नेपाल रेडक्रस सोसाइटीइ ५२ दुजःया केन्द्रीय कार्यसमिति नीस्वंगु दु। थ्व हे कौलागा प्रतिपदाकुन्हु च्वंगु केन्द्रीय कार्यसमितिया बैठकं थुगु कार्यसमितिइ मू न्वकूनापं १७ म्ह दुजःत ल्ययेगु ज्या जुल।

बैठकं मू न्वकू कथं चन्द्रकला कार्कीनापं मेपिं दुजःत ल्यःगु खँ सोसाइटीया महामन्त्री भूपतिलाल श्रेष्ठं धयादिगु दु। थ्व स्वयां न्ह्यः नेपाल रेडक्रसय् ३५ म्ह दुजःया कार्यसमिति दयेकेगु यानातःगु खः। बैठकं आः वइगु मङ्सिर २६ र २७ गते विधान महाधिवेशन आह्वाननाप याःगु दु।

नेपाल रेडक्रसयात अझ छप्प छधी यायेगु कुतःयात विधान अधिवेशनपाखें व्यवस्थित यायेगु महामन्त्री श्रेष्ठया धापू दु। विधान महाधिवेशनपाखें निर्वाचन यानाः आः खनेदुगु मतभेदयात मदयेकेगु निगुलिं पक्षतय् दथुइ सहमति जूगु खँ वय्कलं कनादिल संस्थायात भिंकेगु, संस्थाय् यक्व न्ह्यःनिसें जुयाच्वंगु विवादयात ज्यंकेया लागि व सामूहिक प्रतिबद्धतानापंया भिंकेगु ज्यात न्ह्याकेगु बैठकया निर्णय दु।

नायः प्रा सुदर्शनप्रसाद नेपालजुं फुक्क सरोकारवालालिसेया न्हिंन्हिंसिया खँल्हाबल्हा व सहमतियात निरन्तरता बियाः वैधानिक व दीर्घकालीन रूपं समस्या समाधान यायेत आःया कार्यसमिति प्रतिबद्ध जूगु खँ स्पष्ट यानादिल।आःया कार्यसमितिया विपक्षय् च्वंपिंसं केन्द्रीय कार्यसमितिया गठन, निर्वाचन व थ्वलिसे सम्बन्धित अदालतय् विचाराधीन मुद्दा लितकायेगु प्रक्रिया न्ह्याकेधुंकूगु खँ वय्कलं धयादीगु दु।

संस्थाया आःयागु विधानय् देय्या सङ्घीयतालिसे अनुकूलन, समावेशीकरण, रेडक्रस व रेडक्रिसेन्ट सोसाइटीया अन्तर्राष्ट्रिय महासङ्घया मापदण्डलिसे सामञ्जस्यता लगायत आधारय् थौंकन्हय् हे भिंकेत छगू समिति नीस्वंनेगु ज्या जूगु नायः नेपालं धयादीगु दु। वय्कलं संसारया फुक्क धैथें देसय् ब्यागलं कानुनपाखें रेडक्रस व रेडक्रिसेन्ट सोसाइटी सञ्चालन जुयाच्वंगु सन्दर्भय् नेपालय् आःतक नं रेडक्रस ऐन जारी जुइ मफुनिगुलिं सरकारलिसे समन्वय व ग्वहालिया लागि थ्व समिति गठन यानागु धकाः धयादिल।

निजीकरण समितिं बन्द व कार्यसम्पादनय् कमजोर जूगु छु छु संस्थानतय्गु निजीकरण वर्गीकरणया निंति मन्त्रिपरिषद् सिफारिश यायेगु क्वः छिगु दु।

उपप्रधान व अर्थमन्त्री विष्णुप्रसाद पौडेलया अध्यक्षताय् च्वंगु बैठकय् जनकपुर चुरोट कारखाना, नेपाल मेटल कम्पनी, हेटौँडा कपडा उद्योगया वर्गीकरणया निंति प्रस्ताव सिफारिश यायेगु क्वःछ्यूगु खः। अथेहे विराटनगर जुट मिल, बुटवल धागो कारखाना, गोरखकाली रबर उद्योग, उदयपुर व हेटौँडा सिमेन्ट कारखानाया नं वर्गीकरणया निंति प्रस्ताव सिफारिश यायेगु निर्णय जूगु खः।

