राष्ट्रिय जनता पार्टी नेपालया छम्ह शीर्ष नेतां संविधान संशोधन मजूतले थःपिनिगु पार्टीं सरकारय् ब्वति मकाइगु धयादीगु दु । अध्यक्ष मण्डलया दुजः अनिल झां संविधान संशोधन जुल धाःसा जक थःपिं सरकारय् वनेगु खँय् विचाः यायेफइगु धयादिल । आः हे थःपिं सरकारय् वनेगु खँय् छुं नं बिचाः मयानागु वय्कःया धापू खः ।

म्हिगःया दिनय् संविधान संशोधन याये हे मज्यू धइगु व दुई तिहाई थ्यंके मब्यूगु नेकपा एमालें आः सरकारया नेतृत्व यानाच्वंगु खँ धयादिसें नेता झां थःपिं संशोधनया पक्ष जूगु व वर्तमान प्रधानमन्त्री केपी शर्मा ओली संशोधनया नितिं ईच्छुक जू व मजू धकाः न्ह्यसः तयादिल । एमाले, माओवादी केन्द्र लिसें राष्ट्रिय जनता पार्टी व संघीय समाजवादी फोरम मिले जुल धाःसा दुई तिहाई बहुमत थ्यनीगु व संविधान संशोधन जुइगु वय्कलं धयादिल । संविधान संशोधन पक्षधर जूगुलिं राष्ट्रिय जनता पार्टी व संघीय समाजवादी फोरमं उखेथुखे यायेगु अवस्था मदुगु नेता झाया धापू खः ।

प्रदेश ६ या नां कर्णाली नामाकरण जूगु दुसा सुर्खेतया वीरेन्द्रनगरयात राजधानीकथं क्वःछ्यूगु दु ।

थौं च्वंगु प्रदेशसभाया प्यक्वःगु मुँज्यां अत्याधिक मतं प्रदेशया नां व स्थायी राजधानी क्वःछ्यूगु खः । संविधानं प्रदेशसभाया नां व स्थायी राजधानी क्वःछीगु अधिकार प्रदेशसभायात हे ब्यूगु दु । मुँज्याय् नेकपा एमाले संसदीय दलया नेता यमलाल कँडेलं प्रदेशया नां कर्णाली तय्गु नितिं प्रस्ताव याःगु खःसा विपक्षी दलया नेता जीवनबहादुर शाहीं राजधानी सुर्खेतया वीरेन्द्रनगर दय्केगु प्रस्ताव तयादीगु खः । प्रदेशसभा दलतय्गु सहमतिया लिधंसाय् कँडेल व शाहीं प्रस्ताव तयादीगु खः ।

प्रदेशसभाया मुँज्यां प्रदेशया नां कर्णाली तयेगु प्रस्ताव दुई तिहाई स्वयां अप्वः बहुमतं पारित जूगु खः । ४०म्ह दुजः दुगु प्रदेशसभाय् ३९म्ह सांसदत दु । छम्ह सांसदं राजीनामा बियादीगु खःसा छम्ह सभामुखं मत तयामदी । प्रदेशया नां कर्णाली तयेगु प्रस्तावया पक्षय् ३७म्हेस्यां मत ब्यूगु खः ।

मुँज्यां प्रदेशया राजधानी सुर्खेतया वीरेन्द्रनगर तयेगु प्रस्तावया पक्षय् नं दुई तिहाई बहुमतं पारित जूगु खः । प्रस्तावया पक्षय् ३६कू मत लाःगु खःसा विपक्षय् १कू जक मत कुहांवंगु खः ।