सत्तारुढ साझेदार दल नेकपा एमाले व नेपाली कांग्रेस दथुइ मन्त्रालयया खँ मिले जुइ धुकुगु दु।

स्रोतया कथं एमालें अर्थ, रक्षा, भौतिक पूर्वाधार, संघीय मामिला व सामान्य प्रशासन, शिक्षा, विज्ञान व प्रविधि, भूमि व्यवस्था, सहकारी व गरिबी निवारण, संचार व सूचना प्रविधि व उद्योग, वाणिज्य व आपूर्ति काइगु जुगु दु।

अथेहे, नेपाली कांग्रेसं गृह, परराष्ट्र, ऊर्जा, जलस्रोत लिसे सिँचाइ, शहरी विकास, स्वास्थ्य लिसे जनसंख्या, संस्कृति, पर्यटन लिसे नागरिक उड्डयन, वन लिसे वातावरण तथा कानुन, न्याय लिसे संसदीय मन्त्रालय काइगु जुगु दु।

निगू दलं कन्ह्यः सोमवाः सुथय् तकया दुने मन्त्रीया नां क्वचायेकेगु तयारी याःगु दु।

नेकपा एमालेया अध्यक्ष केपी शर्मा ओलीयात थौ आइतबाः राष्ट्रपति रामचन्द्र पौडेलं संविधानया धारा ७६ (२) कथ प्रधानमन्त्रीइ नियुक्त यानादीगु दु।

ओलीं एमालेया नापनापं नेपाली कांग्रेस लगायत दलया समर्थनय् प्रधानमन्त्रीइ थःगु दाबी पेश यानादीगु खः।

पुष्पकमल दाहाल प्रचण्डं वंगु शुक्रवाः च्वंगु प्रतिनिधिसभाया बैठकय् विश्वासया मत मवयेधुंकाः राष्ट्रपति पौडेलं धारा ७६ (१९) कथं निगू वा व स्वयां अप्वः दलया समर्थनय् प्रधानमन्त्रीयात दाबी पेश यायेत आह्वान याःगु खः।

प्रधानमन्त्रीइ नियुक्त जुयादीम्ह ओलीं कन्हय् सुथय् ११ ता इलय् सपथ ग्रहण याइगु ज्याझ्वः दु।

नेवाः न्ह्यलुवाः नाप पूर्व मन्त्री व जनता समाजबादी पार्टीया सघिय परिषद नायः राजेन्द्रप्रसाद श्रेष्ठया अबु पन्चनारायण श्रेष्ठ मन्त।

८८ दँया श्रेष्ठ बीर अस्पतालय् वासः यायेगु झ्वलय् मदुगु खः। मदुम्ह श्रेष्ठया जहान, निम्ह काय् व छम्ह म्ह्याय् दु।

एमाले अध्यक्ष केपी शर्मा ओलीयात थौं प्रधानमन्त्री जुइत्यःगु दु। राष्ट्रपति रामचन्द्र पौडेलं थौं न्हूम्ह प्रधानमन्त्रीइ नियुक्त यायेत्यंगु खः।

प्रतिनिधिसभाय् प्रधानमन्त्री प्रचण्डयात विश्वासया मत मवःगुलिं शुक्रवाः राष्ट्रपति रामचन्द्र पौडेलं दलतय्त न्हूगु सरकार गठन यायेत आह्वान यानादीगु खः।

उकुन्हु हे ओलीं १६६ म्ह सांसदलिसें कांग्रेसया समर्थनय् दाबी पेश याःगु खः।दावी बुझे यायेगु ई थौं सनिलया ५ ता ई तक खः। सोमवाः सपथ ग्रहण यायेगु ज्याझ्वः तयातःगु दु ।

थ्व नाप ओली प्यक्वःगु पटक प्रधानमन्त्री जुइत्यंगु खः। संविधानया धारा ७६ (२) कथं गठन जुइगु सरकारया नेतृत्व वय्कलं यानादीत्यःगु खः।

नेकपा एमालें मन्त्री ल्ययेगु जिम्मा अध्यक्ष केपी शर्मा ओलीयात ब्यूगु दु।बुधवाः च्वंगु सचिवालय बैठकय् ओलीयात मन्त्रीया नितिं मापदण्ड क्वःछिनाः मन्त्री ल्ययेगु जिम्मा ब्यूगु खः।

सचिव पद्मा अर्यालं धाःगु दु, “पार्टी अध्यक्ष स्वयं हे प्रधानमन्त्री जुइत्यंगु दु, गुज्वःगु टिम दयेकेगु धयागु खँ वं अझ अप्वः सीके फइ” धकाः सचिव पद्मा अर्यालं धाःगु दु।

अध्यक्ष ओलीं मन्त्री ल्ययेत मेमेपिं नेतातय्के सुझाव फ्वंगु दु। आःतक नेपाली कांग्रेस लगायतया दललिसे मन्त्रालय व मन्त्रालयया ल्याः क्वचाःगु मदुनि।