लैङ्गिक व यौनिक अल्पसंख्यक समुदायपिन्स बिस्क कथं हन साया  जात्रा।थौ मंगलवाः न्हिनय् ठमेलस्थित सञ्चय कोष भवन न्ह्यने मुना तेस्रोलिंगी, अन्तरलिंगी, समलिंगी समुदायया मनू तय्स गौरव दिवस (प्राइड डे) या कथं साया जात्रा हंगु दु।

उमिस सांस्कृतिक लँ व बाजं थाना हने ज्या याःगु खः। यौनिक लिसे लैङ्गिक अल्पसंख्यक समुदायया मनू तय्स हंगु जात्रा स्वयेगु निति पर्यटक वःगु दु। ब्बनि कापि स्वसः स्वया अप्पो मनूत स्वनिगः पिने वःगु दु धका व्लु डाइमण्ड सोसाइटीं धाःगु दु।

साया स्वयेगु निति महिला, बालबालिका लिसे जेष्ठ नागरिक मन्त्री नवलकिशोर साह सुडीलगायत नर्वेजियन व अमेरिकी प्रतिनिधिपिनिगु न ब्बति दुगु खः।

महाकाली प्याखँ मध्यपुरथिमि नगरपालिका–७ नगदेशय् मौलिक महाकाली प्याखँ न्यादँलिपा न्ह्यायेत्यःगु दु।

थीथी १६ म्ह द्यःपिनिगु ख्वापा व लं पुना तान्त्रिक विधि पूरायाना महाकाली प्याखँ कन्ह्यनिसे न्ह्याइगु जुगु दु। मुहाली पुया, नायखिँ, धाँ बाजा, तः, मृदङ, भुस्याय्, छुस्याय् बाजं थाना प्याखँ हुलेगु याइ।

उगु प्याखँनय् महाकाली, महादेवी, महालक्ष्मी, देवी, वेताः प्यम्ह, भूत भैरव निम्ह, कवः निम्ह, ख्याः निम्ह, माकः निम्ह, सिंह छम्ह याना झींखुम्ह द्यःपि प्याखँ हुलेगु याइ।

थुगु प्याखँ न्हिं प्यघौ नगदेशया थीथी थासय् प्याखँ हुलेगु याइ।

ख्वपय् च्यान्हु चाः नाप गुन्हु तक हनिइगु साया जात्रा थौनिसे न्ह्यागु दु। सोमवाः बहनि निसे तौमढीस्थित भैरव द्यःया थाय् गुठी कार्यालयय् घिन्ताङघिसी प्याखँ पिकागु खः।

सोमवाः तलेजुइ पूजायाना बहनि तलेजुपाखे सा पिकया जात्रा न्ह्याकूगु धका तलेजुया मूल नाइके नरेन्द्रप्रसाद जोशीं जानकारी बिउगु दु। ‘घिनिताङ घिनिता घिन्ताङघिसी त्वाङ्ग’ धका सांस्कृतिक म्ये हाला ख्वपय् तःजिगु प्याखं कथ कयातःगु जात्रा खः।

जात्राया आकर्षण कथं घिन्ताङघिसी प्याखँ नाप हनुमान प्याखँ, जङ्गल प्याखँ व माक प्याखँ त्वाः त्वालय् पिकायेगु याइ। थीथी थासं पिकागु जात्रा लाय्कूलि, बालाखु गणेश, चोछेँ, भोलाछेँ, महालक्ष्मी, नागपोखरी, क्वाठण्डौँ, नवदुर्गास्थान, सूर्यमढी, दत्तात्रय, सुकुलढोका, गोलमढी, तौमढी, पोटरीस्क्वायर, वंशगोपाल, इताछेँ, खौमाय् चाय् हिलेगु याइ।

विश्व फोटोग्राफी दिवसया लसताय् यलय् लाय्कूलि फोटो प्रदर्शनी याःगु दु। १८५ गु विश्व फोटोग्राफी दिवसया लसताय् राष्ट्रिय फोटो पत्रकार समूह नेपाल (एनएफपिजे) न यलया लाय्कलि फोटो प्रदर्शनी ज्याझ्वः जुगु दु।

‘जब हिमाल मुस्कुराउँछ’ नारा ज्वना याःगु फोटो प्रदर्शनीइ नेपाःया फोटो पत्रकार तयेस थीथी इलय् कयातःगु हिमशृङ्खलाया ५० पा स्वया अप्पो किपा ब्बज्या जूगु खः।

प्रदर्शनीया उलेज्या यलया प्रमुख जिल्ला अधिकारी तुलसीबहादुर श्रेष्ठं थज्यागु किपा ब्बज्या फोटोग्राफर तयेगु क्षमता अझ अप्पो जुइ धका धयादीगु खः। दँय् दँसं अगस्त १९ तारिखय् विश्व फोटोग्राफी दिवसया कथं हलियक फोटोग्राफ तयेस हना वयाच्वंगु खः।

नेपालय् सन् १९९७ य् राष्ट्रिय फोटो पत्रकार समूहया स्थापना जुइ धुका विश्व फोटोग्राफी दिवस हनिइगु याःगु खः।

भारत भ्रमणय् वना च्वम्ह परराष्ट्रमन्त्री आरजु देउवा राणां भारतीय प्रधानमन्त्री नरेन्द्र मोदीयात नापालागु दु।

नापलायेगु झ्वलय् परराष्ट्रमन्त्री देउवां प्रधानमन्त्री केपी शर्मा ओली न मोदीयात नेपाल भ्रमणय् वयेत ब्बना पां लःल्हानादीगु खः। नापलायेगु झ्वलय् निगु देय् दथुइ थीथी पक्षय् नेपाः व भारत सहकार्य अझ बालाक्क यकेगु विषय सहलह जूगु दु धका धाःगु दु।

उगु ज्याझ्वलय् भारतीय विदेशमन्त्री एस जयंशकर, सुरक्षा सल्लाहकार अजित डोभल लगायत पिनिगु न ब्बति दुगु खः।