सञ्चार व सूचना प्रविधिमन्त्री पृथ्वी सुब्बा गुरुङं समाजया विविधतायात ल्यंकातयेत भाषाभाषीया समाचार मदयेक मगाः धका धयादिइगु दु। थौ छगु ज्याझ्वः दथुइ नेपाल टेलिभिजनय् नेपाल भाषा समाचार प्रसारणया उलेज्याः यासें मन्त्री गुरुङ देय्या विविधतायात संरक्षण यायेत विविध भाषां हे बुखँ बिइगु जरुरी जूगु धका धयादिगु खः।

“नेपाः विविधता जाःगु देय् खः, यक्वः विविधतां जाःगु नेपाली कपं समाजयात संरक्षण यायेमाः,” मन्त्री गुरुङं धयादिल – “राज्यया फुक्क निकायलय् समाजया किपाः थें खना कःघाना यंकेमाः।” मन्त्री गुरुङं नेपाल टेलिभिजनं विविधता दुने एकता मालेमाःगु व म्हिगः बहिष्करणय् लानाच्वंपि समुदायतयेत ध्यानय् तया ज्याः याना यंकेमाःगुलि बः बियादिगु खः।

“नेपाल टेलिभिजन राज्ययागु खः, थुकिई राज्य झल्के जुइमाः,” वय्कलं धयादिल – “येँ नेपाल भाषा न्ववाइपिं यक्वः दु । थ्व हे भासं बुखँ न्यंने व स्वये खना नेवाःतयेत गर्व ताई, थ्व नेपाल टेलिभिजजया गौरव याये बहःगु ज्याः खः।” रासस न म्हिगः मंगलबाः नेपाल भासं समाचार सेवा न्ह्याःके धूकूगु न्ह्यःथसें मन्त्री गुरुङं नेपाल टेलिभिजनंं थौं नं निसें सेवा न्ह्याःकूगु महत्वं जाःगु ज्याः जूगु व बुखँया माध्यमं जनताया दथुइ भलसा थनेगु कथंया सामग्री दयेकेगु व प्रसारण यायेमाःगुलि बः बियादिगु खः।

मन्त्रालयया सचिव राधिका अर्यालं सरकारया सच्छि दिंया ज्याःया धलखय् नेपाल टेलिभिजनं यायेमाःगु छगू महत्वं जाःगु ज्याः इलय् हे यायेत ताःलाःगु व थुकि नेवाः भाय् ल्हाइपिं समुदायया भाषा जक मखु लिपिया नापं संरक्षण यायेत तिबः जुवनिगु भलसा प्वंका दिल। नेपाल टेलिभिजनया नायः समीरजंग शाह नं स्रोत साधनया मगाः मचासां देय्या थी थी भाय् संरक्षण व सम्बद्र्धन यायेगु राज्यप्रतिया थःगु दायित्व पूवंकेत नेपाल टेलिभिजन तयार दूगु खँ कनादिल।

महाप्रबन्धक फुलमान बलं राज्यया प्राथमिकता यात न्ह्यःज्याकेत वंगु दँनिसें भाषाभाषीया बुखँ प्रसारण न्ह्याःके धुनागु धासें बागमती प्रदेशया निगूगु तःधंगु भाय् नेपाल भाषाया प्रसारण थौं नं निसें न्ह्याःकेगु ह्वःता चुलागु खँ कनादिल। नेपाल टेलिभिजनं थौं न्हिनय् ४ः३० बजे नेपाल भासं समाचार प्रसारण याःगु खः। नेपाःया जनगणना २०७८ कथं नेवाः भाय् ल्हाइपिं जनताया ल्याः च्यागु लखः व न्यय् स्वंद्वः (स्वंगु प्रतिशत) दु ।

नेपाल टेलिभिजनं वःगु दँनिसें तामाङ व गुरुङ भास न बुखँ प्रसारण न्ह्याःकूगु खः। सरकारया सच्छि गु दिं दुने यायेमाःगु ज्या नाप नेपालय् मातृभाषां पत्रकारिता सच्छि दँ दुगु लसताय् न थुगु ज्याझ्वः जुगु खः।

प्रधानमन्त्री केपी शर्मा ओलीं खुसिबा वया, चलः वया व डुुबानया कारण जूगु क्षतिप्रति गम्भीर जूयादीसे सरकारं सुरक्षित एकीकृत बस्तीया योजना नाप याकन हे पुनःनिर्माण व पुनःव्यवस्थापनया ज्या न्ह्याकेगु जुइ धका धयादीगु खः।

