नेपाली कांग्रेसया नेता रामचन्द्र पौडेलं संसदीय दलया नेताय् पार्टी सभापति शेरबहादुर देउवा विरुद्ध प्रकाशमान सिंहयात न्ह्यःने हइगु जूगु दु । नापं महामन्त्री शशांक कोइरालाया नामय् सर्वसम्मत जूसां सिंह लिचिलीगु स्रोतं न्ह्यथंगु दु ।

 

कांग्रेसया संसदीय दलया नेता ल्ययेगु नितिं २१ गते चुनाव क्वःछिनातःगु दु । कंस आइतवाः उम्मेदवारी दर्ताया ई क्वःछिनातःगु दु । 

 

थौं शुक्रवाः पिथंगु चुनावया धलःकथं आइतवाः सनिलया ६ताः इलंनिसें ७ताः ईतक उम्मेदवारी दर्ता जुइ । पार्टी सभापति शेरबहादुर देउवां थः हे दलया नेता जुइगु नितिं तयारी यानाच्वंगु दु । तर पौडेल पुचःया थौं च्वंगु मुँज्यां सिंहयात न्ह्यःने हयेगु निर्णय याःगु दु । सभापति देउवा ताःमलायेधुंकूगु धासें सिंहं चुनाव लिपा हे दलया नेताया नितिं दावी याना वयाच्वंगु खः । महामन्त्री शशांक कोइरालायात सर्वसम्मतं दलया नेता दयेकेगु कुतः नं जूगु खः । तर दउवां कोइरालायात नं मत्वःतेगु व थः हे दनेगु संकेत बियादीगु खः ।

गृहमन्त्री रामबहादुर थापा बादलं थौं शुक्रवाः सशस्त्र प्रहरी बल नेपालया मू ज्याकूया निरीक्षण यानादीगु दु । निरीक्षण लिपा गृहमन्त्री बादलं ब्यक्तिगत उन्नति स्वयां च्वय् थाहां वनाः देय् व जनताया हीतय् ज्या यायेत सशस्त्र प्रहरीयात इनाप यानादिल ।

 

स्वंगू हे तहया चुनाव ताःलाकेत सशस्त्र प्रहरीं म्हितूगु भूमिकायात च्वछायादिसें मन्त्री बादलं हरेक जिम्मेवारी खोट मदइगुकथं पूवंकेत सुझाव नं बियादिल । सुरक्षा निकाय चेन अफ कमाण्डय् न्ह्यायेमाःगु संगठन जूगुलिं थःगु तहगत संरचनाकथंया जिम्मेवारी पूवंकेत नं वय्कलं इनाप यानादिल ।सीमित साधानस्रोता बाबजूद न्ह्यथनेबहःगु ज्या यानाच्वंगु सशस्त्र प्रहरी बलयात माःगु स्रोतसाधनया बीगु नितिं गृहमन्त्रालयं फक्व कुतः यायेगु बादलया धापू खः । 

 

थ्व हे झ्वलय् सशस्त्र प्रहरी महानिरीक्षक सिंहबहादुर श्रेष्ठं सशस्त्र प्रहरी बलयात भलसा यायेबहःगु केन्द्रीय सुरक्षा निकायकथं न्ह्यःने यंकेत चलायमान फौजकथं विकास याना यंकेमाःगु धयादिल । वय्कलं राज्यं ब्यूगु जिम्मेवारीयात कुशलतापूर्वक बहन यायेत संगठन दृढ संकल्पित जूगु धयादिसें फुक्क भूगोल व प्रदेशय् संगठनया समन्वयात्मक उपस्थिति माःगुलिं उकथंया संरचना दय्केमाःगु जानकारी याकादिल ।

 

भ्रमणया झ्वलय् गृहमन्त्री थापायात सशस्त्र प्रहरी महानिरीक्षक सिंहबहादुर श्रेष्ठं सशस्त्र प्रहरी बलपाखें जुयाच्वंगु ज्याखँ व संगठनया उपलब्त्रीयात कयाः नं जानकारी याकादिल ।