प्रधानमन्त्री व नेकपा एमालेया नायः केपी शर्मा ओली नापं स्वंगु दलया शीर्ष नेतातय् दथुइ थौं च्वंगु बैठकं शान्ति प्रक्रियाया ल्यं दूगु ज्याः याकनं न्ह्याःका यंकेगु सम्बन्धया सहलह जूगु दु।

प्रधानमन्त्री निवास बालुवाटारय् च्वंगु बैठकं शान्ति प्रक्रियाया ल्यः दनिगु ज्याः क्वःचायेकु विषयलय् सहलह जूगू व शान्ति प्रक्रिया भावना र कानूनी प्रक्रियाया विषय दुग्यंक्क ज्ञां दुम्ह मनूयात पदाधिकारी दयेकेगु विषयलय् सहलह जूगु धका नेकपा (माओवादी केन्द्र)या उपमहासचिव शक्तिबहादुर बस्नेतं जानकारी बियादीगु दु।

“छन्हु निन्हु दुने सिफारिश समितियात पूर्णता बिइगु विषयलय् सहलह ब्याःगु दु, सिफारिश समिति पूर्ण जुइवं पदाधिकारीपि सिफारिश जुइ फइ”, बैठक क्वचाये धुका वय्कल धयादिल – “शान्ति प्रक्रियाया भावना व कानूनी प्रक्रिया थुम्ह मनू दूगु समिति दयेकेगु जुइमाः धइगू फुकस्या चाहना खः।

निगु आयोगय् गज्यापिं मनूत व्छयेगु धैगु सिफारिश समितिं क्वछिइ ।” सत्य निरुपण व मेलमिलाप आयोग व बेपत्ता जूपिं मनूतय् छानविन आयोग गठन यायेत थ्वयां न्ह्यःया सरकारं सिफारिश समिति नीस्वंगु खः। वंगु भदौ ३० गते राष्ट्रपतिपाखें निगुलिं आयोगबारेया कानुन हिलेत विधेयक प्रमाणीकरण याःगु खः।

उगु बैठकय् प्रधानमन्त्री ओली, नेपाली काँग्रेसया सभापति व पूर्व प्रधानमन्त्री शेरबहादुर देउवा, प्रतिपक्षी माओवादी केन्द्रया नायः व पूर्व प्रधानमन्त्री पुष्पकमल दाहाल, गृहमन्त्री रमेश लेखक, माओवादी केन्द्रया उपमहासचिव बस्नेत व महान्यायाधिवक्ता रमेश बडालया ब्वति दुगु खः।

संस्कृति, पर्यटन व नागरिक उड्डयन मन्त्री बद्रीप्रसाद पाण्डेपाखें गौशाला धर्मशाला विवाद न्हंकेगु कुतः कथं पशुपति विकास कोषया बैठक आह्वान यानादिइगु दु।

नापं वय्कलं धर्मशालाया सम्बन्धय् छु कथंया नं ज्याः मन्ह्याःकेत नं उजं बियादिइगु दु। कोषया नायः नापं जुयादिइम्ह मन्त्री पाण्डें असोज ३० गते कोषया नामय् छपू पौ च्वया ‘शान्ति सुरक्षाय् समस्या ब्वलंगु’ न्ह्यःथसे गौशाला धर्मशाला प्वंकेगु ज्याः दिकेत उजं बिउगु खः।

मन्त्री पाण्डें वइगु कात्तिक ४ गते परिषद् बैठक मन्त्रालयय् यायेत आह्वान याना दिइगु कोषया प्रवक्ता रेवतीरमण अधिकारीं धयादीगु खः।कोषं थःगु स्वामित्वय् दूगु राज्यया सम्पत्ति धर्मशालायात सुुं छम्ह व्यक्ति वा व्यापारिक पुचःपाखें चले याके बिइगुया पलेसा गैरनाफामुखी ढंग येँ महानगरपालिकानाप जाना चले याना वनेगु घोषणा यायेवं विवाद ब्वलंगु खः। थ्व घोषणाप्रति मारवाडी सेवा समितिपाखें असहमति प्वंकाः वयाच्वंगु दु।

