प्रधानमन्त्री केपी शर्मा ओलीं थःत डिजिटल माध्यमं भिंतुना छ्वयेत इनाप याःगु दु। प्रधानमन्त्री निवास बालुवाटारय् भिंतुना बिउ वइपि अप्पो जूगुलि वयकलं सामाजिक संजालय् डिजिटल माध्यमं भिंतुना बिइत इनाप यानादीगु खः।

मेसेन्जर पाखे भिंतुना सन्देश छ्वयेत व नापलायेगु इलय् स्वामा व खादा ज्वना मवयेत न इनाप यानादीगु दु।

वयकलं धयादीगु दु–

थीथी माध्यमं भिंतुना सन्देश वयाच्वंगु दु। व्यक्तिगत रुपं नापलायेगु स्वयां डिजिटल माध्यमं भिन्तुना बियादील धासा पासापिनिगु ई बचे जुइ। सकल शुभचिन्तकपिन्त फयांफत्तले मेसेन्जर पाखे सन्देश छ्वयादीत इनाप यानाच्वना अले नापलायेगु इलय् स्वामा व खादा ज्वना मवयेत न इनाप यानाच्वना।

सामाजिक संजाल यक्को दुरुपयोगया नापनापं पत्रकारिताया प्रवृत्ति नं हिलेमाः धका प्रेस काउन्सिल नेपालया नायः बालकृष्ण बस्नेतं धयादीगु दु।

आः नकारात्मक खँ म्हो जुयाच्वंगु उल्लेख यासें वय्कलं सृजनशील, रचनात्मक व समाधानमूलक पत्रकारिता माःगु दु धका धयादीगु दु। थुकिया छुं छुं अभ्यास नेपाःया मिडिया ख्यलय् खनेदूगु दु। पत्रकारिता खःगु लँपुइ यकिइगु न्ह्यसःया नापनापं समाधानया विकल्पयात कयाः नं बहस न्ह्याकेमाःगु दु धका धयादीगु दु।

लिपांगु इलय् देशय् सिर्जनात्मक पत्रकारिता प्रवद्र्धन यायेगु ज्याय् प्रेस काउन्सिल नेपाल सक्रिय जुयाच्वंगु दु। युट्युब लिसेंया सामाजिक संजालपाखें चले जुइगु संचार माध्यमयात नं कडा अनुगमन प्रेस काउन्सिलपाखे यानाच्वंगु दु धका धयादीगु दु।

मुगु जिल्लाय् भुखाय् ब्वःगु दु।

मुगुया दार्मा जःखः केन्द्रविन्दु जुयाः भुखाय् ब्वःगु खः।

थौं सुथय् ४ः४० ताः इलय् ३.९ रेक्टर स्केलया भुखाय् ब्वःगु धका राष्ट्रिय भूकम्प विज्ञान केन्द्रं जानकारी ब्यूगु दु।

भुखाचं गुलि क्षति जुलध धइगु जानकारी वःगु मदुनि।

शेयर बजाः थौ थहावःगु दु। म्हिगः १७ ल्याखं अप्वो कुहां वःगु शेयर बजाः परिसूचक नेप्से ७०.१८ ल्याखं अप्वो २३१०.५९ ल्याखय् थ्यंगु दु।

थौ शेयर बजाः २६ महिनाय् दकलय् अप्वः थ्यंगु दु। थ्वः स्वया न्ह्यः २०७९ बैशाख २९ गते शेयर बजाः २,३५०.४२ ल्याखय् थ्यंगु खः। म्युचुअल फण्ड समूह बाहेक थौ बीमा, विकास बैंक, होटल, जलविद्युत, उत्पादन, माइक्रोफाइनान्स, व्यापार समूहया शेयर थहावःगु दु।

सिन्धु विकास बैंक, वरुण जलविद्युत, ग्रीन डेभलपमेन्ट बैंक, अंखु खोला जलविद्युत, मण्डाकिनी जलविद्युत व सिकलेस जलविद्युत कम्पनीया शेयर १० प्रतिशतं स्वया अप्पो थ्यःगु दु।

अथे हे झिगू कम्पनीया शेयर नं ९ प्रतिशतसिबें अप्वोगु दु। समग्रय् स्वयेगु खःसा बजाः थहां वःगु दिं स्वगू कम्पनीया शेयर १० प्रतिशतं म्हो जूगु खः। ३१५ गु कम्पनीया थौ २ करोड ५८ लाख शेयर ९ अर्ब १३ करोडय् कारोवार जूगु दु।

थ्व कारेवार रकम खुल्ला लिपा दकलय् अप्वोगु खः । थ्वः सिबें न्ह्यः माघ ३ गते ९ अर्ब ७६ करोडया कारोवार जूगु खः।

लुँया भाः आःतकया हे दकलय् अप्पो थ्यंगु दु। थौं लुँया तोलां गुसः थहावःगु दु।

लुँ तोलां गुसः थहावना १ लाख ४७ हजार ८ सय थ्यःगु दु धका नेपाल सुनचाँदी व्यवसायी महासंघं जानकारी ब्यूगु दु।

अथेहे वहः वहः तोलां न झीतका थहावःगु दु। वहः तोला झीतका थहावना १ हजार ८ सय ७५ न कारोबार जुगु दु धका महासंघं जानकारी ब्यूगु दु।