यागुगुं कृति अलकापुरी भक्तपुर व संस्कृतिविद् ओम धौभडेलया भक्तपुर दरवारका मल्लकालिन भारदारहरु नांया निगु कृति थौं बुधवाः ख्ववय् छगु ज्याझ्वः दथुइ पितब्बज्या जुगु दु ।
ख्वपया सुर्यवनायय् उगु निगु सफूया पितब्बज्या मूपाहाँ पुरातत्व विभागया महानिर्देशक भेष नारायण दाहालं यानादीगु खः ।
उगु ज्याझुवलय् थःगु नुँगः खँ तयादीसें मूपाँहा दाहालं विभागं पुरा याये मफुगु ज्या थौंया निम्ह च्वमि रसिक व धौभडेलं यागु धका धयादीगु दु । वयकलं पुरातत्व विभागया मिखा मवः थाय् सम्पदा व संस्कृति ख्यलय् अलकापुरी भक्तपुर कृतिं दुथ्याीगु खः ।
मेम्ह विशिष्ठ पाँहा संस्कृतिविद् तेजेश्वरबाबु ग्वंगलं भानुभक्त आचार्य येँ वःगु इलय् ख्वप तक मथ्यंगु लि येँ जक अलकापुरी खःगु खः धयादीसें रसिक ख्वपय् थ्यंगुलि ख्वपयात न अलकापुरी खःगु खः धका धयादीगु खः । थुःगु सफुतिं ख्वप जिल्लां हे गौरवान्दित महशुष याइगु धका भलसा न कयादीगु खः ।
अथेहे मेम्ह अतिथि पाँहा वरिष्ठ समालोचक डा. देवीप्रसाद सुवेदीं थुगु निगु सफुतिं सम्पदा व मल्लकालिन इलयया खोज अनुसन्धान यायेत ग्वाहालि जुइगु धइगु बिचाः तयादिल
च्वमि जितेन्द्र रसिकं थःगु च्यादँया मेहेनत हे थुगु थःगु च्याःगु सफू पिदनेत ताःलागु धका धयादीगु खः । थुगु सफूतिं अलकापुरी ख्वपय् हिन्दु, बौद्ध, मुस्लिम लगायत दक्को सम्पदा व संस्कृति यात कःघानागु दु धका न धयादीगु दु ।
अथेहे मेम्ह च्वमि ओमप्रसाद धौभडेलं ख्वपय् मल्लकालिन इलय् संस्कृति, सम्पदा दयेकिगु नाप विकास सम्मक यायेत सुना सुना ग्वहालि याःगु दु धका थुगु सफुति सिइके फइगु धका बिचाः तयादील ।
कुमारी पुजा क्वःचाल
नृपेन्द्रलाल श्रेष्ठ | ञंलाथ्व दशमी ११३८ ( सेप्तेम्वर १९ २०१८ )
थौं थाय्मदु त्वाःलय् १०८ म्हसित कुमारी पुजा जुगु दु ।
त्वाः छेँ समिति व शहिद शुक्र क्लवया थाय्मदुया मंकाः ग्वसालय् उगु ज्याझ्वः जुगु खः ।
उगु ज्याझ्वलय् कुमारी पुजाय् ब्बति काःपिन्त थी थी समान न देछागु खः ।