प्राकृतिक विपत्तिया कारण खोटाङय् जुगु क्षति व पुनःनिर्माणबारे थौ प्रधानमन्त्री निवास, बालुवाटारय् जिल्लाया सर्वदलीय प्रतिनिधिमण्डलपाखे बिउगु ज्ञापनपौ लःल्हाना कयादीसे प्रधानमन्त्री ओलीं बिहीवाः च्वनिइगु राष्ट्रिय विपद् जोखिम न्युनीकरण व व्यवस्थापन परिषद् व मन्त्रिपरिषदया बैठकं प्रारम्भिक राहत व अस्थायी आवास व ताँ दयकेगु निर्णय यायेगु जानकारी बियादीगु खः।

प्रधानमन्त्री ओलीं खुसि बाः व चलः वया स्वनिगः स्वाइगु  थीथी लँ अवरुद्ध जुगुलि बिचाः याना स्वया याकन ज्या याना अस्थायी कथं लँ सञ्चालन यानागु धका उल्लेख याःगु दु। उपप्रधानमन्त्री नाप अर्थमन्त्री विष्णुुप्रसाद पौडेलं उगु ज्याझ्वलय् सीमित बजेटया बाबजुद पुनः निर्माण व पुनःव्यवस्थापनया ज्या यायेमाः धका बःबियादीगु खः।

उगु पुचलं खोटाङयात तराई जूया प्रदेशया राजधानी नाप स्वाइगु सुनकोशी खुसिइ छगु जब मोटरेबल फोक्सिङटार ताँ सञ्चालनय् वःगु निदँ मथ्यगु इलय् खुसिबा वया चुइका यका जिल्लाय् हे प्राकृतिक नाकाबन्दी जुगु प्रधानमन्त्री ओलीयात अवगत याःगु खः।उ

पुचलय् प्रतिनिधिसभा सदस्यपि रामकुमार राई, सरस्वती बजिमय, पूर्वमन्त्री उषाकला राई, प्रदेश सांसदपि, दिक्तेल रुपाकोट मझुुवागढी नगरपालिकाया प्रमुख तीर्थराज भट्टराईपिनिगु ब्बति दुगु खः।

राष्ट्रपति रामचन्द्र पौडेलं ख्वपय् नवदुर्गा द्यःया दर्शन यानादीसे पूजा यानादीगु दु।

मोहनिया लिपागु दिं थौ बुधवाः आश्विन शुक्ल पूर्णिमाया दिं राष्ट्रपति पौडेलं नवदुर्गा भगवतीया पूजा यानादीगु धका राष्ट्रपति कार्यालयं धाःगु दु।

मोहनिया दकलय् लिपागु दिं राष्ट्र प्रमुखं ख्वपया नवदुर्गा भगवतीया पूजा यायेगु चलन दु। थ्व स्वया न्ह्यः न राष्ट्रपति पौडेलं थीथी शक्तिपीठय् दर्शन याना पूजा यानादीगु खः।

नेकपा मालेया नेता नाप पूर्वमन्त्री डम्बर श्रेष्ठ ७३ दँय् मन्त। स्वँया क्यान्सर जुयाच्वम्ह श्रेष्ठ बुधवाः सुथय् ३ बजे जूया ८ मिनेटय् चितवनस्थित थःगु हे निवासय् मदुगु खः।

मदुम्ह श्रेष्ठयात थौ बुधवाः हे अन्त्येष्टि याःगु दु। मदुम्ह श्रेष्ठया छम्ह काय् व छम्ह म्ह्याय् दी।

जापानी राजदूत युुताकां प्रधानमन्त्री ओलीयात नापलात प्रधानमन्त्री केपी शर्मा ओलीयात नेपाःया निति जापानया राजदूत किकुुता युताकां थौ प्रधानमन्त्री निवास, बालुवाटारय् नापलायेगु ज्या जुगु दु।

नापलायेगु झ्वलय् निगु देय् या दथुइ जुयाच्वंगु परम्परागत सम्बन्ध, निगु पक्षीय हितया विविध विषय नापं ग्वहालिया बारे सहलह जूगु खः।

भौतिक पूर्वाधार लिसे यातायात मन्त्रालयया सचिव केशबकुमार शर्मा, परराष्ट्र मन्त्रालयया सहसचिव कृष्णप्रसाद ढकालपि नापलायेगु झ्वलय् खुसिबाः वःगु नाप चलः वया प्रभावित विपी राजमार्ग पुनः निर्माणय् जापानपाखे यायेफइगु ग्वहालिया विषय न सहलह जूगु खः।