प्रधानमन्त्री दैवी प्रकोप उद्धार कोषय् १ अर्ब ७४ करोड २७ लख खुसः व स्वीप्यतका दां मूंगु दु। प्रधानमन्त्री व मन्त्रिपरिषद्या ज्याःकूपाखें पितब्यूगु विवरण कथं थ्व ध्यबा म्हिगः असोज २० तकया दुने मूवःगु ल्याःचाः खः।

कोषय् संस्थागत नापनापं व्यक्ति÷व्यक्तिपाखें नं ध्यबा दाखिल जुयाच्वंगु दु। म्हिगः असोज ३० गते साल्ट ट्रेड्रिङ कर्पोरेशनपाखें ६१ लख, गैरआवासीय नेपाली संगठनपाखें ५१ लख व राष्ट्रिय समाचार समितिपाखें ३ लख नीखुद्वः व स्वीच्यातकाः दाखिला जूगु खः।

म्हिगः ध्बा लः ल्हापिं विद्याधर मल्लिक, नेपाल प्रहरी श्रीमती संघ, नेपाल इन्सुरेन्स कम्पनी व विद्युत् उत्पादन कम्पनी नं दुथ्याः।

शेयर बजाः वा या लिपागु दिं थौ बिहीवाः लिपागु कारोबारय् बजार सामान्य ल्याखं थहावंगु दु। म्हिगः स्वया नेप्से परिसूचक २.४७ ल्याखं थहावना २७४५ य् कायम जूगु दु।

म्हिगः ५ अर्ब ६६ करोड कारोबार जूगुलि थौ ७ अर्ब १९ करोडया कारोवार जुगु दु। ८९ गु कम्पनीया भाः थहावंगुलि १४२ गु कम्पनीया भाः कुहावःगु दु सा १३ गु स्थिर जूगु दु।व्यापार समूह दकलय् अप्पो २.१० प्रतिशतं कुहावंगु खः।

बैंकिङ ०.४०, फाइनान्स ०.५१, लगानी ०.७१, उत्पादन ०.२१, मेमेगु ०.३६ प्रतिशत थहावंगुलि निर्जीवन बीमा स्थिर जुगु दु। माइक्रोफाइनान्स ०.१९, जीवन बीमा ०.२४, हाइड्रोपावर ०.१२, होटल व पर्यटन १.४८ नाप विकास बैंक समूह ०.६४ प्रतिशतं कुहावःगु दु।

गुडविल फाइनान्सया भाः दकलय् अप्पो ७.६ प्रतिशतं थहावःगु दु। समाज लघुवित्त ५.१२, रावा इनर्जी ५.१२ प्रतिशतं थहावःगु दु। कारोबार रकमया आधारय् कुमारी बैंक, एचआईडीसीएल प्रमोटर, हिमालयन रिइन्स्योरेन्स, ङादी ग्रुप पावर व गुडविल फाइनान्स न्ह्यने खनेदु।

लुँया भाः थौ हाकन थहावना न्हुगु कीर्तिमान तःगु दु। लुँ तोलां थौ खुसः थहावःगु दु। लुँ तोलां खुसः थहावना थौ १ लाख ६२ हजार ४ सय तका थ्यःगु दु धका नेपाल सुनचाँदी व्यवसायी महासङ्घं धाःगु दु।

म्हिगः लुँ तोलां १ लाख ६१ हजार ८ सय तका थ्यःगु खः।

अथेहे वहःया भाः धाःसा थौ स्थिर जुगु दु। वहः तोलां १ हजार ९ सय ५० तका हे कारोबार जुगु दु धका महासङ्घं धाःगु दु।