Display Style:
Column Style
थाइल्याण्ड, कम्बोडियालिसेंया देय् वनेबले सावधानी अपनेयायेत इनाप
लहनान्युज | थिंलागा नवमी ११४५, पुस ९ मंगलवाः
सरकारं म्यान्मा, थाइल्याण्ड, कम्बोडिया, लाओसलिसेंया देय्त वने मंदुपिं व वनेत्यंपिं नेपाःमिपिंत स्वंगु बुँदे यात्रा सम्बन्धी सुचं (ट्राभल एड्भाइजरी) पिथंगु दु। परराष्ट्र मन्त्रालयं सोमबाः ट्राभल एड्भाइजरी पितब्यूसें नेपाली नागरिकतय्त सावधानी अपनेयायेत इनाप याःगु खः।
बांलागु तलब व सुविधा बिइगु धकाः लोभ क्यनाः नेपालय् च्वना च्वंपिया नापनापं वैदेशिक लजगाः व ब्वनेया निंतिं युएईलिसेंया देशय् वनाच्वंपिं नेपाःमितय्त थाइल्याण्डया बैंकक, याहुनया अन्तर्राष्ट्रिय विमानस्थलय् क्वकयाः थीथी माध्यमं म्यान्माया कायिन प्रान्तया म्यावडीइ यंका जबर्जस्ती अवैध ज्या याकाच्वंगु खनेदूगु जूगुलिं थुगु खँय् न्हापा नं सचेत याकेधुंनाःगु धकाः मन्त्रालयं सुचंपाखें लुमंकाब्यूगु दु।
लिपांगु ई मानव बेचबिखन व मेमेगु आपराधिक ज्याय् लगेजुयाच्वंपिं गिरोहतय्सं नं नेपाःया नागरिकतय्त कम्बोडिया, लाओस व म्यान्माय् यंकाः जबर्जस्ती अवैध ज्या याकावयाच्वंगु सुचं वःगु मन्त्रालयं धाःगु दु। अथे हे, रोजगारदाता पासपोर्ट लाका काइगु, न्हि १२÷१३ घौ ज्या याकीगु, सास्ती बिइगु, तलब मबीइगु थेंजाःगु समस्यात दूगु धकाः सुचंत वयाच्वंगु धाःसें उद्धारया निंतिं याहुन व बैंककया नेपाली राजदूतावासय् इनाप पौ तःवइपिं नेपाःमिया ल्याः अप्वयाः वनाच्वंगुलिं थुजाःगु घटनाय् गम्भीर ध्यानाकर्षण जूगु धकाः परराष्ट्र मन्त्रालयनं धाःगु दु।
वैदेशिक लजगालय् तयाबीगु व अथे हे प्रकृतिया मेगु लोभ क्यनाः ध्यबाः कायेगु, सुं गुम्हेसितं विदेश यंकाः अलपत्र यानाबीगु, नेपाः सरकारया प्रचलित कानुन कथं यायेमज्यू धकाः क्वःछिनातःगु ज्याय् संलग्न जुइगु बाय् थुजाःगु ज्या याइपिं व याकीपिंसं कानुन कथं सजायँ फयेमालिगुलिं अज्याःगु ज्या मयायते÷मयाकेत व थुकिइ सचेत जुइत सकसितं परराष्ट्र मन्त्रालयं इनाप याःगु दु। लजगाःया लोभ क्यनाः ल्याय्म्हपिंत ठगे यायेगु व पीडिततय्त गैरकानुनी रुपं बैंकक जुकाः कम्बोडिया, लाओस व म्यान्मा यंकाः कुनां ज्याय् छ्यलाच्वंगु खनेदूगु व सामाजिक सञ्जालतपाखें थीथी थासय् च्वंपिं एजेन्टतपाखें प्रस्तावित जुइगु जुगुलिं थुकथं सामाजिक सञ्जालपाखें यानातःगु नक्कली लजगाःया लोभय् तमक्यनेत मन्त्रालयं इनाप यानातःगु दु।
“वैदेशिक लजगालय् वनेगु प्रयोजनया निंतिं भिजिट भिसाय् यात्रा मयायेत व लजगाःया छुं नं प्रस्तावत नालाकाये न्ह्यव विदेशय् च्वंगु सम्बन्धित नेपाली नियोगपाखें विदेशी फर्म, कम्पनी व लजगाः बिइगु कंपनीया बारे माःक्वं खँ न्यनेकने यायेत व थःम्हेस्यां हे नं उगु फर्म, कम्पनी व लजगाः बिइगु संस्थाया वेबसाइट जाँचय् यानाः स्वयेत इनाप यानाच्वना”, सुचंलय् धयातःगु दु।
बालेन साहया भ्यु टावरया नक्साय् बदमासी
लहनान्युज | थिंलागा नवमी ११४५, पुस ९ मंगलवाः
