राष्ट्रिय स्वतन्त्र पार्टी (रास्वपा) या सभापति रवि लामिछाने विरुद्ध प्रहरीं सहकारी ठगीनाप संगठित अपराधया कसुरय् न अनुसन्धान यायेत अदालतपाखे अनुमति काय्त्यःगु दु।

जिल्ला प्रहरी कार्यालय, कास्कीं केन्द्रीय अनुसन्धान ब्यूरो (सीआईबी) नाप प्रहरी निकाययात छ्वंगु पत्रय् ‘ठगी नाप संगठित अपराध सम्बन्धी मुद्दा’ य् अनुसन्धान याना लामिछानेयात ज्वना छ्वया हयेत धयातःगु दु।

कृष्णप्रसाद जैसीया तक जाहेरी व प्रहरी प्रतिवेदनया आधारय् न्ह्याकेत सूर्यदर्शन बचत तथा ऋण सहकारी संस्था लिमिटेडया सम्बन्धी मुद्दाय् कार्तिक २ गते लामिछानेयात ज्वनेगु अनुमति जारी जूगु पत्रय् उल्लेख यानातःगु दु।

राष्ट्रिय स्वतन्त्र पार्टी (रास्वपा) या सभापति रवि लामिछानेयात ज्वनेगु निति प्रहरीं अदालतय् अनुमति काःगु दु। जिल्ला प्रहरी कार्यालय, कास्कीं सहकारी ठगी प्रकरणय् अनुसन्धानया निति लामिछानेयात हिरासतय् कायेगु अनुमति बिउगु दु धका छम्ह प्रहरी अधिकृतं धाःगु दु।

अदालतं अनुमति बिइ धुका येँ न ज्वना लामिछानेयात कास्की यकेगु प्रहरी तयारी याःगु दु। पोखराया सूर्यदर्शनय् न्ह्यगू सहकारीपाखे ६५ करोड रुपैयाँ गोर्खा मिडिया नेटवर्कय् हयेगुलि अनुसन्धानयायेग लँ चाःगु दु।

सूर्यदर्शन सहकारी ठगी प्रकरणय् कास्की प्रहरीया प्रतिवेदनया आधारय् १६ असोज २०८० हे गितेन्द्रबाबु (जीबी) राई, कुमार रम्तेलनाप १९ म्ह विरुद्ध मुद्दा दर्ता याःगु खः। उकिइ १ अर्ब ११ करोड रुपैयाँ बिगो मागदाबी याःगु खः।

लुँया भाः थौ हाकन मेगु न्हुगु कीर्तिमान तःगु दु।थौ तोलां निद्धः तका थहावंगु दु। लुँ तोलां निद्धः थहावना १ लाख ६४ हजार ४ सय तका थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न स्वीतका थहावःगु दु। वहः तोलां १ हजार ९ सय ८० तका न कारोबार जूगु दु धका महासङ्घं धाःगु दु।

निर्वाचन आयोगं गैर आवासीय नेपाली नागरिकता कयातःपि मनूतय् उज्यागु नागरिकता काये न्ह्यःया नागरिकता परित्याग जूगु विवरण गृह मन्त्रालयपाखे फ्वंगु दु।

स्थानीय तहया उपनिर्वाचनया मतदाता नामावली न्हूधाः यायेगु प्रयोजनया निंति आयोगं थज्यागु विवरण फ्वंगु खः।

ऐन बमोजिम नागरिकता त्यागया थुुज्यागु विवरण कात्तिक ५ गते दुने जिल्ला प्रशासन ज्याःकुथिं जिल्ला निर्वाचन ज्याःकूयात बिया बिइमाःगु व्यवस्था याये धुनागु खँ आयोगया प्रवक्ता नारायणप्रसाद सापकोटां कनादिइगु दु।

निर्वाचन अयोगं थ्व हे वइगु मंसिर १६ गते जुइगु स्थानीय तहया उपनिर्वाचनय् उम्मेदवारी न्ह्यःब्वइगु राजनीतिक दलतयेत मिसा उम्मेदवार दइगु कथं मनोनयनपत्र पेस यायेत उजं ब्यूगु दु।

स्थानीय तहया उपनिर्वाचनय् गाउँपालिकाया नायः व न्वकू, नगरपालिकाया प्रमुख व उपप्रमुख व जिल्ला समन्वय समितिया प्रमुख व उपप्रमुख पदय् उम्मेदवारया मनोनयनपत्र न्ह्यःब्वये चाहेजूपिं राजनीतिक दलतयेत मिसा उम्मेदवार दइगु कथं मनोनयन पत्र पेस यायेत उजं ब्यूगु दु धका आयोगया प्रवक्ता नारायणप्रसाद सापकोटा धयादीगु दु।

उगु उपनिर्वाचन प्रयोजनया नितिं आयोगय् दर्ता जुयाच्वंपि राजनीतिक दलतयेत स्थानीय निर्वाचन ऐन बमोजिम उगु उजं बियेगु ज्याः जूगु खः।