नेकपा एमालेया नेतातय्सं सरकारयात सुझाव पौ थौ लःल्हाःगु दु।

पार्टीपाखें महासचिव शंकर पोखरेललिसेंया नेतातय्सं थःगु हे पार्टीया नेतृत्वय् सरकारयात सुझाव पौ लःल्हाःगु दु।

अध्यक्ष लिसें प्रधानमन्त्री केपी शर्मा ओलीं पार्टीया सुझाव लःल्हाना कयादीगु खः। प्रधानमन्त्री ओलीं सुझाव पौ लःल्हाना कयादीसे पार्टी बिउगु सुझाव कार्यान्वयन यायेगु जुइ धका धयादीगु खः।

प्रधानमन्त्री ओलीं आः वइगु झिंगुदँ दुने “समृद्ध नेपाल, सुखी नेपाली“या च्यागु आज्जु पूवंकेत सरकार न्ह्यःने वनिइ धका धयादिगु खः।

लुँया भाः थौ तोलां निद्धः कुहावःगु दु। लुँ तोलां निद्धः कुहावया थौ १ लाख ४७ हजार ५ सय रुपैयाँ न कारोबार जूगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न स्वीतका कुहावःगु दु। वहः तोलां स्वीतका कुहावया थौ १ हजार ८ सय ३० रुपैयाँ कायम जूगु दु धका महासङ्घं धाःगु दु।

न्हुसतकय् फुटपाथ विस्तारय् स्थानीयपिन्स बिरोध याःगु दु। अन बिरोध ज्याझ्वः यायेवं नेपाल प्रहरी, नगर प्रहरी लगायतया तःधंगु ल्याखय् परिचालन जूगु दु।

उच्च अदालतं फुटपाथ तब्या यायेगु लँपु चायेकेधुंकाः बुधवाःनिसें महानगरं ज्या न्ह्याकूगु खः।सडक डिभिजन कार्यालयया हस्तक्षेप विरुद्ध महानगरं यलय् उच्च अदालतय् रिट दर्ता याःगु खः

रिटया सुनुवाईया झ्वलय् उच्च अदालतं शहरी सतक स्थानीय तहया मातहत जुइगु धका अन्तरिम आदेश ब्यूगु खः।

किपा सामाजिक संजाल

इतिहासकार डा. तुल्सीराम वैद्य मंत नांजाःम्ह इतिहासकार डा. तुल्सीराम वैद्य मंत।

वंगु छुं ई न्ह्यवंनिसें उसाँय् मदयाच्वंम्ह वय्कः म्हीगः मदुगु खः। अलाहवाद विश्वविद्यालयय् इतिहास विषय एम.ए. व पीएच.डी. यानादीगु खः।

२०१७ साल आषाढ १८ गतेनिसे त्रिभुवन विश्वविद्यालय प्राध्यापनया ज्या यानादीम्ह वयकलं इतिहास केन्द्रीय विभागय् प्राध्यापक व विभागीय प्रमुख जुया ज्या यानादीगु खः।

नांजाःगु सफू ‘ब्रेभ किङ जयप्रकाश मल्ल’ या च्वमि डा. वैद्यं शाहकालया प्रारम्भिक इतिहासबारे विशेष अध्ययन यानादीगु दु।

वय्कलं बागमती खुसि बचे यायेगु अभियानय् नं नेतृत्वकारी भूमिकाय् च्वनादीम्ह खः।

लगातार थौ न शेयर बजाः थहां वःगु दु। वंगु सोमवाः कुहां वःगु शेयर बजाः उगु इलय् निसें हे थहां वनाच्वंगु खः।

थौं शेयर बजाः परिसूचक नेप्से ५९.६८ ल्याखं थहावना २४२४.३२ अंकय् थ्यंगु दु। नेप्से नीन्ह्यय् ला लिपा दकलय् अप्वः थ्यंगु दु। थ्वः सिबें न्ह्यः २०७९ य् ११ बैशाखय् नेप्से २,४२० ल्याः थ्यंगु खः। थौं फाइनान्स व जलविद्युत बाहेक फुक्क पुचःया शेयर अप्वःगु दुसा बीमा, माइक्रो फाइनान्स, उत्पादन, बैंकिङ्ग पुचःया शेयरया भाः थहावःगु दु।

नेपाल इन्भेष्टमेन्ट मेगा बैंक, नेपाल फाइनान्स, आँखुखोला जलविद्युत कम्पनी, उपकार लगुवित्त व थ्री स्टार जलविद्युत कम्पनीया शेयर १० प्रतिशतं अप्वःगु दु। कुमारी सबल योजनाया सेयर साढे ५ प्रतिशत स्वयां अप्वः म्हो जूगु दुसा समग्र बजाः अप्वःगु दु। थौं कारोवारया रकम नं यक्व हे अप्वःगु दु।

३१२ गू कम्पनीया ३ करोड ९९ लाख ९० हजार कित्ता शेयर १५ अर्ब ५४ करोडया कारोवार जूगु दु। थ्व कारोवार ३५ महिना दुने दकलय् अप्वः खः। थ्वः सिबें न्ह्यः २०७८ साउन १३ गते १५ अर्ब ६५ करोडया कारोवार जूगु खः।