प्रधानमन्त्री केपी शर्मा ओलीं वइगु असार ६ गते आइतबाः प्रतिनिधिसभाय् सम्बोधन याइगु जुगु दु।

नेकपा एमाले संसदीय दलया प्रमुख सचेतक महेश बर्टौलां वइगु आइतबाः प्रतिनिधिसभाय् प्रधानमन्त्रीया न्ववाइगु ज्याझ्वः दु धका जानकारी ब्यूगु दु।

बर्टौलां धाःगु दु, “प्रधानमन्त्रीं साउन ६ गते सम्बोधन यायेगु एजेण्डा दु, सोमवाः न्हिनय् सम्बोधन यायेगु एजेण्डा क्वःछ्यूगु दु ।” 

सरकारं निमित मुख्यसचिव लीलादेवी गडटौलायात स्थायी मुख्यसचिवया जिम्मा ब्यूगु दु। केपी ओलीया नेतृत्वय् सोमवाः च्वंगु न्हापांगु मन्त्रिपरिषद् बैठकं थौंकन्हय् निमित मुख्यसचिव जुयाच्वंम्ह गडटौलायात मुख्यसचिव दयेकेगु निर्णय याःगु खः।

नेपाःया इतिहासय् न्हापांखुसी पूर्ण जिम्मेवारी कयाः न्हापांम्ह कामु मुख्यसचिव जुयादीगु दु। विशेष अदालतय् अख्तियार दुरुपयोग अनुसन्धान आयोगं भ्रष्टाचार मुद्दा दर्ता यायेधुंकाः निलम्बित मुख्यसचिव डा. वैकुण्ठ अर्यालयात असार २८ गते राजपत्रित विशेष विधाय् मुख्यसचिव विशेष पद दयेकाः उगु पदय् सरुवा यानाः वैकुण्ठ अर्यालयात राष्ट्रिय योजना आयोगय् सरुवा यायेगु निर्णय जूगु खः।

वयां लिपा प्रधानमन्त्री ज्याकुथिइ कानुनी मामिला सचिव जुयाच्वंम्ह गडटौलायात ज्येष्ठताया आधारय् कार्यवाहक मुख्यसचिवया जिम्मेवारी स्वतः वःगु खः।मन्त्रिपरिषदं सोमवाः याःगु निर्णयं मुख्यसचिवया धेंधेंबल्ला छुं ईया नितिं दिकीगु जूगु दु।

शेयर बजाः थौं निगू ल्याखं कुहां वःगु दु। न्हूगु सरकार गठन जुइ न्ह्यः म्हिगः थहावःगुलि थौ शेयर बजाः परिसूचक नेप्से १७.१८ ल्याखं कुहां वयाः २२४०.४१ अंकय् थ्यंगु खः।

थौं जलविद्युत, लगानी, उत्पादन व म्युचुअल फण्ड बाहेक बीमा, होटल, विकास बैंक, माइक्रोफाइनान्स समूहया शेयर अप्वः ल्याखं कुहां वःगु दु।अथे हे जानकी फाइनान्स कम्पनीया शेयर १० प्रतिशतं म्हो जूगु दु।

समग्र रुपं बजाः कुहां वःगु दिं सिभिल बैंक २०८८ या डिबेन्चर व माण्डु जलविद्युत कम्पनीया शेयर १० प्रतिशतं अप्वःगु दु। बजाः कुहां वःसां थौं कारोवारया रकम धाःसा उल्लेखनीय रुपं अप्वःगु दु सा थ्व खुल्ला लिपा  दकलय् अप्वगु खः।

थौं ३२२ गु कम्पनीया २ करोड ५० लाख शेयर ८ अर्ब ७३ करोडय् कारोवार जूगु दु। थ्वसिबें न्ह्यः माघ २ गते ८ अर्ब व २० लाख बराबरया कारोवार जूगु खः।

केपी शर्मा ओलीया नेतृत्वय् न्हूगु गठन जूगु सरकारया न्हापांगु मन्त्रिपरिषद बैठक सिंहदरबारय् न्ह्याःगु दु।

सोमवाः शपथ ग्रहण लिपा बहनी सिंहदरबारय् बहाली जूपिं सकल मन्त्रीपिं नाप बैठक च्वंगु दु। बैठकं विपत सम्बन्धी छुं नियमित व आकस्मिक निर्णय याइगु मन्त्रिपरिषद ज्याकुथि स्रोतं जानकारी ब्यूगु दु।

थ्व बैठकं हे सरकारया प्रवक्ता नं नियुक्त यायेगु न तयारी दु।

परराष्ट्रमन्त्री आरजु राणा देउवायात भारतीय समकक्षी एस जयशंकरं भिंतुना देछाउगु दु।

थौ सोमवाः परराष्ट्रमन्त्री आरजु देउवां शपथ ग्रहण यायेधुंकाः भारतीय विदेशमन्त्री जयशंकरं सामाजिक सञ्जाल एक्स (ट्विटर)पाखें भिंतुना देछाउगु खः।

नेपाःया परराष्ट्रमन्त्री जुयादीम्ह आरजु राणा देउवायात भिंतुना। जिमिगु बहुआयामिक साझेदारीयात अग्रसर यायेत छिपिंलिसे जानाः ज्या यायेगु निंतिं जिं आशा यानाच्वना।” धक जयशंकरं च्वंगु दु।