शेयर बजाः थौ निगु ल्याखं थहावःगु दु।शेयर बजाः परिसूचक नेप्से थौ २१ दशमलव २७ अङ्कं थहावना २ हजार १ सय ४० दशमलव ९७ विन्दुइ थ्यःगु दु।

विकास बैंक, फाइनान्स र व्यापार बाहेक दक्को समूहया शेयर थहावःगुलि होटल, बीमा, व उत्पादन, माइक्रोफाइनान्स समूहया शेयर यक्को थहावःगु दु।

थौ सीईडीबी हाइड्रोपावर, नेशनल लघुवित्त, निफ्रा व केबीएल डिबेन्चर २०८६ या शेयर ५ प्रतिशत स्वया अप्पो थहावःगु दु।अथेहे मैलुङ खोला जलविद्युत् कम्पनीया शेयर धाःसा १० प्रतिशतं कुहावःगु दु।

३ सय २५ गु कम्पनीया १ करोड ४० लाख कित्ता शेयर ६ अर्ब २९ लाख रुपैयाँ न कारोबार जूगु दु। दकलय् अप्पो थौ एनआरएन इन्फ्रास्ट्रक्चर एन्ड डेभलपमेन्ट कम्पनीया २१ करोड रुपैयाँ बराबरया शेयर कारोवार जूगु दु।

नेकपा एमाले प्रतिनिधि सभाय् प्रतिपक्षी बेचय् च्वंगु दु। पुष्पकमल दाहाल प्रचण्ड नेतृत्वया सरकारयात बियातःगु समर्थन लित कायेधुका एमाले प्रतिपक्षी बेञ्न्चय् च्वंगु खः।

आः प्रतिनिधिसभाय् नेपाली कांग्रेस प्रमुख प्रतिपक्षी बेञ्चय् च्वना च्वंगु खः। एमाले न सरकारयात बियातःगु समर्थन लित काये धुका कांग्रेसनाप हे च्वंगु दु। आइतवाः थौ च्वंगु प्रतिनिधि सभाया बैठकय् निगु तधःगु दल कांग्रेस व एमाले प्रतिपक्षी बेञ्चय् च्वंगु दु।

प्रतिनिधि सभाया बैठक न्ह्यने च्वंगु एमाले संसदीय दलया बैठकं प्रधानमन्त्री प्रचण्डयात याकन हे राजीनामा बिइत इनाप याःगु खः। प्रधानमन्त्री प्रचण्डं थ्व हे वइगु असार २८ गते विश्वासया मत काइगु जुगु दु।

प्रतिपक्षी बेन्चपाखे न्ववासे एमालेया प्रमुख सचेतक महेश बर्तौलां सरकारं बहुमत गुमे याये धुकुगु दु धका धयादीगु खः।

नेकपा एमालेया अध्यक्ष केपी शर्मा ओलीें संविधान संशोधन पश्चगमन मजु धका धयादीगु दु। थौ आइतवाः च्वंगु संसदीय दलया बैठकय् अध्यक्ष ओलीं राजनीतिक स्थायित्वया आधार तयार याइगु खँ देश व जनताया हितय् जुइ धका धयादीगु दु।

‘संविधान जारी जुइ धुका आःतक खनेदुगु समस्यायात ध्यानय् तयागु दु। उगु समस्या हल यायेगु कथं संविधान संशोधन यायेगु धका धाःगु दु’ ओलीं दलया बैठकय् धाःगु दु, ‘राजनीतिक स्थायित्वय् मालेगु कथं संविधान संशोधन यायेगु खँ पश्चगमन मखु।’

संविधान अझ बलाकेगु लागि संशोधन यायेमागुलि दक्को दलं ग्वहालि यायेमाः धका धयादीगु खः। बैठकय् संविधानया धारा ७६ (२) कथं नेपाली कांग्रेसया समर्थनय् ओलीयात प्रधानमन्त्री दयकेगु सहमति अनुमोदन याये धुकुगु दु।

नेपाल भाषा व लिपि स्यनिइगुलि न्हापां व्यावसायिक कम्पनी नेवाः(स्यनेकुथि) प्रशिक्षण केन्द्र १७ दँ थ्यःगु दु। नेपालभाषा, प्रचलित लिपि, रञ्जना लिपियात छ्यला थीथी सफू प्रकाशन, दसिपौ तयार यायेगु आज्जु कथं नेपाल भाषा ख्यलय् ल्याम्ह्य तयेत न्ह्यने हयेगुलि रुबिन शाक्यं उगु कम्पनीया परिकल्पनायाना उगु कम्पनी निस्वगु खः। म्हिगः केन्द्रं छगु ज्याझ्वः यासे कम्पनीया १७ क्वःगु स्थापना दिवस हःगु खः।

उगु ज्याझ्वलय् नेपालभाषा व नेपाललिपि प्रशिक्षणय् ब्बति काःपिन्त दसिपौ लल्हायेगु ज्या जुगु दु। स्वला पौ साहित्यिक पत्रिका दबू साहित्य, लिपि सम्बन्धी डिजिटल पत्रिका छगु ज्याझ्वः दथुइ त्रिभुवन विश्वविद्यालय नेपालभाषा केन्द्रीय विभागया प्रमुख डा.राजनलाल जोशीं बिमोचन यानादीगु खः।

मूपाहा विभागया प्रमुख जोशीं विश्वविद्यालय नेपालभाषा ब्बनिइपि अप्पो जुयावंगुलि न्हुगु न्हुगु अवसर वःगु दु धका धयादीगु खः। नेपालभाषा, लिपियात छ्यला थुकियात लजगा कथं कया न्ह्यावने स्वगु तसक बालागु ज्या जुगु धका धयादीगु खः।

ज्याझ्वलय् केन्द्रया कार्यकारी निर्देशक रुबिन शाक्य, लिपिविद् लोकरत्न शाक्य, नेपाल समाचारपत्रया सह सम्पादक सुनील महर्जन, नेवाः पत्रकार राष्ट्रिय दबू यल शाखाया अध्यक्ष मञ्जु बज्राचार्यपिन्स रुबिन शाक्यं नेपाल भाषा व लिपि स्यनिइगुलि न्हापां व्यावसायिक कम्पनी दयेका ज्या याना च्वगुलि सकिसिया प्रशसा यायेमाः धका धयादीगु खः।

वाग्मतीइ खुसि बाः वया बल्खुइ च्वंगु तरकारी बजाः डुबे जूगु दु।

बल्खु वाग्मती खुसि सिथय् च्वंगु उगु तरकारी बजारय् खुसि बाःवया अथे डुबे जूगु खः।

तरकारी बजाः खुसि सिथय् च्वंगु बजाः नाप मू बजारय् न लः दुहावःगु दु।