येँ महानगरपालिकाया मेयर बालेन साहं प्रमुख प्रशासकीय अधिकृतयात याःगु कारबाहीलय् ट्वीस्ट वःगु दु । वंगु शुक्रवाः येँ महानगरपालिकाया मेयर बालेन साहं प्रमुख प्रशासकीय अधिकृत सरोज गुरागाईंयात येँया पुलांगु बसपार्कय् दयेकाच्वगु भ्यु टावरया नक्सा अनधिकृत रुपं पास याःगु धासें कारबाही याःगु खः ।
प्रमुख प्रशासकीय अधिकृत गुरागाईं माःगु कानुनी प्रक्रिया पूमवंकूसें पुलांगु बसपार्कय् दयेकाच्वंगु भ्यु टावरया नक्सा पासया नितिं स्वीकृत बिउगु धासें छानबिन समिति दयेकूगु खः । गुरागाईं वंगु स्वला न्ह्यः २०८१ असोज ७ गते महानगरया प्रमुख प्रशासकीय अधिकृत कथं पद बहाली याःगु खः । तर नक्सा पासया ज्या धाःसा थ्व स्वयां न्हापा हे जुयाच्वने धुंकूगु लूगु दु । उगु नक्सा पास यायेगु नितिं मेयर साहं हे स्वीकृति बिउगु खँ सीदुगु दु । दछि न्ह्यः हे मेयर साहं न्यागू लाख तक जरिवाना क्वःछिनाः स्वीकृति बिउगु खः । स्वीकृत जूगु पौ कथं मेयर साहं २०८० मंसिर २७ गते निणयया नितिं पेश जूगु खःसा वंगु पुस २ गते स्वीकृत बीधुंकाः सम्बन्धित कम्पनीं पुस ४ गते जरिवाना पूगु खनेदु । पौ कथं मेयर साहं थम्हं हे ५ लाख जरिवाना क्वःछिउगु व निर्माण कम्पनीं नक्सा पासया प्रक्रिया न्ह्यःने न्ह्याकूगु खनेदु ।
प्रमुख प्रशासकीय अधिकृत गुरागाईंयात कारबाही यायेगु झ्वलय् द्वपं बियातःगु दु, ‘येँ महानगरपालिकाया आधिकारिक नक्सा पास प्रणालीइ विभागीय प्रमुखया डेस्कय् दुगु व स्वीकृत मजूगु काठमाडौं भ्युटावर भवनया निर्माणया नक्सा पास भ्वं अनुमति पत्रय् प्रमुख प्रशासकीय अधिकृत सरोज गुरागाईं आधिकारिक प्रणालीपाखे प्रक्रिया पूमवंकूसे नक्सा स्वीकृत याःगु खनेदु ।
थुकी स्पष्ट रुपय् प्रमुख प्रशासकीय अधिकृत गुरागाईं ठेकेदार कम्पनी जलश्वेर स्वच्छन्द बिकोई बिल्डर्स प्रालिलिसे सेटिङय् महानगरया आधिकारिक प्रणालीपाखे प्रक्रिया पूमवंकूसे काठमाडौं भ्यु टावरया नक्सा पास यानाबिउगु खः धइगु स्पष्ट याः । तर दछि न्ह्यः मेयर साहं थम्हं स्वीकृति १९ तल्ला भ्यु टावरय् आः वयाः विवाद पिकाःगु खः धइगु स्पष्ट जुयाच्वंगु दु । दछि न्ह्यः भ्यु टावर दयेकेगु नितिं येँ महानगरपालिकायात कम्पनीं २ करोड ३० लाख तक राजस्व काःगु भ्वं नं आः सार्वजनिक जूगु दु ।
महानगरया सूत्रया कथं २०८० माघ ६ गते महानगरया तत्कालीन प्रमुख प्रशासकीय अधिकृतं उगु निर्माण कम्पनीयात पौ च्वयाः जरिवाना व दस्तु पुलेत निर्देशन बिउगु खः । उगु पौया बोधार्थ मेयर साहयात नं बिउगु खः । सूत्रया कथं तत्कालीन प्रशासकीय अधिकृत वसन्त अधिकारीया पालय् टिप्पणी उठे याःगु खःसा उकियात मेयर साहं सदर यानातःगु दु ।
प्रमुख प्रशासकीय अधिकृतयात कारबाही यायेवं थ्व विवाद चर्चाया विषय जूगु दु । विवाद तच्वया वनेवं येँ महानगरपालिकाया उपमेयर सुनिता डंगोलं थ्व विषययात कयाः निष्पक्ष छानबिन जुइमाःगु खँ धयादीगु दु । वय्कलं यदि थ्व विवादय् सुनां नं षडयन्त्र याःगु खःसा उकियात कयाः नं छानबिन यायेमाःगु खँ धयादीगु दु । वय्कलं थ्व षडयन्त्रय् सु सु दु धइगु बारे निष्पक्ष छानबिन यायेमाःगु माग यानादीगु खः ।