मन्त्रिपरिषद्पाखें वर्गीकरण जुइ धुका सम्पत्ति व दायित्व मूल्यांकनया निंति विशेषज्ञसहितया अध्ययन समिति नीस्वनिइ। सम्पत्ति व दायित्व मूल्यांकन जुइ धुका विज्ञतय् सुझावया लिधंसाय् निजीकरणया ढाँचा व प्रक्रिया पहिचान याना नेपाल सरकार न्ह्यने सिफारिश याइ।

समितिया बैठकय् ब्यूगु जानकारी कथं जनकपुर चुरोट कारखाना, नेपाल मेटल कम्पनी, हेटौँडा कपडा उद्योग, विराटनगर जुट मिल, बुटवल धागो कारखाना व गोरखकाली रबर उद्योग वंःगु तःदँ न्ह्यःनिसें बन्द जुयाच्वंगु खः। उकथं हे उदयपुर व हेटौँडा सिमेन्ट कारखानाया कार्य सम्पादन स्तर कमजोर जूगु व मदिक्क घाटा नया च्वंगु खः। बैठकय् उद्योग वाणिज्य मन्त्री दामोदर भण्डारीया नं उपस्थिति दूगु खः।

युनिलिभर नेपालं खुसि बा वया पीडित जूपिन्त प्रधानमन्त्री दैवीप्रकोप उद्धार कोषय् ५० लाख तका लःल्हागु दु।

युनिलिभर नेपाःया प्रबन्ध निर्देशक÷सीईओ, अम्लान मुखर्जी व संस्थापक साझेदार, रविभक्त श्रेष्ठं प्रधानमन्त्री केपी शर्मा ओलीयात नापलाना ५० लखया चेक लःल्हागु खः।

युनिलिभर नेपालं स्वास्थ्य लिसे जनसङ्ख्या मन्त्रालयपाखे राहतया निति मदयक माःगु न्हिया न्हिथं माःगु सामग्री न उपलब्ध याःगु दु।

हेटौँडायात येँ नाप स्वाइगु हेटौँडा–कुलेखानी–फाखेल–सिस्नेरी–येँ सतकय् निखेरं यातायात सञ्चालनय् वःगु दु।

मकवानपुरया इन्द्रसरोवर गाउँपालिका–२ सिमखोलाया सतकय् ह्युमपाइप तया भिंकेगु ज्या धुंका उगु सतकया निखेरं यातायात सञ्चालनय् वःगु मकवानपुर जिल्ला प्रहरी कार्यालयया प्रवक्ता प्रहरी नायब उपरीक्षक श्यामु अर्यालं कनादिगु दु।

वंगु असोज १० निसें १२ गते वगु खुसिबाः व चलखं सतक स्यंगु खः। तत्काल भिंकेगु ज्या न्ह्याका असोज २० गतेनिसें यातायात सञ्चालनय् वःगु खःसां ह्युमपाइप तया कात्तिक २ गतेनिसें तिनि एकतर्फी लँ चाय्केफूगु खः।

नायब प्रहरी महानिरीक्षक किरण राणा प्रहरी अतिरिक्त महानिरीक्षक (एआइजी) पदय् बढुवाया निंति सिफारिश जूगु दु।

गृह मन्त्रालय बढुवा समितिया थौं च्वंगु बैठकं जनपद प्रहरी समूहपाखे प्वनाच्वंगु अतिरिक्त महानिरीक्षक पदय् राणायात बढुवाया निंति सिफारिश याःगु खः।

राणायात प्रहरी नियमावली, २०७१ या नियम २७ या उपनियम ४ कथं बढुवाया निंति सिफारिश यायेगु ज्या जूगु समितिया सदस्य सचिव नाप प्रहरी महानिरीक्षक बसन्त बहादुर कुँवरं कनादिगु दु।

बढुवा सिफारिश जुयादिइम्ह राणा थौंकन्हे प्रहरीया केन्द्रीय अनुसन्धान व्यूरो लाजिम्पाटय् ज्या याना दिइ।