येँ महानगरपालिकाया मेयर साह थीथी निर्वाचित जुइधुंकाः थीथी कथंया विवादय् वनेगु यानाच्वंगु दु । वंगु छुं न्हिं जक मेयर साहं येँ महानगरपालिकाया निर्णय अःखः थीथी वडाया वडा अध्यक्षतय्त गाडी बीवं विवादय् वःगु खः ।
रवि लामिछाने सांसद पदपाखे निलम्बित
लहनान्युज | थिंलागा अष्टमी ११४५, पुस ८ सोमवाः
राष्ट्रिय स्वतन्त्र पार्टी (रास्वपा) या सभापति रवि लामिछाने सांसद पदं निलम्बित याःगु दु। संघीय संसद् सचिवालयं छगु सूचं जारीयासे लामिछाने पदपाखे निलम्बित जूगु दु धका जानकारी ब्यूगु दु।
‘...सम्पत्ति शुद्धिकरण (मनी लाउन्डरिङ) निवारण एने, २०६४ या दफा २७ कथं कुनातंगु इलय् व वयात दफा २२ बमोजिम मुद्दा दायर जूगुलि उगु मुद्दा क्वमचातले अज्याम्ह कर्मचारी, पदाधिकारी वा राष्ट्रसेवक स्वतः निलम्बन जुगु माने यायेगु व्यवस्था दुगुलि उगु कानुनी व्यवस्थाया प्रयोजनया निति थुगु सूचं प्रकाशित यानागु दु,’ संसद् सचिवालयं जारी याःगु सूचखय् धयातःगु दु।
लामिछाने चितवन क्षेत्र नम्बर २ पाखे निर्वाचित सांसद खः।
न्याम्ह राजदूतयात शपथ
लहनान्युज | थिंलागा अष्टमी ११४५, पुस ८ सोमवाः
राष्ट्रपति रामचन्द्र पौडेलं थौं थी थी देय्या निंतिं न्हुगु नियुक्त जूपि राजदूत तय्त पद व गोपनीयताया शपथ याकादीगु दु।
राष्ट्रपति ज्याकुथिइ ग्वसाः ग्वगु छगू ज्याझ्वः दथुइ रुसी महाङ्घया निंतिं नवनियुक्त राजदूत जङ्गबहादुर चौहान, संयुक्त अधिराज्यया राजदूत चन्द्रकुमार घिमिरे, स्पेनया राजदूत शनिल नेपाल, गणतन्त्र कोरियाया राजदूत डा शिवमाया तुम्बाहाङ्फे व गणतन्त्र भारतया राजदूत डा शङ्करप्रसाद शर्मां राष्ट्रपतिया न्ह्यःने पद व गोपनीयताया शपथ ग्रहण यानादीगु राष्ट्रपति ज्याकुथिं धाःगु दु।
उगु ज्याझ्वलय् नेपाः सरकारया उच्च पदस्थ अधिकारी तय्गु नं उपस्थिति दुगु खः।
न्हय्म्ह प्रहरी अधिकृतपिंत दर्ज्यानी चिं
लहनान्युज | थिंलागा अष्टमी ११४५, पुस ८ सोमवाः
मन्त्रिपरिषदं थ्व हे पुस ५ गते क्वःछ्यूगु कथं प्रहरी नायब महानिरीक्षकपाखें प्रहरी अतिरिक्त महानिरीक्षक पदय् निम्ह व गृहसचिवस्तरय् उकुन्हु हे क्वःछ्यूगुलिइ प्राविधिक प्रहरी नायब उपरीक्षकपाखें प्राविधिक प्रहरी उपरीक्षक पदय् न्याम्ह यानाः पदोन्नति जूपिं न्हय्म्ह प्रहरी अधिकृततय्त दज्र्यानि चिंपाखे लःल्हागु दु।
प्रहरी महानिरीक्षक वसन्तबहादुर कुँवरं प्रहरी मू ज्याकुथिइ आइतबाः ग्वसाः ग्वःगु समारोहय् वय्कःपिंत दर्ज्यानी चिंपाखें छाय्प्यूगु केन्द्रीय प्रहरी बुखँकक्षं धाःगु दु।
दर्ज्यानी चिंबियाः छाय्पाःपिं प्रहरी नायब महानिरीक्षकपाखें प्रहरी अतिरिक्त महानिरीक्षक पदय् पदोन्नति जुयादीपिं प्रहरी अतिरिक्त महानिरीक्षकत दुर्गा सिंह व भरतबहादुर बोहरा नापं प्राविधिक प्रहरी नायब उपरीक्षकपाखें प्राविधिक प्रहरी उपरीक्षक पदय् पदोन्नति जुयादीपिं प्राविधिक प्रहरी उपरीक्षकत डा.राम प्रसाद शर्मा, डा.नविन लागेजु, डा.समृद्धि कार्की, डा.अन्जली तण्डुकार व प्रदिन ताम्राकार खः।(रासस)
